Nu Huuphiyaa Yihoowayyo Geppiyoy Aybissee?

“Xoossaa kiitanchchai, tana haarida taani goinniyo Xoossaagee, zine qammi ta matan [eqqiis].”—OOSUWAA 27:23.

1. Xammaqettanau giigidaageeti ayba tangguwaa ekkidonaa? Hegee woygiya oyshaa denttii?

“YESUUS KIRISTTOOSA yarshshuwan ammanidi, Yihoowa sheniyaa oottanau intte nagaraappe simmidi intte huuphiyaa ayyo geppidetii?” Hagee xammaqettanau giigidaageeti xinqqatiyaa haasayaa wurssettan zaariyo naaꞌꞌu oyshatuppe issuwaa. Kiristtaaneti bantta huuphiyaa Yihoowayyo geppana koshshiyoy aybissee? Nu huuphiyaa Yihoowayyo geppiyoogee nuna waatidi goꞌꞌii? Issi uri ba huuphiyaa geppennan, Xoossay koyiyo ogiyan ayyo goynnana danddayennay aybissee? Ha oyshatu zaaruwaa akeekanau, kasetidi ba huuphiyaa geppiyoogee aybakko qoppana koshshees.

2. Issi uri ba huuphiyaa Xoossaayyo geppiyoogaa giyoogee woygiyoogee?

² Issi uri ba huuphiyaa Xoossaayyo geppiyoogee woygiyoogee? Kiitettida PHauloosi bau Xoossaara deꞌiya dabbotaa waati qonccissidaakko akeeka. Daafay gakkana haniyo markkabiyan deꞌiya daro asatussi i, Yihoowa ‘tana haarida Xoossaa’ yaagiis. (Oosuwaa 27:22-24 nabbaba.) Tumu Kiristtaaneti ubbay Yihoowassa. Hegaappe dumma hanotan, kumetta alamee “xalahe halaqan” haarettees. (1 Yohaannisa 5:19) Kiristtaaneti Yihoowa ufayssiya ogiyan bantta huuphiyaa woosan ayyo geppiyo wode, eti abaa gidoosona. Hegaa mala geppay issi asi shiiqettido shiiqo. Hegaappe simmidi haattan xammaqettees.

3. Yesuusa xinqqatee ay malaatii? A kaalliyaageeti a leemisuwaa waatidi kaallana danddayiyoonaa?

³ Yesuusi Xoossaa sheniyaa polanau doorido wode, nuuyyo leemiso gidiyaabaa oottiis. I yelettidoy Xoossau buzo gidida Israaꞌeela asaappe gidiyo gishshau, Xoossau bana geppi uttiis. SHin i xammaqettiyoogan Higgiyan koyettiyaabaappe aadhiyaabaa oottiis. Xoossaa Qaalay i: “Xoossau, taani neeni koyiyoogaa oottanau yaas” yaagidoogaa qonccissees. (Ibraawe 10:7; Luqaasa 3:21) Hegaa gishshau, Yesuusa xinqqatee, i ba Aawaa sheniyaa oottanau ba huuphiyaa Xoossaayyo sheedhidoogaa malaatees. A kaalliyaageeti xammaqettanau giigiyo wode, a leemisuwaa kaalloosona. Gidoppe attin, eti haattan xammaqettiyoogee, bantta huuphiyaa woosan Xoossaayyo geppidoogaa asau qonccissiyo oge.

Nu Huuphiyaa Geppiyoogee Goꞌꞌiyo Ogiyaa

4. Issoy issuwau aqiyoogaa xeelliyaagan Daawitanne Yonaataana giddon deꞌiya laggetettaappe ay tamaariyoo?

⁴ Kiristtaaneti bantta huuphiyaa geppiyoogee xoqqu oottidi xeelliyooba. Hegee coo qaala geliyoogaappe aadhiyaaba. Gidoshin, nu huuphiyaa geppiyoogee goꞌꞌiyoy ayba ogiyaanee? Asay issoy issuwau qaalaa geliyoogee waatidi goꞌꞌiyaakko hegaara geeddarissiyoogan ane beꞌoos. Issi leemisoy laggetettaa. Neeni lagge gidiyoogan goꞌettanau, laggetettay kaalettiyoobaa polana koshshees. Hegee laggiyau aqiyoogaa, giishin laggiyaa ufayssiyaabaa wozanappe oottiyoogaa gujjees. Geeshsha Maxaafan deꞌiya keehi loꞌꞌo laggetettaappe issoy, Daawitanne Yonaataana laggetettaa. Ubba eti issoy issuwau lagge gidanau maacettidosona. (1 Sameela 17:57; 18:1, 3 nabbaba.) Laggee issoy issuwau hegaadan aqiyoogee meeze gidennaba gidikkonne, laggeti issoy issuwau aqiyo wode woykko issoy issuwaa ufayssiyaabaa oottanau wozanappe koyiyo wode, darotu laggetettay minnees.—Leemiso 17:17; 18:24.

