Naata Xoossaabaa Tamaarissana Bessiyay Oonee?
“Tamaariyaagee bana tamaarissiyaagaappe aadhdhenna; shin tamaaridi wurssida ubbai tamaarissiyaagaa mala gidees.”—LUQ. 6:40.
YELIDAAGEETUPPE issoti issoti bantta naata Xoossaabaa tamaarissanau banttau giday baynnabadan qoppoosona. Loꞌꞌo asttamaare gidanau, koshshiyaagaa keenaa tamaaribeennabadan woy haymaanootiyaabaa loyttidi erennabadan qoppana danddayoosona. Hegaappe denddidaagan, ha keehippe koshshiya oosuwaa bantta dabbuwaappe issoy woy haymaanootiyaa kaalettiyaagee oottanaadan koyana danddayoosona.
SHin, naata haymaanootiyaa tumaanne kandduwaa maaraa tamaarissanau giday deꞌiyoy tumuppe oonee? Hegaa xeelliyaagan Geeshsha Maxaafay woygiyaakko beꞌite; qassi pilggiyaageeti giidobaara he qofaa gatti xeellite.
Aawaa Aawatettay Aybee?
Geeshsha Maxaafay Tamaarissiyoobaa: “Aawatoo, intte intte naata Godaa seeraaninne zoriyan dichchiteppe attin, eta hanqqetissoppite.”—Efi. 6:4.
Pilggiyaageeti akeekidobaa: Aawati haymaanootiyaabaa minttidi ammaniyaaba gidikko waanidi goꞌꞌettiyoonaa? Fazers Rilijes Involvment end Erily CHayldihud Bihever giyo, 2009n attamettida xuufee hagaadan gees: “Haymaanootiyaa kaalliya asaara issippe deꞌiyoogee attuma asay loꞌꞌo aawa gidanaadan maaddana danddayees. Haymaanootee issi uri deretettan naaguwaanne maaduwaa demmanaadan oottees; hegaadankka waanidi loꞌꞌo hanotan deꞌanaakko tamaarisseesinne kaalettees.”
Naata dichiyoogaaninne loohissiyoogan aawati oottiyoobay keehippe koshshiyoogaa Geeshsha Maxaafay minttidi qonccissees. (Lee. 4:1; Qol. 3:21; Ibr. 12:9) SHin he zoree ha wodiyankka goꞌꞌii? Filoorida Yuniversittee, aawati bantta naata goꞌꞌiyoogaabaa yootiya xuufiyaa 2009n attamissiis. Aawati loyttidi dichido naati haratuppe aaruwan qarettiyaageetanne banttana xoqqu oottidi xeelliyaageeta gidana danddayiyoogaa pilggiyaageeti akeekidosona. Attuma naati iita eeshshaa darin bessennan aggana danddayoosona; qassi macca naatussi daro baggi guuggee payya gidanaadan maaddana danddayees. Geeshsha Maxaafaa zoree ha wodiyankka goꞌꞌiyoogee qoncce.
Aayyiyaa Oottiyoobay Ay Keena Koshshiyaabee?
Geeshsha Maxaafay Tamaarissiyoobaa: “Ne aayyiyaa tamaarissiyoogaakka karoppa.”—Lee. 1:8.
Pilggiyaageeti akeekidobaa: Handbuuk of CHayld Saykolooji giyo, 2006n attamettida maxaafay, “Aayyiyaa amakaayiyan 65%ppe biidi 80% gidiyaagaa aawaagaappe dariya wodiyaa naata huuphiyan huuphiyan loohissiyoogan aattausu; qassi daro biittatun qooday hegaa mala” yaagidi yootiis. Hegaa keena wodiyaa issippe aattiyoogan, aayyiyaa haasayiyoobay, oottiyoobaynne i eeshshay naꞌaa dichau keehippe maaddees.
Naata Xoossaabaa tumaa tamaarissanau aayyiyaanne aaway hashetidi oottiyo wode, guuxxiis giishin etau naaꞌꞌu alꞌꞌo imotaa immoosona. Koyruwan, naati saluwan deꞌiya bantta Aawaara, deꞌo laytta ubban banttana goꞌꞌana danddayiya dabbotaa medhanaadan hanotay injjetees. Naaꞌꞌanttuwan, azinaynne machiyaa keehippe koshshiya hoolliyaa gakkanau waanidi hashetidi oottana koshshiyaakko eta leemisuwaappe tamaaroosona. (Qol. 3:18-20) Harati aawaanne aayyiyo maaddana danddayikkokka, naata Xoossaabaa tumaa, qassi so asay waanaanaadan Xoossay koyiyaakko tamaarissiyo aawatettay deꞌiyoy yelidaageetussa.
Yaatin, yelidaageeti bantta naata waatidi tamaarissana koshshii? Keehippe goꞌꞌiya ogeti awugeetee?