Ubbaappe Aadhiya Deꞌo Ogiyan Simerettite!
“Simmi nuuni paxa de7in woi haiqqin Godaassa [“Yihoowassa,” NW].”—ROOME 14:8.
1. Ubbaappe aadhiya deꞌo ogiyaa xeelliyaagan Yesuusi ay tamaarissidee?
YIHOOWAY nuuni ubbaappe aadhiya deꞌo ogiyan simerettanaadan koyees. Asay dumma dumma ogiyan deꞌana danddayiyaaba gidikkonne, ubbaappe aadhiya ogee issuwaa xalla. Nuuni deꞌana danddayiyo ubbaappe aadhiya ogee, Xoossaa Qaalaara moggidi deꞌiyoogaanne a Naꞌaa Yesuus Kiristtoosappe tamaariyoogaa. Yesuusi bana kaalliyaageeti ayyaanaaninne tumatettan Xoossau goynnanaadan tamaarissiis; qassi erissiyo ashkkara oottanaadan azaziis. (Maatiyoosa 28:19, 20; Yohaannisa 4:24) Yesuusa azazuwaara moggidi deꞌiyoogan, Yihoowa ufayssoosinne A anjjuwaa demmoos.
2. Daroti koyro xeetu layttan Kawotettaa kiitau ayba zaaro immidonaa? “Ogiyaa” kaalloosona geetettidoy aybissee?
2 “Merinaa de7uwaassi doorettida [“suure wozanaa koshshay deꞌiyo,” NW ]” asati ammanidi xammaqettiyo wode, eta “Ubbaappe aadhiya deꞌo ogiyan intte simerettiyoogan ufayttoos” gaanau loꞌꞌo gaasoy deꞌees. (Oosuwaa 13:48) Koyro xeetu layttan dumma dumma biittaappe yiida, shaꞌan qoodettiyaageeti tumaa ekkidi, bantta huuphiyaa Xoossau geppidoogaa xammaqettiyoogan qonccissidosona. (Oosuwaa 2:41) Koyro xeetu layttan deꞌida he Kiristtaaneti he “ogiyaa” kaallidosona. (Oosuwaa 9:2; 19:23) Kiristtoosa kaalliyaageetu deꞌoy baasettidoy, Yesuus Kiristtoosa ammaniyoogaananne a leemisuwaa kaalliyoogaana gidiyo gishshau, hegaadan giyoogee bessiyaaba.—1 PHeexiroosa 2:21.
3. Yihoowa asay xammaqettiyoy aybissee? Aadhida tammu layttatun aappun asay xammaqettidee?
3 Ha wurssetta gallassatun erissiyo ashkkara oottiyo oosoy aakkiis; hegee ha wodiyan 230ppe dariya biittatun oosettiiddi deꞌees. Aadhida tammu layttatun, 2,700,000ppe dariyaageeti Yihoowayyo oottanau qofaa qachidi, bantta huuphiyaa ayyo geppidoogaa bessanau xammaqettidosona. Hegee saaminttan saaminttan 5,000ppe dariya asay xammaqettees giyoogaa! Xammaqettanau qofaa qachiyoogee Xoossaa siiqiyoogan, Geeshsha Maxaafaa eraa demmiyoogaaninne an deꞌiya timirttiyaa ammaniyoogan baasettees. Xinqqatee Yihoowaara mata dabbotaa medhiyooba gidiyo gishshau, nu deꞌuwan xoqqa sohoy deꞌiyooba. Yihooway beni wode bau oottidaageeti ba ogiyan simerettanaadan maaddidoogaadan, au ammanettidi oottanaadan i nuna maaddanaagaa ammanettiyoogaakka bessiyo oge.—Isiyaasa 30:21.
Xammaqettana Koshshiyoy Aybissee?
4, 5. Xammaqettiyoogan demmiyo goꞌꞌaappenne anjjuwaappe amaridaagaa yoota.
