Kiristtaane SHiiqoy Minttettiyaagaa Gidanaadan Koshshiyaabaa Ootteetii?
“Intte issippe shiiqiyo wode, . . . ubbabay minttettiyaagaa gido.” —1 QOR. 14:26, NW.
1. SHiiquwaa waanna halchuwaappe issoy, 1 Qoronttoosa shemppo 14y bessiyoogaadan aybee?
‘KEEHI minttettiya shiiqo!’ Kawotettaa Addaraashan shiiquwan beetti simmidi hegaadan gi ereetii? Intte hegaadan gi eriyoogau siree baawa! Gubbaaꞌe shiiqoti tumukka minttettiyaageeta gidiyoogee garamissenna. Beni Kiristtaanetu wodeegaadan, ha wodiyan shiiqotu waanna halchuwaappe issoy shiiquwan beettida ubbaa ayyaanaaban minttettanaassa. Kiitettida PHauloosi Qoronttoosa Kiristtaanetussi xaafido koyro dabddaabbiyan he halchuwaa waatidi qonccissidaakko akeekite. I shiiquwaa kifiliyaa ubbaa halchchoy hegaa mala, giishin gubaaꞌiyaa “dichchanau maaddiyaabaa” woy minttettiyaabaa gidana koshshiyoogaa shemppo 14n zaari zaaridi qonccissiis.—1 Qoronttoosa 14:3, 12, 26 nabbaba.a
2. (a) SHiiqoti minttettiyaageeta gidanaadan oottiyay aybee? (b) Woygiya oyshata beꞌanee?
2 SHiiqoti minttettuwaanne timirttiyaa demmiyoogeeta gidanaadan oottiyay Xoossaa ayyaanaa gidiyoogaa akeekoos. Hegaa gishshau, gubaaꞌe shiiquwaa ubbaa saluwan deꞌiya nu Aawaa Yihooway ba geeshsha ayyaanaa baggaara anjjanaadan wozanappe woossiyoogan doommoos. Gidikkokka, danddayettida keenan shiiqoy minttettiyaagaa gidanaadan gubaaꞌiyan deꞌiya ubbay oottiyoobay deꞌiyoogaa akeekoos. Yaatiyo gishshau, Kawotettaa Addaraashan saaminttan saaminttan shiiqiyo shiiqoti ubbatoo ayyaanaaban woppissiyaageetanne minttettiyaageeeta gidanaadan nuuni nu huuphen oottana danddayiyo issi issibati aybee?
3. Kiristtaane shiiqoti ay keena koshshiyaabee?
3 Hegaa zaaruwaa demmanau, nu shiiqota xeelliyaagan he shiiqota kaalettiyaageeti hassayana koshshiyo issi issibata pilggana. SHiiqoti shiiqiya ubbaa minttettiyaageeta gidanaadan kumetta gubaaꞌee oottana danddayiyoobaakka beꞌana. Nu shiiqoti geeshsha gidiyo gishshau, ha allaallee nuuni xoqqu oottidi xeelliyooba. SHiiqotun beettiyoogeenne qofaa immiyoogee, nuuni Yihoowau goynniyoogan keehi koshshiyaaba gidiyoogee qoncce.—Maz. 26:12; 111:1; Isi. 66:22, 23.
Geeshsha Maxaafaa Xannaꞌanau Giigida SHiiquwaa
4, 5. Wochiyo Keelaa Xinaatiyaa halchoy aybee?
4 Nuuni ubbay Wochiyo Keelaa xinaatiyaa shiiquwaappe loytti goꞌettanau koyoos. Yaatiyo gishshau, he shiiquwau waanna halchuwaa loytti akeekanau, Wochiyo Keelaa maxeetiyaaninne xannaꞌiyo huuphe yohotun laamettida issi issibata ane zaarettoos.