5. Issi ayllee loꞌꞌo gidida godau ubbatoo haarettiyoogan waanidi goꞌettana danddayii?

⁵ Israaꞌeeletuyyo Xoossay immido Higgee, maacettiyoogan asay goꞌettido hara gaytotettaa qonccissees. Issi ayllee loꞌꞌo gidida godau ubbatoo haarettidi goꞌettanau koyiyaaba gidikko, laamettenna mino maachaa maacettana danddayees. Higgee hagaadan gees: “He aillee, ‘Taani ta godaa, ta keettaayyiyoonne ta naata siiqais; taani ailletettaappe kiyikke’ yaagikko, a godai a pirddiyaageetu sintti aatto; hegaappe guyyiyan pengge woikko pengge qosilettaakko a efiidi, a haittaa goottan lukko. Simmi i ba de7⁠o laitta ubban ayyo aille gidana.”—Kessaabaa 21:5, 6.

6, 7. (a) Maacettiyoogee asaa waati goꞌꞌii? (b) Yihoowaara nuuyyo deꞌiya dabbotaabaa hegee ay qonccissii?

⁶ Aqo deꞌoy issoy issuwau wozanappe aqiyoogaa koyiyaaba. Hegee maayettidobaa oottiyoogaa gidennan, issi urassi aqiyoogaa. Maaraadan ekkennan woy gelennan issippe coo deꞌiyaageeti woykko eta naati hirgga duussaa doosona. SHin boncho gidida aqo duussan issoy issuwau aqidaageeti bantta aqo duussan merettiya metuwaa siiquwan giigissanau baaxetanaadan Geeshsha Maxaafay mino zoriyaa zorees.—Maatiyoosa 19:5, 6; 1 Qoronttoosa 13:7, 8; Ibraawe 13:4.

⁷ Beni wode, asay zalꞌꞌiyaaranne oosuwaara gayttidaagan maacettiyoogan goꞌettiis. (Maatiyoosa 20:1, 2, 8) Ha wodiyankka hegaadan maacettiyoogee goꞌꞌees. Leemisuwau, nuuni zalꞌꞌiyaa doommanaappe woykko oosuwau qaxarettanaappe kase maayettidobaa parami wottiyoogee goꞌꞌees. Hegaa gishshau, laggetettaa, aqo deꞌuwaanne oosuwaa malatiyaabau qaalaa geliyoogee gaytotettaa minttiyaaba gidikko, neeni ne huuphiyaa Yihoowayyo muleera geppiyoogee aara deꞌiya dabbotaa hegaappe keehi aaruwan minttees! Beni wode deꞌida asay ba huuphiyaa Xoossaa Yihoowayyo geppidoogan waani goꞌettidaakkonne hegee qaalaa geliyoogaappe aadhiyoy ayba ogiyaanakko ane haꞌꞌi beꞌoos.

Israaꞌeelati Banttana Xoossaayyo Geppidoogan Goꞌꞌettdo Ogiyaa

8. Israaꞌeeleti banttana Xoossaayyo geppidosona giyoogee woygiyoogee?

⁸ Israaꞌeele deree ubbay Xoossaayyo qaalaa gelido wode, banttana Yihoowayyo geppidaageeta gididosona. Yihooway Siinaa Deriyaa lanqqen eta shiishshidi: “Intte taayyo kumetta azazettikkonne ta maachchaa naagikko, kawotetta ubbaa giddon intte taayyo buzo gidana” yaagiis. Asaykka issi doona gididi: “GODAI giidobaa ubbaa nuuni oottana” yaagiis. (Kessaabaa 19:4-8) Israaꞌeeleti banttana geppidoogee issibaa oottanau maacettiyoogaappe aadhiyaaba. Hegaa giyoogee eti Yihoowassa gididosonanne Yihoowaykka eta baayyo “buzo” ootti xeelliis giyoogaa.

