So Asaa Ufayssau Qulppiyaa

Panttatettan Deꞌiyaageeta Sintta Wodiyau Giigissiyoogaa

“Ta attuma naatuura kase ufayssiya hanotan haasayoos. Taani giyoobaa akeekan siyidi, sohuwaara zaaruwaa immoosona. SHin eti haꞌꞌi panttatetta wodiyan deꞌiyo gishshau, ubbaban ooyettoos. Ubba nuuni goynuwaara gayttidabaa oottiyoogaakka dosokkona. Eti, ‘nuuni Geeshsha Maxaafaabaa denttidi haasayana koshshii?’ yaagidi oychoosona. Ta naati panttatetta wodiyau gakkanaappe kase, haraatu son hegaa malabaa beꞌiyaaba gidikkokka, ta son hegaa malabi hanana gaada mule qoppa erikke.”—Reji.a

PANTTATETTA wodiyan deꞌiya naꞌa dichiiddi deꞌeetii? Yaatikko, intte naꞌaa dichan keehippe ufayssiya wodiyaa beꞌiiddi deꞌeeta. He wodee keehippe unꞌꞌissiya wode gidanaukka danddayees. Kaallidi deꞌiya hanotati meeze gididaba gidokkonaa?

▪ Haattaa doonan qachido wolwoluwaadan, naatettan intte naꞌay intteppe haakkenna. Wodoroy duuxxin baana haniya wolwoluwaadan, haꞌꞌi panttatettan daro laꞌatettaa koyees.

▪ Intte naꞌiyaa naatettan deꞌiyo wode, intteyyo ubbabaa yootausu. Haꞌꞌi panttatetta wodiyan deꞌiyoogaadan, ba laggetuura ‘issippetettaa’ medhaasu; haꞌꞌi intteyyo aybanne odanau koyennaagaa akeekeeta.

Hegaa mala hanotay intte son merettiyaaba gidikko, intte naꞌi simmana danddayenna hanotan makkaliis giidi kuuyanau eesotoppite. Yaatin haniiddi deꞌiyaabay aybee? Ha oyshaa zaaranau, intte naꞌa dichan panttatetta wodee keehippe koshshiya wode gidiyoogaa ane beꞌoos.

Panttatettay Issi Asa Dichau Koshshiya Wode

Yelettoosappe doommidi, issi naꞌa deꞌuwan koyro hanettiya darobay deꞌees; hegeetuppe amaridaageeti, tangguwaa, haasayaa, timirtte keetta biyoogaa doommiyoogaa. Bantta naꞌay keehippe koshshiya dichaa bessiyo wode yelidaageeti ufayttoosona. He hanotay intte naꞌay dicciiddi deꞌiyoogaa qonccissees.

Yelidaageetuppe issoti issoti he wodiyaa ufayttidi ekkana xayikkonne, panttatetta wodee keehippe koshshiya wode. Aawaynne aayyiyaa eeno giya naꞌaa beꞌanau koyishin, eta naꞌaa eeshshay sohuwaara sohuwaara laamettiyoogee eti hirgganaadan oottiyoogee qoncce. Gidikkokka, panttatetta wodee dichau keehippe koshshiya wode. Ayba ogiyaanee?

Issi wode ‘asi ba aawaanne ba aayyiyo aggi bayanaagaa’ Geeshsha Maxaafay yootees. (Doomettaabaa 2:24) Panttatetta wodiyaa goꞌꞌaappe waannatiyaagee intte naꞌay woy naꞌiyaa sinttanaa wodiyau giigettanaadan maaddiyoogaa. He wode intte naꞌay, kiitettida PHauloosi: “Taani naatettan de7iyo wode, na7adan haasayais. Na7adan qoppais. Qassi na7adankka akeekais. Wodalla gidido wode, naatetta hanuwaa xaissaas” giidoogaadan gaana danddayees.—1 Qoronttoosa 13:11.

Panttatettan deꞌiya intte naꞌay woy naꞌiyaa hegaadan oottoosona—bantta naatetta eeshshaa aggidi, aawatettay siyettiyo, banttanan ammanettiya gastta gididi sooppe kiyanau loohissuwaa demmoosona. Issi xuufee panttatetta wodiyaa so asaappe shaahettanau giigettiyo wode yaagidi qonccissiis.

