Yesuusa Kaalliyaageeta Oottiyo Oosuwan Ufaytta
“Hegaa gishshau, intte biidi, . . . tana kaalliyaageeta oottite.”—MAATIYOOSA 28:19.
1-3. (a) Geeshsha Maxaafaa xannaꞌiya asa demmiyo wode darotuyyo aybi siyettii? (b) Woygiya oyshata beꞌanee?
AMARKKAA biittan Hinddi giyo qaalaa haasayiya citan haggaaziya issi michiyaa, “aadhida 11 saaminttau Pakisttaaneppe yiida issi keettaa asaa Geeshsha Maxaafaa xannaꞌissaydda takkaas” yaagada xaafaasu. Gujjadakka, “nuuni laggetettaa medhidoogee qoncce. Ha keettaa asay mata wode simmidi Pakisttaane biyoogaa qoppiyo wode tau ayfiyan afuttay yooliyoolees. Tau hegaadan siyettiyoy eta laggetettay attiyoogan azzaniyo gishsha xallaassa gidennan, eta Yihoowabaa tamaarissiyoogan demmido ufayssaakka qoppiyo gishshassa” yaagaasu.
2 Ha micheegaadan neenikka issi ura Geeshsha Maxaafaa xannaꞌissiyoogan beettiya ufayssaa demma eray? Yesuusinne koyro xeetu layttan a kaallidaageeti, erissiyo ashkkara oottiyo oosuwan keehippe ufayttidosona. Yesuusi loohissido 70u erissiyo ashkkarati haggaazuwan demmidoban ufayttidoogaa yootido wode, Yesuusikka ‘geeshsha ayyaanan ufayttiis.’ (Luqaasa 10:17-21) Hegaadankka, ha wodiyan daroti erissiyo ashkkara oottiyoogan keehi ufayttoosona. Ufayssan minnidi oottiya aassiyaageeti, 2007n aginan aginan amakaayiyan 6 miiloonenne 5 xeetu shaꞌu asaa Geeshsha Maxaafaa xannaꞌissidosona!
3 Gidikkokka, aassiyaageetuppe issoti issoti hanno gakkanau Geeshsha Maxaafaa xinaate demmibookkona. Harati mata wodeppe doommidi xinaate demmennan aggana danddayoosona. Nuuni Geeshsha Maxaafaa xinaatiyaa demmanau baaxetiyo wode ayba paaceti gakkana danddayiyoonaa? He paaceta waatidi xoonana danddayiyoo? “Biidi, . . . tana kaalliyaageeta oottite” yaagiya Yesuusa azazuwaa azazettanau nuuyyo danddayettiyaabaa ubbaa oottiyo wode ay anjjo demmiyoo?—Maatiyoosa 28:19.
Nuuni Ufayttennaadan Oottana Danddayiya Paaceta
4, 5. (a) Alamiyan issi issi heeran daro asay ayba zaaruwaa immii? (b) Hara heeran aassiyaageeta ayba paacee gakkii?
4 Alamiyan issi issi heeran, asay nu xuufiyaa wudidi ekkeesinne nunaara Geeshsha Maxaafaa xannaꞌanau ufayttees. Awusttiraaliyaappe Zambbiyaa biidi guutta wodiyau haggaazida issi azinaynne machiyaa: “Nuuni siyidobay tuma. Zambbiyaa biittay sibikatiyan daro ayfee beettiyo soho. Ogiyan sabbakiyoogee keehippe ufayssiyaaba! Asay nuukko yiidi haasayissees; ubba issoti issoti koyiyo maxeetee awugaakko oychoosona” yaagidi xaafidosona. Mata wode issi laytti, Zambbiyan deꞌiya ishatinne michoti 200,000ppe dariya asaa Geeshsha Maxaafaa xannaꞌissidosona—hegee issi aassiyaagaassi amakaayiyan issuwaappe dariya xinaatee deꞌees giyoogaa.
5 Gidikkokka, hara heeran aassiyaageeti xuufiyaa asau immanaunne Geeshsha Maxaafaa xannaꞌissiyo asa demmanau metootana danddayoosona. Aybissi? Aassiyaageeti sooppe soo biyo wode asay darotoo son deꞌenna; son deꞌiyaageetikka haymaanootebaa siyanau koyennaageeta gidana danddayoosona. Eti diccidoy haymaanoote kaallenna keettaana gidana danddayees; woykko worddo haymaanootiyaa kaalliyaageetu hanotaa, giishin eti loꞌꞌo milatiya iitata gidiyoogaa ixxiyaageeta gidana danddayoosona. Daro asati worddo henttanchati qohidoogeeta gidana danddayoosona. (Maatiyoosa 9:36) Hegaa mala asati Geeshsha Maxaafaabaa tobbanau siranaagee qoncce.
