Geeshsha Maxaafay Nu Wodiyau Goꞌꞌiyo Gaasuwaa
“Xoossaa maxaafa ubban Xoossaa Ayyaanai de7ees. Qassi he maxaafati . . . de7uwau zoriyaa immanau maaddoosona.”—2 XIMOOTIYOOSA 3:16, 17.
DARO xeetu layttau, Geeshsha Maxaafay daro wogatun deꞌiya asati bantta deꞌo ogiyaa laammidi loꞌꞌo deꞌuwaa deꞌanaadan denttettiis. Qommoora deꞌiya xiqisee Geeshsha Maxaafay hegaadan keehippe goꞌꞌiyaagaa gididoy aybissakko qonccissees; hegeekka Geeshsha Maxaafan deꞌiya aadhida eratettay yiidoy Xoossaappe. Geeshsha Maxaafay xaafettidoy asaana gidikkonne, i nuussi Xoossaa qofaa yootees. Geeshsha Maxaafay: “Asati Geeshsha Ayyaanai kaalettin, Xoossaa qaalaa [haasayidosona]” yaagidi qonccissees.—2 PHeexiroosa 1:21.
Geeshsha Maxaafay baa giishin naaꞌꞌu ogiyan goꞌꞌiya kaaleto gidees. Koyroy, loꞌꞌo deꞌuwaa deꞌanau ay oottana bessiyaakko tuma gidida qofaa immees. Naaꞌꞌanttoy, asay loꞌꞌo deꞌuwaa deꞌanau koshshiya laamiyaa oottanaadan denttettiyo wolqqay au deꞌees. Ha naaꞌꞌu ogeta ane beꞌoos.
Loꞌꞌo Halchuwau Gakkanaadan Maaddiya Timirttiyaa
Geeshsha Maxaafan Xoossay hagaadan qaalaa geliis: “Taani nena erissananne neeni baanau bessiya ogiyaa nena tamaarissana; taani nena zorananne naagana.” (Mazamure 32:8) Nuuni keehippe aadhida erancha gidanaadan maaddiya zoriyaanne timirttiyaa Xoossay immiyoogaa akeeka. Ay halchoy keehippe goꞌꞌiyaakko akeekanau he timirttiyaa demmiyoogee goꞌꞌennabata kaalliyoogan nu wodiyaa wurssenna mala maaddana danddayees.
Leemisuwau, daro asay bantta deꞌuwan hayttatiyoogaa woykko duretiyoogaa halchoosona. Asi barkka bana maaddanaadan giigissiyo maxaafati darotoo haratuppe aadhidi waani hayttatana woykko duretana danddayiyaakko yootoosona. Hara baggaara Geeshsha Maxaafay hagaadan gees: “Ba laggiyaa bollan qanaatiyo [qofay] . . . hada; carkkuwaa oiqqanau yedettiyoogaa mala.” “Bira dosiya uraassi biri gidi erenna.” (Eranchchaa 4:4; 5:10) Hagee ha wodiyan nuuyyo goꞌꞌiya zoree?
Geeshsha Maxaafan deꞌiya zoree ay keena goꞌꞌiyaakko leemisuwan yootanau, Jaappaane biittan deꞌiya Akinoora hanotaa ane beꞌoos. Akinoori erettida yuniverssitiyaappe anjjettanaunne asay xoqqu oottidi xeelliyo ooso keettan qaxarettanau wolqqaama annaaciyan harata xoonidi ba halchuwau gakkiis. Ubbabay i koyidoogaadan hanidaba milatees. SHin i qoppidoogaadan hegee au ufayssaa immibeenna. Ubba unꞌꞌoynne daafuray a payyatettaa qohiis. Aara oottiya laggeti a aynne minttettibookkona. Keehippe unꞌꞌettido gishshau, ushshancha gidiis; ubba bana woranau qoppiis. He wode Yihoowa Markkatuura Geeshsha Maxaafaa xannaꞌiyoogaa doommiis. I tamaaridobay deꞌuwan xoqqu oottidi xeelliyooban, ba xeelaa laammanaadan oottiis. Hegaappe sohuwaara, unꞌꞌuwaa gaasuwan a bolli gakkida payyatettaa pacay deciyoogaa doommiis. Akinoori bana xoqqu oottidi xeelliyoogaappenne erettida asa gidanau koyiyoogaappe Geeshsha Maxaafay: “Woppu giida wozanai bollaa payya wottees” yaagiya leemisoy tuma gidiyoogaa ba deꞌuwan beꞌiis.—Leemiso 14:30.