9. Israaꞌeeleti banttana Xoossaayyo geppidoogan waani goꞌettidonaa?

⁹ Israaꞌeeleti Yihoowassa gidiyoogan goꞌettidosona. I ammanettiyaagaa; qassi siiqiya aaway ba naꞌau koshshiyaabaa kunttiyoogaadan etau koshshiyaabaa kunttiis. Xoossay Israaꞌeeletuyyo: “Aayyiyaa ba xanttiyo na7aa doganau danddayaiyye? Ba uluwaappe yelido na7au qarettekkeeyye? Geelladan a dogiyaakkokka, taani nena dogikke!” yaagiis. (Isiyaasa 49:15) Yihooway eta kaalettanau Higgiyaa immiis; hananabaa yootiyaageetun minttettiis; qassi kiitanchatun naagiis. Mazamuraawee: “I ba qaalaa Yaaqooba zerettaassi, ba awaajjuwaanne pirddaa Israa7⁠eela asaassi awaajjees. I hara kawotettaa asaassi hagaa oottibeenna” yaagidi xaafiis. (Mazamure 147:19, 20; Mazamure 34:7, 19; 48:14 nabbaba.) Yihooway beni wode baassa gidida deriyau koshshiyaabaa kunttidoogaadan, ha wodiyankka bantta huuphiyaa assi geppidaageetuyyo koshshiyaabaa kunttees.

Nu Huuphiyaa Xoossaayyo Geppana Koshshiyo Gaasuwaa

10, 11. Nuuni Xoossaa keettaa asa gididi yelettidoo? Qonccissa.

¹⁰ Issi issi asay Kiristtaane gidanau ba huuphiyaa geppiyoogaanne xammaqettiyoogaa qoppiyo wode, ‘Taani ta huuphiyaa Xoossaayyo geppennan ayyo goynnana danddayennay aybissee?’ giidi oychana danddayees. Xoossaa xeelan nu hanotay ha wodiyan ay malakko qoppiyoogee hegaa loytti akeekanau maaddees. Addaame nagaraa gaasuwan nuuni ubbay Xoossaa keettaa asa gididi yelettibeennaagaa hassaya. (Roome 3:23; 5:12) Xoossay nuna ba keettaa asa oottidi ekkanaadan, nu huuphiyaa au geppiyoogee keehippe koshshiyaaba. Hegaadan giyoy aybissakko ane beꞌoos.

¹¹ Xoossay halchidoogaadan merinaa deꞌuwaa laatissana danddayiya aawi nuuppe ooyyoonne baawa. (1 Ximootiyoosa 6:19) Koyro azinaynne machiyaa nagaraa oottido wode asa zaree siiqo Aawaa, Medhidaagaappe haakkido gishshau, nuuni Xoossaa naata gididi yelettibookko. (Zaarettido Wogaa 32:5⁠ra gatta xeella.) He wodeppe doommidi, asaa naati ubbay Xoossaappe haakkidi, Yihoowa keettaa asa gidennan deꞌidosona.

12. (a) Nagarancha gidida asaa naati waanidi Xoossaa keettaa asa gidana danddayiyoonaa? (b) Xammaqettanaappe kase nuuni ayba tanggo ekkana bessii?

¹² Gidikkokka, Xoossay nuna huuphe xekkan bana ufayssiya, ba soo ashkkara oottidi ekkanaadan a woossana danddayoos.a Hegee nu mala nagaranchatuyyo waani danddayettiyaabee? Kiitettida PHauloosi: “Nuuni Xoossaara kase morkke; shin a Na7aa haiquwan aara sigettida” yaagidi xaafiis. (Roome 5:10) Nuuni xammaqettiyoogan Xoossaa ufayssanau loꞌꞌo zoriya wozanay deꞌiyoogeeta gidanaadan a woossoos. (1 PHeexiroosa 3:21) SHin xammaqettanaappe kase nuuni ekkana koshshiyo tanggoti deꞌoosona. Nuuni Xoossaa eranau, an ammanettiyoogaa tamaaranau, nagaraappe simmanaunne nu deꞌuwaa ogiyaa laammanau bessees. (Yohaannisa 17:3; Oosuwaa 3:19; Ibraawe 11:6) Xoossay nuna ba keettaa asa oottidi ekkanaappe kase nuuni oottana koshshiyo harabaykka deꞌees. Hegee aybee?

