Kumetta Wodiyaa Haggaaziyaageeta Hassayite

1. Mishiraachuwaa yootanawu daafuriyaageeta xeelliyaagan PHawuloosayyo aybi siyettidee?

KIITETTIDA PHawuloosi mishiraachuwaa yootanawu daafuridaageeta hassayiis. I hagaadan giis: “Nuuni nu Xoossaa, nu Aawaa sinttan ammanuwan intte oottido oosuwaanne, siiquwan intte daafurido daafuraa, qassi Xoossai intteyyo nu Godaa Yesuus Kiristtoosa baggaara immana giidoogaa ekkanau gencciyo genccaa ubba wode hassayoos.” (1 Tas. 1:3) Yihooway baayyo ammanettida ashkkarati siiquwan oottana danddayiyoobay daro gidin woy guutta gidin, ikka eta hassayees.—Ibr. 6:10.

2. Ha huuphe yohuwan nuuni beꞌanabay aybee?

² Beni gidin ha wodiyan, daro Kiristtaaneti Yihoowayyo kumetta wodiyaa haggaazanawu bantta goꞌꞌaa aggibayidosona. Ha huuphe yohuwan, koyro xeetu layttan issoti issoti hegaadan haggaazanawu ay oottidaakko, qassi ha wodiyan kumetta wodiyaa haggaaziyo issi issi ogeta beꞌana; qassi bantta dosan hegaadan kumetta wodiyaa haggaaziyaageeta nuuni hassayiyoogaa waati bessana danddayiyaakkokka akeekana.

KOYRO XEETU LAYTTAA KIRISTTAANETA

3, 4. (a) Koyro xeetu layttan issoti issoti ayba ogiyan haggaazidonaa? (b) Eti banttawu koshshiyaabaa waati demmidonaa?

³ Yesuusi xammaqetti simmidi sohuwaara Xoossaa Kawotettaabaa yootiyoogaanne haratikka hegaadan oottanaadan tamaarissiyoogaa doommiis. (Luq. 3:21-23; 4:14, 15, 43) Yesuusi hayqqi simmin, kiitettidaageeti he oosoy ubbasan aakki aakki baanaadan sintta xeera gididi kaalettidosona. (Oos. 5:42; 6:7) Issi issi Kiristtaaneti misoonaawe gididi oottanawu haahosaa biidosona; leemisuwawu, Piliphoosi Pilisxxeeman dumma dummasan mishiraachuwaa yootiis. (Oos. 8:5, 40; 21:8) Qassi PHawuloosinne harati haaho biitti biidi sabbakidosona. (Oos. 13:2-4; 14:26; 2 Qor. 1:19) Marqqoosa, Luqaasanne Sillaasa gujjin issoti issoti Geeshsha Maxaafaa giddon deꞌiya issi issi maxaafata xaafidosona woy xaafe gididi harata maaddidosona. (1 PHe. 5:12) Daro michoti he ammanettida ishatuura issippe haggaazidosona. (Oos. 18:26; Roo. 16:1, 2) Giriiketto Geeshsha Maxaafaa Xuufee ha ishatinne michoti oottido keehi ufayssiyaabaa yootees; hegee Yihooway ba ashkkarata hassayiyoogaa bessees.

⁴ Koyro xeetu layttan kumetta wodiyaa haggaazidaageeti banttawu koshshiyaabaa waati demmidonaa? Issi issitoo ishatinne michoti eta imatuwaa mokkidosona; qassi issi issiban eta maaddidosona; shin eti harati banttana hegaadan maaddana bessiyaabadan qoppokkona. (1 Qor. 9:11-15) Qassi issi issi Kiristtaanetinne kumetta gubaaꞌeekka eta maaddiis. (Oosuwaa 16:14, 15; Piliphphisiyuusa 4:15-18 nabbaba.) PHawuloosinne aara issippe haggaaziyaageeti banttawu koshshiyaabaa demmanawu issi issibaa oottidosona.

