Yesuusi Xoossaabaa Ay Tamaarissidee?

“Na7aappenne Na7ai Aawaa bessanau koyiyo asatuppe attin, harai ooninne Aawai oonakko erenna.”—LUQAASA 10:22.

XOOSSAU bayra Naꞌay asa gidanaappe kase zawi baynna wodiyaa ba Aawaara siiqo dabbotan deꞌiis. (Qolasiyaasa 1:15) Yaatiyo gishshau, Naꞌay ba Aawaa qofaa, eeshshaanne au siyettiyaabaa erees. Ha Naꞌay Yesuusa gididi saꞌaa yiido wode, ba Aawaabaa tumaa mishettidi tamaarissiis. He Naꞌay giidobaa siyiyoogan nuuni Xoossaabaa darobaa erana danddayoos.

Xoossaa sunttaa Yihoowa geetettiya Xoossaa sunttay aybippenne aaruwan Yesuusi xoqqu oottidi xeelliyoobaa. Ha siiqo Naꞌay harati ba Aawaa sunttaa eranaadaaninne goꞌettanaadan koyees. Yesuusa giya sunttay “Yihooway ashshiyaagaa” giyoogaa. Yesuusi hayqqanaappe kase qammi Yihoowakko: “Taani ne sunttaa eta erissaas” yaagidi woossiis. (Yohaannisa 17:26) Yesuusi Xoossaa sunttaa goꞌettidoogeenne haraatussi yootidoogee garamiyaaba gidenna. Yesuusi tamaarissiyoobaa siyiyaageeti Yihoowa sunttaanne a birshshettaa erennan Yihoowabaa tumaa waatidi erana danddayiyoonaa?a

Xoossaa gita siiquwaa Issi wode Yesuusi Xoossaakko woossido woosan: ‘Aawau, saꞌay merettanaappe kase neeni tana siiqadasa’ yaagiis. (Yohaannisa 17:24) Yesuusi saluwan deꞌiyo wode Xoossaa siiquwaa beꞌido gishshau, i saꞌan deꞌiyo wode he siiquwau dumma dumma macaraa wozanappe qonccissiis.

Yesuusi Yihoowa siiqoy aaho gidiyoogaa qonccissiis. Yesuusi: “Xoossaa Na7aa ammaniya ubbai merinaa de7⁠uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagiis. (Yohaannisa 3:16) “Sa7aa” geetettida Giriike qaalay “biittaa” giyoogaa gidenna. Ha sohuwan, he qaalay asaa, giishin asaa naata ubbaa malaatees. Xoossay asaa naata daro siiqido gishshau, ammanettiya asay nagaraanne hayquwaa aylletettaappe naxa kiyidi, merinaa deꞌuwaa hidootaa demmanaadan ba siiqiyo Naꞌaa immiis. Hegaa mala gita siiqoy nuuni qoppanaunne danddayiyooba gidenna.—Roome 8:38, 39.

Yesuusi issi minttettiya tumaa yootiis: Yihooway baassi goynniyaageeta huuphiyan huuphiyan wozanappe siiqees. Yihooway ba dorssata ubbaa shaakki eriyaanne alꞌꞌobadan xeelliya henttancha mala gidiyoogaa Yesuusi tamaarissiis. (Maatiyoosa 18:12-14) Yihooway erennan issi siine kafoykka saꞌan wodhennaagaa Yesuusi yootiis. Gujjidikka: “Intte huuphiyan de7⁠iya binnaana ubbaikka qoodan de7⁠ees” yaagiis. (Maatiyoosa 10:29-31) Issi siine kafiyaa ba keettan baynnaagaa Yihooway akeekiyaaba gidikko, baayyo goynniyaageetussi huuphiyan huuphiyan ay keena hegaappe aaruwan qoppanddeeshsha! Nu huuphiyan deꞌiya binnaanaa ubbaa Yihooway qoodiyaaba gidikko, nu deꞌuwaabaa, giishin nuna koshshiyaabaa, nu daafuraanne nuna qofissiyaabaa i erana danddayennabi deꞌanee?

