Ooratta Inggilizetto Wochiyo Keelaa Erissiyoogaa
AKEEKANAU metenna Inggilizetto Wochiyo Keelay ha aginaappe doommidi kiyiyoogaa erissiyoogan keehippe ufayttoos. Ha ooratta maxeetiyaa issi layttau mali beꞌidi, goꞌꞌiyaaba gidikko ubbatoo attamana. Ha maxeetiyan xannaꞌiyo huuphe yohoynne sohoy palahiyaaba gidikko, hara huuphe yohoykka kiyana. Hagee daro Yihoowa Markkata ayyaanaaban keehippe maaddanaagaa ammanettoos. Hegee koshshidoy aybissee?
Alame yuushuwan daro biittatun deꞌiya Yihoowa Markkati Inggilizettuwaa haasayoosona. He biittatun deꞌiya Yihoowa Markkati he biittan deꞌiya hara qaalaa haasayiyaaba gidikkokka, gubaaꞌiyaa shiiquwaaninne haggaazuwan ubbatoo Inggilizettuwaa goꞌettoosona. Gidikkokka, nu xuufiyan goꞌettiyo Inggilizettuwaa eti akeekanau metootoosona. Qassi, Inggilizettuwaa loyttidi haasayenna Yihoowa Markkati, Inggilizettuwaa haasayiyo biitta biidi deꞌoosona. Hegaa bollikka, bantta qaalan shiiqiyo gubaaꞌe shiiqotun beettana danddayokkona.
Nuuni saaminttan saaminttan xannaꞌiyo Wochiyo Keelaa huuphe yohoti, koshshiyo wodiyan giigiya ayyaana qumaa nuuni miyo waanna oge. Yaatiyo gishshau, shiiquwan beettida ubbay xannaꞌiyoobaappe kumetta hanotan goꞌettanau maaddana mala, akeekanau metenna ogiyan Inggilizetto Wochiyo Keelaa giigissana koshshiis. Ha ooratta Wochiyo Keelau koyro sinttay haraagaappe dummatees. Xannaꞌiyo huuphe yohotun deꞌiya sima huuphe yohotu, menttotu, zaareto oyshatunne misiletu qofay hankkuwaagaara issi mala. Yaatiyo gishshau, Wochiyo Keelaa Xinaatiyaa wode naaꞌꞌaappe awugaanne oyqqidi kaallanaunne qofaa immanau danddayettees. Naaꞌꞌaa giddon deꞌiya qaalaa dummatettaa akeekanau, ha maxeetiyan xannaꞌiyo koyro huuphe yohuwaa mentto 2ppe ekettida leemisuwaa hagaappe garssan beꞌite.
Ha ooratta giigissoy Yihoowa, “Ne azazuwaa taani tamaarana mala taayyo akeekaa imma” yaagidi woossida darotu woosaa zaaro gidanaagaa hidootoos. (Maz. 119:73) Inggilizettuwaa loyttidi erennaageetinne Inggilizettuwaa haasayiya issi issi yelaga naati ubba saaminttan Wochiyo Keelaa Xinaatiyau loyttidi giigettanau hegee maaddanaagaa ammanettoos. Yihooway alame yuushuwan deꞌiya ‘ishantta siiqiyoogaappe’ denddidaagan ayyaanaabaa qumaa palahissidi immanau ‘ammanettida wozannaama ashkkaraa’ goꞌettiyo gishshau nuuni a keehippe galatoos.—1 PHe. 2:17; Maa. 24:45.
Yihoowa Markkata Bollaara Heemmiyaagaa