Wachtawur ONLAYN LAYBREERIYAA
Wachtawur
ONLAYN LAYBREERIYAA
Wolayttattuwa
  • GEESHSHA MAXAAFAA
  • XUUFETA
  • SHIIQOTA
  • w12 12/1 sin. 22-26
  • ‘Imatta’ Gididi Deꞌiyoogaa

Ne dooridoogan biidoy baawa.

Atto ga, biiduwaa bessiyoode balay merettiis.

  • ‘Imatta’ Gididi Deꞌiyoogaa
  • Yihoowa Kawotettaa Erissiya Wochiyo Keelaa—2012
  • Sima Huuphe Yohota
  • Issi Mala Qofaa
  • ‘MERETA UBBAY OOLEES’
  • TUMU KIRISTTAANETI WAANANA KOSHSHII?
  • LOꞌꞌO EESHSHAA
  • BESSIYAAGAADAN HAARETTIYOOGAA
  • SIIQIYOOGAA
  • Iita Alamiyan, “Yedetettidi Kiyida” Asadan Deꞌoos
    Yihoowa Kawotettaa Erissiya Wochiyo Keelaa—2011
  • ‘Imattati’ Issippetettan Tumu Goynuwaa Goynnoosona
    Yihoowa Kawotettaa Erissiya Wochiyo Keelaa—2012
  • Nu Hidootan Ufayttiyoogaa
    Yihoowa Kawotettaa Erissiya Wochiyo Keelaa—2012
Yihoowa Kawotettaa Erissiya Wochiyo Keelaa—2012
w12 12/1 sin. 22-26

‘Imatta’ Gididi Deꞌiyoogaa

“Intte ha sa7an imattanne yedettin asasan de7iyaageeta gididoogaadan, . . . asatettaa amuwaappe intte haakkana mala, taani inttena woossais.”—1 PHE. 2:11.

WOYGADA ZAARUUTEE?

Tiyettidaageeti imattadan deꞌiyaageeta geetettana danddayiyoy aybissee?

‘Hara dorssati’ imatta geetettiyoy ayba ogiyaanee?

Neeni hidootan naagiyoobay aybee?

1, 2. PHeexiroosi ‘Xoossay dooridoogeeta’ giidoogeeti oonee, qassi i eta ‘imatta’ giidoy aybissee?

YESUUSI saluwaa bi simmin, 30 gidiya layttaappe guyyiyan, kiitettida PHeexiroosi, “Xoossai doorido asatuyyo PHanxxoosa biittan, Galaatiyaa biittan, Qaphphadooqiyaa biittan, Isiyaa biittaaninne Bitiniyaa biittan yedettin laalettidi de7iyaageetuyyo” dabddaabbiyaa xaafiis. (1 PHe. 1:1) PHeexiroosi, Kiristtoosaara saluwan haaranaadan “de7uwaa” hidootaa ekkanau naaꞌꞌantto yelettida ayyaanan tiyettidaageetussi he dabddaabbiyaa xaafiis. (1 PHeexiroosa 1:3, 4 nabbaba.) SHin, i ha doorettidaageeta “imattanne yedettin asasan de7iyaageeta” giidoy aybissee? (1 PHe. 2:11) Alame yuushuwan deꞌiya Yihoowa Markkatuppe ayyaanan tiyettida giyaageeti keehi guutta gididaashin, hegaa nuuni ubbay eranau koyiyoy aybissee?

2 Koyro xeetu layttan deꞌida, ayyaanan tiyettidaageeti ‘imatta’ geetettidoogee bessiyaaba. Ayyaanan tiyettidaageetuppe attida ha wodiyan deꞌiyaageetuugaadan, etikka saꞌan merinau deꞌokkona. Ayyaanan tiyettida, ‘amarida dorssa wudiyaa’ yara gidida kiitettida PHauloosi, “Nu biittai saluwaana; nuuni qassi saluwaappe yaana nuna ashshiya Godaa Yesuus Kiristtoosa naagoos” yaagiis. (Luq. 12:32; Pili. 3:20) Eta “biittai saluwaana” gidiyo gishshau, tiyettidaageeti hayqqiyo wode Seexaanay haariyo saꞌaa deꞌuwaa aggoosona; yaatidi saluwan hayqqenna deꞌuwaa demmoosona. (Piliphphisiyuusa 1:21-23 nabbaba.) Eti saꞌan deꞌiyoy amarida wode xalla gidiyo gishshau, ‘imatta’ geetettana danddayoosona.