4 Geella neeni Xoossaa eraa demmida, ne deꞌuwan laamiyaa oottidanne xammaqettennan aassaydda deꞌiyaagaa gidana danddayaasa. Hegaa mala dichay ufayssiyaaba. SHin ne huuphiyaa Xoossau geppidoogaa woosan qonccissadii, qassi xammaqettanau qoppadii? Ne deꞌuwan xoqqu oottada xeellana bessiyoy ne huuphiyaa ufayssiyoogaa woy aqo demmiyoogaa gidennan, Yihoowa sabbiyoogaa gidana bessiyoogaa Geeshsha Maxaafaa xinaatiyan akeekidoogee sirissenna. (Mazamure 148:11-13 nabbaba; Luqaasa 12:15) Yaatin, xammaqettiyoogan demmiyo issi issi anjjoynne goꞌꞌay aybee?
5 Ne huuphiyaa geppida Kiristtaane gidiyo wode, ne deꞌuwau gita halchoy deꞌana. Neeni Xoossay koyiyoobaa oottiyo gishshau, ufayttiyaagaa gidana. (Roome 12:1, 2) Yihoowa ayyaanay neeyyo sarotettaanne ammanuwaa mala eeshshati deꞌanaadan oottana. (Galaatiyaa 5:22, 23) Xoossay ne woosaa siyana; qassi neeni a Qaalaara moggiya ogiyan deꞌanau oottiyoobaa anjjana. Ne haggaazoy ufayssiyaagaa gidana; qassi neeni Xoossaa ufayssiya ogiyan deꞌiyoogee neeni merinaa deꞌuwaa hidootan keehi ammanettanaadan oottana. Hegaa bollikka, ne huuphiyaa geppiyoogeenne xammaqettiyoogee Yihoowa Markkatuppe issuwaa gidanau neeni tumuppe koyiyoogaa bessees.—Isiyaasa 43:10-12.
6. Nuuni xammaqettiyoogee ay qonccissii?
6 Nu huuphiyaa Xoossau geppiyoogaaninne xammaqettiyoogan, nuuni Yihoowassa gidiyoogaa bessoos. Kiitettida PHauloosi: “Nuuppe ooninne ba huuphe xalaalau deꞌenna; qassi ooninne ba huuphe xalaalau hayqqenna; nuuni paxa deꞌikko, Yihoowau deꞌoos; qassi hayqqikkokka, Yihoowau hayqqoos. Simmi nuuni paxa deꞌin woy hayqqin Yihoowassa” yaagidi xaafiis. (Roome 14:7, 8, NW) Xoossay nuuyyo koyidobaa dooriyo maataa immiyoogan nuna bonchiis. Nuuni Xoossaa siiqiyo gishshau ha ogiyaa kaallanau minttidi qofaa qachiyo wode, a ufayssoos. (Leemiso 27:11) Nuuni xammaqettiyoogee nu huuphiyaa au geppidoogaanne Yihooway nuna Haariyaagaa gidiyoogaa qonccissiyo malaata. Ubbaa haariyo maataa xeelliyaagan nuuni a bagga gidiyoogaa hegee qonccissees. (Oosuwaa 5:29, 32) Yaatiyo wode, Yihoowaykka nu miyyiyan eqqees. (Mazamure 118:6 nabbaba.) Xammaqettiyoogee nuuni haꞌꞌi gidin sinttappekka gidin, ayyaanaaban daro anjjuwaa demmiyo ogiyaakka dooyees.
Siiqiya Ishanttu Maabaraa Yame Gidiyo Anjjuwaa
7-9. (a) Ubbabaa aggidi bana kaallida ubbau Yesuusi ammanttiyaabaa ay yootidee? (b) Marqqoosa 10:29, 30n deꞌiya, Yesuusi gelido qaalay polettiiddi deꞌiyoy ayba ogiyaanee?