5 Ichashe 15, 2008, Wochiyo Keelaa, xinaatiyau giigida koyro maxeetiyaappe doommidi, koyro sinttan keehi qoncce gidida issibay deꞌees. Intte hegaa akeekidetii? Hara doonan xinaatiyau giigida maxeetetu koyro sinttan gimbbee deꞌees. Qassi gimbbiyaappe tohossa baggan dooyetti uttida Geeshsha Maxaafay deꞌiyoogaa akeekeeta. Hegee Wochiyo Keelaa Xinaatiyaa shiiqoy koshshido gaasuwaa qonccissees. Hegee koshshidoy ha maxeetiyaa goꞌettidi Geeshsha Maxaafaa xannaꞌanaassa. Ee, saaminttan saaminttan nu xannaꞌiyo Wochiyo Keelaa Xinaatiyan Xoossaa Qaalay ‘qonccees’; qassi Nahimiyaa wodiyaagaadan, hegee ‘woygiyoogaakko birshshettees.’—Nah. 8:8; Isi. 54:13.
6. (a) Wochiyo Keelaa Xinaatiyaa xeelliyaagan laamettidabay aybee? (b) “Nabbaba” giya xiqiseta xeelliyaagan ay hassayana koshshii?
6 Geeshsha Maxaafay nuuni xannaꞌiyo waanna xuufe gidiyo gishshau, Wochiyo Keelaa Xinaatiyan issi issibay laamettiis. Xannaꞌiyo huuphe yohotun amarida xiqisetuppe kaallidi “nabbaba” yaagiyaagee dees. SHiiquwan he xiqiseti nabbabettiyo wode, nuuni ubbay nu Geeshsha Maxaafaa kessidi kaallanaadan minttettoy imettiis. (Oos. 17:11) Aybissi? Xoossaa zoriyaa nu Geeshsha Maxaafan beꞌiyo wode, nuna keehippe bochees. (Ibr. 4:12) Hegaa gishshau, he xiqiseti nabbabettiyo wode ubba asay kessidi kaallana mala, nabbabettanaappe kase shiiquwaa kaalettiyaagee gidiya wodiyaa immana koshshees.
Nu Ammanuwaa Qonccissanau Daro Wodiyaa Demmoos
7. Wochiyo Keelaa Xinaatiyaa wode nuuyyo waatiyo injjee deꞌii?
7 Wochiyo Keelaa xannaꞌiyo huuphe yohota xeelliyaagan laamettida harabay, mata wodeppe doommidi huuphe yohoti qaammidosona. Yaatiyo gishshau, Wochiyo Keelaa xannaꞌiyo wode, menttota nabbabiyoogee guutta wodiyaa ekkiyo gishshau, qofaa immanau daro wodee deꞌees. Maxeetiyan deꞌiya oyshau zaaruwaa immiyoogan, xiqisiyaa qofaa qonccissiyoogan, Geeshsha Maxaafaa baaso siraataa kaalliyoogee eratetta gidiyoogaa bessiya qantta temokruwaa yootiyoogan woykko hara ogiyan, gubaaꞌiyan deꞌiya daroti haꞌꞌi bantta ammanuwaa qonccissiyo injjee deꞌees. Misiliyaa xeelliyaagan tobbanaukka guutta wodiyaa goꞌettana koshshees.—Maz. 22:22; 35:18; 40:9 nabbaba.
8, 9. Wochiyo Keelaa Xinaatiyaa kaalettiyaagee oottiyoobay aybee?
8 Gidoppe attin, dumma dumma qofaa immanau wodiyaa demmana danddayiyoy, qofaa immiyaageeti qantta qofaa immiyoogaanne shiiquwaa kaalettiyaagee Wochiyo Keelaa Xinaatiyaa wode darotoo qofaa immennan aggiyoogaa xallaana. Yaatiyo gishshau, shiiqoy ubbaa minttettiyaagaa gidanaadan kaalettiyaagee ba huuphen gidin, haratikka bessiyaagaadan qofaa immanaadan oottanau a aybi maaddana danddayii?
