Wurssettaa Xeelliyaagan Denddiya Oyddu Oyshatu Zaaruwaa

YESUUS KIRISTTOOSI sinttappe ‘wurssettay gakkanaagaa’ yootiis. He wodiyaa xeelliyaagan i: “Sa7ai merettoosappe hachchi gakkanaashin de7⁠ibeennabainne qassi hagaappe sinttaukka mule de7⁠enna iita waayee he wode de7ana” yaagiis.—Maa. 24:14, 21.

Wurssettaa xeelliyaagan Yesuusi yootidobaynne Geeshsha Maxaafan deꞌiya hara xiqiseti daro oyshay denddanaadan oottoosona. He oyshatu zaaruwaa ne Geeshsha Maxaafaappe kessada aybissi xeellikkii?

1 Aybaa Wurssettee?

Geeshsha Maxaafay nuuni deꞌiyo saꞌay xayees geenna. Mazamuraawee: “[Xoossau] neeni sa7aa a baasuwaa bolli essadasa; i meri merinaukka qaaxxenna” yaagidi xaafiis. (Maz. 104:5) Saꞌan deꞌuwan deꞌiya ubbay muleera xaragettidi xayana giidikka Geeshsha Maxaafay tamaarissenna. (Isi. 45:18) Wurssetta bashshaappe amarida asay attanaagaa Yesuus Kiristtoosi ba huuphe yootiis. (Maa. 24:21, 22) Yaatin, aybi xayanaagaa Geeshsha Maxaafay yootii?

Giiga xayida asaa naatu haaroy xayana. “Saluwaa Xoossai mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana” giidi xaafanaadan hananabaa yootiya Daaneela Xoossay denttettiis.—Dane. 2:44.

Olay xayana; heeraa mooriyoogeekka attana. Mazamure 46:9y Xoossay oottanabaa: “I sa7aa gaxaa gakkanaassi de7⁠iya olaa teqqees; wonddafiyaa menttees; tooraa kinchchees; gonddalliyaakka taman xuuggees” yaagidi qonccissees. Xoossay “sa7aa xaissiyaageetakka” xayssanaagaa Geeshsha Maxaafay yootees.—Ajj. 11:18.

Danoynne pirdda pacay xayana. “Suure asatinne boree bainna asati biittan gam77⁠idi de7ana. SHin iitati biittaappe xoqollettana; ammanttennaageetikka shodettidi xayana” yaagidi Xoossaa Qaalay yootees.a—Lee. 2:21, 22.

2 Wurssettay Awude Yaanee?

Xoossaa Yihooway iitata xayssiyoonne ba Kawotettaa essiyo ‘wodiyaa’ keeriis. (Mar. 13:33) SHin Geeshsha Maxaafay nuuni wurssettay gakkiyo gallassaanne saatiyaa erana danddayennaagaa qoncciyan yootees. Yesuusi: “He gallassaanne he saatiyaa Aawaa xalaalaappe attin, harai atto saluwan de7⁠iya kiitanchchata gidin, woi tana Na7aa gidinkka ooninne eriyaabi baawa” yaagiis. (Maa. 24:36) SHin Yesuusinne i erissiyo ashkkarati Xoossay wurssettaa ehaanaappe kase saꞌan aybi hanettanaakko kasetidi yootidosona. Hagaappe kaallidi deꞌiya hanotati ubbay kumetta saꞌan issi wode polettiyo wode, wurssettay sohuwaara gakkana.

Taarikiyan hani erenna ogiyan polotikay, carkkuwaanne heeraa hanotay, issippetettaa duussay keehi moorettiis. Wurssettaa xeelliyaagan erissiyo ashkkarati oychido oyshaa Yesuusi: “Issi biittaa asai hara biittaa asaara olettana; qassi issi kawotettai hara kawotettaara olettana; biittaa qaattai ubbasan de7ana; koshaikka de7ana; shin hegee koiro leesso mala” yaagidi zaariis. (Mar. 13:8) Kiitettida PHauloosi hagaadan xaafiis: “Wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77⁠obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.”—2 Xim. 3:1-5.

Sabbakiyo oosoy alame yuushuwan daro qaalan oosettiiddi deꞌees. Yesuusi: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana” yaagiis.—Maa. 24:14.

3 Wurssettaappe Kaallidi Aybi Hananee?

Loꞌꞌo asa ubbay merinau saluwan deꞌanau saꞌaappe baana giidi Geeshsha Maxaafay tamaarissenna. Hegaappe dumma ogiyan, Xoossay koyro asaa naatuyyo halchidobay polettanaagaa Yesuusi tamaarissiis. Yesuusi: “Ashkketi anjjettidaageeta; aissi giikko, eti sa7aa laattana” yaagiis. (Maa. 5:5; 6:9, 10) Wurssettaappe kase hayqqidaageeti sinttappe denddanaagaa Geeshsha Maxaafay yootees. (Iyy. 14:14, 15; Yoh. 5:28, 29) Wurssettaappe kaallidi aybi hananee?

