2 Xoossaabaa Tumu Eraa Demma
“Asai nena issi Xoossaa gididaagaa erana . . . mala, hagee merinaa de7o.”—Yohaannisa 17:3.
XUBE GIDIYAABAY AYBEE? Issoti issoti Xoossay baawa goosona. Harati Xoossay ubbasan deꞌiya, zawi baynna wolqqa goosona. I deꞌiyoogaa ammaniyaageetikka, a oonatettaaranne a eeshshaara moggenna timirttiyaa tamaarissoosona.
HE XUBIYAA WAATA XOONANA DANDDAYAY? Xoossaabaa erana danddayiyo issi ogee i medhidobaa beꞌiyoogaa. Kiitettida PHauloosi: “Beettenna [Xoossaa] hanotai hegeekka a merinaa wolqqainne a Xoossatettai issippe Xoossai ha sa7aa medhdhoosappe doommidi, etau qonccidi beettiis; eti hegaa Xoossai medhdhidobaappe be7anau [danddayoosona]” yaagiis. (Roome 1:20) Meretaa akeekan beꞌiyo wode, Medhidaagaa aadhida eratettaanne wolqqaa xeelliyaagan darobaa tamaarana danddayaasa.—Mazamure 104:24; Isiyaasa 40:26.
Gidikkokka, Xoossay ay mala Xoossakko tumu era demmanau, ubba asay Xoossaa Qaalaa, Geeshsha Maxaafaa bari huuphe pilggana bessees. Neeni qoppana bessiyoobaa harati kuuyanaadan paqqadoppa. Hegaadan oottiyoogaappe, Geeshsha Maxaafay: “Xoossai intte qofaa muumeera dummayidi, inttena laammoppe attin, ha sa7aa asaa milatoppite; he wode intte Xoossai koyiyoobi, lo77obi, a ufaissiyaabinne qassi kumettabi aibakko erana” yaagiyo zoriyaa kaalla. (Roome 12:2) Leemisuwau, ane kaallidi Xoossaabaa Geeshsha Maxaafay yootiyoobaa beꞌoos.
Xoossaayyo buzo sunttay deꞌees. Xoossaa buzo sunttay koyro Geeshsha Maxaafaa kumettan shaꞌan qoodettiya sohuwan deꞌees. Daro birshshettati he sunttaa Mazamure 83:18n goꞌettidaageeta gidishin, hagaadan gees: “Neessi sunttay Yihoowa gididoogee, neeni saꞌa ubban Ubbaappe Xoqqiyaagaa gidiyoogaa asay ero.”—NW.
Xoossaa Yihooway asaa naati oottiyooban ufayttanau woy azzananau danddayees. Yihooway Israaꞌeeleta Gibxxe aylletettaappe kessi simmin, eti issi issitoo a loꞌꞌo zoriyaa kaalliyoogaa aggidosona. Eta makkala oosoy i ‘lanccanaadan’ oottiis. Eti oottidoban “Israa7eela Geeshshaa hanqqetissidosona”—Mazamure 78:40, 41.
Yihooway nuussi huuphiyan huuphiyan qoppees. Yesuusi ba erissiyo ashkkaratuyyo hagaadan giis: “Naa77u siine kafoti bakkannan baizettokkonaayye? Intte Aawai gaana xayikko, he siine kafotuppe issinniyaakka sa7an wodhdhukku. SHin harai atto, intte huuphiyan de7iya binnaana ubbaikka qoodan de7ees. Simmi yayyoppite; daro siine kafotuppe intte aadhdheeta.”—Maatiyoosa 10:29-31.
Xoossay issi zariyaa woy wogaa haraappe aattidi xeellenna. Kiitettida PHauloosi Ateena kataman Giriiketuyyo, “Xoossai asa zare ubbaa issi uraappe medhdhidi, biitta ubban wottiis” yaagidi yootiis. I “Xoossai nuuppe ooyyoonne haaho gidenna” yaagidikka qonccissiis. (Oosuwaa 17:26, 27) Kiitettida PHeexiroosi: “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa galatiyoogaa taani tumu akeekaas” yaagiis.—Oosuwaa 10:34, 35.
DEMMANA WOYTOY AYBEE? Issoti issoti ‘Xoossau oottanau keehi koyoosona; shin eti Xoossau oottanau keehi koyiyo koshshay tumu eratettaappe gidenna.’ (Roome 10:1) Tumuppe Geeshsha Maxaafay Xoossaabaa tamaarissiyoobaa eriyaaba gidikko, cimettiyoogaappe naagettaasanne ‘Xoossaakko shiiqana’ danddayaasa—Yaaqooba 4:8.
Gujo qofaa demmanau, Tumuppe Geeshsha Maxaafay Tamaarissiyoy Aybee? giya maxaafan, “Xoossaa Xeelliyaagan Tumay Aybee?” giya shemppo 1 xeella.a
[Tohossa qofata]
a Yihoowa Markkati attamissidoogaa.
[Sinttaa 6n deꞌiya misiliyaa]
Xoossaabaa erana danddayiyo issi ogee i medhidobaa beꞌiyoogaa