9 Hegaa zaaranau, issi leemisuwaa akeekite. Loꞌꞌo hanotan kaalettido Wochiyo Keelaa Xinaatee, beꞌanau ufayssiya issippe wottido dumma dumma ciishsha mala. Dumma dumma cora ciishshaa shiishshidoogaa giddon daro ciishshay deꞌiyoogaadan, Wochiyo Keelaa Xinaatiyankka dumma dumma daro qofay deꞌees. Issippe shiishshido cora ciishshay yesuwaaninne meran dummatiyoogaadan, shiiquwan immiyo qofaa aahotettaynne hegaa immiyo ogee dumma dumma. Kaalettiyaagee oottiyoobay aybee? I immiyo qofay issippe shiishshido cora ciishshaa giddon deꞌiya ciishshaa hayttaa mala. He hayttay daro sohuwaa oyqqana koshshenna; hegaappe, loyttanaunne issippe gattanau maaddiyaaba. Hegaadankka, kaalettiyaagee immiyo qofay waanna sohuwaa oyqqiyaagaa gidennan, harati Yihoowa sabbanau immiyo qofaa minttiyaagaa gidiyoogaa i akeekana koshshees. Ee, shiiquwan deꞌiyaageeti immiyo dumma dumma daro qofaynne kaalettiyaagee bessiya sohuwan immiyo guutta qofay issippe gayttiyo wode, issippe shiishshido cora ciishshadan shiiqida asaa ubbaa ufayssiyaagaa gidees.
Xoossaayyo “Ubba Wode Galataa Yarshshuwaa Immoos”
10. Beni Kiristtaaneti gubaaꞌiyaa shiiqota waatidi xeellidonaa?
10 PHauloosi 1 Qoronttoosa 14:26-33n gubaaꞌiyaa shiiquwaabaa yootidoogee, koyro xeetu layttan he shiiqota kaalettiyo ogiyaa nuuni akeekanaadan maaddees. He xiqiseta xeelliyaagan Geeshsha Maxaafaa erancha issoy, “Beni Woosa keettan oosettiyaaban keehippe erettidabay shiiquwaa yiya ubbay issibaa oottiyo maatay deꞌiyoogaanne hegaa oottana bessiyoogaa akeekiyoogaa gidennan aggenna. Issi uri coo giidi siyana xallau yeenna; i yiyoy ekkana xallaassa gidennan immanaassa” yaagidi xaafiis. Beni Kiristtaaneti gubaaꞌiyaa shiiqota eti ammaniyoobaa yootiyo injjedan xeellidoogee tuma.—Roo. 10:10.
11. (a) Gubaaꞌiyaa shiiqoti minttettiyaageeta gidanaadan keehippe maaddiyay aybee, aybissi? (b) Gubaaꞌiyan kaseegaappe loꞌꞌo qofaa immanau ayba zoriyaa oosuwan peeshshiyoogee maaddana danddayii? (Tohossa qofaa xeella.)
11 Nuuni ammaniyoobaa shiiquwan yootiyoogee gubaaꞌiyaa keehippe ‘maaddiyaaba.’ Intte shiiquwaa yiiddi takkidoy daro layttassa gidin gidana xayin, nu ishatinne michoti immiyo qofaa siyiyoogee keehi ufayssiyaaba. Issi cimida, ammanettida Kiristtaanee wozanappe immiyo qofay nuna denttettees; nuussi qoppiya issi gubaaꞌe cimay nubaa akeekiyo wode keehippe minettoos; issi guutta naꞌay Yihoowa wozanappe siiqiyoogaa bessiyaabaa haasayiyo wode pashkki goos. Qofaa immiyoogan, nuuni ubbay Kiristtaane gubaaꞌee minttettiyaagaa gidanaadan oottiyoogee qoncce.b
12. (a) Muusenne Ermmaasa leemisuwaappe ay tamaarana danddayiyoo? (b) Qofaa immanaadan woosay waatidi maaddana danddayii?