6. Issi issi aassiyaageetuyyo deꞌiya pacay ayba gidana danddayii?
6 Issi issi ammanettida aassiyaageeta ufayttennaadan oottana danddayiya hara paacee gakkees. Eti issi wode erissiyo ashkkara oottiyoogan keehi mino gidikkokka, haꞌꞌi payyatettaa pacaappe woykko ceegatettaappe denddidaagan wolqqaa xayidosona. Nuuni nu bolli ehaana danddayiyo abbe xayssiya issi issibatakka qoppa. Leemisuwau, Geeshsha Maxaafaa xinaatiyaa xannaꞌissanau giday baynnabadan neeyyo siyettii? Paaroona haasayissanaadan Yihooway kiittido wode Muusessi siyettidaagaadan neessi siyettana danddayees. Muusee: “Abeet Godau, taani hagaappe kasekka, woikko neeni ne ashkkaraayyo haasayidoosappe simminkka taani biddaa danddayikke” yaagiis. (Kessaabaa 4:10) Tau gidi baawa giyoogaara gayttida harabay, erissiyo ashkkara oottiyoogan murutikke yaagiyoogaa. Nuuni loꞌꞌo asttamaare gidenna gishshau, issi ura erissiyo ashkkara oottana danddayokko giidi hirggana danddayoos. He hirggaappe denddidaagan Geeshsha Maxaafaa xannaꞌissokko gaana danddayoos. Ha paaceta waatidi xoonana danddayiyoo?
Ne Wozanaa Giigissa
7. Yesuusa a oosuwau denttettiday aybee?
7 Koyro tanggoy nu wozanaa giigissiyoogaa. Yesuusi: “Asa dooni a wozanan kumidabaappe haasayees” yaagiis. (Luqaasa 6:45) Yesuusa a oosuwau denttettiday haratu goꞌꞌau wozanappe qoppiyoogaa. Leemisuwau, i Ayhudati ayyaanaaban qohettidaageeta beꞌido wode etau “qarettiis.” Ba erissiyo ashkkaratuyyo: “Kattai daro; . . . simmi kattaa Godai kattaa cakkanau oosanchcha yeddana mala, a woossite” yaagiis.—Maatiyoosa 9:36-38.
8. (a) Nuuni aybaa qoppiyoogee loꞌꞌoo? (b) Geeshsha Maxaafaa xannaꞌiya issinna giidobaappe ay tamaarana danddayiyoo?
8 Erissiyo ashkkara oottiyo wode, issi uri wodiyaa immidi nuna Geeshsha Maxaafaa xannaꞌissidoogan ay keena goꞌettidaakko wozanappe qoppiyoogee loꞌꞌo. Nuuni haggaazuwan demmiyo asatubaa, qassi nuuni yootiyo kiitaa ezggidi eti ay keena goꞌꞌettanaakkokka qoppa. Issi maccaasiyaa ba deꞌiyo biittan deꞌiya Yihoowa Markkatu macara biiruwau kaallidi deꞌiyaagaadan xaafaasu: “Ta soo yiidi tana xannaꞌissiya Yihoowa Markkata keehippe galatiyoogaa yootana koyays. Taani daro oyshaa oychiyoogan eta ubbatoo gamꞌꞌettiyo gishshau, taban eti issi issitoo salettanaagaa erays. SHin eti danddayancha; qassi wozanappe koyidi bantta tamaaridobaa tana tamaarissoosona. Taani ha asatuura gayttidoogan Yihoowanne Yesuusa galatays.”
9. Yesuusi aybi bolli xeelaa wottidee? Nuuni waatidi a leemisuwaa kaallana danddayiyoo?
9 Yesuusi tamaarissidobaa ekkiday ubba asaa gidennaagee qoncce. (Maatiyoosa 23:37) Issi issi asati guutta wodiyau a kaallidosona shin, a timirttiyaa dosibeenna gishshau, “naa77antto a kaallibookkona.” (Yohaannisa 6:66) Gidikkokka, issoti issoti koshshaa bessibeenna gishshau, Yesuusi ba kiitau goꞌꞌi baynnabadan qoppibeenna. I zerido zerettaappe daro baggay ayfibeennaba gidikkonne, Yesuusi ba oosuwaa goꞌꞌaa bolli ba xeelaa wottiis. I kattay cahaa bessidoogaa akeekiis; qassi he cahan maaddiyoogan keehippe ufayttiis. (Yohaannisa 4:35, 36 nabbaba.) Kattaa giddon deꞌiya mela sohuwaa xallaa xeelliyoogaappe, Yesuusaagaadan nu moottan demmana cahaa bolli xeelaa wottiyoo? Waanidi hegaa mala loꞌꞌo xeelaa oyqqidi deꞌana danddayiyaakko ane pilggoos.