HA WODIYAN KUMETTA WODIYAA HAGGAAZIYAAGEETA

5. Issi azinaynne machiyaa bantta deꞌuwan kumetta wodiyaa haggaaziyoogaa xeelliyaagan woygidonaa?

⁵ Ha wodiyankka, daroti dumma dumma ogiyan Yihoowayyo kumetta wodiyaa haggaaziiddi deꞌoosona. (“Kumetta Wodiyaa Haggaaziyo Ogeta” giya saaxiniyaa xeella.) Eti bantta dosan doorido he oosuwaa xeelliyaagan etawu aybi siyettii? He ishanttanne michontta hegaadan oychana danddayeeta; qassi eti yootiyoobay inttena minttettana danddayees. Kaallidi deꞌiya leemisuwaa beꞌa: Kumetta wodiyaa aqinye, dumma aqinyenne misoonaawe gididi oottida, qassi haꞌꞌi kare biittan Beeteele keettaa asaa yara gididi haggaaziya issi ishay hagaadan giis: “Taani ta deꞌuwan kuuyido keehi loꞌꞌobatuppe issoy kumetta wodiyaa haggaazuwaa doommidoogaa gaada qoppays. Taassi layttay 18 gidiyo wode, yuniversttiyaa gelada tamaariyoogaappe, kumetta gallassa oosuwaa oottiyoogaappenne aqinye gidiyoogaappe issuwaa dooranawu keehi metootaas. Issi uri kumetta wodiyaa Yihoowayyo haggaazanawu giidi ba goꞌꞌaa aggibayikko, Yihooway hegaa dogennaagaa ta deꞌuwan akeekaas. Taani haraabaa oottanawu dooridaba gidiyaakko, Yihooway tawu immido eraa mule goꞌettana danddayenna ogiyan haꞌꞌi goꞌettays.” A keettayiyaa qassi hagaadan gaasu: “Nuuyyo imettida ooso ubbay taani kayma gidanaadan maaddiis. Yihooway nuna ubba wode naagiyoogaanne kaalettiyoogaa akeekida; nuuni nu goꞌꞌaa aggibayibeennaba gidiyaakko hegaa mala maaduwaa mule demmokko. Nuuni kumetta wodiyaa haggaaziyo gishshawu ubba galla Yihoowa galatays.” Ne deꞌoykka hegaa mala gidanaadan koyay?

6. Yihoowayyo haggaaziyoogaara gayttidaagan ay ammanettana danddayiyoo?

⁶ Issoti issoti haꞌꞌi kumetta wodiyaa haggaazana danddayennaagee qoncce. SHin eti bantta kumetta shemppuwaappe oottiyoobaa Yihooway xoqqu oottidi xeelliyoogaa ammanettana danddayoos. PHawuloosi Qolasiyaasa gubaaꞌiyan deꞌiyaageeta gujjin, Pilimoona 1-3n qonccissido asatubaa qoppa. (Nabbaba.) PHawuloosikka Yihoowaykka eta nashshidosona. Hegaadan, saluwan deꞌiya nu Aaway intte oosuwaakka nashshees. SHin intte ha wodiyan kumetta wodiyaa haggaaziyaageeta waati maaddana danddayeetii?

AQINYETA MAADDIYOOGAA

7, 8. Aqinye gididi haggaaziyaageetuppe koyettiyaabay aybee, qassi gubaaꞌiyan deꞌiyaageeti aqinyeta waatidi maaddana danddayiyoonaa?

⁷ Koyro xeetu layttan kumetta wodiyaa haggaazida Kiristtaanetuugaadan, mishettidi haggaaziya aqinyeti gubaaꞌiyan deꞌiyaageeta keehi minttettoosona. Daroti aginan aginan 70 saate gidiyaagaa minnidi haggaazoosona. Intte eta waatidi maaddana danddayeetii?

⁸ SHero giyo issi aqinyiyaa hagaadan gaasu: “Aqinyeti ubba galla haggaaziyo gishshawu, mino milatoosona. SHin eti hara uri banttana minttettanaadan koyoosona.” (Roo. 1:11, 12) Amarida layttawu kase aqinye gidada haggaazida hara michiyaa bantta gubaaꞌiyan deꞌiya aqinyeta xeelliyaagan hagaadan gaasu: “Eti ubba wode minnidi oottoosona. Haraati bantta kaamiyan eta haggaazo moottaa ekki efiyo wode, qumaa shoobbiyo wode, nadaajjiyaa shammiyo amarida miishshaa etawu immiyo wode woy koshshiya haraban eta maaddiyo wode aqinyeti keehi galatoosona. Hegee intte etawu wozanappe qoppiyoogaa bessees.”

