PHeexiroosinne Hanaanee Worddotidosona--Nuuni Ay Tamaarana Danddayiyoo?

Worddotiyoogaa giyoogee eriiddi tuma gidennabaa yootiyoogaa. Neeni worddota eray?—a Xoossaa siiqiya issi issi gita asaykka worddoti erees. Geeshsha Maxaafan abay xaafettido, worddotida uraabaa neeni erennan aggakka. A sunttay PHeexiroosa; i Yesuusi kiittido 12tuppe issuwaa. I worddotidoy aybissakko ane beꞌoos.

Asay Yesuusa oyqqidi qeese ubbatu halaqaa soo efiis. Hegee hanidoy bilahe usuppun saateppe guyyiyaana. PHeexiroosi asi beꞌennan qeese ubbatu halaqaa dirssa giddo geliis. Ayyo penggiyaa dooyida, qeese ubbatu halaqaa ashkkariyaa tamaa pooꞌuwan beꞌada PHeexiroosa eraasu. A, “Neenikka Galiilaa Yesuusaara issippe de7aasa” yaagaasu. PHeexiroosi yayyidi Yesuusa erennaagaa yootiis.

Guyyeppe “hara ashkkariyaa a be7ada” eridoogaa Geeshsha Maxaafay yootees. A, “Ha bitanee Naazireeta Yesuusaara de7ees” yaagaasu. Zaarettidikka PHeexiroosi a erennaagaa yootiis. Guuttaa gamꞌꞌishin, hara asati PHeexiroosakko yiidi, “Neenikka tuma etaara issippe de7aasa” yaagidosona.

PHeexiroosi keehippe yayyiis. Yaatiyo gishshau, heezzanttuwaa, “Taani hegaa bitaniyaa erikke!” yaagidi worddotiis. Sohuwaara kuttoy waassi aggiis. Yesuusi PHeexiroosa xeelliis; yaatin, guutta saatiyaappe kase Yesuusi a, “Neeni kuttoi waassanaappe kase heezzutoo tana kaddana” giidoogaa PHeexiroosi hassayiis. PHeexiroosi mishettidi yeekkiis. I keehippe azzaniis!

Hegaa malabay ne bolli gakkana danddayii?— Geella neeni timirtte keettan deꞌishin, naati Yihoowa Markkatubaa haasayiyoogaa doommidosona. Issi naꞌay, “Eti banddiraa mazamuriyaa yexxokkona” yaagees. Haray qassi, “Eti bantta biittau olettokkona” yaagees. Haray, “Eti ufayssa masqqalaa bonchenna gishshau, Yesuusan ammanokkona” yaagees. Issi naꞌay neekko simmidi, “Neenikka Yihoowa Markka gidikkii?” yaagidi oychees. Neeni woyguutee?—

Neeni hegaa malabaa loytta zaaranau kasetada giigettana koshshees. PHeexiroosi giigettibeenna. I asau yayyidi worddotiis! Gidikkokka, i worddotido gishshau keehippe azzaniis; Xoossaykka ayyo atto giis.

Beni wode deꞌida, Hanaaniyaa giyo Yesuusi erissiyo ashkkaraykka worddotiis. SHin Xoossay ayyoonne a machee Saphiiriyyo atto gibeenna. Eti naaꞌꞌay worddotanau zorettidosona. Xoossay Hanaaniyaassinne Saphiirissi atto gibeennay aybissakko ane beꞌoos.

Yesuusi kiitettidaageetuppe shaahettidi Xoossaakko saluwaa boosappe tammu gallassay aadhi simmin, Yerusalaamen 3,000 gidiya asay xammaqettiis. Etappe daroti PHenxxaqosxxe baalaa bonchanau haaho biittaappe yiidosona; qassi eti Yesuusi erissiyo ashkkara gidi simmidi bantta ooratta ammanuwaabaa loyttidi eranau yan takkanau koyidosona. Yaatiyo gishshau, Yesuusi erissiyo ashkkaratuppe issoti issoti eta koshshiyaabau miishshaa immidi maaddidosona.

Hanaaneenne a keettayiyaa ooratta Kiristtaaneta maaddanau gadiyaa bayzzidosona. Hanaanee he miishshaa kiitettidaageetuyyo ehiidi, gadiyaa bayzzido miishshaa ubbaa ehiidabadan yootiis. SHin i ubba miishshaa ehibeenna! I bagga miishshaa bau ashshiis! Xoossay PHeexiroosi hegaa eranaadan oottin, i Hanaaniyaa, “Neeni Xoossau worddotidoogaappe attin, asau worddotabaakka” yaagiis. Yaagin, Hanaanee kunddidi hayqqi aggiis! Heezzu saate heerappe guyyiyan, a keettaayiyaa gelaasu. Ba azinay waanidaakko erennan akka worddotada, kunddada hayqqa aggaasu.

Hegaappe nuuni loꞌꞌobaa tamaaroos: Tumaa haasayiyoogee keehippe koshshiyaaba! Ee, nuuni ubbay hegaappe tamaarana koshshees! Gidikkokka, nuuni ubbay, ubba qassi naatettan deꞌiyo wode baloos. Yihooway nena siiqiyo gishshaunne PHeexiroosayyo atto giidoogaadan neeyyookka atto giyo gishshau ufayttikkii?— SHin, nuuni tumaa haasayana koshshiyoogaa dogoppa. Nuuni worddotidi nagaraa oottiyaaba gidikko, Xoossay nuuyyo atto gaanaadan woossana koshshees. PHeexiroosi hegaadan oottidoogee erettidaagaa; Xoossaykka ayyo atto giis. Nuuni worddotiyoogaa agganau baaxetiyaaba gidikko, Xoossay nuuyyookka atto gees!