3. ‘Hara dorssata’ xeelliyaagan nuuni ay oychana koshshii?

3 ‘Hara dorssati’ shin? (Yoh. 10:16) Geeshsha Maxaafay eti saꞌan merinau deꞌanaagaa yootees. Yaatin, nuuni etikka imatta mala gaana danddayiyoy aybissee?

‘MERETA UBBAY OOLEES’

4. Deriyaa haariyaageeti teqqana danddayibeennabay aybee?

4 Seexaanaa iita alamee deꞌiyo wode ubban, Kiristtaaneta gujjin, ubba asay Seexaanay Yihoowa bolli makkalidoogee kaalettidoban ubbatoo waayettees. Roome 8:22y, “Mereta ubbai issippe hanno gakkanaassi, maccaasa leessoi oiqqin ooliyoogaadan, sahuwan ooliyoogaa nuuni eroos” yaagees. Deriyaa haariyaageeti, saynttisttetinne asaa maaddiyaageeti wozanappe baaxetikkonne, ha metuwaa teqqana danddayokkona.

5. Miilooniyan qoodettiyaageeti 1914ppe haa simmin ay oottidonaa, qassi aybissi?

5 Yaatiyo gishshau, 1914ppe haa simmin, miilooniyan qoodettiya asay Xoossay sunttido Kawuwaa, Kiristtoos Yesuusau ba dosan haarettees. Eti Seexaanau haarettanau koyokkona. Eti Seexaanaa alamiyaara exatokkona. Ubba eti bantta deꞌuwan Xoossaa Kawotettaara gayttidabaa oottoosona; qassi bantta aquwaakka hegau goꞌettoosona.—Roo. 14:7, 8.

6. Yihoowa Markkati asasan deꞌiya asa geetettana danddayiyoy ayba ogiyaanee?

6 Yihoowa Markkati deꞌiyo 200ppe dariya biittan higgiyau azazettoosona. SHin, eti awan deꞌiyaaba gidikkokka, asasan deꞌiya asa mala. Eti bantta deꞌiyo biittaa polotikan gelokkona; qassi deretettan deꞌiya metuwaa giigissokkona. Eti ha wodiyankka banttana Xoossay giigissiyo, ooratta alamiyaa dere asadan xeelloosona. Eti ha iita alamiyan imatta gididi deꞌiyoy guutta wode xallaassa gidiyo gishshau ufayttoosona.

7. Xoossaa ashkkarati merinau deꞌanay ayba ogiyaanee, qassi eti merinau deꞌanay awaanee?

7 Kiristtoosi mata wode Seexaanaa iita alamiyaa xayssana. Kiristtoosa haaruwan nagaraynne azzanoy muleera xayana. A haaruwan, Yihooway ubbabaa haariyo maataa eqettiya ubbay xayana. Xoossau ammanettidi oottiyaageeti saꞌay Gannate gidiyo wode merinau deꞌana. (Ajjuutaa 21:1-5 nabbaba.) He wode mereta ubbay muleera “bashshaa ailletettaappe . . . kiyana; qassi he meretati Xoossaa naati ailletettaappe kiyido bonchcho kessaa shaakkana.”—Roo. 8:21.

TUMU KIRISTTAANETI WAANANA KOSHSHII?

8, 9. PHeexiroosi ‘asatettaa amuwaappe haakkanaadan’ yootidoogee woygiyoogaakko qonccissa.

8 PHeexiroosi, Kiristtaanetuppe koyettiyaabaa hagaadan giis: “Ta dabbotoo, intte ha sa7an imattanne yedettin asasan de7iyaageeta gididoogaadan, ubba wode intte shemppuwaara olettiya asatettaa amuwaappe intte haakkana mala, taani inttena woossais.” (1 PHe. 2:11) I he zoriyaa immidoy tiyettida Kiristtaanetussa gidikkonne, Yesuusa hara dorssatikka he zoriyaa kaallana koshshees.

