Naata Xoossaabaa Tamaarissiyo Ogiyaa UBBAAPPE LOꞌꞌO OGEE AWUGEE?

“Hachchi taani nena azaziyo ha azazota ne wozanan wotta. Eta neeni ne naata tamaarissa; neeni ne son uttiyo wode, ogiyan hemettiyo wode, zin77iyo wodenne denddiyo wode etabaa haasaya.”—ZAA. 6:6, 7.

YELIDAAGEETI naata loohissiyo aawatettay issi issitoo deexxiyaabadan qoppana danddayoosona. Gidikkokka, eti zore koyiyo wode, demmiyo keehi daro zoree hidootaa qanxxissana danddayees. Darotoo dabbotinne laggeti eta qofaa kaallanaadan koyoosona. Yelidaageetussi kirqqi gaanaadan oottiya, darotoo issoy issuwaara moggenna qofay maxaafatun, maxeetetuuninne Intternneetiyan ubbatoo kiyees.

Hara baggaara, Geeshsha Maxaafay yelidaageeti bantta naata ay tamaarissanaakko ammanttiya zore xalla gidennan, waati tamaarissanaakko goꞌꞌiya kaaletuwaakka oyqqiis. Hagaappe qommoora deꞌiya, Geeshsha Maxaafaa xiqisee bessiyoogaadan, yelidaageeti galla galla bantta naatuura Xoossaabaa haasayiyo issi issi ogiyaa koyana bessees. Miilooniyan qoodettiya yelidaageeti bantta naata Xoossaabaa tamaarissanau maaddida, Geeshsha Maxaafan deꞌiya oyddu qofay hagaappe kaallidi deꞌees.

1. Meretaappe timirttiyaa demmite. Kiitettida PHauloosi, “Beettenna [Xoossaa] hanotai hegeekka a merinaa wolqqainne a Xoossatettai issippe Xoossai ha sa7aa medhdhoosappe doommidi, etau qonccidi beettiis” yaagidi xaafiis. (Roo. 1:20) Yelidaageeti bantta naati Xoossay medhidobata akeekanaadaaaninne he meretati Xoossaa eeshshatuppe awugaa qonccissiyaakko qoppanaadan oottidi, Xoossay etau qonccidi beettanaadan keehippe maaddana danddayoosona.

Yesuusi ba erissiyo ashkkarata tamaarissiyo wode ha hiillaa goꞌettiis. Leemisuwau, i hagaadan giis: “Paalliya kafota xeellite; eti zerokkona; cakkokkona; gootarankka qolokkona; shin saluwan de7iya intte Aawai eta mizees; intte etappe keehi aadhdhekketii?” (Maa. 6:26) Yesuusi ha sohuwan Yihoowa eeshshaa, siiquwaanne qaretaa qonccissiis. SHin hegaappekka aadhiyaabaa oottiis. Xoossay he eeshshata ba naatuyyo waatidi qonccissidaakko, Yesuusi ba erissiyo ashkkarati akeekanaadan maaddiis.

Aadhida erancha Kawuwaa Solomoni, Xoossay meretan qaacotuyyo aadhida eratettaa immidoogaa yootidi, goꞌꞌiyaabaa tamaarissanau ha guutta meretata goꞌettiis. I hagaadan giis: “Inttenoo azallatoo, qaacotukko biite; biidi etappe tamaarite. Yaatidi aadhdhida eranchcha gidite. Qaacota ootissanau azaziyaabi, halaqi woikko eta haariyaabi baawa; shin banttau maanabaa bone minjjoosona; kattaa cakkiyo wodekka banttau koshshiya kattaa shiishshoosona.” (Lee. 6:6-8) Hegee, goꞌꞌiya hoolliyaa kessiyoogaanne he hoolliyaa gakkanau Xoossay nuussi immido abbiyaa goꞌettiyoogaa goꞌꞌaa tamaarissiyo wolqqaama oge!

Yelidaageeti kaallidi deꞌiyaagaa oottikko, Yesuusinne Solomoni tamaarissido, keehippe goꞌꞌiya ogiyaa kaallana danddayoosona: (1) Naati dosiyo maatay woy mittay, mehee woy doꞌay awugaakko oychite. (2) He maataa woy mittaa, mehiyaa woy doꞌaa xeelliyaagan kaseegaappe aaruwan erite. (3) Hegaa mala meretati Xoossaabaa ay tamaaranaadan oottiyaakko akeekite.