Yesuusi saluwan uttidi, Xoossaa Kawotettaa Kawo gididi haarana. Hananabaa yootiya Daaneeli hagaadan xaafiis: “Taani he qamma ajjuutan, asa na7a milatiyaagee [hayquwaappe denddida Yesuusi] saluwaa shaaraara yiyaagaa be7aas. Yiidaagee Merinaasappe De7⁠iyaagaakko [Xoossaa Yihoowakko] shiiqin, eti a a sintti aattidosona. Asai ubbai, kawotettati ubbainne dumma dumma qaalan haasayiya zareti ubbai ayyo [Yesuusayyo] haarettana mala, maatai, bonchchoinne kawotettai ayyo imettiis. A maatai merinau shaarettenna maataa; a kawotettai mulekka xayennaagaa.”—Dane. 7:13, 14; Luq. 1:31, 32; Yoh. 3:13-16.

Xoossaa Kawotettau haarettiyaageeti polo payyatettaa, merinaa woppaanne merinaa deꞌuwaa demmana. Hananabaa yootiya Isiyaasi: “He wodetun asati keettata keexxidi, etan de7ana; woiniyaa turatakka tokkidi, eta aifiyaa maana. Eti keexxin, harai de7⁠enna; harai maanau tokkiyoobaa tokkokkona” yaagidi xaafiis. (Isi. 65:21-23) He wodiyaa xeelliyaagan kiitettida Yohaannisi hagaadan xaafiis: “Xoossaa keettai asaara de7⁠ees; Xoossai asaara issippe de7ana. Eti a asa gidana; Xoossai ba huuphen etaara de7ana. I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7⁠enna. Aissi giikko, ceegabai xayiis.”—Ajj. 21:3, 4.

4 Bashshaappe Attanau Neeni Ay Oottana Bessii?

Xoossay asaa naatu allaalliyan kelttiyaa gelidi, iitatettaa saꞌaappe xayssanaagaa xeelliyaagan wurssetta wodiyan deꞌiya issoti issoti qilliiccanaagaa kiitettida PHeexiroosi yootiis. (2 PHe. 3:3, 4) Yaatikkonne, nu wodiyan deꞌiyaageeti kaallidi deꞌiya tangguwaa ekkanaadan PHeexiroosi zoriis.

Taarikiyaappe tamaara. “Xoossai nagaranchchatu bolli bashshaa haattaa yeddiisippe attin, beni asau kehibeenna; shin xillotettaabaa yootida Nohanne hara laappun asata ashshiis” yaagidi PHeexiroosi xaafiis. (2 PHe. 2:5) Qilliicciyaageeta xeelliyaagan PHeexiroosi hagaadan giis: “Daro wodiyaappe kase Xoossai haasayin, saloinne sa7ai merettidoogaa eridi, eti akeekennan ixxidosona. Sa7ai haattaappenne haattan merettiis. Qassi hegaa gaasuwan, he wode de7⁠iya sa7ai he haattan meetetti xayiis. SHin ha77⁠i de7⁠iya saloinne sa7ai, Xoossau goinnenna asati pirddettiyo gallassainne xayiyo gallassai gakkanaassi takkidi, he qaalan tamaa naagoosona.”b—2 PHe. 3:5-7.

Xoossay kessido maaraadan deꞌa. Wurssetta bashshaappe attanau koyiyaageeti, “geeshsha kandduwaa kaallanaunne Xoossau aqidoogaa bessiyaabaa oottana” koshshiyoogaa PHeexiroosi yootiis. (2 PHe. 3:11, NW) PHeexiroosi ‘geeshsha kandduwaa kaalliyoogaanne’ ‘Xoossau aqidoogaa bessiyaabaa oottiyoogaa’ qonccissidoogaa akeeka. Yaatiyo gishshau, coo ammanays giyoogaappe woykko bashshaappe attanau giidi Xoossaara dabbotanau maliyoogaappe aadhiyaabaa koshshees.

Nuuni ay oottiyoogan Xoossay ufayttii? Hegaa xeelliyaagan neeni eriyoobaa Geeshsha Maxaafay tamaarissiyoobaara aybissi geeddarssikkii? Yihoowa Markkati nena ufayssan maaddana. Eti zaariyoobaa ne Geeshsha Maxaafaappe bessanaadan oycha. Yashshiyaabay nu yuushuwan deꞌikkokka, hegaadan oottiyoogee neeni sintta wodiyaa ammanettada xalatettan naaganaadan maaddana danddayees.

[Tohossa qofata]

[Sinttaa 7n deꞌiya misiliyaa qonccissuwaa]

Saꞌay xayenna; shin saꞌaa mooriyaageeti xayana