7 Kiitettida PHeexiroosi Yesuusa: “Be7a, nuuni nuuyyo de7iya ubbabaa aggi bayidi, nena kaallida; yaatidi nuuni ai demmaneeshsha?” yaagiis. (Maatiyoosa 19:27) PHeexiroosi ba huuphe gidin, Yesuusi erissiyo hara ashkkarati sinttappe ay demmanaakko eranau koyiis. Eti Kawotettaa sabbakiyo oosuwau muleera aqanau, gita yarshsho yarshshidosona. (Maatiyoosa 4:18-22) Yesuusi eta ammanttiyaabaa ay yootidee?
8 Marqqoosi xaafidoogaadan, erissiyo ashkkarati ayyaanaaban isha gididaageetu yame gidanaagaa Yesuusi qonccissiis. I: “Ta gishshaunne wonggeliyaa mishiraachchuwaa gishshau, keettaa woi ishantta woi michchentta, woi aawaa woi aayyiyo woi machchiyo, woi naata woi gadiyaa aggida asi ooninne, ha77i ha wodiyan xeetutooppe dariya keettata, ishantta, michchentta, aayeta, naata, gadiyaa, qassi waayiyaakka ekkana. Sinttappe yaana wodiyankka merinaa de7uwaa ekkana” yaagiis. (Marqqoosa 10:29, 30) Lidiyo, Aqiila, PHirisqqilonne Gaayoosa mala koyro xeetu laytta Kiristtaaneti, Yesuusi qaalaa gelidoogaadan bantta mala Kiristtaanetussi “keettaa” immidaageetuppenne “ishantta, michchentta, aayeta” gididaageetuppe amaridaageeta.—Oosuwaa 16:14, 15; 18:2-4; 3 Yohaannisa 1, 5-8.
9 Yesuusi yootidobay ha wodiyan gita ogiyan polettiiddi deꞌees. I bana kaalliyaageeti aggana giido ‘gadee,’ miisoonaweta, Beeteele keettaa asaa yameta, alame yuusho oosanchatanne harata gujjin daroti dumma dumma biittatun Kawotettaara gayttidabaa oottanau bantta dosan aggi bayido aquwaa malaatees. Daro ishatinne michoti sima deꞌuwaa deꞌanau bantta keettaa aggidosona; Yihooway etassi koshshiyaabaa kunttidoogaanne ayyo oottiyoogan eti ufayssaa demmidoogaa qonccissiya temokruwaa siyiyoogee nuna ufayssees. (Oosuwaa 20:35) Hegaa bollikka, Yihoowayyo oottiya, xammaqettida ubbay alame yuusho ishatu maabaraa yame gidiyoogaadan, “kasetidi, Xoossaa kawotettaanne a xillotettaa” koyiyoogan anjjuwaa demmana danddayoosona.—Maatiyoosa 6:33.
Ubbaappe Xoqqiya Xoossan Naagettiyoogaa
10, 11. “Ubbaappe Xoqqiya Xoossan” naagettanau akko shiiqiyoogee woygiyoogee? Nuuni he leemiso sohuwan waanidi deꞌana danddayiyoo?
10 Ba huuphiyaa geppiyoogeenne xammaqettiyoogee hara gita anjjuwaa demissees; hegeekka “Ubbaappe Xoqqiya Xoossan naagettidi” deꞌanau akko shiiqiyo maataa. (Mazamure 91:1 nabbaba.) Hegee woygiyoogee? Hegee ayyaanaaban naaguwaanne woppatettaa demmiyo sohuwaa koyiyoogaa woy demmiyoogaa bessiya hanotaa woykko ayyaanaaban qohuwaappe naaguwaa demmiyo hanotaa malaatees. Xoossan ammanettennaageeti he sohuwaa erokkona. Nu huuphiyaa geppidoogaara moggiya ogiyan deꞌiyoogaaninne kumetta hanotan Yihoowan ammanettiyoogan a: “Neeni taayyo qatonne baqata attiyo soho; neeni taani ammanettiyo ta Xoossaa” yaagana danddayoos. (Mazamure 91:2) Xoossaa Yihooway nuuni naagettidi deꞌiyo soho. (Mazamure 91:9) Hegaappe aadhiya loꞌꞌo sohoy baawa!