2. Yesuusi ba tamaarissidoogeeta xeellido ogiyaa kaallite. Hanno gakkanau deꞌida asa ubbaagaappe aaruwan, tamaarissiyo keehippe koshshiyaabaa Yesuusi erees. Gidikkokka, i daro wodiyaa oyshaa oychanau goꞌettiis. I ba tamaarissiyoogeetu qofaunne etau siyettiyaabau keehippe qoppiis. (Maa. 17:24, 25; Mar. 8:27-29) Hegaadan, bantta naata tamaarissanau keehippe koshshiya darobaa yelidaageeti eroosona. Gidikkokka, loꞌꞌo ayfiyaa demmanau, eti Yesuusa leemisuwaa kaallana, qassi naati banttau siyettiyaabaa yayyennan yootanaadan minttettana koshshees.

Naatuyyo iita xeelay deꞌikko, woy issi goꞌꞌiyaabaa sohuwaara akeekana xayikko shin? Yesuusi kiitettidaageeta oyqqido ogiyaa akeekite. Eti issi issitoo issoy issuwaara keehippe palamettidosona; ba huuphiyaa kawushshiyoogaa goꞌꞌaa sohuwaara akeekibookkona. Gidikkokka, Yesuusi ubbatoo danddayidi, ba huuphiyaa kawushshiyoogee koshshiyoogaa zaaretti zaaretti yootiis. (Mar. 9:33, 34; Luq. 9:46-48; 22:24, 25) Yesuusa leemisuwaa kaalliya yelidaageeti bantta naatu qofaa akeekan suurissoosona; qassi koshshiyaaba gidikko, issibaa goꞌꞌaa naati loyttidi akeekana gakkanaashin hegaa zaaretti zaaretti yootoosona.a

3. Leemiso gididi tamaarissite. Kiitettida PHauloosi Roomen deꞌiya Kiristtaaneta zorido zoriyaa yelidaageeti loyttidi kaalliyoogee bessiyaaba. I etau, “Yaatin, neeni harata tamaarissiyaagee nena ne huuphen aissi tamaarissikkii? Neeni, ‘Wuuqqoppa’ yaagada qaalaa yootaasa; shin neeni ne huuphen wuuqqaiyye?” yaagidi xaafiis.—Roo. 2:21.

Naati yelidaageeti yootiyoobaappe oottiyoobaa kaalliyo gishshau he zoree bessiyaaba. Sabbakiyoobaa oosuwan peeshshiyaageetu naati banttana yelidaageeti tamaarissiyoobaa darotoo ezggoosona.

4. Naatettan deꞌishin doommite. Kiitettida PHauloosaara misoonaawe oosuwaa oottida Ximootiyoosau i diccido heeran keehi loꞌꞌo sunttay deꞌees. (Oos. 16:1, 2) Hegau issi gaasoy, i ‘guutta naatettaasappe doommidi geeshsha maxaafata tamaaridoogaa.’ Ximootiyoosa aayyiyaanne a aayee aayyiyaa, ayyo Geeshsha Maxaafaa nabbabiyoogaa xalla gidennan, he maxaafati oyqqido qofaa i akeekanaadankka maaddidosona.—2 Xim. 1:5; 3:14, 15.

Intte Maaduwaa Demmana Danddayiyo Sohuwaa

Yelidaageeti bantta naata Xoossaabaa tumaa tamaarissanau maaddanaadan Yihoowa Markkati daro xuufiyaa giigissidosona. Issoti issoti naata qofan oyqqidi xaafidoogeeta. Harati qassi yelidaageetinne panttatetta wodiyan deꞌiya naati issoy issuwaara ubbatoo haasayanaadan maaddana danddayoosona.b

Yelidaageeti bantta naata Xoossaabaa tamaarissanaappe kase, naati oychiyo issi issi metiya oyshatu zaaruwaa erana koshshees. Leemisuwau, kaallidi deꞌiyaageetu mala oyshata woygidi zaaruuteetii: Xoossay tuggay deꞌanaadan paqqadidoy aybissee? Saꞌaa xeelliyaagan Xoossaa halchoy aybee? Hayqqida asay awan deꞌii? Inttenne intte soo asay Xoossaakko shiiqanaadan oottana danddayiya, hageetunne hara oyshatu zaaruwaa eranaadan Yihoowa Markkati inttena ufayssan maaddana.—Yaaq. 4:8.

[Tohossa Qofaa]