Mussinnay Ay Keena Aakkidee?
“Nu dirijjitee nu heeran deꞌiya issi kawo ooso keettau issi issibaa oottees. Nuuni he oottidobau miishshaa ekkanau darotoo naaꞌꞌu woy heezzu aginaa naagoos. SHin, mata wode issi kawo oosanchay tau silkkiyaa dawaliis. Nuuni ayyo mattaayiyaa immiyaaba gidikko, miishshay eesuwan qanxxettanaadan oottanaagaa yootiis.”—JOONA.a
MUSSINNAN qohetta eray? Qommoora odettidaagaa mala gidana xayikkonne, mussinnan neenikka qohettennan aggakka.
Transparensi Internashinal giyo dirijjitee 2011n oosettida mussinnaa qonccissidoogaadan, 183 biittatuppe dariya baggan mussinnay keehi daro.” Naaꞌꞌu layttappe kase he dirijjitee, “Mussinnaa gaasuwan qohettenna biitti alamiyan baynnaagee qoncce” yaagidi, mussinnay ubbasan meeze gididoogaa 2009 layttaa irpporttiyan yootiis.”
“Mussinnay, goꞌꞌiyaabaa demmanau giidi bau imettida aawatettaa hanenna ogiyan goꞌettiyoogaa. Hegee a deꞌoy, aqoy woy ufayssay maatay deꞌiyo asi ammanettidaagaa gidiyoogaara gayttidaba gidido asa ubbaa qohees.”—TRANSPARENSI INTERNASHINAL
Issi issi hanotan, mussinnay kaalettiyoobay keehi qohiyaaba gidana danddayees. Leemisuwau, Heyti biittan 2010n denddida wolqqaama biittaa qaattaappe denddidaagan daro asay hayqqido gaasotuppe issoy “mussinnaanne xaasayiyoogaa” gidiyoogaa Taym maxeetee yootiis. He maxeetee gujjidikka, ‘Manddiisee keexettida keettatun oottidobi he keena; shin kawotettan hegaa kaalloosona geetettiyaageeti daro maganxxaa ekkoosona’ yaagiis.”
Mussinnay gattiyo qohoy attana danddayii? Ha oyshaa zaaranau, mussinnau gaaso gididabaa nuuni erana koshshees. Kaalliya huuphe yohuwan hegaa beꞌana.
[Tohossa qofaa]
a Sunttay laamettiis.