Naati Tamaarana Koshshiyaabay Aybee?

“Xoossaa maxaafa ubban Xoossaa Ayyaanai de7ees. Qassi he maxaafati . . . tumatettaa tamaarissanau, balaa seeranau, mooruwaa suurissanaunne xillotetta de7uwau zoriyaa immanau maaddoosona.”—2 XIM. 3:16, 17.

NAATI Xoossaabaa tumaa tamaarana koshshees. Eti he tumaa awuppe tamaarana danddayiyoonaa? Alamiyan keehi bonchettiya haymaanoote maxaafaa, Geeshsha Maxaafaappe tamaarana danddayoosona.

Geeshsha Maxaafay Xoossay kiittido dabddaabbe mala. He dabddaabbiyan, Xoossay ba eeshshaa qonccissiis; qassi yelagatanne cimata gujjin ba naati ubbay kaallana bessiya kandduwaa maaraa giigissiis. Yelaga naatikka etappe timirtte demmana danddayiyo, Geeshsha Maxaafay tamaarissiyoobatuppe amaridaageeta ane beꞌite.

Xoossay Nuuni Abaa Ay Eranaadan Koyii?

◼ Geeshsha Maxaafay Tamaarissiyoobaa: “Neessi sunttay Yihoowa gididoogee, ne xallay saꞌa ubban Ubbaappe Xoqqiya Xoossaa.”—Maz. 83:18, NW.

Hegaappe Tamaariyoobaa: Xoossay buzo sunttay deꞌiyo, qoncce gididi deꞌiyaagaa.

◼ Geeshsha Maxaafay Tamaarissiyoobaa: “GODAI wozanaa ubbaa qorees; qofan de7iya halchchuwaa ubbaakka erees. Neeni a koyikko, i neeyyo beettana.”—1 Odi. 28:9.

Hegaappe Tamaariyoobaa: Xoossaa Yihooway guutta naata gujjin nu ubbaayyo qoppees. (Maz. 10:14; 146:9) Nuuni abaa eranaadan koyees.

◼ Geeshsha Maxaafay Tamaarissiyoobaa: “Aawai haiqqido hiyyeesaa un77oppite. Intte eta un77in, eti taakko waassikko, taani eta waasuwaa tumuppe siyana.”—Kes. 22:22-24.

Hegaappe Tamaariyoobaa: Yihooway guutta naatu woosaakka siyees. Nuuni ubbatoo Xoossaa haasayissana, qassi nu wozanaa qofaanne nuuyyo siyettiyaabaa au yootana danddayoos.

◼ Geeshsha Maxaafay Tamaarissiyoobaa: “Eti zaari zaaridi, Xoossaa paaccidosona; Israa7eela Geeshshaa hanqqetissidosona.”—Maz. 78:41.

Hegaappe Tamaariyoobaa: Nu haasayaynne oosoy Yihoowa ufayssana woy azzanttana danddayees; yaatiyo gishshau, nuuni issibaa haasayanaappe woy oottanaappe kase qoppana koshshees.

Nu Zare Gidennaageeta Waatidi Oyqqana Koshshii?

◼ Geeshsha Maxaafay Tamaarissiyoobaa: “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa [galatees.]”—Oos. 10:34, 35.

Hegaappe Tamaariyoobaa: Xoossay asa asappe shaakkennaba gidikko, nuunikka eta meray nuugaappe dummato gishsha xallau harata shaakki xeellana koshshenna.

◼ Geeshsha Maxaafay Tamaarissiyoobaa: “Xoossai intteyyo immana giido inttenan de7iyaagau gaaso oichchiya ooyyoonne zaaro immanau ubba wode giigi uttite; shin hegaa ashkketettaaninne yashshatettan oottite.”—1 PHe. 3:15.

Hegaappe Tamaariyoobaa: Haymaanootiyaabaa asaara haasayiyo wode, hanqqettennan ammanttiya ogiyan nu qofaa qonccissana koshshees. Eta haymaanootee nuugaappe dummatiyoogeetakka bonchana koshshees.

Nu Soo Asaa Waatidi Oyqqana Koshshii?

◼ Geeshsha Maxaafay Tamaarissiyoobaa: “Naatoo, inttena yelidaageetuyyo ubbaban azazettite. Aissi giikko, intte etau azazettiyoogee Xoossaa daro ufaissees.”—Qol. 3:20.

Hegaappe Tamaariyoobaa: Azazettiya naati banttana yelidaageeta siiqiyoogaa xalla gidennan, Xoossaa ufayssanau koyiyoogaakka qonccissoosona.

◼ Geeshsha Maxaafay Tamaarissiyoobaa: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago. Kiristtoosi intteyyo atto giidoogaadan, inttekka atto giite.”—Qol. 3:13.

Hegaappe Tamaariyoobaa: Nu soo asaa gujjin, hara asay issi issitoo nuna yiilloyana danddayees. SHin Xoossay nuuyyo nu mooruwaa atto gaanaadan koyiyaaba gidikko, nuunikka haratuyyo eta mooruwaa atto giyoogaa tamaarana koshshees.—Maa. 6:14, 15.

Ammanettiyaageetanne Keha Gidana Bessiyoy Aybissee?

◼ Geeshsha Maxaafay Tamaarissiyoobaa: “Worddotoppite. . . . asai ubbai ba ishau tumaa haasayanau bessees.”—Efi. 4:25.

Hegaappe Tamaariyoobaa: Nuuni tumaa haasayiyo wode Xoossaa leemisuwaa kaalloos; qassi a ufayssoos. Nuuni worddotiyoogaa meeze oottidaba gidikko, Xoossaa morkkiyaa, “[wordduwaa] aawa” Dabloosa mala gidoos.—Yoh. 8:44; Tii. 1:2.

◼ Geeshsha Maxaafay Tamaarissiyoobaa: “Hara asi intteyyo oottanau koyiyo ubbabaa inttekka asau oottite.”—Maa. 7:12.

Hegaappe Tamaariyoobaa: Nu soo asaunne nu heeran deꞌiya hara asau siyettiyaabaa, etau koshshiyaabaanne eta qofaa akeekana bessees. Nuuni haratuyyo ‘qarettiyo’ wode, etikka nuussi qarettana danddayoosona.—1 PHe. 3:8; Luq. 6:38.

Hagaappe kase deꞌiya leemisoti bessiyoogaadan, Geeshsha Maxaafay tamaarissiyoobay naati gasttiyo wode harata nashshiyaageeta, bonchiyaageetanne etau qarettiyaageeta gidanaadan maaddana danddayees. SHin naata hegaa ooni tamaarissana bessii?