Intte “guutta” naꞌay woy naꞌiyaa mata wode intteppe shaahettidi deꞌanaagaa qoppiyoogee intte hirgganaadan oottiyoogee tuma. Kaallidi deꞌiyaagaadan oychana danddayeeta:

▪ “Ta naꞌay so giddon guutta aawatettaa polanau danddayennaba gidikko, waatidi bana woy ba keettaa suure oyqqana danddayii?”

▪ “Ta naꞌiyaa soo gelana bessiya saatiyan gelennaaro gidikko, oosuwaa oyqqiyo wode waatada ba aawatettaa polana danddayay?”

Hegaa mala hanotay inttena qofissikko, hagaa hassayite: Bana danddayidi deꞌiyoogee, eti coo geliyo pengge gidenna; hegee i woy a hemettiyo oge gidishin, he ogiyaa wurssanau daro wodiyaa ekkees. “Na7a wozanaa azallatettai baqqi oiqqees” giyaagaa haꞌꞌi intte naꞌay woy naꞌiyaa oottiyoobaappe beꞌeeta.—Leemiso 22:15.

Gidikkokka, loꞌꞌo kaaletuwan, intte naꞌay woy naꞌiyaa bantta “akeekaa abbiyaa goꞌettiyoogan loohissida,” aawatettay siyettiyo gastta asa gidana danddayoosona.—Ibraawe 5:14, NW.

Muruta Gidanau Maaddiya Waannabata

Panttatetta wodiyan deꞌiya intte naꞌay bana danddayiyo wodiyau giigana mala “qoppiyo abbiyaa” dichanaadan intte maaddana koshshees; yaatikko i bar huuphe loꞌꞌo kuushshaa kuuyana danddayees. (Roome 12:1, 2, NW) Kaallidi deꞌiya Geeshsha Maxaafaa baaso siraatay intte hegaadan oottanau maaddees.

Piliphphisiyuusa 4:5: “Asai ubbai intte ashkketettaa [“bessiyaagaadan qoppiyoogaa,” NW] ero.” Panttatettan deꞌiya intte naꞌay soo gelana bessiyo saatee gujettanaadan oychana danddayees. Hegee hanennaagaa sohuwaara yooteeta. Intte naꞌay hanqquwan, “Tana guutta naꞌadan xeelleeta!” yaagees. “Ne oosoy guutta naꞌaagaa mala” gaanaappe kasetidi, kaallidi deꞌiyaagaa qoppite: Panttatettan deꞌiya naati banttau bessiyaagaappe daro laꞌatettaa koyoosona; shin yelidaageeti, naati koyiyoogaappe guutta laꞌatettaa immanau koyiyaaba milatees. Wodiyaappe wodiyan etau laꞌatettaa gujjdi immana danddayeetii? Panttatettan deꞌiya intte naꞌaa sohuwan gididi ayssi qoppekketii?

ANE HAGAADAN OOTTITE: Panttatetta wodiyan deꞌiya intte naꞌau kaseegaappe guutta laꞌatettaa gujjana danddayiyo issi woy naaꞌꞌu ogeta xaafite. Ayyo imettida laꞌatettaa waatidi goꞌettiyaakko beꞌidi, haraa gujjanaagaa qonccissite. I ba laꞌatettaa bessiyaagaadan goꞌettikko, wodeppe laꞌatettaa gujjidi demmana danddayees. I bessiyaagaadan goꞌettana xayikko, imettida laꞌatettiykka digettana.—Maatiyoosa 25:21.

_______y

Qolasiyaasa 3:21: “Aawatoo, intte naati wozanaa bayenna mala, eta yiilloyoppite.” Issi issi yelidaageeti panttatettan deꞌiya bantta naꞌay oottiyo ubbabaa yaata yaatoppa gaanau koyoosona. I kiyiyo geliyoosaa ubbaa eranau a minttidi kaalloosona. Ayyo laggeta dooroosonanne i silkkiyan haasayiyoobaa qosan ezggoosona. SHin hegaadan oottiyoogee koyidoogaadan maaddennan aggana danddayees. Hegaadan naꞌaa minttidi kaalliyoogee naꞌay baqatanau koyanaadan oottana danddayees; ubba wode a laggetu balaa qoriyoogee, kaseegaappe aattidi ba laggeta dosanaadan oottana danddayees; eti haasayiyoobaa qosan siyiyoogee intte beꞌenna ogiyan bantta laggetuura gayttanau hara ogiyaa koyanaadan oottana danddayees. Intte a minttidi kaallido payduwan, wayssiyaagaa gidana danddayees. Panttatettan deꞌiya naꞌay inttenaara son deꞌiiddi ba huuphessi kuuyiyoogaa tamaarana xayikko, intteppe shaahettiyo wode baayyo kuuyiyoogaa waatidi erana danddayii?

