So Asaa Goynuwaa—An Kaseegaappe Aaruwan Ufayttana Danddayeetii?

Biraazilen deꞌiya issi Aaway, “So Asaa Goynuwan nuuni wozanappe tobbiyo gishshau taani gidees gaana xayikko, saꞌay keehi qammanaashin xannaꞌoos” yaagiis. Jaappaanen deꞌiya issi aaway layttay tamma gidido ba naꞌay woqqu saate xannaꞌidaakko qoppennan gujjidikka xannaꞌanau koyiyoogaa yootiis. Aybissi? A aaway, “I xannaꞌanau keehi koyees; qassi hegee a keehi ufayssees” yaagidi yootiis.

Naati ubbay xannaꞌanau hegaadan koyennaagee erettidaagaa; ubba issoti issoti so asaa goynuwaa dosennan aggana danddayoosona. SHin eti dosennay aybissee? Toogon deꞌiya issi aaway, “Yihoowau goynniyoogee salettiyaaba gidana bessenna” yaagiis. Salettiyaaba gidikko, hegee so asaa goynuwaa waati kaalettiyaakko qonccissiyaabeeshsha? Daro keettaa asay so asaa goynoy Isiyaasi Sambbataa xeelliyaagan yootidoogaadan, keehi ‘ufayssiyaagaa’ gidana danddayiyoogaa akeekidosona.—Isi. 58:13, 14.

Kiristtaane aawati bantta so asaa goynoy ufayssiyaagaa gidana mala, goynuwaa wodiyan pashkki gaana bessiyoogaa akeekoosona. Heezzu macca naatinne issi attuma naꞌay deꞌiyo Ralfi ba so asaa goynoy xinaate mala gidennan, haasaya mala gidiyoogaa yootiis; ubbaykka ba qofaa yootees. Ubbaykka xannaꞌiyoobaa dosanaadaaninne ufayttidi xannaꞌanaadan oottiyoogee issi issitoo metana danddayiyoogee tuma. Issi aayyiyaa, “So asaa goynoy taani koyiyoogaa keena ufayssanaadan oottenna mala issi issitoo tana keehi daafurssees” yaagaasu. Intte so asaa goynuwan kaseegaappe aaruwan ufayttana danddayeetii?

HANOTAADAN LAAMMIYOOGAANNE DUMMA DUMMABAA XANNAꞌIYOOGAA

Naaꞌꞌu naati deꞌiyo, Jarmane biittan deꞌiya aaway, “Nuuni hanotaadan laammana koshshees” yaagiis. Naataliyo giyo naaꞌꞌu naatu aayyiyaa qassi, “Nu soo asau keehi koshshiyay dumma dummabaa xannaꞌiyoogaa” yaagaasu. Daro keettaa asay bantta so asaa goynuwaa wodiyaa dumma dumma kifiliyan shaakkees. Naaꞌꞌu yelaga naati deꞌiyo, Brazilen deꞌiya Kiletoni, “Yaatiyoogee xinaatee ufayssiyaagaa gidanaadaaninne ubbay bantta qofaa yootanaadan maaddees” yaagiis. Keehi kaalotiya naati deꞌikko, yelidaageeti xinaatiyaa saatiyaa dumma dumma kifiliyan shaakkidi naatu ubbaassi koshshiyaabaa tamaarissana danddayoosona. Yelidaageeti so asa ubbau koshshiyaabaa tobbana danddayoosona; qassi ay xannaꞌanaakkonne waati xannaꞌanaakko hanotaadan laammana danddayoosona.

Issi issi so asay dumma dummabaa xannaꞌanau ay oottidee? Issoti issoti bantta so asaa goynuwaa Yihoowau mazamuriyaa yexxiyoogan doommoosona. Mekisiikon deꞌiya Kuwani, “Yexxiyoogee ufayssiya hanotan xannaꞌanau giigettanaadan maaddees” yaagiis. A so asay he galla xannaꞌiyoobaara gayttida mazamuriyaa doorees.

Issi issi keettaa asay Geeshsha Maxaafaappe amaridaagaa issippe nabbabees. Geeshsha Maxaafaappe nabbabiyooban odettida dumma dumma asatuugaadan hanidi so asay kayan kayan nabbabees. Jaappaanen deꞌiya issi aaway, ‘hegaadan nabbabiyoogaa meezetanau koyro waayettidoogaa’ yootiis. SHin a naaꞌꞌu naati bantta aawaynne aayyiyaa banttanaara kayan kayan nabbabiyoogaa beꞌidi ufayttidosona. Issi issi so asay Geeshsha Maxaafaa taarikiyan odettidaagaadan oottees. Naaꞌꞌu attuma naati deꞌiyo, Tohossa Afirkkan deꞌiya Rojeri, “Nuuni yelidaageeti Geeshsha Maxaafan akeekennabaa darotoo naati akeekoosona” yaagiis.

