Sinttanaabaa Erana Danddayiya Uri Deꞌii?

Nuuni ubbay sinttanaabaa eranawu koyoos. Nuuninne nu siiqiyoogeeti sinttappe ay mala deꞌo deꞌanaakko qoppoos. Nuuni hagaadan oychana danddayoos: ‘Ta naati sinttappe loꞌꞌo deꞌo deꞌaneeshsha? Saꞌay daafaban xayaneeshsha? Taani sinttappe loꞌꞌo deꞌo deꞌanawu haꞌꞌi oottana danddayiyoobi deꞌaneeshsha?’ Hegaa eranawu koyiyoogee wottin deꞌiyaaba; nuuni meretan hirggennan woppu giidi deꞌanawu koyoos. Neeni sinttappe hananabaa eriyaaba gidikko, hegawu asatettaaninne qofan giigettana danddayaasa.

Yaatin, sinttappe hananabay aybee? Hegaa erana danddayiya uri deꞌii? Sinttanaabaa yootiya eranchati yootidobaappe issi issibay polettikkokka, darobay polettibeenna. SHin, Xoossay sinttappe hananabaa suure yootana danddayiyoogee odettiis. Xoossaa ba Qaalan, “Wurssettan hananabaa doomettan, qassi biron hanibeenna yohota beni wodiyaappe doommada awaajjais” yaagiis. (Isiyaasa 46:10) I yootidobay ay keena polettidee?

XOOSSAY YOOTIDOBAY AY KEENA POLETTII?

Xoossay hanana giidi beni yootidobay ay keena polettidaakko neeni erana koshshiyoy aybissee? Carkkuwaa hanotaabaa yootiya dirijjitee daro wodiyawu suure yootiiddi takkidaba gidikko, neeni garamettana danddayaasa. He dirijjitee wontto carkkuwaa hanotay ay mala gidanaakko yootiyoobaa ne wozanan wottaasa. Hegaadankka, Xoossay yootiyoobay ubbay polettiyoogaa neeni akeekikko, sinttappe aybi hananaakko i yootidobaakka eranawu koyiyoogee attenna.

GITA KATAMAA BASHSHAA:

Leemisuwawu, daro xeetu layttawu wolqqaama gididi deꞌida gita katamay xayanaagaa suure yootidoogee keehi maalaaliyaaba. Xoossay hananabaa yootiya, ba asatuppe issuwaa baggaara Nanawe katamay xayanaagaa yootiis. (Sofonaasa 2:13-15) Taarikiyaa xaafeti hegaa xeelliyaagan woygidonaa? Laappuntta xeetu layttan K.K., Baabiloonetinne Meedoonati Nanawe katamaa olidi xayssidosona; hegee hanidoy Xoossay kasetidi yootoosappe 15 gidiya layttay aadhi simmiina gidennan aggenna. Qassi Xoossay Nanawe katamaa “mela bazzodan, baisa soho” oottanaagaa kasetidi yootiis. I hegaadan kaseti yootidobay polettidee? Ee, polettiis. He katamaynne a yuushoy 518 miiloone kaare meetire heera gidiyo gishshawu, woraajjidaageeti geella he katamaa ashshana giidi asay qoppidaba gidikkokka eti hegaadan oottibookkona. Ubba eti he katamaa muleera xayssidosona. Polotikaabaa yootiya ay asinne hegaa kasetidi suure yootana danddayii?

ASAA MEQETTAY XUUGETTANA:

Yarshshuwaa yarshshiyo issisan asaa meqettaa xuuggana uraa sunttaanne i o zarekko, qassi he yarshshiyo sohoy awu kataman deꞌiyaagaakko, 300 layttaappe kasetidi xalatettan yootana danddayiyay oonee? Meeze gidenna he hiraagay polettikko, hegaa kasetidi yootida uri nashettiyoogee attenna. Xoossay kiittin hananabaa yootiyaagee, “Daawita zariyaassi Yoosiyaasa geetettiya issi na7ai yelettana” yaagiis. Qassi Beeteelen yarshshiyoosan ‘i asaa meqettaa xuugganaagaakka’ yootiis. (1 Kawotu Maxaafaa 13:1, 2) Hegaappe heezzu xeeta gidiya layttay aadhi simmin, Yoosiyaasa giyo kawoy Daawita zariyaappe kawotiis; hegee Geeshsha Maxaafan meeze gidida suntta gidenna. Kasetidi odettidaagaadan, Yoosiyaasi “meqettata duufotuppe kessidi” Beeteelen deꞌiya yarshshiyo sohuwaa bolli “taman xuuggiis.” (2 Kawotu Maxaafaa 23:14-16) Asappe keehi wolqqaama gidida uri maaddennan hegaadan ubbabaa kasetidi yootana danddayiyay oonee?