13. Issi uri Xoossaa ufayssiya ogiyan goynniya, A keettaa asaa yame gidanau ba huuphiyaa ayyo geppanau qaalaa geliyoogee bessiyaaba gididoy aybissee?

¹³ Xoossaappe haakkida uri Xoossaa ufayssiya a keettaa asaa yame gidanaappe kase, Yihoowayyo wozanappe qaalaa gelana koshshees. Hegee aybissi koshshidaakko akeekanau, aawu aaya baynna issi naꞌaa kehatettan ba naꞌadan dichanau koyida issi loꞌꞌo aawaa qoppa. He aaway loꞌꞌo asa gidiyoogan erettees. SHin he bitanee ba naꞌadan a ekkanaappe kase naꞌay qaalaa gelanaadan koyees. Yaatiyo gishshau, bitanee: “Taani nena ta naꞌadan ekkanaappe kase, neeni tana ne aawadan siiqanaagaanne bonchanaagaa erana koyays” yaagees. He bitanee naꞌaa ba soo ehiyoy, naꞌay wozanappe qaalaa geliyo wode xallaana. Hegee bessiyaaba gidennee? Hegaadankka, ayyo banttana geppanau qaalaa geliyaageetu xallaa Yihooway ba soo asa oottidi ekkees. Geeshsha Maxaafay: “Inttena ayyo geppidaageetanne a ufayssiya deꞌo yarshsho oottidi au shiishshite” yaagees.—Roome 12:1, Zi Niwu Inggilish Baybil.

Siiquwaanne Ammanuwaa Qonccissiyo Oge

14. Nu huuphiyaa geppiyoogee siiquwaa qonccissiyooba gididoy ayba ogiyaanee?

¹⁴ Nu huuphiyaa Xoossaayyo geppiyoogee, Yihoowa wozanappe siiqiyoogaa qonccissiyo oge. Issi issi hanotan, hegee ekkiyo woy geliyo wode maacettiyoogaara issi mala. Ekkiya issi Kiristtaanee ay hanotankka gidin, i ekkiyooriyyo ammanettanau qaalaa geliyo wode, o siiqiyoogaa qonccissees. Hegee issibaa oottanau qaalaa geliyoogaa gidennan, issi uraara maacettiyoogaa. Ekkiya issi Kiristtaanee aqo deꞌuwaa maachaa maacettennan, ba ekkiyooriira deꞌana danddayennaagaa akeekees. Hegaara issi mala hanotan, nuunikka nu huuphiyaa Yihoowayyo geppennan, a keettaa asaa yame gidiyoogan kumetta hanotan goꞌettana danddayokko. Nuuni polo gidana xayikkonne, Xoossaassa gidanau koyiyo, qassi ayba hanotankka ayyo ammanettidaageeta gidanau murttido gishshau, ayyo nu huuphiyaa geppoos.—Maatiyoosa 22:37.

15. Nu huuphiyaa geppiyoogee ammanuwaa qonccissiyoy ayba ogiyaanee?

¹⁵ Nuuni nu huuphiyaa Xoossaayyo geppiyo wode, ammanuwaa qonccissoos. Hegaadan giyoy aybissee? Nuuni Yihoowa ammaniyoogee, nuuyyo akko shiiqiyoogee loꞌꞌo gidiyoogaa ammanettanaadan oottees. (Mazamure 73:28) Nuuni deꞌiyoy “geellanne nagaranchcha asaa” giddoona gidiyo gishshau, Xoossaara hemettiyoogee ubbatoo metennaba gidennaagaa eroos; shin Xoossay nuuni baaxetiyo wode maaddanau gelido qaalan ammanettoos. (Piliphphisiyuusa 2:15; 4:13) Nuuni polo gidennaagaa eroos; shin nuuni moorobaa oottiyo wodekka, Yihooway nu nagaraa atto gaanaagaa ammanettoos. (Mazamure 103:13, 14; Roome 7:21-25 nabbaba.) Nuuni nu suuretettaa naaganau murttidoogaa Yihooway anjjanaagaa ammanettoos.—Iyyooba 27:5.