Deꞌuwan keehippe goꞌꞌiya halchoy ayba gaada qoppay? Neeni tumuppe ufayttanaadan oottiya, halchada gakkiyoobay aybee? Ufayssay deꞌiyo aqo deꞌo oyqqiyoogee? Woy ne naati loꞌꞌo deꞌuwaa doommanaadan oottiyoogee? Daro laggeti deꞌiyoogee? Deꞌuwan ufayssaa demmiyoogee? Hageeti ubbaykka loꞌꞌo halcho. Geeshsha Maxaafay hegaa minttettikkonne, nu deꞌuwan waanna halcho gidanaadaana gidenna. Geeshsha Maxaafay akeekanau goꞌꞌiya zoriyaa: “Xoossaassi yayya; a azazuwaa naaga. Aissi giikko, hegee asassi waanna ooso” yaagidi deꞌuwan ufayssaa immiya waannabaa yootees. (Eranchchaa 12:13) Nuuni ha azazuwaa polanau koyennaba gidikko, deꞌoy halchoy baynnaagaa, salettiyaagaanne keehippe hidootaa qanxxissiyaagaa gidees. Hara baggaara Geeshsha Maxaafay: “GODAN ammanettiya uri anjjettidaagaa” yaagidi nuna minttettees.—Leemiso 16:20.
Geeshsha Maxaafay Asay Laamettanaadan Oottiyo Ogiyaa
Kiitettida PHauloosi: “Xoossaa qaalai paxa de7eesinne oottees” yaagidi xaafiis. Naaꞌꞌu zoozee deꞌiyo qara bisuwaadan, asa wozanan deꞌiya qofaanne koshshaa shaakkana danddayees. (Ibraawe 4:12) Geeshsha Maxaafay asay ba qoppidoogaadan gidennan, tumuppe ba deꞌiyo hanotaa akeekanaadan maaddiyo gishshau, asay deꞌiyo maaraa laammanaadan oottiyo wolqqay au deꞌees. Hegaa gishshau, suure wozanay deꞌiyoogeeti laamiyaa oottana koshshiyoogaa akeekoosona. Leemisuwau, beni Qoronttoosa gubaaꞌiyan issi wode wuuqqiyaageeta, mattottiyaageeta, shaaramuxiyaageetanne hegaa mala harabaa oottiyaageeta xeelliyaagan kiitettida PHauloosi: “Intteppekka issi issi asai hegeetu mala. SHin . . . Xoossaa Ayyaanan intte meecettidetanne geeyideta” yaagiis. (1 Qoronttoosa 6:9-11) Yihoowa geeshsha ayyaanay ha wodiyankka ootteesinne wolqqaama; qassi asay koshshiya laamiyaa oottanaadan denttettana danddayees.
Awurooppan deꞌiya Maariyo geetettiya makkalancha bitanee, maariwaana giyo jallissiya xaliyaa goꞌettiyaanne bayzziya asa. Issi wode, issi polisee a xaliyaa oyqqin, keehippe yiillotidi he polisiyaa shociisinne a kaamiyaakka goꞌꞌennaagaa oottidi mooriis. Hegaa bollankka, Maariyoyyo oosoy baawa; qassi ayyo daro acoy deꞌees. I ba metuwaa barkka giigissanau danddayennaagaa akeekidi, Geeshsha Maxaafaa xannaꞌanau koyiis. Maariyoy dichaa bessidi, ba huuphiyaa suure oyqqiis; jallissiya xaliyaa goꞌettiyoogaanne bayzziyoogaa, qassi makkalancha gidiyoogaa aggiis. A kase eriya daroti a hanotan garamettidosona. Eti aara gayttiyo wode, “Maariyo, hagee tumu nenee?” yaagidi oychoosona.
Akinooranne Maariyo mala asati bantta deꞌuwaa laammanaadaaninne deꞌuwan tumu woppaanne ufayssaa demmanaadan denttettidabay aybee? Geeshsha Maxaafaa xannaꞌiyoogan, Xoossaabaa xeelliyaagan eti demmido ooratta eraa gidiyoogee qoncce. Nuuni ha wodiyan deꞌuwan ufayttanaunne sinttappe merinaa deꞌuwaa demmanau koshshiya, goꞌꞌiya kaaletuwaa immana danddayiyay Xoossaa xalla. Xoossaa Yihooway Aawadan, Geeshsha Maxaafaa baggaara: “Ta na7au, siya; taani giyoogaakka ekka; ne bareekka aduqqana. . . . Neeni hemettiyo wode, ne hemettiyoosan xubbiyaabi de7enna; woxxikkokka xubettakka. Tamaaridoogaa hassaya; timirttee neeyyo de7o gidido gishshau, loitta naaga; yeddoppa” yaagees. (Leemiso 4:10-13) Nuna Medhidaagaa kaaletuwaa kaallanau koyiyoogaappe aaruwan maaddana danddayiya ayba zoree deꞌii?
