Yelidaageetoo Intte Naata Heemmite

1, 2. (a) Beni Israaꞌeela biittan deꞌiya henttanchati oottiyo issi issibay aybee? (b) Yelidaageeti henttancha mala gidiyoy aybiinee?

BENI Israaꞌeela biittan deꞌiya henttanchati darobaa genccidi deꞌoosona. Eti gallassa suuluwaanne qamma kinchuwaa danddayiyoogaa xalla gidennan, qohiya doꞌaappenne asaappe bantta wudiyaa naagana koshshees. Henttanchati bantta dorssaa ubba wode loytti xeelloosona; qassi sahettidaageeta woy qohettidaageeta akeekan oyqqoosona. Dorssa marati hara dorssatuppe shugo gidiyo gishshawu, eta dumma ogiyan oyqqoosona.—Doo. 33:13.

² Kiristtaane gidida aawaynne aayyiyaakka he henttanchatuugaa mala eeshshay deꞌiyoogeeta gidana bessees. Eti bantta naata Yihoowa “seeraaninne zoriyan” dichana bessees. (Efi. 6:4) Hegee wolqqaama aawatetta! Seexaanay ba iita qofan ubbatoo naata qohanawu koyees; qassi nagarancha gidiyo gishshawu, naati iitabaa qoppana danddayoosona. (2 Xim. 2:22; 1 Yoh. 2:16) Intteyyo naati deꞌiyaaba gidikko, eta waati maaddana danddayeetii? Intte intte naata heemmanawu maaddiya heezzubaa hagaappe kaallidi beꞌana; hegeekka, eta eriyoogaa, miziyoogaanne kaalettiyoogaa.

INTTE NAATA ERITE

3. Yelidaageeti bantta naatu “hanotaa” waati erana danddayiyoonaa?

³ Loꞌꞌo henttanchay ba dorssati payyakkonne eranawu eta huuphiyan huuphiyan loytti xeellees. Inttekka intte naatu hanotaa eranawu hegaadan oottana danddayeeta. Geeshsha Maxaafay, “Ne dorssati de7iyo hanotaa loittada era” yaagees. (Lee. 27:23) Yaatanawu, intte intte naati oottiyoobaa, oppiyoobaanne etawu siyettiyaabaa akeekana koshshees. Hegaadan oottanawu inttena aybi maaddana danddayii? Hegawu maaddiya waannabatuppe issoy, intte naatuura ubba wode haasayiyoogaa.

4, 5. (a) Naati bantta qofaa yelidaageetuyyo yootanaadan aybi maaddana danddayii? (Ha huuphe yohuwaa doomettan deꞌiya misiliyaa xeella.) (b) Intte naati intteyyo bantta qofaa unꞌꞌettennan yootanaadan ay oottidetii?

⁴ Daro aawatinne aayeti bantta naati yelaga gidiyo wode kaseegaadan etaara haasayennaagaa akeekidosona. Yelagati banttawu siyettiyaabaanne bantta qofaa yootanawu koyennan aggana danddayoosona. Intte naatu hanotaykka hegaa mala gidikko, waatana danddayeetii? Intte naꞌay woy naꞌiyaa inttenaara issibaa adussa saatiyawu haasayanaadan wodiyaa keeriyoogaappe ubba wode etaara issi issibaa haasayite. (Zaa. 6:6, 7) Intte etaara issi issibaa oottana danddayeeta. Qassi etaara hemettana, kaaꞌananne so giddon oottiyoobaa issippe oottana danddayeeta. Hegaadan etaara issippe wodiyaa aattiyo wode, intte naati bantta qofaanne banttawu siyettiyaabaa yootanawu koyana danddayoosona.

⁵ Intte hegaadan oottinkka intte naati ba qofaa yootanawu koyennaba gidikko shin? Hara ogiyan haasayissana danddayeeta. Leemisuwawu, intte naꞌiyaa waana peꞌidaakko oychiyoogaappe intte waani peꞌidaakko iyyo yootana danddayeeta. Hegaappe simmin, akka waana peꞌidaakko babaa intteyyo yootana danddayawusu. Woykko issibaa xeelliyaagan i qofay aybakko eranawu a siranaadan oottenna ogiyan oychite. He allaalliyaa xeelliyaagan i laggetuyyo aybi siyettiyaakko o oychana danddayeeta. Hegaappe simmidi, a ba laggeta woyga zorana danddayiyaakko oychana danddayeeta.