12 Gidoppe attin, qofaa immiyoogee dungguuxatuyyo keehippe metiyaaba gidana danddayees. Intte hanotay hegaa mala gidikko, hegee oorattaba gidennaagaa akeekiyoogee maaddana danddayees. Muusenne Ermmaasa mala ammanettida Xoossaa ashkkaratikka, asaa haasayissanau eray banttau paca gidiyoogaa yootidosona. (Kes. 4:10; Erm. 1:6) SHin, Yihooway bau oottiya he asati asaa sinttan bana sabbanaadan maaddidoogaadan, inttekka ayyo galataa yarshuwaa shiishshanaadan maaddana. (Ibraawe 13:15 nabbaba.) Qofaa immanau yayyiyoogaa xoonanau, Yihoowappe waatidi maaduwaa demmana danddayeetii? Koyruwan, shiiquwau loyttidi giigettite. Yaatidi, Kawotettaa Addaraashaa baanaappe kase, qofaa immanau xalatettaa inttessi immanaadan Yihoowa minttidi woossite. (Pili. 4:6) Intte oychiyoy Yihooway ‘koyiyoogaadaana’ gidiyo gishshau, i intte woosaa zaaranaagaa ammanettana danddayeeta.—1 Yoh. 5:14; Lee. 15:29.
‘Gazddissiyaanne Minttettiya’ SHiiqota
13. (a) Nu shiiqoti shiiquwan beettidaageeta waatana koshshii? (b) Cimatuyyo keehippe koshshiya oyshay awugee?
13 SHiiquwau waanna halchotuppe issoy, shiiquwan beettidaageeta ‘gazddissiyoogaanne minttettiyoogaa.’c (1 Qor. 14:3, NW) Ha wodiyan deꞌiya gubaaꞌe cimati shiishshiyo kifilee bantta ishanttanne michontta minttettiyoogaanne gazddissiyoogaa waatidi erana danddayiyoonaa? Zaaruwaa demmanau, Yesuusi hayquwaappe denddi simmidi takkennan kaalettido shiiquwaabaa ane qoppoos.
14. (a) Yesuusi xeesido shiiquwaappe kase aybi hanidee? (b) “Yesuusi etakko shiiqidi, eta [haasayissido]” wode kiitettidaageeti woppaa demmidoy aybissa gidana danddayii?
14 Koyruwan, he shiiquwaappe kase hanettidabaa qoppite. Yesuusi hayqqanaappe kase, kiitettidaageeti “a yeggi bayidi baqatidosona”; qassi kasetidi odettidaagaadan, ‘eti bantta soo bantta soo laalettidosona.’ (Mar. 14:50; Yoh. 16:32) Hegaappe simmin, Yesuusi hayquwaappe denddidi, azzanida ba kiittidoogeeta dumma shiiquwau xeesiis.d Hegaa siyidi, “tammanne isiini erissiyo ashkkarati Yesuusi banttana biite giido Galiila Deriyaa biidosona.” Eti yaa gakkido wode, “Yesuusi etakko shiiqidi, eta [haasayissiis].” (Maa. 28:10, 16, 18) Yesuusi kasetidi hegaadan oottidoogan kiitettidaageeti ay keena woppaa demmidaakko qoppite! Yesuusi etau ay yootidee?
15. (a) Yesuusi yootido allaalleti aybee, shin ay gibeennee? (b) He shiiqoy kiitettidaageeti waananaadan oottidee?
