Yesuus Kiristtoosa—A Timirttee Asaa Ay Keena Goꞌꞌidee?
“Qifirinaahoomappe yiida ha bitanee erancha gidiyoogaa xeelliyaagan keehippe mino naqaashay, i hanno gakkanau asaa qofaanne wozanaa omooddiyoogaa.”a—GREG ESTERBRUK GIYO XAAFIYAA.
QAALAU wolqqay dees. Akeekan haasayiyo qaalati wozanaa denttettanau, hidooti deꞌanaadan oottanaunne deꞌuwaa laammanau danddayoosona. Yesuus Kiristtoosaagaadan wolqqaamabaa haasayida asi baawa. Yesuusi Deriyaa Bolla Timirttiyan tamaarissidobaa siyida issoy: “Yesuusi ba haasayiyoogaa wurssido wode, asai i tamaarissiyoogan garamettiis” yaagidi xaafiis.—Maatiyoosa 7:28.
Yesuusi tamaarissidobaa alamiyaa yuushuwan deꞌiya daro asay hanno gakkanaukka erees. Darobaa oyqqida qaalatuppe amarida leemisota ane beꞌoos.
“Xoossaassinne miishshaassi haarettanau danddayekketa.”—Maatiyoosa 6:24.
“Hegaa gishshau, hara asi intteyyo oottanau koyiyo ubbabaa inttekka asau oottite.”—Maatiyoosa 7:12.
“Qeesaaraagaa Qeesaarassi, Xoossaagaa Xoossaassi immite.”—Maatiyoosa 22:21.
“Ekkiyaagaappe immiyaagee anjjettidaagaa woykko ufayttiyaagaa.”—Oosuwaa 20:35.
Yesuusi asay hassayiyoobaa yootiyoogaappe aadhiyaaba oottiis. Xoossaabaa tumaa qonccissido, asay deꞌuwan tumuppe ufayttanaadan maaddidonne asay tugga ubbaappe kiyiyo ogiyaa—Xoossaa Kawotettaa qonccissido gishshau, i tamaarissidobay keehippe wolqqaama. Kaalliya sinttatun nuuni ha qofaa pilggiyo wode, Yesuusi miilooniyan qoodettiya “asaa qofaanne wozanaa” hanno gakkanau omooddiyoogee aybissakko akeekoos.
[Tohossa qofata]
a Qifirinaahoomi Galiilaa awuraajjan deꞌiya, Yesuusi diccido katama gidiyoogaadan qofettees.—Marqqoosa 2:1.