Nuuni Geeshsha Gidana Koshshiyoy Aybissee?

1. Wogaabaa maxaafay nuna waatidi maaddana danddayii?

WOGAABAA maxaafay Geeshsha Maxaafan deꞌiya ay maxaafaappekka aaruwan geeshshatettaabaa yootees. Geeshshatettay Yihoowayyo tumuppe goynniya asa ubbaappe koyettiyaaba gidiyo gishshawu, Wogaabaa maxaafan deꞌiya qofaa akeekiyoogee nuuni geeshsha gidanaadan maaddees.

2. Wogaabaa maxaafay ay qonccissii?

² Hananabaa yootiya Muusee xaafido Wogaabaa maxaafay tamaarissanawu maaddiya “Xoossaa maxaafa” shaaho. (2 Xim. 3:16, 17) Ha maxaafan deꞌiya shemppotu ubban Yihoowa sunttay amakaayiyan tammaa gidiyaagee deꞌees. Wogaabaa maxaafan deꞌiya qofaa akeekiyoogee nuuni Xoossaa sunttay borettanaadan oottiyaabaappe haakkanaadan maaddees. (Wog. 22:32) He maxaafan darotoo qonccida, “Taani GODAA” giya qofay nuuni Yihoowa azazettanaadan hassayissees. Ha huuphe yohuwaaninne kaalliyaagan, nuuni geeshsha goynuwaa goynnanaadan maaddiya, Xoossay immido imota gidida, ha maxaafan deꞌiya keehi maaddiyaabaa tobbana.

GEESHSHA GIDANA KOSHSHEES

3, 4. Aarooninne a naati meecettiyoogee aybiyyo leemisoo? (Ha huuphe yohuwaa doomettan deꞌiya misiliyaa xeella.)

³ Wogaabaa 8:5, 6 nabbaba. Yihooway Aarooni Israaꞌeelatuyyo qeese ubbatu halaqa gidanaadan, qassi a naati qeese gididi oottanaadan dooriis. Aarooni Yesuus Kiristtoosassi, qassi a naati ayyaanan tiyettida Kiristtaanetussi leemiso. Yaatin, Aarooni meecettiyoogee Yesuusi geeyana koshshiyoogaa bessiyaabee? CHiikka, Yesuusi nagarinne ‘bali baynnaagaa’ gidiyo gishshawu, hegee i geeyiyoogaa bessiyaaba gidenna. (Ibr. 7:26; 9:14) SHin Aarooni meecetti geeyiyoogee Yesuusa geeshshatettaanne xillotettaa bessiyaaba. Aaroona naati meecettiyoogee shin aybawu leemisoo?

⁴ Aaroona naati meecettiyoogee saluwan qeese gidanaadan doorettidaageeti geeyiyoogaa bessiyaaba. Ayyaanan tiyettidaageetu xinqqatee Aaroona naati geeyiyoogaara gayttidabee? CHii, xinqqatee nagaraa xayssenna; shin, issi asi Xoossaa Yihoowayyo bana muleera geppidoogaa bessees. Ayyaanan tiyettidaageeti ‘qaalan meecettoosona’; qassi eti hegaadan oottanawu Yesuusi tamaarissidobaa kumetta wozanaappe oosuwan peeshshoosona. (Efi. 5:25-27) Yaatiyo gishshawu, eti geeshsha. ‘Hara dorssati’ shin?—Yoh. 10:16.

5. Hara dorssati Xoossaa Qaalan geeyoosona gaana danddayiyoy aybissee?

⁵ Aaroona naati “zawai bainna daro asaa” gidida Yesuusa hara dorssatu leemiso gidokkona. (Ajj. 7:9) Yaatin xammaqettida zaway baynna daro asaykka Xoossaa Qaalan geeyii? Ee, geeyees! Saꞌan deꞌanawu hidootiyaageeti Yesuusa suuttay keehi koshshiyoogaanne goꞌꞌiyoogaa Geeshsha Maxaafaappe nabbabiyo wode, hegaa ammanidi “qamminne gallassi” Xoossaayyo geeshsha oosuwaa oottoosona. (Ajj. 7:13-15) Ayyaanan tiyettidaageetinne hara dorssati ubba wode geeshsha gididi deꞌiyoogee eta ‘loꞌꞌo deꞌuwan’ qoncci beettees. (1 PHe. 2:12) Bantta Henttanchay Yesuusi yootiyoobaa siyidi ammanettidi a kaalliya, ayyaanan tiyettidaageetunne hara dorssatu geeshshatettaanne issippetettaa beꞌiyo wode Yihooway keehi ufayttiyoogee qoncce!