11 Naaguwaanne woppatettaa Yihoowappe demmiyo leemiso sohuwan deꞌiyoogee, aara deꞌiya dabbotaa minttiyoogan anjjuwaa demmiyo maataakka malaatees. Hegee nu huuphiyaa ayyo geppidi xammaqettiyo wode doommees. Hegaappe simmin, Geeshsha Maxaafaa xannaꞌiyoogan, wozanappe woossiyoogaaninne kumetta hanotan azazettiyoogan Xoossaakko shiiqoos; yaatiyoogan aara deꞌiya dabbotaa minttoos. (Yaaqooba 4:8) Medhidaagan ammaniyoogan yeeqibeenna Yesuusaagaa keena Yihoowakko shiiqida hara asi baawa. (Yohaannisa 8:29) Yaatiyo gishshau, nuuni nu huuphiyaa geppiyo wode gelido qaalaa polanaadan Yihooway koyiyoogaanne nuna maaddanau danddayiyoogaa mule sirana bessenna. (Eranchchaa 5:4) Xoossay ba asau oottido ayyaanaabaa giigissoti, i nuna tumuppe siiqiyoogaunne ayyo oottiyoogan murutanaadan koyiyoogau qoncce naqaasha.
Ayyaana Gannatiyaa Xoqqu Oottidi Xeellite
12, 13. (a) Ayyaana gannatee aybee? (b) Nuuni oorattata maaddana danddayiyoy ayba ogiyaanee?
12 Nu huuphiyaa geppiyoogeenne xammaqettiyoogee ufayssiya ayyaana gannatiyan nuuni deꞌanaadankka injjiyaa medhees. Hegee Xoossaa Yihoowaaranne issoy issuwaara sarotettan deꞌiya, nu mala Kiristtaanetuura deꞌiyo, dumma gidida ayyaanaabaa hanotaa. (Mazamure 29:11; Isiyaasa 54:13) Alamiyan nu ayyaana gannatiyaara geeddarssana danddayiyo issibinne baawa. Daro biittaappe yiidaageeti shiiqiyo awuraajjaa shiiquwan, dumma dumma biittaappe, qaalaappenne sheeshshaappe yiida ishatunne michotu giddon deꞌiya sarotettay, issippetettaynne ishatettaa siiqoy hegaa loytti qonccissees.
13 Nuuni deꞌiyo ayyaana gannatee ha wodiyan alamee deꞌiyo azzanttiya hanotaappe keehi dumma. (Isiyaasa 65:13, 14 nabbaba.) Nuuni Kawotettaa kiitaa yootiyoogan, harati ayyaana gannatiyaa gelanaadan shoobbiyo maataa demmida. Mata wode gubaaꞌiyaa yame gididaageetanne haggaazuwan loohissoy koshshiyoogeeta maaddiyoogeekka anjjo. Aqiilinne PHirisqqila “Xoossaa ogiyaa kaseppe sittayidi, [Aphiloosayyo] geeshshidi” yootidoogaadan, gubaaꞌiyaa cimati immiyo kaaletuwan oorattata maaddiyo maataa demmiyoogan nuuni anjjettana danddayoos.—Oosuwaa 18:24-26.
Yesuusappe Tamaariyoogaa Aggoppite
14, 15. Nuuni Yesuusappe tamaariyoogaa aggennaadan oottiya loꞌꞌo gaasoy aybee?