9, 10. Issoti issoti bantta gubaaꞌiyan deꞌiya aqinyeta maaddanawu ay oottidonaa?

⁹ Aqinyetuura issippe haggaaziyoogan eta maaddana koyeetii? Boobi giyo issi aqinyiyaa, “Saaminttaa giddon nunaara haggaaziya ura keehi koyoos” yaagaasu. He gubaaꞌiyan deꞌiya hara aqinyiyaa qassi, “Saateppe guyyiyan issippe haggaaziya ura demmanawu daro metootoos” yaagaasu. Haꞌꞌi Birukiliine Beeteelen oottiya issi michiyaa aqinye gidada haggaazido wodiyaabaa ufayttaydda hagaadan gaasu: “Kaamee deꞌiyo issi michiyaa he wode, ‘Nenaara haggaaziya ura xayiyo wode taayyo dawala; taani nenaara haggaazana’ yaagaasu. Taani aqinye gidada haggaazanaadan a keehi maaddaasu.” Qassi SHero giyo issi michiyaa hagaadan gaasu: “Aqo oyqqibeenna aqinyeti haggaazuwaappe simmiyo wode darotoo banttarkka takkoosona. Aqo oyqqibeenna ishatanne michota issi issitoo intte so asaa goynuwaa wode shoobbana danddayeeta. Harabaakka etaara issippe oottiyoogee eti minnanaadan maaddees.”

¹⁰ Aadhida 50 gidiya layttaa kumetta wodiyaa haggaazida issi michiyaa aqo oyqqibeenna hara michotuura aqinye gidada haggaazido wodiyaabaa qoppada hagaadan gaasu: “Nu gubaaꞌiyaa cimati amarida aginan ubbatoo aqinyeta oychoosona. Eti nu payyatettaynne oosoy ay malakko, qassi nuna qofissiyaabay deꞌiyaakko eranawu oychoosona. Eti hegaa wozanappe oottoosona. Nuussi koshshiyaabi deꞌiyaakkonne eranawu eti nu soo yiidi nuna xomoosoosona.” Ha cimatinne hegaadan oottiya harati Henesifooru leemisuwaa kaalloosona; i ba soo asawu koshshiyaabaa kunttiiddi, PHawuloosakka issi issiban maaddiis.—2 Xim. 1:18.

11. Dumma aqinye gididi haggaaziyaageetuppe koyettiyaabay aybee?

¹¹ Issi issi gubaaꞌetun dumma aqinyeti haggaazoosona; hegee eti deꞌiyo gubaaꞌetussi gita anjjo. Ha ishatuppenne michotuppe daroti aginan aginan 130 saatiyaa minnidi haggaazoosona. Eti banttawu deꞌiya wodiyaa haggaaziiddinne gubaaꞌiyaa maaddiyaabaa oottiiddi wurssiyo gishshawu, miishsha demmanaassi harabaa oottiyo wodiyaa darotoo demmokkona. Eti bantta wodiyaa haggaazuwawu loytti goꞌettana mala macara biiroy etawu aginan aginan amarida aballiyaa immees.

12. Cimatinne harati dumma aqinyeta waati maaddana danddayiyoonaa?

¹² Nuuni dumma aqinyeta waatidi maaddana danddayiyoo? Dumma aqinye gidida darotuura gayttiya, macara biiruwan oottiya issi cimay hagaadan giis: “Gubaaꞌe cimati eta haasayissana, eta hanotaa shaakki erananne eta waati maaddana danddayiyaakko akeekana koshshees. Issi issi ishati dumma aqinyetuyyo aballee imettiyo gishshawu eta aybinne metenna giidi qoppoosona; shin gubaaꞌiyan deꞌiya ishati eta maaddana danddayiyo daro ogee deꞌees.” Kumetta wodiyaa aqinyetudan, dumma aqinyetikka banttanaara issippe haggaaziya ura demmiyo wode ufayttoosona. Inttekka eta hegaadan maaddana danddayeetii?

WORADAA XOMOOSIYAAGEETA MAADDIYOOGAA

13, 14. (a) Nuuni woradaa xomoosiyaageetubaa ay hassayana koshshii? (b) Woradaa xomoosiyaageeta maaddanawu ay oottana danddayay?