6. Nu huuphiyaa waati qorana koshshii?

⁶ Israaꞌeelan qeese gididi oottiyaageeti asatettan geeshsha gidanaadan odettida azazoy ha wodiyan deꞌiya Yihoowa asaa keehi maaddiyaaba. Geeshsha Maxaafaa nunaara xannaꞌiyaageeti darotoo nuuni goynniyo sohoy geeshsha gidiyoogaanne nuunikka geeshsha, qassi suure maayuwaa maayiyaageeta gidiyoogaa akeekoosona. Giddoppe attin, qeesetu geeshshatettay Yihoowayyo goynniyo xoqqa deriyaa giꞌꞌiya uraa “wozanai geeshsha” gidana bessiyoogaa nuuni akeekanawu maaddees. (Mazamure 24:3, 4 nabbaba; Isi. 2:2, 3) Nuuni Xoossaayyo geeshsha qofaappenne geeshsha wozanaappe, qassi geeshsha asatettan oottana bessees. Hegawu ubbatoo nu huuphiyaa qorana bessees; yaati simmidi, issoti issoti geeshsha gidanawu bantta deꞌuwan issi issibaa giigissoosona. (2 Qor. 13:5) Leemisuwawu, pokkobaa bessiya misiliyaa eriiddi beꞌiya xammaqettida uri, ‘Taani tumuppe geeshsha asee?’ giidi bana oychana koshshees. Yaatidi, i he iitabaa beꞌiyoogaa agganawu maaduwaa oychana koshshees.—Yaaq. 5:14.

AZAZETTIYOOGAN GEESHSHA GIDA

7. Wogaabaa 8:22-24 maaran, Yesuusi leemiso gidiyaabaa ay oottidee?

⁷ Israaꞌeelan qeesetettaa wogay doommiyo wode, Muusee Qeese Ubbatu Halaqaa Aaroonanne a naatu ushacha hayttaa xeeraa, ushacha kushiyaa wogga biradhiyaanne ushacha tohuwaa wogga biradhiyaa dorssaa suuttaa tiyiis. (Wogaabaa 8:22-24 nabbaba.) Qeeseta hegaadan suuttaa tiyiyoogee eti bantta oosuwaa wozanappe azazettidi oottana bessiyoogaa akeekissees. Hegaadankka, Qeese Ubbatu Halaqay Yesuusi ayyaanan tiyettidaageetussinne hara dorssatussi wotoy baynna leemiso gidiyaabaa oottiis. A hayttay Xoossaa kaaletuwaa siyanawu ubba wode giigi uttiis. Yesuusa kushee Yihoowa sheniyaa oottees; qassi a tohoy geeshshatettaa ogiyaappe mule sherꞌꞌi gi erenna.—Yoh. 4:31-34.

8. Yihoowayyo goynniya ubbay waatana bessii?

⁸ Ayyaanan tiyettida Kiristtaanetinne Yesuusa hara dorssati suure gididi deꞌida, Qeese Ubbatu Halaqaa, bantta godaa leemisuwaa kaallana bessees. Yihoowayyo goynniya ubbay Xoossaa Qaalan deꞌiya kaaletuwaa eeno giidi azazettana bessees; yaatiyoogan eti a ayyaanaa azzanttiyoogaappe haakkoosona. (Efi. 4:30) Eti ‘sitta ogiyan hemettana’ bessees.—Ibr. 12:13.