Cakkanau Halchada Zera
10, 11. Ne ufayssaa naagada deꞌanau ay oottana danddayay?
10 Goshshanchay cakkanau halchidi kattaa zerees. Hegaadan, nuunikka Geeshsha Maxaafaa xinaatiyaa doomissanau halchidi sabbakana koshshees. Gidikkokka, neeni haggaazuwan ubbatoo shaahettaydda daro asaa son demmennaba woykko zaarettada oychiyoogeeta demmana danddayennaba milatikko shin? Hegee hidootaa qanxxissana danddayees. Yaatin haggaazuwau sooppe soo biyoogaa aggaaguutee? Aggennaagee qoncce! Daro wodiyau goꞌettido ha muruta hiillan haꞌꞌikka daro asau sabbakiiddi deꞌoos.
11 Gidikkokka, ne ufayssaa naagada deꞌanau asaa demmana danddayiyo hara ogeta gujjada sabbakiyo hiillaa aassana danddayay? Leemisuwau, ogiyan woykko eta ooso sohuwan asaayyo markkattanau mala eray? Silkkiyan asau sabbakana danddayay; woykko neeni Kawotettaa kiitaa yootido asaa haasayissanau eta silkke quxuriyaa ekkana danddayay? Aggennaaninne hanotaadan laammada sabbakiyoogan, Kawotettaa kiitau loꞌꞌo zaaruwaa immiya asaa demmada ufayttana danddayaasa.
Asay SHeneho Giyo Hanotaa Danddayiyoogaa
12. Nu moottan deꞌiya daro asay sheneho giyaaba milatikko waatana danddayiyoo?
12 Ne moottan deꞌiya daro asay haymaanootiyaabaa sheneho giyaagaa gidikko shin? Eta koshshaa denttettiya ogiyan eta haasayissana danddayay? PHauloosi Qoronttoosan deꞌiya ammaniyaageetussi: ‘Taani Ayhudatussi etaara eta gidada deꞌaas. Ta huuphen higgiyaappe garssaara deꞌikke. SHin higgiyaappe garssaara deꞌiyaageetussi higgiyaappe garssaara deꞌiya asa mala gidaas’ yaagidi xaafiis. PHauloosa denttettidabay aybee? I: “Taani ai ogiyaaninne amarida asata ashshanau, ubba asatuura ubbaban eta mala gidaas” yaagiis. (1 Qoronttoosa 9:20-22) Nuunikka hegaadan, nu moottan deꞌiya asaa koshshaa denttettiya qofaa demmana danddayiyoo? Haymaanoote kaallennaba gidikkokka, daro asati bantta soo asaa gaytotettaa minttanau koyoosona. Qassi eti deꞌuwaa halchuwaa eranau koyana danddayoosona. Hegaa mala asatussi eta ufayssiya ogiyan Kawotettaa kiitaa yootana danddayiyoo?
13, 14. Erissiyo ashkkara oottiyo oosuwan demmiyo ufayssaa gujjanau ay oottana danddayiyoo?
13 Daro asay sheneho giyaaba milatiyo heerankka, aassiyaageetuppe daroti erissiyo ashkkara oottiyo oosuwan demmiyo ufayssay gujjiiddi deꞌees. Waanidi? Hara biittaa qaalaa tamaariyoogaana. Layttay 60ppe bolla gidido issi azinaynne machiyaa, CHaynaappe yiida, shaꞌan qoodettiya tamaaretinne eta soo asay bantta gubaaꞌiyaa moottan deꞌiyoogaa akeekidosona. Azinay, “hegee nuuni CHayna qaalaa tamaaranaadan denttettiis” yaagiis. Gujjidikka, “gallassi gallassi he qaalaa xannaꞌanau wodiyaa koshshikkokka, hegee nu heeran deꞌiya CHayna biittaa asatuppe darota Geeshsha Maxaafaa xannaꞌissanaadan maaddiis” yaagiis.