15 Yesuusi, “Maata ubbai . . . taayyo imettiis” yaagidi yootiyoogan shiiquwaa doommiis. Yaatidi, “Biidi, asa ubbaa tana kaalliyaageeta oottite” yaagidi etau oosuwaa immiis. Wurssettan, “Taani wodiyaa wurssettai gakkanaassikka ubba wode inttenaara de7iyoogaa akeekite” yaagidi, siiquwan minttettiis. (Maa. 28:18-20) SHin Yesuusi oottibeennabaa akeekidetii? I ba kiittidoogeeta seeribeenna; eta qofaa siriyoogaa bessanau woykko guutta wodiyau eta ammanoy shuggidoogaa denttidi, etau keehippe siyettanaadan oottanau he shiiquwaa goꞌettibeenna. Hegaappe, etau gita oosuwaa immiyoogan inne a Aaway eta siiqiyoogaa ammanettanaadan oottiis. Yesuusi haasayissido hanotay kiitettidaageeti waananaadan oottidee? Eti keehippe gazddidonne minettido gishshau, he shiiquwaappe guutta wodee aadhi simmin, “tamaarissiyoogaanne yootiyoogaa yaa gujjidosona.”—Oos. 5:42.
16. Minttettiya shiiquwaa kaalettiyoogan, ha wodiyan Kiristtaane cimati Yesuusa leemisuwaa waatidi kaalliyoonaa?
16 Ha wodiyan gubaaꞌiyaa cimati Yesuusa leemisuwaa kaallidi, shiiquwaa Yihooway ba asaa siiqiyoogaa aggennaagaa bantta mala Kiristtaaneti ammanettanaadan oottiyo injjedan xeelloosona. (Roo. 8:38, 39) Yaatiyo gishshau, cimati shiiquwan shiishshiyo kifiliyan bantta ishanttu pacan gidennan, eta loꞌꞌo oosuwan xeelaa wottoosona. Bantta ishanttu qofaa sirokkona. Hegaappe, bantta mala Kiristtaaneti ubbay Yihoowa siiqiyoogaadaaninne suurebaa oottanau koyiyoogaadan xeelliyoogaa qonccissiyaabaa yootoosona. (1 Tas. 4:1, 9-12) Cimati issi issitoo gubaaꞌee giigissana koshshiyoobaa zorana bessiyoogee qoncce; shin zoree koshshiyoy amaridaageetu xallaassa gidikko, darotoo he asata buzo zoriyoogee loꞌꞌo. (Gal. 6:1; 2 Xim. 2:24-26) Cimati kumetta gubaaꞌiyau haasayaa shiishshiyoode, bessiya wode ubban galatoosona. (Isi. 32:2) Eti, shiiqoy kuuyettiyo wode shiiquwan beettida ubbay woppaanne minttettuwaa demmanaadan oottiya ogiyan haasayanau baaxetoosona.—Maa. 11:28; Oos. 15:32.
Nu SHiiqoti Minettiyo Soho
17. (a) Nu shiiqoti minettiyo soho gidiyoogee awudeegaappenne aaruwan koshshiyoy aybissee? (b) SHiiqoy minttettiyaagaa gidanaadan ay oottanau danddayay? (“SHiiqoy Nenanne Harata Minttettanaadan Oottiyo Tammu Ogeta” giya saaxiniyaa xeella.)
17 Seexaanaa alamee huqqunniyoogaa gujji gujji biyo wode, nu shiiqoti ubba asay minttettuwaa demmiyo soho gidana koshshees. (1 Tas. 5:11) Amarida layttappe kase issi michiyoonne i azinaa iita metoy gakkiis; he michiyaa, “Kawotettaa Addaraashan shiiquwan beettiyoogee Yihoowa qesiyan idimettiyoogaa mala. Nu ishatuuranne nu michotuura yan aattiyo saatiyan nu tohuwaa Yihoowa bolli wottiyoobadan nuuyyo siyettees; qassi amarida hanotan woppaa demmoos” yaagaasu. (Maz. 55:22) Nu shiiquwan beettiya ubbay hegaadan minettanaadan amottoos. Hegaadan hanana mala Kiristtaane shiiqoti minttettiyaageeta gidanaadan nuuppe koyettiyaabaa ubbatoo oottoos.