9. Bolla Gididi Heemmiyaagaa yara gidida ishatuura issippe oottida heezzu ishati woygidonaa, qassi eti giidobay neeni geeshsha gidada deꞌanaadan waati maaddana danddayii?

⁹ Bolla Gididi Heemmiyaagaa yara gidida ishatuura daro layttaa issippe oottida, saꞌan deꞌanawu hidootiya heezzu ishati wozanappe nashshidi yootidobaa beꞌa. Etappe issoy hagaadan giis: “Etaara oottiyoogee gita maata; shin taani etayyo mata lagge gidido gishshawu, eti ayyaanan tiyettida Kiristtaane gidikkokka nagaraa oottenna asa gidennaagaa issi issitoo akeekaas. SHin, taani sintta xeera gididi kaalettiya he ishatuyyo ubba wode azazettanawu qofaa qachaas.” Hara ishay qassi, “‘Kiristtoosayyo azazettana mala’ minttettiya 2 Qoronttoosa 10:5n deꞌiyaagaa mala xiqiseti, sintta xeera gididi kaalettiyaageetuyyo taani azazettanaadaaninne etaara hasheta oottanaadan maaddiis. Hegee wozanappe azazettiyoogaa” yaagiis. Hankko ishay qassi, “Yihooway dosiyoobaa dosiyoogeenne i ixxiyoobaa ixxiyoogee, qassi ubba wode a kaaletuwaa kaalliyoogeenne a ufayssiyaabaa oottiyoogee a dirijjitiyaayyoonne i saꞌawu halchidobaa oottanaadan dooridoogeetuyyo azazettiyoogaa giyoogaa” yaagiis. Ha ishay, guyyeppe Bolla Gididi Heemmiyaagaa yara gidida Naatan Noori 1925 Wochiyo Keelan kiyida, “Deriyaa Yeletaa” giya huuphe yohuwan deꞌiya qofaa issoti issoti maayana xayikkonne i sohuwaara maayidoogaa akeekiis. Noori hegaadan azazettidoogee he ishaa keehi garamissiis. Ha heezzu ishati yootidobaa wotta denttada qoppiyoogee azazettiyoogan neeni geeshsha gidanaadan maaddees.

SUUTTAARA GAYTTIDA HIGGIYAA AZAZETTIYOOGAA

10. Suuttaara gayttidaagan imettida higgiyaa azazettiyoogee ay keena koshshiyaabee?

¹⁰ Wogaabaa 17:10 nabbaba. Yihooway Israaꞌeelati “suutta” meennaadan azaziis. Kiristtaanetikka mehiyaa suuttaappe woy asaa suuttappe haakkana bessees. (Oos. 15:28, 29) Xoossay suuttaa miya uraa bolli ‘ba sinttaa tukkanaagaanne’ a ba asaa giddoppe xayssanaagaa yootiis; hegaa malabay nu bolli gakkanaadan koyokko. Nuuni a siiqoosinne awu azazettanawu koyoos. Deꞌuwawu hirggissiyaabay gakkiyo wodiyankka, Yihoowa erennaageetinne ayyo azazettanawu koyennaageeti nuna woossiyo wode eti koyiyoobaa oottenna mala murttida. Ee, nuuni suuttaappe haakkiyo gishshawu asay nu bolli qilliiccanaagaa eroos; shin nuuni Xoossawu azazettanawu koyoos. (Yih. 17, 18) Nuuni suuttaa meennaadan woy akkamuwawu a goꞌettennaadan ‘naagettana’ mala maaddiyaabay aybee?—Zaa. 12:23.