[Box/Picture on page 7]
Ha Wodiyau Goꞌꞌiya Zoriyaa
Ha wodiyan ubba ogiyan kaaletto gidiya, keehippe goꞌꞌiya baaso siraataa Geeshsha Maxaafay yootees. Amarida leemisoy hagaappe kaallidi deꞌees:
• Haratuura loꞌꞌo gaytotettay deꞌiyoogan
“Hegaa gishshau, hara asi intteyyo oottanau koyiyo ubbabaa inttekka asau oottite.”—Maatiyoosa 7:12.
“Intte ubbaa giddon guuxxiyaagee ubbaappe gitatees.”—Luqaasa 9:48.
“Imattaa mokkite.”—Roome 12:13.
• Iita eeshshaa aggiyoogan
“Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.”—Leemiso 13:20.
“Daro woine eessaa [uyiyaageetuura] . . . zuppetoppa.”—Leemiso 23:20.
“Hanqqettiya uraara laggetoppa.” —Leemiso 22:24.
• Loꞌꞌo aqo deꞌoy deꞌanaadan
“Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”—Efisoona 5:33.
“Maarotettaa, qaretaa, kehatettaa, intte huuphiyaa kaushshiyoogaa, ashkketettaanne danddayaa maayite. Issoi issuwaabaa, danddayite; ooninne ba laggiyaa bolli hanqqettidobai de7ikko, issoi issuwau atto yaago.”—Qolasiyaasa 3:12, 13.
• Naata Maaddiyoogan
“Na7i waanidi de7ana bessiyaakko tamaarissa; yaatikko, i cimidikka hegaa aggenna.”—Leemiso 22:6.
“Aawatoo, intte intte naata Godaa seeraaninne zoriyan dichchiteppe attin, eta hanqqetissoppite.”—Efisoona 6:4.
• Ooshshaappe haakkiyoogan
“Liiqo haasayai hanqquwaa zarbbissees; shin porddolla qaalai hanqquwaa denttettees.”—Leemiso 15:1.
“Issoi issuwaa bonchchiyoogan ufaittite.”—Roome 12:10.
Maayettidobaa xaafi oyqqiyoogee laggetu giddonkka gidin, zalꞌꞌiyaara gayttidaagan darotoo ooshshay denddennaadan oottana danddayees. Hegaa gishshau, Xoossaa ashkkaraa Ermmaasi: “SHamaa paramaa markkati de7iyoosan paramada, maatafaa an wottaas; miishshaakka meezaanan kilada immaas” yaagidi xaafiis.—Ermmaasa 32:10.
• Loꞌꞌo xeelay deꞌanaadan maaddiyoogan
“Tuma gidiyaabaa ubbaa, bonchchissiyaabaa ubbaa, mooro gidennabaa ubbaa, geeshshabaa ubbaa, siiqobaa ubbaa, lo77o haasaya gidiyaabaa ubbaa qoppite.” —Piliphphisiyuusa 4:8.
Geeshsha Maxaafay loꞌꞌo gidenna qofaa qoppiyoogaanne hara asaa boriyoogaa, qassi ‘zuuzummiyoogaanne harata amassaliyoogaa’ minttettenna. I: “Xoossai intteyyo immana giidoogan ufaittite” yaagees. —Yihudaa 4, 16; Roome 12:12.
Ha loꞌꞌo baaso siraatata oosuwan peeshshiyoogee nuuni ha wodiyan sarotettaanne woppatettaa demmana xallaassa gidennan, Xoossay nuuppe koyiyoobata oottiyaageeta gidanaadaaninne a anjjuwaa demmanaadan maaddoosona. Geeshsha Maxaafay: “Xilloti biittaa laattananne yan merinau de7ana” yaagees.—Mazamure 37:29.
[Sinttaa 5n deꞌiya misiliyaa]
Akinooree oosancha gididi deꞌiyo wode, (haddirssa baggan) qassi ha wodiyan ba keettaayeera ufayssan Geeshsha Maxaafaa tumaa yootiyo wode