6. Haasayissiyo wode ezggana koyiyaageetanne shiiqanawu deexxennaageeta gidiyoogaa giyoogee woygiyoogee?

⁶ Intte naati inttenaara haasayanawu koyanaadan, intte eti haasayana koyiyo wode siyiyaageetanne shiiqanawu deexxennaageeta gidana koshshees. Yelidaageeti bantta naatuura haasayanawu ubbatoo wode xayiyaaba gidikko, naati bantta metuwaa yootennan aggana danddayoosona. SHiiqanawu deexxennaageeta gidiyoogaa waati bessana danddayeetii? “Ay wodekka taakko yaana danddayaasa” giyoogaa xallay gidenna. Yelaga naati intte eta metuwaa xaasayi xeellanaadan woy intte eta hanqqettanaadan koyokkona. Daro aawatinne aayeti hegaara gayttidaagan loꞌꞌo leemiso gidoosona. Kaylo giyo tammanne uddufun laytta naꞌiyaa, “Taani ta aawaara ubbabaa haasayays. Taani haasayiyo wode i kelttiyaa gelenna; qassi tana borennan ezggees. Yaatidi ubbatoo tana loꞌꞌobaa zorees” yaagaasu.

7. (a) Ekkanawu woy gelanawu qoppidi haratuura laggetiyoogaa malabaa bantta naatuura haasayiyo wode yelidaageeti waatana bessii? (b) Yelidaageeti akeekennan bantta naata waatidi yiilloyana danddayiyoonaa?

⁷ Ekkanawu woy gelanawu qoppidi haratuura laggetiyoogaa mala akeekan oyqqana koshshiyaabaa issi issitoo intte naatuura haasayana danddayeeta. Hegaa malabaa etaara haasayiyo wode eti hegaa waatidi suure oyqqana danddayiyaakko yootiteppe attin hegaa xeelliyaagan iitabaa xallaa yootoppite. Leemisuwawu, intte issi hooteeliyaa gelidi qumaa maanawu oychiyo wode qumaa aattiya uri moorettida qumaa miyoogee kaalettiyoobaa xallaa yootiyaakko waatuuteetii? Intte hegaappe kiyidi hara hooteeliyaa baana danddayeeta. Intte naatikka inttena zoriya oychiyo wode intte yootiyoobay ufayssennabaa xalla gidikko, eti yiillotidi hara uraa zoriyaa oychana danddayoosona. (Qolasiyaasa 3:21 nabbaba.) Hegaa gishshawu, oottana bessiyaaba oottite. Emilo giyo yelaga michiyaa hagaadan gaasu: “Ta aawaynne aayyiyaa taani gelanawu qoppada laggetiyoogaa xeelliyaagan tanaara haasayiyo wode, taani laggetiyoogee bala gaada qoppanaadan oottokkona. Eti taani issi uraa loytta eriyoogeenne aqo laggiyaa demmiyoogee ufayssiyaaba gidiyoogaa yootoosona. Hegee taani hegaa xeelliyaagan etaara haasayanawu koyanaadan oottiis. Taani hegaa malabaara gayttidabaa ubbaa qosennan etawu yootana koyays.”

8, 9. (a) Naati yootiyoobaa kelttiyaa gelennan ezggiyoogee ayba goꞌꞌaa demissii? (b) Intte naati yootiyoobaa ezggiyoogee inttena waati goꞌꞌidee?

⁸ Hegaa xeelliyaagan Kayla, naati inttenaara haasayiyo wode intte danddayan ezggiyoogee shiiqanawu deexxennaageeta gidiyoogaa bessiyo oge gidiyoogaa yootaasu. (Yaaqooba 1:19 nabbaba.) Ba naꞌiyo barkka dichiya Katiyo giyo issi aayyiyaa hagaadan gaasu: “Taani kase ta naꞌiyaa tawu yootiyoobaa danddayan siyikke. A ba yootiyoobaa yootada wurssenna mala teqqays. A yootiyoobay tana sohuwaara salettees; qassi taani a yootiyoobaa siyada yiillotana koyikke. Ta eeshshay haꞌꞌi kaseegaa mala gidenna gishshawu, ta naꞌee eeshshaykka laamettiis. A haꞌꞌi kaseegaappe aaruwan tanaara hashetawusu.”

⁹ Ronalda giyo issi aawaykka ba yelaga naꞌeebaa hegaara issi malabaa yootiis. I hagaadan giis: “A banaara tamaariya issi naꞌaa siiqidoogaa yootido wode, taani koyro keehi yiillotaas. SHin taani Yihooway ba ashkkarata danddayaaninne bessiyaagaadan oyqqiyoogaa wotta dentta qoppada, ta naꞌiyo zoranaappe kase a yootiyoobaa siyiyoogee loꞌꞌo gidiyoogaa qoppaas. Hegaadan oottidoogee keehi maaddiis! Taani ta naꞌee qofaa he wode akeekaas. A ba qofaa yoota simmin, taani iyyo yootiyoobaa siiquwan yootana danddayaas. Hegaappe simmin, taani zoriyoobaa a siyiyo gishshawu keehi garamettaas. A ba eeshshaa laammanawu wozanaappe koyiyoogaa yootaasu.” Intte intte naatuura ubbatoo haasayiyoogee eta qofaanne etawu siyettiyaabaa loytti akeekanawu maaddees. Hegee qassi eti loꞌꞌobaa kuuyanawu intte eta maaddanaadan oottees.a

INTTE NAATA MIZITE

10, 11. Intte naati tumaappe haakkennaadan waati maaddana danddayeetii?

