4 Siriyoobau Zaaruwaa Demma
“Laa ha ammanoi laafidoogoo! Aissi siradii?”—Maatiyoosa 14:31.
XUBE GIDIYAABAY AYBEE? Yesuusi erissiyo ashkkaratikka issi issitoo siridosona. (Maatiyoosa 14:30; Luqaasa 24:36-39; Yohaannisa 20:24, 25) Geeshsha Maxaafay ammanoy pacciyoogaa “baqqi oiqqiya nagaraa” yaagees. (Ibraawe 12:1) Kiitettida PHauloosi: “Ammanoy ubba asaassi deꞌiyaaba gidenna” yaagidi xaafiis. (2 Tasalonqqe 3:2, NW) Hegee issoti issoti ammanana danddayokkona giyoogaa gidenna. Hegaappe, daroti he ammanoy deꞌanaadan maaddiyaabaa oottokkona giyoogaa. Ammanoy deꞌanaadan baaxetiyaageeta Xoossay anjjees.
HE XUBIYAA WAATA XOONANA DANDDAYAY? Neeni siranaadan gaaso gidiyaabata akeeka. Leemisuwau, hayquwaappe denddida Yesuusa beꞌidoogaa erissiyo ashkkaraa Toomaasassi harati yootidaba gidikkonne, i siriis. Toomaasi ba huuphe beꞌanau koyiis. Hanidabay aybee? Ayyo mino ammanoy deꞌanaadan koshshiyaabaa Yesuusi bessiis.—Yohaannisa 20:24-29.
Nuuni siriyaa xayssanau koshshiya zaaruwaa Xoossaa Yihooway Geeshsha Maxaafaa baggaara immees. Leemisuwau, olau, makkalaunne asaa naata tuggayiya harabau qoncciyan woy qoncce gidenna ogiyan gaasoy Xoossaa giidi qoppiyo gishshau, daroti Xoossan ammaniyoogaa aggidosona. Ha allaalliyaa xeelliyaagan Geeshsha Maxaafay woygii?
Xoossay asaa naatu aysuwaa baggaara haarenna. “Ha sa7aa haariyaagee” ayfiyan beettenna ayyaana meretaa, Seexaanaa gidiyoogaa Yesuusi yootiis. (Yohaannisa 14:30) Seexaanay saꞌaa kawotettaa maata ubbaa Yesuusa bessidi, baayyo issitoo goynniyaaba gidikko, hegaa assi immanaagaa yootiis. I: “Ha wolqqa ubbainne bonchchoi taassi imettido gishshau, taani dosiyo oossinne immana; neessikka immana” yaagiis. Seexaanau he maatay deꞌiyoogaa Yesuusi kashi gibeenna. Ubba i: “Xoossaa maxaafai, ‘Godau, ne Xoossau goinna; a xalaalau ootta’ yaagees” yaagiis. (Luqaasa 4:5-8) Alamiyan deꞌiya tuggau gaasoy Xoossaa gidennan, Seexaanaanne asaa naatu aysuwaa.—Ajjuutaa 12:9, 12.
Xoossaa Yihooway tuggau gaaso gidiya ubbabaa mata wode xayssana. I ba Naꞌꞌaa, Kiristtoos Yesuusi asaa naata haaranaadan, Kawotettaa woy aysuwaa giigissiis. (Maatiyoosa 6:9, 10; 1 Qoronttoosa 15:20-28) Geeshsha Maxaafaa hiraagaa poluwaa maaraadan, he Kawotettaabaa mishiraachoy ha wodiyan saꞌa ubban odettiiddi deꞌees. (Maatiyoosa 24:14) Ha Kawotettay a eqettiya ubbaanne asaa naatu metuwau gaaso gidiya ubbabaa mata wode xayssana.—Daaneela 2:44; Maatiyoosa 25:31-33, 46; Ajjuutaa 21:3, 4.
DEMMANA WOYTOY AYBEE? Siriyaageeti, “cimo hanotan asaa bala ogiyaa kaalettiya gene asaa” timirttiyan yaanne haanne shocettiya beeta mala. (Efisoona 4:14; 2 PHeexiroosa 2:1) Hegaappe dumma hanotan, bantta oyshau aliya zaaruwaa demmiyaageeti ‘ammanuwan minnidi’ eqqana danddayoosona.—1 Qoronttoosa 16:13.
Ha xuufiyaa giigissiya Yihoowa Markkati, nena geella wayssida oyshatuyyo zaaruwaa demmanaadan nena maaddanau koyoosona. Neeni etaara gayttada eti tamaarissiyoobaa ne huuphe pilgganaadan shoobboosona. Neeni hegaadan oottiyoogee, Xoossaa xeelliyaagan neeyyo keehippe mino ammanoy deꞌanaadan oottees.
Gujo qofaa demmanau, Tumuppe Geeshsha Maxaafay Tamaarissiyoy Aybee? giya maxaafan, “Xoossaa Kawotettay Aybee?” giya shemppo 8nne “Xoossay Tuggaa Aybissi Coꞌꞌu Giidi Xeellii?” giya shemppo 11 xeella.a
[Tohossa qofata]
a Yihoowa Markkati attamissidoogaa.
[Sinttaa 9n deꞌiya misiliyaa]
Bantta oyshau aliya zaaruwaa demmiyaageetu ammanuwau mino baasoy deꞌees