9 Nuuni amottiyo issi issibaa, Medhidaagee kessido maaran polikko, hegee bala gidenna. Hegee deꞌuwan ufayttanaadan maaddiyaaba. Leemisuwau, miyoogan, uyiyoogan, minttettiya oosuwaa oottiyoogaaninne haratuura loꞌꞌo wodiyaa aattiyoogan ufayttiyoogee nuuni amottiyoobaappe loꞌꞌoba. Aqo laggiyaara poliyo asho gaytotettan ufayttanau koyiyoogeekka bessiyaaba. (1 Qor. 7:3-5) SHin, PHeexiroosi ‘asatettaa amuwaa’ giidoogeeta ‘shemppuwaara olettiya’ amuwaa xallaara gattidoogee bessiyaaba. Hegee bala gidida asatettaa amo. Issi issi Geeshsha Maxaafaa birshettati hegaa “ashuwaa amuwaa” (King Jemis Vershin) woy “nagaraa amuwaa” (Niwu Intternaashinaal Vershin) goosona. Xoossaa sheniyaara maayettenna, qassi Xoossaara deꞌiya dabbotaa moorana danddayiya asatettaa amoy wolqqaamennaadan teqqana bessees. Nu asatettaa amuwaa bala ogiyan poliyaaba gidikko, hayqqana danddayoos.

10. Seexaanay Kiristtaaneti ha alamiyaa bagga gidanaadan paacciyo issi issi ogeti awugeetee?

10 Seexaanay tumu Kiristtaaneti ha alamiyan ‘imattadan’ deꞌiyaageeta gidiyoogaa ubbatoo qoppennaadan oottanau halchiis. I nuuni aquwaabau bichaaranaadan, shori baynnabaa oottanaadan, nu huuphiyaa xoqqu oottidi xeellanaadan, ubbabau yaaretanaadaaninne nu biittan ceeqettiyaageeta gidanaadan koyees. Ha ubba amoy Seexaanaa pire gidiyoogaa nuuni akeekana koshshees. Nuuni ha iita asatettaa amuwaappe haakkanau murttiyoogee, Seexaanaa iita alamiyaa bagga gidanau koyennaagaa bessees. Yaatiyoogan, nuuni hagan deꞌiyoy ‘imattadaana’ gidiyoogaa bessoos. Nuuni tumuppe koyiyoynne baaxetiyoy xillotettay deꞌiyo Xoossaa ooratta alamiyan merinau deꞌanaassa.

LOꞌꞌO EESHSHAA

11, 12. Allaga biittaa asaa issi issitoo asay waati xeellii, qassi issi issi asay Yihoowa Markkata xeelliyaagan ay qoppii?

11 PHeexiroosi ‘imatta’ gididi deꞌiyaageetuppe koyettiyaabaa paydo 12nkka hagaadan giis: “Aihuda gidenna asai inttena iitabaa oottiyaageetudan zigiriyo wode, Kiristtoosi yiyo gallassi intte lo77o oosuwaa eti akeekidi, Xoossaa galatana mala, intte de7uwaa eta giddon loitti naagite.” Imattati allaga biittan woy bantta biitta gidennasan deꞌoosona. Imattati heeran deꞌiya asaappe dummatiyo gishshau, asay eta amassalees, qassi issi issi asay eta iita asadan xeellees. Eta haasayay, eti oottiyoobay, eta maayoy, ubba qassi eta meray heeran deꞌiya asaagaappe dummatana danddayees. SHin eti eeshshan loꞌꞌo gidiyoogee, eti iita gidennaagaa hara asay akeekanaadan oottana danddayees.

12 Hegaadankka, tumu Kiristtaaneti haasayan, woy wodiyaa aattanau dooriyoobaa malaban bantta shooron deꞌiya daro asaappe dummatoosona. Darotoo, eti maayiyoobaaninne alleeqettiyooban heeran deꞌiya daro asaappe eta shaakki erana danddayettees. Eti haratuppe dumma gidiyo gishshau, issi issi asay iitabaa oottida asadan eta ‘zigirees.’ SHin, eta maara deꞌuwaa gishshau, harati eta galatana danddayoosona.

13, 14. “Aadhdhida eratettai ba oosuwan” tuma gididi beettidoy ayba ogiyaanee? Leemisuwaa yoota.