Nu Huuphiyaa Xoossaayyo Geppiyoogee Ufayssaa Demissees

16, 17. Nu huuphiyaa Yihoowayyo geppiyoogee ufayssaa demissiyoy aybissee?

¹⁶ Nu huuphiyaa Yihoowayyo geppiyoogee nuna ayyo immiyoogaa gujjiyo gishshau, ufayssaa demissees. Yesuusi: “Ekkiyaagaappe immiyaagee anjjettidaagaa woykko ufayttiyaagaa” giido wode, tuma gididabaa yootiis. (Oosuwaa 20:35) Yesuusi saꞌan haggaaziyo wode, immiyoogan demmiyo ufayssaa loyttidi akeekiis. Koshshiyo wode, Yesuusi shemppiyoogaa, quma miyoogaanne injje deꞌuwaa deꞌiyoogaa aggidi, harati deꞌuwaa ogiyaa demmanaadan maaddiis. (Yohaannisa 4:34) Yesuusi ba Aawaa wozanaa ufayssiyoogan ufayttiis. Yesuusi: “Taani ubba wode a ufaissiyaagaa [oottays]” yaagiis.—Yohaannisa 8:29; Leemiso 27:11.

¹⁷ Hegaa gishshau, Yesuusi: “Tana kaallanau koyiya urai de7⁠ikko, bana yeggi bayo” yaagidi, ufayssiya deꞌo ogiyaa bana kaalliyaageetuyyo qonccissiis. (Maatiyoosa 16:24) Hegaadan oottiyoogee, nuuni Yihoowakko shiiqanaadan maaddees. Nuuyyo koshshiyaabaa siiquwan kunttiyaagaappe aadhiya, nu huuphiyaa aatti immiyo hara uri deꞌii?

18. Nu huuphiyaa Yihoowayyo geppidoogaara moggiya ogiyan deꞌiyoogee, aybiyyo woykko ooyyookka gidin nu huuphiyaa geppiyoogaappe aadhiya ufayssaa demissiyoy aybissee?

¹⁸ Nu huuphiyaa Yihoowayyo geppidi, a sheniyaa oottiiddi hegaara moggiya ogiyan deꞌiyoogee, aybiyyo woykko ooyyookka gidin nu huuphiyaa geppiyoogaappe aadhiya ufayssaa demissees. Leemisuwau, daro asay tumu ufayssaanne woppaa demmissenna miishshaa duretettaa ba deꞌuwan yedettees. Gidikkokka, bantta huuphiyaa Yihoowayyo geppiyaageeti merinau ufayttoosona. (Maatiyoosa 6:24) ‘Xoossaara issippe oottiyoogee’ gita maata gidiyo gishshau, hegee eti ufayttanaadan oottees; gidikkokka, eti bantta huuphiyaa geppiyoy oosossi gidennan, nuna nashshiya Xoossaassa. (1 Qoronttoosa 3:9) Eti bantta goꞌꞌaa yarshshiyoogaa appe aaruwan nashshana danddayiya uri baawa. Ba naaguwan eti merinau goꞌettanaadan, ubba i bau ammanettiyaageeti zaaridi yelaga gidanaadan oottana.—Iyyooba 33:25; Ibraawe 6:10 nabbaba.

19. Bantta huuphiyaa Yihoowayyo geppidaageeti ayba maata demmiyoonaa?

¹⁹ Ne huuphiyaa Yihoowayyo geppiyoogee, aara mata dabbotay neeyyo deꞌanaadan oottees. Geeshsha Maxaafay: “Xoossaakko shiiqite; ikka inttekko shiiqana” yaagees. (Yaaqooba 4:8; Mazamure 25:14) Kaalliya huuphe yohuwan, nuuni Yihoowassa gidanau dooridoogan ammanettana danddayiyoy aybissakko beꞌana.

[Tohossa qofaa]

Woygada Zaaruutii?

• Issi uri ba huuphiyaa Xoossaayyo geppiyoogaa giyoogee woygiyoogee?

• Nu huuphiyaa Xoossaayyo geppiyoogee nuna waati goꞌꞌii?

• Kiristtaaneti bantta huuphiyaa Yihoowayyo geppana koshshidoy aybissee?

[Sinttaa 14n deꞌiya misiliyaa]

Nu huuphiyaa geppidoogaara moggiya ogiyan deꞌiyoogee merinaa ufayssaa demissees