11. Layttan layttan Nagaraa Atto Giissiyo Gallassay aynne maaddenna haymaanoote woga gidenna giyoy aybissee?

¹¹ Beni Israaꞌeelan layttan layttan Nagaraa Atto Giissiyo Gallassi qeese ubbatu halaqay mehiyaa suuttaa goꞌettidi oottiyoobay Xoossay suuttaa ayba ogiyan xeelliyaakko akeekanawu maaddees. Suuttay dummabawu goꞌettiyooba. Suuttay Yihoowa maarotaa koyiyaageetu nagaray atto geetettanaadan maaddees. Mirgguwaanne deeshshaa suuttay maachaa taabootaa qumꞌꞌuwaappe ha baggaaninne ya baggan caccafettees. (Wog. 16:14, 15, 19) Hegee Yihooway Israaꞌeelatu nagaraa atto gaanaadan oottees. Hegaa bolli qassi, “asho maayida meretaa ubbaa de7oikka a suuttaa giddon de7iyo gishshau,” issi uri mehiyaa woy doꞌaa shukkiyo wode suuttaa saꞌan gussidi biittaa kammanaadan Yihooway azaziis. (Wog. 17:11-14) Ha ubbabay aynne maaddenna haymaanoote wogee? CHii, gidenna. Nagaraa Atto Giissiyo Gallassi suuttaa goꞌettiyoogeekka suuttaa saꞌan gussanaadan imettida azazoykka, Yihooway hegaappe kase Noheyyoonne a zerettawu suuttaara gayttidaagan immido azazuwaara maayettiyaaba. (Doo. 9:3-6) Xoossaa Yihooway asi suuttaa goꞌettennaadan azaziis. Yaatin hegaara gayttidaagan Kiristtaaneti ay oottana koshshii?

12. Suuttay nagaraa atto giyoogaara gayttidaba gidiyoogaa PHawuloosi Ibraawe Kiristtaanetuyyo xaafido dabddaabbiyan waati qonccissidee?

¹² Kiitettida PHawuloosi suuttay geeshshiyoogaa xeelliyaagan Ibraawe Kiristtaanetuyyo, “Higgee giyoogaadan, tumakka amaridabaappe attin, ubbabaikka suuttan geeyees; suutti gukkana xayikko, atotetti baawa” yaagiis. (Ibr. 9:22) PHawuloosi gujjidi, mehiyaa yarshshoy Israaꞌeelata amarida ogiyan maaddidaba gidikkonne, eti nagarancha gidiyoogaanne bantta nagaraappe geeyanawu hegaappe aadhiya yarshshoy etawu koshshiyoogaa hegee hassayissiyoogaa yootiis. Ee, Higgiyawu “yaana lo77obaa eesho xalaalai de7ees; ayyo tumu leemisoi baawa.” (Ibr. 10:1-4) Yaatin, nagaray waani atto geetettana danddayii?

13. Yesuusi ba suuttaa waagaa Yihoowayyo sheedhidoogaa xeelliyaagan neeyyo aybi siyettii?

¹³ Efisoona 1:7 nabbaba. ‘Nu gishshawu ba huuphiyaa immida’ Yesuus Kiristtoosa hayqoy anne a Aawaa siiqiya ubbaa keehi goꞌꞌiyaaba. (Gal. 2:20) SHin nuna naxa kessiyaabay woy nu nagaraa atto giissiyaabay Yesuusi hayquwaappe denddi simmidi oottidobaa. Nagaraa Atto Giissiyo Gallassaara gayttidaagan Muuse Higgee eesho gididobaa Yesuusi poliis. He gallassi, yarshshido mehiyaa suuttaappe guuttaa qeese ubbatu halaqay dunkkaaniyan, qassi guyyeppe Solomona beeta maqidasiyan Ubbaappe Aadhida Geeshsha Sohuwaa Xoossaa sintti ekkidi gelees. (Wog. 16:11-15) Hegaadankka, Yesuusi ba suuttaa waagaa Yihoowayyo immanawu saluwaa geliis. (Ibr. 9:6, 7, 11-14, 24-28) Nuuni Yesuusa suuttay ashshiyoogaa ammaniyoogan, nu nagaray atto geetettiyoogaanne nu zoriyaa wozanay geeyiyoogaa eriyo gishshawu keehi ufayttoos!

14, 15. Suuttaara gayttidaagan Yihoowa higgiyaa akeekiyoogeenne azazettiyoogee koshshiyaaba gididoy aybissee?