14 Neeni hara biittaa qaalaa tamaaranau danddayennaba gidikkokka, hara qaalaa haasayiya asaa demmiyo wode, Ubba Deriyaa Asau Yootiyo Mishraachuwaa yaagiya bukleetiyaa loytta goꞌettana danddayaasa. Neeni demmiyo asay haasayiyo qaalan giigida xuufiyaakka ubbatoo demmana danddayaasa. Neegaappe dumma qaalaynne wogay deꞌiyo asaa haasayissanau baaxiyaanne wodiyaa koshshiyoogee tuma. Gidikkokka, “Daro zerettaa zeriya urai qassi daro kattaa cakkana” yaagiya, Xoossaa Qaalan deꞌiya baaso siraataa akeeka.—2 Qoronttoosa 9:6.
Gubaaꞌiyan Deꞌiya Ubbaa Gujjees
15, 16. (a) Erissiyo ashkkara oottiyoogee gubaaꞌiyan deꞌiya ubbaa ooso gididoy aybissee? (b) Cimidaageetuyyo he oosuwan ayba sohoy deꞌii?
15 Gidikkokka, erissiyo ashkkara oottiyoogee issi ura xallay oottiyooba gidenna. Hegaappe, gubaaꞌiyan deꞌiya ubbay oottiyooba. Aybissi? Yesuusi: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Qassi Geeshsha Maxaafaa xannaꞌiyaageeti shiiquwan beettiyo wode, eti yan beꞌiyo siiquwan darotoo omoodettiyoogee tuma. Geeshsha Maxaafaa xannaꞌiya issinna: “SHiiquwan beettiyoogee tana keehippe ufayssees. Asay tana ufayssan mokki ekkees!” yaagada xaafaasu. Yesuusi bana kaalliyaageeta eta soo asay ixxana danddayiyoogaa yootiis. (Maatiyoosa 10:35-37 nabbaba.) Gidikkokka, eti gubaaꞌiyan ayyaanaaban daro “ishantta, michchentta, aayeta, naata” demmanaagaa qaalaa geliis.—Marqqoosa 10:30.
16 Cima ishatinne michoti, Geeshsha Maxaafaa xannaꞌiyaageeti dichaa bessanaadan keehippe maaddoosona. Ayba ogiyan? Issi issi cimidaageeti Geeshsha Maxaafaa xinaatiyaa xannaꞌissana danddayennaba gidikkokka, gubaaꞌiyaa shiiqotun eti immiyo minttettiya qofay siyiya ubbaa ammanuwaa minttees. Eti “xillo de7uwaa” ogiyan simerettido hanotay, gubaaꞌiyau puulaa gujjees; qassi suure wozanay deꞌiyoogeeti Xoossaa dirijjitiyaakko yaanaadan oottees.—Leemiso 16:31.
Yashshaa Xooniyoogaa
17. Giday baynnabadan siyettiya qofaa waatidi xoonana danddayiyoo?
17 Geeshsha Maxaafaa xannaꞌissanau neeyyo giday baynnabadan siyettikko ay oottana danddayay? Yihooway Muusessi geeshsha ayyaanaanne aara oottanaadan a ishaa Aaroona immidi, a maaddidoogaa hassaya. (Kessaabaa 4:10-17) Mishiraachuwaa sabbakiyo oosuwan geeshsha ayyaanay nuna maaddanaagaa Yesuusi qaalaa geliis. (Oosuwaa 1:8) Hegaa bollikka, Yesuusi naaꞌꞌa naaꞌꞌa oottidi sabbakanaadan kiittiis. (Luqaasa 10:1) Yaatiyo gishshau, Geeshsha Maxaafaa xannaꞌissiyoogee neeyyo deexxiyaaba gidikko, Xoossay ba ayyaanan aadhida eratettaa immanaadan woossa; yaatada nena minttettanaadaaninne maaddanaadan temokroy deꞌiyo uraara sabbaka. Yihooway ha wolqqaama oosuwaa ootissanau, coo asata giishin, “sa7an de7iya laafata” goꞌettanau dooridoogaa akeekiyoogee ammanuwaa minttiyaaba.—1 Qoronttoosa 1:26-29.
