Geeshsha Maxaafaa Xannaꞌanau Prograamiyaa Kessadii?

BOLLAARA HEEMMIYAAGEE zillaytti Geeshsha Maxaafaa xannaꞌanaunne so asaara issippe tobbanau wodiyaa demmanaadan oottiya, gubaaꞌiyaa shiiquwaa prograamiyaa laamiyaa erissiis. Neeni so asau huuphe gidikko, so asaayyo bessiyaanne ubbay goꞌettiyo, so asaa Geeshsha Maxaafaa xinaatiyaa ne macheeranne ne naatuura ubbatoo xannaꞌa. Naata yelibeenna woy naati son baynna machiyaanne azinay he wodiyaa Geeshsha Maxaafaa issippe xannaꞌanau goꞌettana danddayoosona. So asaa aawatetti baynna ekkibeenaageetinne gelibeennaageeti, Geeshsha Maxaafaa loyttidi buzo xannaꞌanau he wodiyaa goꞌettana danddayoosona.

So Asaa Goynuwaa omarssaa giigissuwan ufayttidoogaa daroti yootidosona. Leemisuwau, Keeven giyo gubaaꞌiyaa cimay hagaadan giidi xaafiis: “‘Galatays’ giyoogaa xallay gubaaꞌiyan deꞌiyaageetussi siyettidabaa loytti qonccissenna. SHiiquwau biyoogee attido omarssan, Bollaara Heemmiyaagee nu soo asaara xannaꞌanaadan yootidoogaadan waatidi goꞌettana danddayiyaakko cimati issippe tobbida.”

I azinay gubaaꞌiyaa cima gidido Jooda hagaadan gaada xaafaasu: “Layttay 15, 11nne 2 gidido heezzu macca naati nuuyyo deꞌoosona. Mata wode malaatan haasayiya gubaaꞌiyaa yame gidida. SHiiqotu ubbau giigettanau daro wodiyaanne baaxiyaa koshshees. Haꞌꞌi ha giigissuwaappe denddidaagan, so asaa goynuwan qofaa wottana danddayiyo issi omarssaa demmida!”

Kumetta wodiyaa aqinye gidida Jooninne Joꞌan giyo azinaynne machiyaa hagaadan giidi xaafidosona: “Gubaaꞌiyaara gayttida hara oosotuura gattiyo gishshau, darotoo nu soo asaa Geeshsha Maxaafaa xinaatiyaa issi issitoo xannaꞌoos. He wodiyaa nuuppe koyettiyaagaadan goꞌettiyaaba gidikko, ha ooratta giigissoy Yihooway immido, ayyaanaaban nuna minttettiya imota.”

Layttay 25 heera gidido, Tooni giyo machibeenna ishay Masqqaynno omarssan buzo xinaatiyaa xannaꞌees. I hara omarssata gubaaꞌiyaa shiiquwau giigettanau goꞌettees. Gidikkonne, Tooni, “Taani Masqqaynno omarssaa yeemottada naagays” yaagiis. Aybissi? Tooni: “He omarssay taani Yihoowaara gayttiyo dumma omarssa. Naaꞌꞌu saate gidiyaagaa, Yihoowaara deꞌiya dabbotaa minttiyaaba xannaꞌays. Daro saatiyaa Xannaꞌiyoogee taani nabbabiyo Geeshsha Maxaafaa xiqisetun wotta denttada qoppanaadan maaddees” yaagiis. I ayba ayfe demmidee? “Yihoowa zoriyaa kaseegaappe aaruwan loyttada eraas” yaagiis. I hegau leemiso yootana danddayii? “Loytti Akeekiyoogaa giya maxaafan, Daawitanne Yonaataana laggetettaabaa nabbabaas. Yonaataani ba goꞌꞌaa yarshshido qofaappe darobaa tamaaraas. Tumu lagge gidiyoogee woygiyoogaakko loyttada akeekanaadan tana a leemisoy maaddiis. Hagaa mala aloꞌꞌobaa daruwaa demmanau Masqqaynno omarssaa yeemottada naagays!” yaagiis.

Yihoowa ashkkarati ubbay Geeshsha Maxaafaa xinaatiyaunne so asaa goynuwau demmido gujo saatiyaa loytti goꞌettiyoogan daro anjjuwaa demmanaagau siree baawa.