¹⁴ Nuuni “suutta” meennaadan Yihooway azazidoy aybissakko haꞌꞌi loytta akeekadii? (Wog. 17:10) Xoossay suuttaa geeshshaba oottidi xeelliyo gaasuwaa akeekadii? I suuttaa deꞌodan xeellees. (Doo. 9:4) Nuuni suuttaa Xoossaagaadan xeellana koshshiyoogaa, qassi suuttaappe haakkanaadan i azazidobaa azazettana koshshiyoogaa ammanay? Nuuni Xoossaara saruwan deꞌanawu, Yesuusa wozuwaa yarshuwaa ammanananne nuna Medhidaagee suuttaa xoqqu oottidi xeelliyoogaa akeekana koshshees.—Qol. 1:19, 20.

¹⁵ Nuuni suuttaa ekkanaadan harati minttettanaadan oottiyaabay merettana danddayees. Woykko nu soo asi woy nu laggee akkamettiyo wode suuttaa ekkana woy aggana koshshiyaakko kuuyanaadan oottiyaabay qoppennan merettana danddayees. Qoppibeennabay hegaadan merettiyo wode, suuttawu suuppa kifiletuura gayttidabaanne akkamettiyo ogiyaa kuuyana koshshees. Hegaa gishshawu, kaseti pilggidi gakkana danddayiyaabawu giigetti uttiyoogee loꞌꞌo. Hegaadan oottiyoogeenne woossiyoogee qoppibeennabay gakkiyo wode nu qofaa laammennan minni eqqanaadan maaddees. Nuuni Geeshsha Maxaafay oottoppite giyoobaa oottidi Yihoowa azzanttana koyennaagee qoncce! Daro aakimetinne hara asati asa shemppuwaa ashshanawu asay suuttaa immanaadan minttettoosona. SHin, suuttaa ayba ogiyan xeellana bessiyaakko kuuyiyay Medhidaagaa gidiyoogaa geeshsha gidida Yihoowa deree ammanees. Yihooway “suutta” ubbaa geeshsha oottidi xeellees. Suuttaara gayttidaagan nuuni a azazuwaa naaganawu murttidaageeta gidana bessees. Nuuni geeshsha deꞌo deꞌiyoogan, shemppo ashshiya Yesuusa suuttaa xoqqu oottidi xeelliyoogaa bessoos; nagaraa atto giissiyaynne merina deꞌuwaa demissiyay Yesuusa suuttaa.—Yoh. 3:16.

YIHOOWAY NUUNI GEESHSHA GIDANAADAN KOYIYOY AYBISSEE?

16. Yihoowa asay geeshsha gidana koshshiyoy aybissee?

¹⁶ Xoossay Israaꞌeelata Gibxxe aylletettaappe kessiyo wode eta, “Taani intte Xoossaa gidanau, inttena Gibxxe biittaappe kessida GODAATTENNEE. Hegaa gishshau, taani geeshsha gidiyo gishshau, inttekka geeshsha gidite” yaagiis. (Wog. 11:45) Yihooway geeshsha gidiyo gishshawu, Israaꞌeela asaykka geeshsha gidanaadan koyiis. Nuuni Yihoowa Markkatikka geeshsha gidana bessees. Wogaabaa maxaafay hegaabaa loytti qonccissees.

17. Wogaabaa maxaafaa xeelliyaagan haꞌꞌi neeyyo aybi siyettii?

¹⁷ Wogaabaa maxaafaappe keehi maaddiya amarida qofaa beꞌida. Ha huuphe yohuwan beꞌidobay geeshsha ayyaanaa kaaletuwan xaafettida Wogaabaa maxaafaa neeni nashshanaadan maaddennan aggenna. Wogaabaa maxaafan qonccida keehi maaddiya qofaappe xannaꞌido amaridabay nuuni geeshsha gidana bessiyoy aybissakko neeni loytta akeekanaadan maaddidoogee qoncce. Wogaabaa maxaafan deꞌiya hara keehi maaddiya qofay aybee? Yihoowayyo geeshsha oosuwaa oottiyoogaa xeelliyaagan shin ha maxaafaappe ay tamaarana danddayiyoo? Kaalliya huuphe yohuwan hegaabaa beꞌana.