Xoossaakko SHiiqa

‘Ta Asay Tuggatiyo Tuggaa Geeshshada Beꞌaas’

Kessaabaa 3:1-10

“Geeshshai, geeshshai, geeshshai Ubbaappe Wolqqaama GODAATTENNEE!” (Isiyaasa 6:3) Geeshsha ayyaanaa kaaletuwan xaafettida ha qaalay, Xoossaa Yihooway geeshshanne aybippenne keehi xillo gidiyoogaa qonccissees. ‘A geeshshatettay i asau qoppennaadan woykko asakko shiiqennaadan oottii? Hegaa mala geeshsha Xoossay nagarancha asa gidida taassi tumuppe qoppii?’ gaada oychana danddayaasa. Kessaabaa 3:1-10n deꞌiya, Xoossay Muuseyyo yootido minttettiya qaalaa ane pilggoos.

Issi gallassi Muusee dorssaa heemmiiddi, issi keehippe ooratta gididabaa beꞌiis; buuray xuugettikkokka, tamay buuraa “meennaagaa” beꞌiis. (Paydo 2) Hegaa gaasuwaa eranau koyido gishshau, i yaa shiiqidi loytti xeelliis. Yihooway issi kiitanchaa baggaara, tamaa giddoppe Muusa hagaadan yaagiis: “Haa shiiqoppa; neeni eqqido biittai geeshsha gidiyo gishshau, ne tohuwan de7⁠iya caammaa kessa.” (Paydo 5) Buuray xuugettiyoogee Xoossay beettidoogaa kalꞌꞌatiyo gishshau, he biittaykka geeshsha gididoogaa hassaya!

Geeshsha Xoossay Muusekko shiiqidi a haasayissido gaasoy deꞌees. Xoossay: “Taani Gibxxe biittan ta asai tuggatiyo tuggaa geeshsha be7ada, eti bantta kaabbotuppe waassiyo waasuwaa siyada, taani eta waayiyaa qoppaas” yaagiis. (Paydo 7) Xoossay ba asaa bolli gakkiya metuwaa akeekiis; eta woosaakka siyiis. I eta waayiyaa ba waayedan xeelliis. Xoossay: ‘Ta asay tuggatiyo tuggaa geeshsha beꞌaas’ giidoogaa hassaya. ‘Geeshsha beꞌaas’ giya qaalaa xeelliyaagan issi maxaafay: “He qonccissoy issi urassi siyettiyaabaa, siiquwaanne qaretaa malaatees” yaagiis. Yihooway Muusessi haasayido qaalay, Xoossay wozanappe qoppiyaagaa gidiyoogaa malaatees.

Yaatin Xoossay ay oottanee? I coo qarettidi woykko azzanidi aggiigibeenna. Hegee i tangguwaa ekkanaadan denttettiis. I ba asaa Gibxxe asatu kushiyaappe kessanaunne eta “maattainne eessai goggiyo biitta” ehaanau qofaa qachiis. (Paydo 8) Hegaadan oottanau, Yihooway ba “asata, . . . Gibxxeppe kessana mala” Muusa kiittiis. (Paydo 10) Muusee he kiitau ammanettidaagaa gididi, 1513n K.K., Israaꞌeeleta Gibxxeppe kessiis.

Yihooway laamettibeenna. Ha wodiyan au goynniyaageeti metootiyo metuwaa i beꞌiyoogaanne eti maaduwau waassiyo wode i siyiyoogaa ammanettana danddayoosona. Eti tuggatiyo tuggaa i geeshshidi erees. SHin Yihooway baassi wozanappe oottiyaageetuyyo coo qarettidi aggiigenna. Siiqiya Xoossay etau “qoppiyo gishshau,” eta maaddanau koyees.—1 PHeexiroosa 5:7.

Xoossay qarettiyoogee nuuyyo hidootay deꞌanaadan oottees. A maaduwan, nuuni polo gidenna asaa naati amarida ogiyan geeshsha gidanaunne a ufayssanau danddayoos. (1 PHeexiroosa 1:15, 16) Unꞌꞌuwaaninne hidootaa xayiyoogan metootaydda deꞌiya issi maccaasiyaa, Muusee beꞌido xuugettiya buuraabaa yootiya taarikiyaappe minttettuwaa demmaasu. A: “Yihooway biittaa geeshsha oottana danddayikko, taayyookka guutta hidootay deꞌana danddayees. Ha qofay tana keehippe maaddiis” yaagaasu.

Neeni geeshsha Xoossaa, Yihoowabaa gujjada tamaarana koyay? Yihooway “nuuni aibippe merettidaakkonne i erees; nuuni biitta gidiyoogaa i akeekees;” hegaa gishshau, aara mata dabbotaa medhiyoogee danddayettiyaaba.—Mazamure 103:14.