Saluwan deꞌiya Aawaa Hagaappe kase huuphe yohuwan beꞌidoogaadan Yesuusi Xoossau mexi issi Naꞌa. Ha siiqo Naꞌay Yihoowa haasayissiyo wodenne abaa haratussi yootiyo wode darotoo ta “Aawaa” giidoogee garamissenna. Yesuusi haasayidoban xaafettidabaappe koyro gidida, au layttay 12 gidido wode beeta maqidasiyan haasayidoban Yihoowa, “Ta Aawaa” yaagiis. (Luqaasa 2:49) “Aawaa” giya qaalay Wonggeletun 190 gidiya sohuwan dees. Yesuusi Yihoowa ‘nu Aawaa,’ ‘ta Aawaa,’ “intte Aawaa” yaagidi dumma dumma ogiyan xeegiis. (Maatiyoosa 5:16; 6:9; 7:21) Yesuusi darotoo hegaadan xeesiyoogan polo gidenna nagarancha asaa naati Yihoowaara mata dabbotaa medhanaunne an ammanettanau danddayiyoogaa qonccissiis.

Maariyaagaanne atto giyaagaa Polo gidenna asaa naatuyyo Yihoowa maarotay keehi koshshiyoogaa Yesuusi eriis. Yesuusi bayi beettida naꞌaabaa yootido leemisuwan, ba mooruwaa aggidi simmiya naꞌaa ufayssan mokkiya, qarettiyaanne atto giya aawan Yihoowa leemisiis. (Luqaasa 15:11-32) Yaatiyo gishshau, Yesuusi giidobay nagarancha asa naatu wozanay maaranau danddayissiya hanotan laamettidaakkonne Yihooway beꞌiyoogaa nuuni ammanettanaadan oottees. Nagaraappe simmiya ura atto gaanau Yihooway wozanappe koyees. Yesuusi: “Taani intteyyo odiyoogee aibee giikko, hegaadan nagaraappe simmana koshshenna uddufun tammanne uddufun xillotun ufaittanaappe ba nagaraappe simmiya issi nagaranchchan saluwan de7⁠iyaageeti ufaittana” yaagiis. (Luqaasa 15:7) Hegaa mala maariya Xoossaakko shiiqanau koyennay oonee?

Woosaa siyiyaagaa Yesuusi saꞌaa yaanaappe kase saluwan deꞌiiddi, Yihooway ‘woosaa siyiyaagaa’ gidiyoogaanne ammanettidi baayyo goynniyaageetu woosan ufayttiyoogaa ba huuphe beꞌiis. (Mazamure 65:2) Yaatiyo gishshau, woygi woossana bessiyaakko, qassi aybaassi woossana bessiyaakko Yesuusi tamaarissiyoogeetussi yootiis. Yesuusi, “Mela biddoppite” yaagidi zoriis. Xoossaa “shenee saluwan hanidoogaadan, sa7ankka” hananaadan woossana mala, i yootiyoobaa ezggiyaageeta minttettiis. Nuuyyo galla galla koshshiya qumau, nu nagaray atto geetettanaadan, qassi paaciyaa xoonanaukka woossana danddayoos. (Maatiyoosa 6:5-13) Yihooway ba ashkkarati ammanuwan wozanappe oychiyoobaa kehatettan zaariyoogaa Yesuusi tamaarissiis.—Maatiyoosa 7:7-11.

Yihoowabaa tumaa, qassi i ay mala Xoossakko tamaarissanau Yesuusi wozanappe koyidoogee qoncce. SHin, Yesuusi Yihoowa xeelliyaagan tamaarissana koyido harabaykka deꞌees; hegeekka, ha saꞌaanne asaa naata xeelliyaagan Yihooway ba halchuwaa polanau kumetta saꞌaa laammanau goꞌettiyoobaa. Hegee Yesuusi tamaarissidobau waanna yoho.

[Tohossa qofata]