14 Nuuni Yesuusappe tamaariyoogaa aggennaadan oottiya loꞌꞌo gaasoy deꞌees. Yesuusi asa gidanaappe kase, zawi baynna wodiyau ba Aawaara issippe oottiis. (Leemiso 8:22, 30) Aybippenne aadhiya deꞌo ogee, tishshatettan Xoossaayyo oottiyoogaanne tumatettaayyo markkattiyoogaa gidiyoogaa i eriis. (Yohaannisa 18:37) Hara deꞌo oge ubbay yaaretiyoogaanne yuushshi qoppennaagaa bessiyaaba gidiyoogaa Yesuusi loytti akeekiis. I iita hanotan paacettanaagaanne hayqqanaagaakka eriis. (Maatiyoosa 20:18, 19; Ibraawe 4:15) I nuussi leemiso gidiyoogaadan, waanidi ammanettidi deꞌana danddayiyaakko tamaarissiis.
15 Yesuusi xammaqetti simmin, ubbaappe aadhiya deꞌo ogiyaa agganaadan Seexaanay a sohuwaara paacciis; shin i koyidoogaadan hanibeenna. (Maatiyoosa 4:1-11) Seexaanay ay oottiyaabaa gidikkokka, nuuni ammanettidi deꞌana danddayiyoogaa hegee qonccissees. Xammaqettanau giigettiyaageetu bollinne mata wode xammaqettidaageetu bolli i ba xeelaa wottiyaaba milatees. (1 PHeexiroosa 5:8) Balabaa siyido gishshau nuussi qoppiyoogan so asay nu bolli yedetaa gattana danddayees. Gidikkokka, nuuni oyshettidobaa zaariyo wodenne markkattiyo wode bonchiyoogaanne hiillaa goꞌettiyoogaa mala Kiristtaane eeshshata qonccissanaadan hegaa mala paacee injjiyaa medhees. (1 PHeexiroosa 3:15) Hegaa gishshau, hegaa mala hanotay nuuni yootiyoogaa siyiyaageeti goꞌettanaadan oottana danddayees.—1 Ximootiyoosa 4:16.
Ubbaappe Aadhiya Deꞌo Ogiyaa Mintti Oyqqite!
16, 17. (a) Zaarettido Wogaa 30:19, 20n qonccida, deꞌuwau koshshiya heezzubati aybee? (b) Muusee xaafidobaa Yesuusi, Yohaannisinne PHauloosi waati kaafidonaa?
16 Yesuusi saꞌaa yaanaappe 1,500 layttaa kasetidi, Israaꞌeeleti ubbaappe aadhiya deꞌo ogiyaa dooranaadan Muusee minttettiis. I: “Taani intte sinttan de7uwaanne haiquwaa, anjjuwaanne qanggettaa wottidoogau hachchi saluwaanne sa7aa intte bolli markkayana; simmi inttenne intte zaree de7uwan de7ana mala, de7uwaa doorite. GODAA intte Xoossaa siiqite; a qaalaa siyite, ayyo azazettite; aara ohettite. Hegaadan hanikko, GODAI kase intte maizza aawatuyyo, Abrahaamayyo, Yisaaqayyoonne Yaaqoobayyo immanau caaqqido biittan inttenne intte naati adussa laittaa de7ana” yaagiis. (Zaarettido Wogaa 30:19, 20) Israaꞌeeleti Xoossau ammanettibookkona; shin Muuse yootido, deꞌuwau koshshiya heezzubati laamettibookkona. Hegeeta Yesuusinne harati zaarettidi yootidosona.
17 Koyruwan, ‘nuuni nu Xoossaa Yihoowa siiqana bessees.’ Xoossaa xillotetta ogiyaara moggidi deꞌiyoogan nuuni a siiqiyoogaa qonccissoos. (Maatiyoosa 22:37) Naaꞌꞌanttuwan, Xoossaa Qaalaa xannaꞌiyoogaaninne a azazuwaa naagiyoogan ‘nuuni Yihoowa qaalaa siyana bessees.’ (1 Yohaannisa 5:3) Hegaadan oottanau Geeshsha Maxaafaa tamaariyo Kiristtaane shiiqotun nuuni ubbatoo beettana koshshees. (Ibraawe 10:23-25) Heezzanttoy, ‘nuuni Yihoowaara ohettana bessees.’ Nuna gakkiya metoy ayba gidikkokka, ubba wode Xoossan ammanettiyoogaa bessiyaageetanne a Naꞌaa kaalliyaageeta gidoos.—2 Qoronttoosa 4:16-18.