13 Nu loꞌꞌo eeshshay, nuna ‘zigiriyo’ gaasoy baynnaagaa asay akeekanaadan maaddana danddayees. Xoossau polo azazettida asi Yesuusa xalla. SHin asay akka wordduwan mootiis. Issoti issoti a “ha yoraanne woine eessaa uyiyaagaa be7ite; giiraa ekkiyaageetuuranne nagaranchchatuura siiqettees” yaagidosona. SHin, i hegaa mala asa gidennaagaa ba loꞌꞌo eeshshan bessiis. Yesuusi, “Aadhdhida eratettai ba oosuwan tuma gididi beettees” yaagiis. (Maa. 11:19) Hegee ha wodiyankka tuma. Leemisuwau, Jarmanen, Seltters giyo sohuwan deꞌiya Beeteelen oottiya ishanttanne michontta shooron deꞌiya issi issi asay asakko shiiqennabadan xeellees. SHin he katamaa ayssiyaagee etau exatidi, “Yan oottiya Yihoowa Markkatu deꞌuwaa hanotay haratuugaappe dummatees; shin hegee heeran deꞌiya asaa hirggissiyaaba gidenna” yaagiis.

14 Eraashiyaa biittan Moskko kataman deꞌiya Yihoowa Markkatuura gayttidaagan mata wode kuuyettidabaykka hegaara issi mala. Asay eta daroban wordduwan mootiis. SHin, Tamme 2010n, Paransaaye biittan Isttrasbur giyo kataman deꞌiya, Awurooppan Asaa Maataa Pirdda Keettay, Moskko katamay yan deꞌiya Yihoowa Markkatu goynuwan kelttiyaa gelidi eti shiiquwaa shiiqennaadan diggidoogee bessennaba gidiyoogaa akeekidoogaa yootiis. Awurooppan Asaa Maataa Pirdda Keettay, Yihoowa Markkati moorobaa oottidosona gaanau Raashiyaa pirdda keettati naqaasha demmibeennaagaa yootiis. He pirdda keettay Yihoowa Markkatu bolli bessennabaa oottanau, Moskko pirdda keettati yaa haa qaattenna bantta higgiyaa goꞌettidoogaa yootiis.

BESSIYAAGAADAN HAARETTIYOOGAA

15. Alame yuushuwan deꞌiya tumu Kiristtaaneti kaalliyo Geeshsha Maxaafaa maaray awugee?

15 Moskkon deꞌiya Yihoowa Markkati, ubba alame yuushuwan deꞌiyaageetikka, PHeexiroosi Kiristtaanetuppe koyettiyaabaa yootido harabaakka poloosona. I, “Godaa gishshau, asa higge ubbaayyo haarettite; kawoikka ubbaappe bolla gidiyo gishshau, ayyo haarettite. Qassi deriyaa haariyaageetuyyookka haarettite” yaagiis. (1 PHe. 2:13, 14) Nuuni ha iita alamiyaa bagga gidokko. SHin, PHauloosi yootidoogaadan tumu Kiristtaaneti deriyaa heemmiyaageetu higgee Xoossaa higgiyaara palqqettennaba gidikko, azazettoosona.—Roome 13:1, 5-7 nabbaba.

16, 17. (a) Nuuni kawotettaa eqettennaagaa bessiyay aybee? (b) Deriyaa heemmiya issoti issoti woygidonaa?

16 Yihoowa Markkati ha alamiyan imatta gididi deꞌoosona; shin eti hegaadan deꞌiyoy kawotettaa eqettanau woy hara asaa toochanau koyiyo gishshataassa gidenna. Polotikaara woy deretettaa deꞌuwaara gayttidaagan harati kuuyiyoobaa Yihoowa Markkati eqettokkona woy hegan kelttiyaa gelokkona. Issi issi haymaanooteti polotikan kelttiyaa geloosona; shin Yihoowa Markkati gelokkona. Eti haariyaageeti asaa ayssiyo maaraa laammanaadan oottanau mule malokkona. Yihoowa Markkati kawuwaa bolli denddanau woy harati denddanaadan oottanau mule koyokkona!