¹³ Woradaa xomoosiya ishatinne eta machoti ayyaanaaban kaymanne mino. Hegee tuma gidikkokka, eti harati banttana minttettanaadan, banttanaara issippe haggaazanaadan, qassi issi issitoo banttanaara issippe wodiyaa aattanaadan koyoosona. Woradaa xomoosiya ishati woykko eta machoti sahettiyo wode woy hosppitaaliyaa geliyo wode, oychiyoogaaninne koshshiyaabaa kunttiyoogan eta maaddana danddayoos. “Siiqo dottoree” Luqaasi PHawuloosanne aara dumma dumma gubaaꞌeta xomoosiya harata koshshiyaaban maaddiis.—Qol. 4:14; Oos. 20:5–21:18.

¹⁴ Woradaa xomoosiya ishatinne eta machoti nuuni etawu mata lagge gididi minttettanaadan koyoosona. Woradaa xomoosiya issi ishay hagaadan giis: “Ta laggeti tawu minttettoy koshshiyo wodiyaa eriyaaba milatees. Eti tana akeekan issi issibaa oychoosona; hegee taani tana qofissidabaa etawu yootanaadan maaddees. Eti taani yootiyoobaa loytti siyiyoogee tana daro maaddiis.” Woradaa xomoosiya ishatinne eta machoti ishatinne michoti etawu qoppidi oottiyoobaa wozanappe nashshoosona.

BEETEELE KEETTAA ASAA MAADDIYOOGAA

15, 16. Beeteeleeninne Gita SHiiqotu Addaraashan deꞌiyaageeti ay oottiyoonaa, qassi nuuni eta waati maaddana danddayiyoo?

¹⁵ Kawotettaa mishiraachuwaa sabbakiyoogaara gayttidaagan Beeteeleeninne Gita SHiiqotu Addaraashan oottiyaageeti keehi maaddoosona. Intte gubaaꞌiyan woy intte woradan Beeteele keettaa asay deꞌikko, eta hassayiyoogaa waati bessana danddayeetii?

¹⁶ Eti Beeteele gelido heeran, so asaappenne bantta laggetuppe shaahettido gishshawu, eta laamotana danddayoosona. Beeteelen oottiya haratinne gubaaꞌiyan deꞌiyaageeti etawu lagge gidiyoogee eta keehi minttettees! (Mar. 10:29, 30) Eti Beeteelen oottiyo oosuwaa hanotay, saaminttan saaminttan gubaaꞌe shiiquwawunne haggaazuwawu biyoogaa diggenna. SHin eti issi issitoo Beeteelen oottiyo harabay deꞌana danddayees. Yaatiyo gishshawu, gubaaꞌiyan deꞌiyaageeti hegaa akeekidi Beeteele keettaa asaanne eti oottiyoobaa nashshiyo wode, ubbay keehi goꞌettees.—1 Tasalonqqe 2:9 nabbaba.

KARE BIITTAN KUMETTA WODIYAA HAGGAAZIYAAGEETA MAADDIYOOGAA

17, 18. Kare biittan kumetta wodiyaa haggaaziyaageeti ay ay oottiyoonaa?

¹⁷ Kare biitti biidi haggaaziyaageeti geella kase erenna qumaa maana, qaalaa haasayana, wogaanne hegaa mala harabaa meezetana danddayoosona. Kare biittan kumetta wodiyaa haggaaziyaageeti ay ay oottiyoonaa?

¹⁸ Issoti issoti misoonaawe gididi daro saatiyaa haggaazoosona; qassi eti dumma ogiyan loohido gishshawu, gubaaꞌiyan deꞌiya hara darota loohissoosona. Macara biiroy misoonaawetussi keettaanne eti banttawu koshshiyaabaa kunttana mala aballiyaa immees. Kare biittan haggaaziya issoti issoti macara biiruwan oottoosona; harati qassi macara biiruwaa, xuufiyaa birshshiyo biiruwaa, Gita SHiiqotu Addaraashaa woy Kawotettaa Addaraashata keexxoosona. Eti maanabaanne deꞌanasaa gujjin, etawu koshshiyaabaa macara biiroy woy hegaa heeran deꞌiya ishati kunttoosona. Beeteele keettaa asaadan, etikka ubba wode gubaaꞌe shiiquwaa shiiqoosonanne haggaazoosona; hegaa gishshawu eti deꞌiyo gubaaꞌiyaa keehi maaddoosona.