So asaa goynuwaa wode harabaa gujjanau Nohe markkabiyaa woy Solomona beeta maqidasiyaa leemisuwaanne hegaa malabaa issippe oottana danddayettees. Hegaadan oottanau pilggana koshshees; hegee ufayssiyaaba gidana danddayees. Leemisuwau, Isiyan issi keettan wuygen ichashu laytta naꞌiyaa, i aaway, i aayyiyaanne i aawaa aayyiyaa issippe shiiqidosona. Eti kiitettida PHauloosi misoonaawe oosuwau biidosaa bessiya kaassaa giigissidosona. Hara keettaa asay Kessaabaa maxaafan deꞌiya taarikiyaa qonccissiya kaassaa giigissiis. Toogon deꞌiya Donalda giyo 19 laytta naꞌay dumma dummabaa oottiyoogee ‘bantta so asaa maaddidoogaanne bantta so asaa goynuwaa minttidoogaa’ yootiis. Intte so asaa goynuwan kaseegaappe aaruwan ufayttanau oottanabaa qoppana danddayeetii?

GIIGETTIYOOGEE KEEHI KOSHSHIYAABA

So asa goynuwan ufayttanau dumma dummabaa xannaꞌananne hanotaadan laammana koshshikkonne, hegaappe loytti tamaaranau ubbay giigettana koshshees. Guutta naati issi issitoo daafuriyo gishshau, xannaꞌanau dooridobaa aaway kaseti qoppidi loytti giigettanau wodiyaa bazzana koshshees. Issi aaway, “Taani kasetada giigettiyo wode ubbaykka xinaatiyaa wodiyan ufayttoosona” yaagiis. Jarmanen deꞌiya issi aaway kaalliya saaminttatun ay xannaꞌanaakko ba soo asau kasetidi yootees. Usuppun guutta naati deꞌiyo Beeniinen deꞌiya issi aaway ba so asaa goynuwan dirijjitiyaa diividiyaa beꞌanau halchiyo wode giigissido oyshata kasetidi immees. Tumakka, kasetidi giigettiyoogee so asaa goynuwau keehi maaddees.

Ay xannaꞌanaakko so asay kasetidi erikko, he saaminttan hegaa haasayana danddayoosona; hegee qassi eti yeemottanaadan oottees. Qassi ubbaassi eta gishshay gishshay imettikko, so asaa goynuwaa eti ubbaykka banttabaadan xeelloosona.

SO ASAA GOYNUWAA AGGENNAN GOYNNANAU BAAXETITE

Daro keettaa asay so asaa goynuwaa aggennan goynnanau metootees.

Daro aawati so asau koshshiyaabaa kunttanau daro saatiyaa oottana koshshees. Leemisuwau, Mekisiikon deꞌiya issi aaway guuran tammanne naaꞌꞌu saatiyan sooppe kiyidi omarssi naaꞌꞌu saateppe kase soo simmenna. Issi issitoo ayyaanaaban shiiqiyo hara shiiquwaa gaasuwan So Asaa Goynuwaa wodiyaa laammana danddayettees.

Gidikkokka, nuuni so asaa goynuwaa aggennan goynnanau murttana koshshees. Toogo biittan deꞌiya Loyso giyo 11 laytta naꞌiyaa, “Nuuni gallassi hanidabaa gaasuwan issi issitoo so asaa goynuwaa gamꞌꞌidi doommikkokka, goynniyoogaa aggi erokko” yaagada bantta soo asay waanidi murttidaakko yootaasu. Issi issi keettaa asay saaminttaa doomettaa heeran so asaa goynuwaa goynniyoy aybissakko akeekana danddayaasa. Qoppibeennabay merettikko, eti he saaminttan hara gallassi so asaa goynuwaa goynnana danddayoosona.

“So asaa goynuwaa” giya sunttay bessiyoogaadan, hegee intte Yihoowau goynniyo ogetuppe issuwaa. Intte soo asay ubbay saaminttan saaminttan ‘bantta inxxarssan Yihoowa galatona.’ (Hoo. 14:2) Qassi Yihoowa “ufaissai intteyyo wolqqa gidiyo gishshau,” he wodee son deꞌiya ubbay ufayttiyo wode gidanaadan amottoos.—Nah. 8:9, 10.