¹⁰ Loꞌꞌo henttanchay ba wudiyaappe dorssay bayana danddayiyoogaa erees. He dorssay guuttaa haakkidi maataa maanawu baana danddayees. He sohuwaappe guuttaa guuttaa haakkiiddi wudiyaappe shaahettees. Hegaadan issi naꞌay leddan leddan tumaappe haakkana danddayees. I iita laggetuppe woy wodiyaa aattiyo iitabaappe denddidaagan qohettana danddayees. (Lee. 13:20) Hegaa malabaappe intte naꞌaa waati naagana danddayeetii?

¹¹ Intte naata tamaarissiyo wode, eti giigissana koshshiyaabay deꞌiyoogaa akeekikko eta sohuwaara maaddite. Eti banttawu deꞌiya loꞌꞌo eeshshaa dichanaadan maaddite. (2 PHe. 1:5-8) So asaa goynuwaa aggennan shiiqiyoogee hegaadan oottanawu keehi maaddees. Xiqimita 2008 Nu Kawotetta Haggaazoy so asaa goynuwaa xeelliyaagan, “So asau aawatettay deꞌiyoogeeti so asaa Geeshsha Maxaafaa xinaatiyaa ubbatoo loꞌꞌo hanotan kaalettiyoogan Yihoowa sinttan bantta aawatettaa polanaadan minttettoos” yaagees. Intte intte naata heemmanawu maaddiya he wodiyaa loytti goꞌetteetii? Intte ayyaanaabaa kaseyiyoogaa naati keehi nashshiyoogaa akeekite.—Maa. 5:3; Pili. 1:10.

12. (a) Yelagati aggennan shiiqiyo so asaa goynuwaappe waani goꞌettiyoonaa? (“Eti Nashshoosona” giya saaxiniyan deꞌiya qofaappe gujjada yoota.) (b) Neeni so asaa goynuwaappe waana goꞌettadii?

¹² Kariso giyo issi yelagiyaa bantta So Asaa Goynoy eta keehi goꞌꞌidoogaa xeelliyaagan yootidobaa akeeka: “Nuuni uttidi issippe tobbiyoogaa keehi dosays. Hegee nuuni issoy issuwaa siiqanaadaaninne issippe ufayssiya wodiyaa aattanaadan maaddees. Nuuni nu So Asaa Goynuwaa ubba wode goynnanaadan ta aaway koyees. I hegaa xoqqu ootti xeelliyoogee taanikka xoqqu oottada xeellanaadan maaddiis. Hegee taani a bonchanaadaaninne nuna ayyaanaaban kaalettanaadan awu immettida aawatettawu haarettanaadan denttettiis.” Britino giyo hara yelagiyaa qassi hegaadan gaasu: “So asaa goynoy taani nu soo asaakko shiiqanaadan maaddiis. So asaa goynoy eti ta qofaa akeekanawu koyiyoogaanne tawu tumuppe qoppiyoogaa bessees. Qassi hegee nuuni issoy issuwaa siiqiyaanne ufayttiya so asaa gidanaadan maaddiis.” Yelidaageetu halchoy bantta naati Yihoowa siiqanaadan tamaarissiyoogaa. So asaa goynoy hegaadan oottanawu keehi maaddiyaabatuppe issuwaa.b

INTTE NAATA KAALETTITE

13. Issi naꞌi Yihoowayyo haggaazanaadan waati denttettana danddayiyoo?

¹³ Loꞌꞌo henttanchay ba dorssata kaallanawunne naaganawu xamꞌꞌaa goꞌettees. I xamꞌꞌaa goꞌettiyo waana halchotuppe issoy ba dorssata “lo77o qooruwan” heemmanaassa. (Hiz. 34:13, 14) Aawanne aayo gidiyo gishshawu, intte halchoykka ayyaanaaban hegaara issi mala. Intte intte naati Yihoowayyo haggaazanaadan eta kaalettanawu koyeeta. Intte intte naati, “Abeet ta Xoossau, taani neeni koyiyoogaa oottanau dosais; ne higgee ta wozanaa giddon de7ees” yaagidi xaafida mazamuraawiyaagaadan qoppanaadan koyeeta. (Maz. 40:8) Hegaadan nashshiya yelagati bantta huuphiyaa Yihoowayyo geppidi xammaqettoosona. Eti he gitabaa kuuyanaappe kase, koshshiyaagaa keena eraa demmana bessees; qassi Yihoowayyo oottanawu wozanaappe koyana bessees.