[Tohossa qofata]
a Koyro xeetu laytta gubaaꞌe shiiqotun hanettiya issi issibay attanaagee kasetidi odettiis. Leemisuwau, ha wodiyan ‘dumma dumma qaalan haasayokko’ woykko ‘hananabaa yootokko.’ (1 Qor. 13:8; 14:5) Hegaadan gidikkokka, PHauloosa zoree, ha wodiyan gubaaꞌe shiiquwaa waatidi kaalettana koshshiyaakko loyttidi akeekanaadan maaddees.
b Gubaaꞌiyan kaseegaappe loꞌꞌo qofaa immanau maaddiya zoriyaa demmanau, Wochiyo Keelaa, Masqqala 1, 2003, sinttaa 19-22 xeella.
c “Minttettiya” geetetti birshshettida qaalati Giriikettuwan naaꞌꞌa. Vayns Ekispoziteri Dikshineeri of Old end Niwu Testtament Words giyo maxaafay, he qaalatuppe issoy hankkuwaappe aaruwan qarettiyoogaa bessiyaaba gidiyoogaa qonccissees.—Yohaannisa 11:19ra gatta xeella.
d Hegee guyyeppe PHauloosi, Yesuusi “ichchashu xeetaappe dariya ishatussi issitoo qoncciis” giido wodiyaa gidana danddayees.—1 Qor. 15:6.
Woygada Zaaruutii?
• Gubaaꞌiyaa shiiqoti ay keena koshshiyaabee?
• SHiiquwan immiyo qofay gubaaꞌiyaa minttettanau maaddiyoy aybissee?
• Yesuusi erissiyo ashkkaratuura shiiqido shiiquwaa kaalettido hanotaappe ay tamaarana danddayiyoo?
[Sinttaa 26n diya misiliyaa]
SHIIQOY NENANNE HARATA MINTTETTANAADAN OOTTIYO TAMMU OGETA
Kasetada giigetta. Gubaaꞌiyan tobbiyo xuufiyaa kasetada neeni xannaꞌiyo wode, shiiquwaa ufayssan kaallaasa; qassi hegaa loyttada akeekaasa.
Ubbatoo shiiquwan beetta. Daro asay shiiqiyoogee shiiqida ubbaa minttettiyo gishshau, neeni shiiquwan beettiyoogee maaddees.
Kasetada gakka. Neeni shiiqoy doommanaappe kase gakkiyaaba gidikko, Yihoowau goynniyoogaa shaaho gidida, doometta mazamuriyaaninne woosan shaahettana danddayaasa.
Koshshiya ubbabaa ekkada ya. Tobbiyoobaa kaallanaunne loytta akeekanau, ne Geeshsha Maxaafaanne shiiquwan goꞌettiyo xuufeta ekkada ya.
Qofay laalettanaadan oottiyaabaappe haakka. Leemisuwau, moobbaliyan yiida kiitaa shiiquwaa wode gidennan, shiiqoy wuri simmin nabbaba. Hegaadan oottiyoogan, ne buzo allaalliyaa bessiyaagaadan oyqqaasa.
Qofaa imma. Daro asay qofaa immiyo wode, ammanuwaa qonccissiya dumma dumma qofan daroti minettoosonanne gazddoosona.
Qantta qofaa imma. Hegee danddayetta keenan daroti qofaa immanaadan injjiyaa medhees.
Neeyyo imettidabaa shiishsha. Tiꞌokiraase Haggaazo Timirtte Keettan tamaare kifilee woy Haggaazo SHiiquwan shiishshiyoobi deꞌiyo wode, loytta giigetta, kasetada meezeta, qassi shiishshennan aggenna mala baaxeta.
SHiishshidaageetanne qofa immidaageeta galata. SHiiquwan shiishshiyooban shaahettidaageetinne qofaa immidaageeti oottidobaa keehippe nashshiyoogaa etau yoota.
Haratuura dabbotaa medha. SHiiquwaappe kasenne shiiquwaappe simmin sarotiyoogeenne minttettiyaaba haasayiyoogee, shiiquwan beettiyoogan keehippe ufayttanaadaaninne goꞌettanaadan maaddees.