ISSI KAWOTETTAA XAYUWAA:

Alamiyan wolqqaama kawotettaa xoonana ola gadaaway yelettanaappe daro wodiyaa kasetidi a sunttaa, qassi he ola gadaaway xoonanawu goꞌettana hiillaa issi uri kasetidi yootiyaaba gidiyaakko, hegee keehi maalaalissiyaaba. SHin Xoossay Qiiroosa giyo asi issi kawotettaa olanaagaa kasetidi yootiis. Qiiroosi Ayhudata omooduwaappe kessanaagee, qassi eti bantta biitti biidi geeshsha beeta maqidasiyaa zaarettidi keexxanaadan maaddanaageekka odettiis. Qiiroosi goꞌettana hiillaappe issoy shaafay melanaadan oottiyoogaa gidiyoogaa, qassi he katamaa i xooni oyqqanawu penggeekka a sinttan dooya gidanaagaa Xoossay kasetidi yootiis. (Isiyaasa 44:27–45:2) Xoossay kasetidi yootido ha ubbabay polettidee? Qiiroosi he katamaa olidoogee tuma gidiyoogaa taarikiyaa xaafeti maayoosona. Qiiroosa olanchati Baabiloone shaafatuppe issoy harasaa goggana mala hiilla ooso oottidosona​; hegee shaafaa melissidosona giyoogaa mala. Hegaappe simmidi, olanchati dooya deꞌiya, katamaa penggiyaara gelidosona. Takkidi, Qiiroosi Ayhudata omooduwaappe kessidi, Yerusalaamen deꞌiya beeta maqidasiyaa eti zaarettidi keexxanaadan awaajjiis. Qiiroosi Ayhudatu Xoossaayyo goynnenna asa gidiyo gishshawu, hegee maalaalissiyaaba. (Izira 1:1-3) He ubbabaa Xoossaappe attin hara ooninne kasetidi yootana danddayeenna!

Xoossay sinttanaabaa suure yootana danddayiyoogaa bessiya heezzu leemisota beꞌida. SHin i yootin polettidabay hegaa xalla gidenna. Ayhudata kaalettida Yaasu shiiqida daro asaayyo hegaa xeelliyaagan hagaadan giis: “GODAI intte Xoossai intteyyo immana giido lo77o ubbaappe issibinne attibeennaagaa intte ubbai intte wozanaaninne shemppuwan ereeta. I intteyyo immana giidobaappe issibinne attennan, ubbai polettiis.” (Yaasa 23:1, 2, 14) Xoossay qaalaa gelidobaynne hanana giidi yootidobay ubbay polettidoogaa Yaasu wode deꞌida asay kashi gaana danddayenna. SHin Xoossay ba giidobaa waatidi polii? Xoossaa ogeenne asaa ogee keehi dummatees. Xoossay mata wode nena gujjin, asaa keehi goꞌꞌiyaabaa oottanaagaa kasetidi yootido gishshawu, hegee neeni erana koshshiyaaba.

XOOSSAY KASETIDI YOOTIDOBAA ASAAGAARA GEEDDARSSIYO WODE

Asay hananabaa yootanawu, deꞌiyaabaanne saynisee pilggi demmidobaa yiggees; woy ayyaanaabaa eroos giya worddoti odiyoobaa goꞌettees. Eti hananabaa yooti simmidi, yootidobay hananaakko agganaakko utti bayidi xeelloosona.—Leemiso 27:1.

Asaagaappe dumma hanotan Xoossay ubbabaa erees. Xoossay asaa meretaanne eeshshaa wurssidi erees; hegaa gishshawu, i etabaa erana koyikko, he asatinne kumetta deree sinttappe oottanabaa ubbaa erana danddayees. SHin Xoossay hegaappekka aadhiyaabaa oottana danddayees. I ba giidobay polettanaadan hegaa xubbiyaabaa diggana danddayees. I, “Ta doonaappe kiyiya qaalaikka . . . taani . . . kiittidoogaa oottanaappe attin, taakko coo simmenna” yaagiis. (Isiyaasa 55:11) Hegaa gishshawu, Xoossay hanana giidi yootidobaappe issi issibay i sinttappe ay oottanaakko bessees. I ba giidobaa polido gishshawu, sinttappekka hegaadan oottanaagaa ammanettoos.

SINTTAPPE HANANABAA

Nenanne ne siiqiyoogeeta maaddiya, Xoossay sinttappe hanana giidobay deꞌii? Wolqqaama bashshay gakkana haniyoogaa kasetada eriyaaba gidikko, he bashshaappe attanawu issi issibaa oottana danddayaasa. Geeshsha Maxaafan kasetidi odettidabaa xeelliyaagankka hegaadan oottana daddayaasa. Xoossay kumetta alamiyan deꞌiya hanotay mata wode laamettanaagaa yootiis. (“Xoossay Sinttanaabaa Ay Yootidee?” giya saaxiniyaa xeella.) Ha hananabay erancha giyo daroti sinttappe hanana giidi yootiyoobaappe keehi dumma.

Neeni, ‘Xaaxi waaxi xeelliyo wode ha alamiyaa hanotay issi taarike mala. Hegee kasetidi xaafettido gishshawu, wurssettan aybi hananaakko qoncce’ gaada qoppana danddayaasa. Xoossay, “‘Ta qofai minnana; qassi taanikka ta halchchuwaa ubbaa polana’ yaagais. Wurssettan hananabaa doomettan . . . awaajjais” yaagiis. (Isiyaasa 46:10) Hegaa gishshawu, sinttappe hananabay nenanne ne soo asaa ufayssiyaagaa gidana danddayees. Geeshsha Maxaafay sinttanaabaa woygiyaakko neeyyo yootanaadan Yihoowa Markkata oycha. Yihoowa Markkati hara asaagaappe dumma wolqqay deꞌiyoogeeta gidokkona; eti ‘ayyaanaa cenggurssaa siyoos woy sinttanaabaa yootanawu nuuyyo dumma eray deꞌees’ gookkona. Eti Geeshsha Maxaafaa tamaare gidiyo gishshawu, Xoossay sinttappe nena keehi goꞌꞌiyaabaa ha wodiyan oottiiddi deꞌiyoogaa neeyyo yootana danddayoosona.