14, 15. (a) Kiristtaane gidida aawaanne aayee halchoy aybee? (b) Yelagati tumaa sirana danddayiyoy aybissee?

¹⁴ Intte naati Yihoowaara dabbotaa minttanawu koyennaba, ubba bantta ammanuwaara gayttidabaa siriyaaba gidikkoshin? Eti Yihoowa siiqanaadaaninne Xoossay oottidobaa nashshanaadan tamaarissite. (Ajj. 4:11) Hegaa akeekiyo wode, eti Xoossawu goynnanawu koyana danddayoosona.

¹⁵ SHin intte naꞌay tumaa siriyoogaa yootikko shin? Yihoowayyo haggaaziyoogee aybippenne aaruwan goꞌꞌiyaaba gidiyoogaanne ufayssaa demmanaadan maaddiyoogaa eti akeekanaadan oottidi eta waatidi heemmana danddayeetii? Eti siranaadan oottida gaasoy aybakko koyro akeekite. Leemisuwawu, intte naꞌay Geeshsha Maxaafay yootiyoobaa maayenneeyye, ba laggetuyyo sabbakanawu yayyii? Intte naꞌiyaa Xoossay kessido xillotettaa maaraa kaalliyoogee aadhida eratetta gidiyoogaa sirayiiyye, harati bana borennaadan yayyay?

16, 17. Yelidaageeti bantta naati Yihoowaara dabbotanaadan waati maaddana danddayiyoonaa?

¹⁶ Gaasoy ayba gidikkokka, intte naati tumaa siranaadan oottida ubbabaa qoranaadan eta maaddana danddayeeta. Waatidi? Daro aawatinne aayeti kaallidi deꞌiya oyshatu malaa goꞌettidi bantta naata maaddoosona: “Neeni Kiristtaane gidiyoogan neeyyo aybi siyettii? Kiristtaane gidiyoogee nena waati goꞌꞌidee? Yihoowayyo oottanawu gaada ay ay aggadii? Neeni ha wodiyan demmido goꞌꞌaynne sinttaappe demmana goꞌꞌay neeni Yihoowayyo oottanawu gaada aggidobaappe keehi dariyoogaa akeekadii? Aybin?” He oyshata hassayidi ufayssiyaanne keha ogiyan intte naata oychiteppe attin balaa qoranawu koyidi oychiya asadan oychoppite. Hegaa tobbiyo wode Marqqoosa 10:29, 30n deꞌiya qofaa issippe tobbana danddayeeta. Issi issi yelagati Kiristtaanee gidiyo gishshawu aggidobaa issi baggan, demmido goꞌꞌaa qassi hara baggan woraqatan xaafoosona. Hegee eti giigissana bessiya issi issibaa akeekidi giigissanaadan maaddees. Xannaꞌanawu koyiya asaa Geeshsha Maxaafay Tamaarissiyoy giyo maxaafaa woy “Xoossaa Siiquwan” giyo maxaafaa xannaꞌissiyaaba gidikko, nu naata shin loytti xannaꞌissana koshshennee? Intte hegaadan oottiiddi deꞌeetii?

¹⁷ Wodeppe, intte naati oossi oottanawu koyiyaakko banttawu doorana. Intte ammaniyoobaa intte naatikka coo ammanana giidi qoppoppite. Eti Yihoowaara banttawu dabbotana koshshees. (Lee. 3:1, 2) Intte naꞌay Yihoowaara dabbotibeennaba gidikko, intte naꞌaara baaso timirttiyaa ayssi tobbekketii? Intte naꞌay woy naꞌiyaa kaallidi deꞌiyaagaa mala oyshaa qoppanaadan maaddite: “Xoossay deꞌiyoogaa taani waatada erana danddayiyaanaa? Xoossaa Yihooway tawu tumuppe qoppiyoogaa ammananaadan oottiyaabay aybee? Yihooway kessido xillotettaa maaray tana goꞌꞌiyoogaa taani ammaniyoy aybisee?” Intte naꞌay woy intte naati Yihoowa ogee aybippenne loꞌꞌo gidiyoogaa akeekanaadan danddayan maaddite; yaatidi loꞌꞌo henttancha gidiyoogaa bessite.c—Roo. 12:2.

18. Yelidaageeti Gita Henttanchaa Yihoowa leemisuwaa waati kaallana danddayiyoonaa?

¹⁸ Tumu Kiristtaaneti ubbay Gita Henttanchaa leemisuwaa kaallanawu koyoosona. (Efi. 5:1; 1 PHe. 2:25) Yelidaageeti dorssan leemisettida bantta naatu hanotaa loytti erana koshshees; qassi Yihooway immana anjjuwa eti demmanaadan eta kaalettana koshshees. Intte naata tumaa ogiyan dichiyoogan ubbatoo eta heemmite!