17 PHeexiroosi, “Kawo bonchchite” giidi zoridoogaara maayettiya ogiyan eti deriyaa ayssanau sunttettidaageetuyyo azazettiyoogan he asata bessiyaagaadan bonchoosona. (1 PHe. 2:17) Deriyaa heemmiyaageeti issi issitoo, Yihoowa Markkati asaa hirggissiyaabaa oottoosona giidi qoppanaadan oottiyaabi baynnaagaa yootoosona. Leemisuwau, Jarmane biittan Branddenberggen kase kaabiniyaa ministtire, guyyeppe qassi Jarmane parllaamaa yara gidida SHitefan Raykee Naazeti eta yedettido wode, Yihoowa Markkati loꞌꞌo eeshshay deꞌiyoogeeta gididoogaa yootiis. Yihoowa Markkati yedetettiiddikka bantta ammanuwaa laammibookkona; qassi banttanaara issippe qashettidaageeta kehatettan oyqqidosona. I issi issi asay hara biittappe yiida, woykko polotikan woy haymaanootiyan banttaagaappe dummatiya qofay deꞌiyo asatussi iiti iiti biyo gishshau, he eeshshay Jarmane mala biittau keehi maaddiyaaba gidiyoogaa yootiis.

SIIQIYOOGAA

18. (a) Ishantta ubbaa siiqiyoogee nuussi meeze gididoy aybissee? (b) Yihoowa Markka gidenna amarida asati ay akeekidonaa?

18 Kiitettida PHeexiroosi, “Intte ishantta siiqite. Xoossau yayyite” yaagiis. (1 PHe. 2:17) Yihoowa Markkati Xoossau yayyoosona; giishin, a azzanttiyaabaa oottenna mala yayyoosona. Eti Xoossaa hegaadan bonchiyoogee a sheniyaa oottanau koyanaadan denttettees. Eti banttaagaa mala koshshay deꞌiyo, alame yuushuwan deꞌiya ishanttuuranne michonttuura Yihoowau ufayssan oottoosona. Yaatiyo gishshau, alame yuushuwan deꞌiya “ishantta” ubbaa siiqiyoogee etayyo meeze gididaba. Asay ba xallaa siiqiyo ha alamiyan meeze gidenna ha siiquwan, Yihoowa Markka gidenna asati issi issitoo garamettoosona. Leemisuwau, asay manddariyo wode maaddiya Amarkka dirijjitiyan imatta asaa heeraa bessiyaara, Jarmane biittan 2009n daro biittappe yiidaageeti shiiqido awuraajjaa shiiquwan Yihoowa Markkati kare biittaappe yiidaageeta maaddiyoogaanne siiqiyoogaa beꞌada garamettaasu. A heeraa bessiyaaro gidada oottido wode ubban, hegaa malabaa mule beꞌa erennaagaa yootaasu. Guyyeppe, issi Yihoowa Markkay, “A nubaa ubbabaa keehi garamettaydda yootaasu” yaagiis. Neeni shiiqido awuraajjaa shiiquwan Yihoowa Markkatubaa akeekidi asi hegaadan gin siyadii?

19. Nuuni ay oottanau murttana koshshii, qassi aybissi?

19 Qommoora beꞌido ogetuuninne haratun, Yihoowa Markkati Seexaanaa alamiyan tumuppe ‘imatta’ gidiyoogaa bessoosona. Eti ubbatoo hegaadan deꞌanau murttidosona. Xoossay giigissido, geeshshatettay kumido ooratta alamiyan mata wode merinau deꞌanau eti hidootiyoogee bessiyaaba. Neeni he ooratta alamiyan deꞌanau amottay?

[Sinttaa 23n deꞌiya misiliyaa qonccissuwaa]

Nuuni Seexaanaa alamiyaa kaafokko

[Sinttaa 23n deꞌiya misiliyaa qonccissuwaa]

Nuuni Xoossay ehaana ooratta alamiyaabaa yootoos

[Sinttaa 25n deꞌiya misiliyaa qonccissuwaa]

Geeshsha Maxaafaa tumay Eraashiyaa biittan deꞌiya ha so asay issippe ufayttidi deꞌanaadan maaddiis

    Wolayttatto Xuufeta (2000-2025)
    Kiya
    Gela
    • Wolayttattuwa
    • Kiita
    • Dosiyoobata
    • Copyright © 2025 Watch Tower Bible and Tract Society of Pennsylvania
    • Goꞌettiyo Wogaa
    • Goꞌettiyaageetu Xuuraa Naagiyo Higgiyaa
    • Goꞌettiyaageetu Xuuraa Naagiyo Higgiyaa Giigissiyoobaa
    • JW.ORG
    • Gela
    Kiita