Eti oysha ubbaa Geeshsha Maxaafaappe zaaridosona!

KASE DEꞌUWAA:

Taani yelettiyo wode, Isppeenen huuphessa baggan arggokko baqqidi deꞌiya Galisiya giyo gaxariyan nu soo asawu guutta gadee deꞌees. Nu soo naatu hosppunatuppe taani oyddantto naꞌa. Nu soo asay keehi siiqettees. He wode Isppeene biittan, issi keettaa asaappe baa giishin issi naꞌi gadaamiyaa geliyoogee meeze gididaba. Nu soo naatuppe heezzati hegaadan oottida.

Taayyo layttay 13 gidiyo wode, taanikka ta micheegaadan Madiride kataman deꞌiya gadaamiyan deꞌanawu baas. Gadaamiyaa deꞌoy salettiyaaba. Higge, woosanne hiyyeesatetta xallappe attin, laggeti dabboti yan baawa. Guuran denddidi wotti dentti qoppanawu woosa keettan shiiqoos; shin darotoo taani aybanne qoppikke. Guuttaa takkidi, Laatine qaala xallan mazamuriyaa yexxoosinne haymaanoote siraataa bonchoos. Tawu aybinne gelenna gishshawu, Xoossay taappe haahuwan deꞌiyaabadan qoppays. Kumetta gallassaa sirphi gaada peꞌays. Ta micheera gayttiyo wodekka, “Geeshsha Mayraamissi galatay gido” giyoorippe harabaa haasayokko. Malakuseti nuuni qumaa mi simmidi 30 daqiiqa xallawu haasayanaadan paqqadoosona. Nu son taani ufayttada deꞌiyoogaappe hegee keehi dummatiyaaba! Taani keehi boorasiyo gishshawu darotoo yeekkays.

Xoossaakko shiiqidabadan qoppa erennaba gidikkonne, tawu layttay 17 gidiyo wode malakuse gidaas. Taappe koyettiyaabaa polaas, shin taani yaatanaadan Xoossay dooridaakkonne sohuwaara siriyoogaa doommaas. Malakuseti hegaadan siriyaageeti siꞌooliyaa taman xuugettanaagaa yootoosona! Gidoppe attin, taani siriyoogaa aggabeykke. Yesuus Kiristtoosi asaappe shaahettibeennaagaa erays; i ubba harata minnidi tamaarissiisinne maaddiis. (Maatiyoosa 4:23-25) Tawu layttay 20 gidido wode, malakuse gidada deꞌiyoy aybissakko tawu erettennan ixxiis. Alaafe gidida malakusiyaa taani malakuse gidada deꞌana koshshiyoogaa sirikko, sohuwaara aggada baanaadan yootin garamettaas. Tana harata moorawusu gaada yayyennan aggukku. Yaatiyo gishshawu, gadaamiyaappe kiyaas.

Taani soo simmiyo wode, ta aawaynne aayyiyaa ta hanotaa loytti akeekidosona. SHin nu heeran oottiyoobi baynna gishshawu, ta ishanttuppe issoy deꞌiyoosaa, Jarmane biitti baas. I Isppeeneppe biida Koministtetu citaa yame. Oosanchatu maatawunne macca asaa maatawu baaxetiya he asatuura deꞌiyo wode ufayttays. Yaatiyo gishshawu, Koministte gidada wurssettan he citaa yame gidida uraa gelaas. Koministtetu xuufiyaa asawu immiyoogaaninne salppidi kawotettaa eqettiyoogan goꞌꞌiyaabaa oottays gaada qoppaas.

SHin, guuttaa takkada haꞌꞌikka hidootaa qanxxaas. Koministteti bantta yootiyoobaa darotoo oottennaagaa akeekaas. Nu citan deꞌiya amarida yelagati Frankfertten deꞌiya Isppeene biittaa biiruwaa 1971n xuuggido wode, kaseegaappe aattada siraas. Eti Isppeene biittaa haaroy asaa naaqqiyoogaa eqettanawu hegaadan oottidosona. SHin yaatiyoogan hanqqettiyoogaa bessiyoogee maara gidenna gaada qoppaas.

Bayra naꞌaa yelido wode, hegaappe simmin taani Koministtetu shiiquwaa shiiqennaagaa ta azinawu odaas. Ta kase laggetuppe ooninne tananne ta naꞌaa oychibeenna gishshawu, keehi boorasaas. Deꞌuwawu halchidobay aybakko qoppiyoogaa doommaas. Hegaadan deretettaa deꞌuwaa giigissanawu baaxetiyoogee goꞌꞌiyaabee?

TAANI LAAMETTANAADAN GEESHSHA MAXAAFAY MAADDIIS:

Isppeene biitta asa gidida naaꞌꞌu Yihoowa Markkati 1976n nu soo yiidi Geeshsha Maxaafaa qofay deꞌiyo xuufiyaa tawu immidosona. Eti tana oychanawu zaaretti yiido wode, tuggaa, asay ubbay issi likke gidennaagaanne naaquwaa xeelliyaagan bolli bollan daro oyshaa oychaas. Eti oysha ubbaa Geeshsha Maxaafaappe zaarin keehi garamettaas! Sohuwaara Geeshsha Maxaafaa xannaꞌanawu eeno gaas.

Koyro taani erana koyiyo gishsha xallawu etaara tobbaas. SHin ta azinaara issippe Yihoowa Markkatu Kawotettaa Addaraashan shiiqiyoogaa doommido wode, ubbabay laamettiis. He wode nuuyyo naaꞌꞌu naati deꞌoosona. Yihoowa Markkati kehatettan nuna bantta kaamiyan ekkidi boosona; qassi shiiquwaa wode nu naata oyqqiyoogan maaddoosona. Hegaa gishshawu, Yihoowa Markkata siiqiyoogaa doommaas.

Gidikkokka, haymaanootiyaaban issi issibaa siriyoogaa aggabeykke. He wode, nu soo asaa oychanawu Isppeene baanawu qofaa qachaas. Qeese gidida, ta aawaa ishay Geeshsha Maxaafaa xannaꞌennaadan tana digganawu maliis. SHin yan deꞌiya Yihoowa Markkati tana keehi maaddidosona. Eti Jarmanen deꞌiya Yihoowa Markkatudan ta oyshaa Geeshsha Maxaafaappe zaaridosona. Jarmane biyo wode Geeshsha Maxaafaa xannaꞌiyoogaa zaarettada doommanawu qofaa qachaas. Ta azinay Geeshsha Maxaafaa xannaꞌiyoogaa agganawu kuuyikkokka, taani murttidoogaadan oottaas. Taani 1978n xammaqettada Yihoowa Markka gidaas.

TAANI GOꞌETTIDO HANOTAA:

Geeshsha Maxaafaa suure eray taani ta deꞌuwan halchiyoobaynne kaalliyo maaray qoncce gidanaadan oottiis. Leemisuwawu, 1 PHeexiroosa 3:1-4y, maccaasati bantta azinawu ‘yashshatettan haarettanaadaaninne’ “Xoossaa sinttan [banttayyo] daro al77o” gidida ‘woppu giida ayyaanay’ deiyoogeeta gidanaadan zorees. Hegaa mala maaray taani machonne aayo gidiyoogaadan, taappe koyettiyaabaa maara oottanaadan maaddiis.

Taani Yihoowa Markka gidoosappe 35 gidiya layttay aadhiis. Taani Yihoowa asaa yara gidada Xoossawu haggaaziyo gishshawunne ta ichashu naatuppe oyddati hegaadan oottiyo gishshawu ufayttays.