18. (a) Wochiyo Keelay 1914n tumaa xeelliyaagan woygi qonccissidee? (b) Ha wodiyan deꞌiya tumaa pooꞌuwaa xeelliyaagan nuuyyo aybi siyettana koshshii?
18 Geeshsha Maxaafaa tumaara moggidi deꞌiyoogee gita anjjo! Kaallidi deꞌiya qofay 1914n, Wochiyo Keelan kiyiis: “Nuuni anjjettidanne ufayttiya asa gidokkonii? Nu Xoossay ammanettiyaagaa gidennee? Hara loꞌꞌobaa eriya uri deꞌikko, hegaa kaallo. Intteppe ooninne hara loꞌꞌobaa demmidaba gidikko, nuuyyo yootana giidi qoppoos. Nuuni Xoossaa Qaalaappe demmidobaappe hara loꞌꞌobi aybinne baynnaagaa eroos. . . . Tumu Xoossaa loytti eridoogan nu deꞌuwan demmido sarotettaa, ufayssaanne anjjuwaa yooti wurssana danddayokko. Xoossaa Aadhida Eratettaa, Pirddaa, Wolqqaanne Siiquwaa yootiya Taarikee nu guuggiyaanne wozanaa keehippe woppissiyaaba. Hegaappe harabaa koyokko. Hegaappe harabaa amottiyoogaappe Xoossaa eran dichaa bessanau koyoos.” (Wochiyo Keelaa, Tisaase 15, 1914, sinttaa 377-378) Ayyaanaabaa pooꞌuwaanne tumaa nuuni nashshiyoogaa aggokko. Nuuni “GODAA poo7uwan” hemettiyoogee ha wodiyan ufayttanaadan oottiya gita gaaso gidiyoogee qoncce.—Isiyaasa 2:5; Mazamure 43:3; Leemiso 4:18.
19. Xammaqettanau gidaa kunttidaageeti he tangguwaa ekkanau haganaa sugana koshshennay aybissee?
19 Neeni “GODAA poo7uwan” hemettana koyiyaaba gidikkonne, ne huuphiyaa geppada xammaqettabeennaba gidikko, haganaa sugoppa. Geeshsha Maxaafay yootiyo, xammaqettanau koshshiya gida ubbaa kuntta; hegee Xoossaynne Kiristtoosi nuussi oottidobaa nashshiyoogaa bessiyo loꞌꞌo oge. Neessi deꞌiya aqo ubbaappe aadhiya, ne deꞌuwaa Yihoowayyo imma. A Naꞌaa kaalliyoogan Xoossaa sheniyaa oottanau halchidoogaa bessa. (2 Qoronttoosa 5:14, 15) Hegee ubbaappe aadhiya deꞌo oge gidiyoogee erettidaagaa!
Woygada Zaaruutii?
• Nu xinqqatee ay malaatii?
• Nu huuphiyaa Xoossau geppiyoogeenne xammaqettiyoogee ayba anjjuwaa demissii?
• Yesuusappe tamaariyoogee keehippe koshshiyoy aybissee?
• Ubbaappe aadhiya deꞌo ogiyaa mintti oyqqanaadan nuna aybi maaddii?
[Sinttaa 29n deꞌiya misiliyaa]
Ne xinqqatee neeni ubbaappe aadhiya deꞌo ogiyaa dooridoogaa bessees
[Sinttaa 30n deꞌiya misiliyaa]
Neeni deꞌiyoy “Ubbaappe Xoqqiya Xoossan naagettidi” deꞌiyoosaanee?