18. Issi ura Geeshsha Maxaafaa xannaꞌissada maaddana danddayikke giyo yashshaa waati xoonana danddayiyoo?
18 Issi ura Geeshsha Maxaafaa xannaꞌissada maaddana danddayikke yaagiyo yashshaa waatidi xoonana danddayiyoo? Erissiyo ashkkara oottiyo oosoy quma kato mala gidennaagaa akeekiyoogee loꞌꞌo; qumi maliꞌꞌiyoy woy aggiyoy he kattiya ura hanotaana. Hegaappe dumma hanotan, erissiyo ashkkara oottiyoogee nu baaxiyaappe aadhiyaabaa gujjees. Issi uri baakko yaanaadan oottiyoogan he oosuwan gita sohoy deꞌiyoy Yihoowa. (Yohaannisa 6:44) Nuuninne gubaaꞌiyan deꞌiya harati he tamaaree dichaa bessanaadan maaddanau nuuyyo danddayettida ubban tamaarissiyo hiillaa goꞌettoos. (2 Ximootiyoosa 2:15 nabbaba.) Tamaareekka ba tamaariyoobaa oosuwan peeshshana koshshees. (Maatiyoosa 7:24-27) Issi uri Geeshsha Maxaafaa xinaatiyaa aggiyo wode, nuuni azzanana danddayoos. Geeshsha Maxaafaa xinaateti loꞌꞌo dooruwaa dooranaagaa hidootoos; shin issi uri ba huuphe babaa “Xoossau yootana.”—Roome 14:12.
Demmiyo Woytoy Aybee?
19-21. (a) Geeshsha Maxaafaa xannaꞌissiyoogan ayba goꞌꞌaa demmiyoo? (b) Sabbakiyo oosuwaa oottiya ubbata Yihooway waati xeellii?
19 Geeshsha Maxaafaa xannaꞌissiyoogee Kawotettaa kaseyiyoogan nu xeelaa wottanaadan oottees. Hegee Xoossaa Qaalaa tumaa ciimma qofay nu wozanaaninne nu guuggiyan deꞌanaadankka oottees. Hegaadan haniyoy aybissee? Baaraaka giyo issi aqinyee: “Geeshsha Maxaafaa xannaꞌissiyoogee issi uri Xoossaa Qaalaa loytti tamaaranaadan oottees. Hara ura loytta tamaarissanaayyo kasetada ta ammanuwaa minttana koshshiyoogaa eraas” yaagidi qonccissiis.
20 Neeni Geeshsha Maxaafaa xannaꞌissaydda deꞌennaba gidikko, Xoossaa sinttan ne haggaazuwau waagi baawa giyoogee? Gidennaagee qoncce! Yihooway nuuni a sabbanau oottiyo baaxiyaa keehippe nashshees. Sabbakiyo oosuwaa oottiya ubbati Xoossaara “issippe oottiya a oosanchchata.” Hara baggaara, Xoossay nuuni zerido zerettay diccanaadan oottiyoogaa beꞌiyoogee, Geeshsha Maxaafaa xannaꞌissiyoogan demmiyo ufayssay gujjanaadan oottees. (1 Qoronttoosa 3:6, 9) Eemii giyo issi aqinyiyaa, “Issi Geeshsha Maxaafaa xinaatee dichaa bessiyoogaa neeni beꞌiyo wode, he urau maalaalissiya imotaa, giishin Yihoowa eriyoonne merinaa deꞌuwaa demmiyo injjiyaa medhanau nena goꞌettido gishshau Yihoowa keehippe galataasa” yaagaasu.
21 Geeshsha Maxaafaa xinaatiyaa doomissanaunne xannaꞌissanau nuuyyo danddayettida ubbaa oottiyoogee, ha wodiyan Xoossau haggaaziyoogan nu xeelaa wottanaadaan ootteesinne sinttappe ooratta alamiyan demmiyo deꞌuwau nu hidootaa minttees. Yihoowa maaduwan, nuuni yootiyoobaa ezggiyaageeti atotettaa demmanaadan maaddanaukka danddayoos. (1 Ximootiyoosa 4:16 nabbaba.) Hegee ayba ufayssiyaaba gidanee!
Hassayay?
• Issoti issoti Geeshsha Maxaafaa xannaꞌissennaadan diggana danddayiya paaceti awugeetee?
• Nu moottan deꞌiya daroti sheneho giyaageeta gidikko ay oottana danddayiyoo?
• Geeshsha Maxaafaa xannaꞌissiyoogan ayba woytuwaa demmiyoo?
[Sinttaa 15n deꞌiya misiliyaa]
Loꞌꞌo wozana koshshay deꞌiyoogeeta demmanau ne haggaazuwaa hiillaa aassay?