19. Kare biittappe yiidi intte biittan kumetta wodiyaa haggaaziyaageeta waati maaddana danddayeetii?

¹⁹ Kare biittappe yiidi intte biittan kumetta wodiyaa haggaaziyaageeta waati maaddana danddayeetii? Intte heeran asay miyo qumay eti kase meezeti erennaba gidana danddayiyoogaa hassayite. Eta qumaa shoobbiyo wode hegaa hassayidi, eti maanawu koyiyoobay woy darin meezetibeennabay aybakko kasetidi oychana danddayeeta. Eti intte qaalaanne intte wogaa meezetanawu baaxetiyo wode danddayancha gidite. Eti intte yootiyo ubbabaa akeekiyoogee wode ekkiyaaba; gidikkokka, eti he qaalaa loytti eranaadan kehatettan maaddana danddayeeta. Eti tamaarana koyoosona!

20. Kumetta wodiyaa haggaaziya uraanne a aawaa woy aayyiyo waati maaddana danddayiyoo?

²⁰ Bantta soo asaappe haakkidi deꞌiya, kumetta wodiyaa haggaaziyaageeti daro layttaa haggaazoogaappe guyyiyan cimida bantta aawaa woy aayyiyo waati maaddanaakko qoppana danddayoosona. Aawaynne aayyiyaa Yihoowa Markka gidikko, bantta naati kumetta wodiyaa haggaaziyoogaa aggennaadan koyana danddayoosona. (3 Yoh. 4) Kumetta wodiyaa haggaaziyaageeti bantta aawaa woy aayyiyo maaddanawunne etakko darotoo biidi oychanawu banttawu danddayettida ubbabaa oottiyoogee qoncce. SHin, he cima asatu matan deꞌiyaageeti maadoy koshshiyo wode issi issibaa kunttiyoogan, kumetta wodiyaa haggaaziyaageeta maaddana danddayoosona. Kumetta wodiyaa haggaaziyaageeti, ha wodiyan saꞌan oosettiya ooso ubbaappe xoqqu oottidi xeelliyo sabbakiyo oosuwaa keehi maaddiiddi deꞌiyoogaa nuuni dogana bessenna. (Maa. 28:19, 20) Kumetta wodiyaa haggaaziya uraa aaway woy aayyiyaa maado koyiyo wode intte woy intte gubaaꞌee eta maaddanee?

21. Harati eta maaddiyoogaanne minttettiyoogaa xeelliyaagan kumetta wodiyaa haggaaziyaageetuyyo aybi siyettii?

²¹ Daroti minnidi oottiyoy duretanawu koyiyo gishshataassa; shin kumetta wodiyaa haggaazanawu dooridaageeti minnidi oottiyoy banttawu deꞌiya keehi murutabaa Yihoowayyo immanaassanne harata maaddanaassa. Intte eta maaddanawu oottiyo ubbabaa eti keehi nashshoosona. Kare biittan kumetta wodiyaa haggaaziya issi michiyaa, “Issi asi nashshanawu koyidi xaafidobaara ubbay, harati intteyyo qoppiyoogaanne intte oottiyooban eti ufayttiyoogaa bessees” yaagaasu.

22. Kumetta wodiyaa haggaazuwaa xeelliyaagan neeyyo aybi siyettii?

²² Kumetta wodiyaa Yihoowayyo haggaaziyoogee ubbaappe aadhiya gita anjjuwaa demissiya deꞌo oge. Metiya issi issibay deꞌikkokka, hegee darobaa tamaariyoonne ufayssiya deꞌo deꞌiyo oge. Kumetta wodiyaa haggaazoy, Yihoowayyo ammanettidi oottiya ubbay sinttappe Xoossaa Kawotettaa haaruwan merinawu oottana ufayssiya oosuwawu haꞌꞌi giigettanaadan maaddees. Nuuni ubbay kumetta wodiyaa haggaaziyaageeti ‘ammanuwan oottiyo oosuwaanne siiquwan daafuriyo daafuraa ubba wode hassayiyaageeta’ gidoos.—1 Tas. 1:3.