ANE HAGAADAN OOTTITE: Panttatettan deꞌiya intte naꞌaara a qofissiyaabaa haasayiyo wode, i dooriyoobay a waatidi bochana danddayiyaakko qoppanaadan maaddite. Leemisuwau, a laggetu balaa qoriyoogaappe: “Higgiyaa kanttidi [ebeloy] qashettiyaaba gidikko, asay nena waatidi xeellana gaada qoppay?” yaagite. Panttatettan deꞌiya intte naꞌay dooriyoobay ayyo loꞌꞌo woy iita sunttay deꞌanaadan oottiyoogaa akeekanaadan maaddite.—Leemiso 11:17, 22; 20:11.

Efisoona 6:4: “Intte intte naata Godaa seeraaninne zoriyan dichchiteppe attin, eta hanqqetissoppite.” ‘Zoriyaa’ giya qaalay tuma gididabaa yootiyoogaappe aadhiyaabaa gujjees. Naꞌay oottiyoobaa ba dosan oottanaadan a wozanaanne a qofaa denttettiyoogaa giyoogaa. Intte naꞌay panttatetta wodiyau gakkiyo wode, hegaadan oottiyoogee keehippe koshshiyaaba. Andire geetettiya issi aaway, “intte naꞌay dicci dicci biyo wode, intte a haasayissiyoonne ayyo qofaa shiishshiyo hanotaa laammana koshshees” yaagiis.—2 Ximootiyoosa 3:14.

ANE HAGAADAN OOTTITE: Issi qofay denddiyo wode, i intte sohuwan gididi, intte a naꞌa gidiyaakko ayba zoriyaa immanaakko oychite.Pilggidi ba qofaa kaafiya woy kaafenna qofaa inttessi qonccissanaadan oottite. Saaminttaa giddon he yohuwan zaarettidi tobbite.

Galaatiyaa 6:7: “Asi ba zeriyoogaa zaarettidi cakkana.” Issi naꞌi qixaatiyan, giishin barkka issi kifiliyan uttanaadan oottiyoogan woykko i dosiyoobaa oottennaadan diggiyoogan tamaarana danddayees. Panttatettan deꞌiya naꞌay oottiyoobay kaalettiyoobaa qoppanaadan oottiyoogee keehi loꞌꞌo.—Leemiso 6:27.

ANE HAGAADAN OOTTITE: A acuwaa qanxxiyoogan woy i kunddido timirttiyau asttamaariyaa haasayissiyoogan a maaddoppite. I oottidobay kaalettiyooban zilꞌꞌettidi daro wodiyau goꞌꞌiyaabaa tamaaranaadan aggibayite.

Yelidaageeta gidiyoogaadan, intte naꞌay panttatettaappe sohuwaara loꞌꞌo ogiyan gastta asa gidanaadan amottana danddayeeta. SHin, darotoo hegaadan hanenna. SHin “na7i waanidi de7ana bessiyaakko tamaarissa” giyaagaadan oottanau intte naꞌaa panttatettay intteyyo loꞌꞌo injjiyaa medhees. (Leemiso 22:6) Geeshsha Maxaafaa baaso siraatay intte soo asaa deꞌoy ufayssiyaagaa gidanaadan oottanau mino baaso.

[Tohossa qofata]

[Sinttaa 12n deꞌiya misiliyaa]

INTTENA HAGAADAN OYCHITE:

Panttatettan deꞌiya ta naꞌay woy naꞌiyaa sooppe kiyiyo wode kaallidi deꞌiyaabata oottana danddayiyoonaa?

▪ ubbatoo oottiyo ayyaanaban meeze gididabata mintti kaalliyoogaa

▪ loꞌꞌo dooruwaa dooriyoogaanne loꞌꞌo kuushshaa kuuyiyoogaa

▪ haraatuura bessiya ogiyan haasayiyoogaa

▪ ba huuphe payyatettaa naagiyoogaa

▪ miishshaa bessiyaagaadan oyqqiyoogaa

▪ ba keettaa geeshshatettaaninne loyttidi oyqqiyoogaa

▪ issibaa ba dosan oottiyoogaa

[Sinttaa 12n deꞌiya misiliyaa]

Panttatettan deꞌiya intte naꞌay woy naꞌiya aawatettay siyettiyo ogiyan simerettiyaaba gidikko, laꞌatettaa gujjidi immana danddayeetii?