Tamaarissanaadan Yihooway Nuna Kaalettees

1. Ha wodiyan deꞌiya Kiristtaaneta sabbakiyo oosuwaara gayttidaagan ayba metoy gakkidee?

GEESHSHA MAXAAFAA TAMAARETIa 130 gidiya layttappe kase Kawotettaa mishiraachuwaa yootiyoogaa doommido wode, eta daro metoy gakkiis. Koyro xeetu layttaa Kiristtaanetuugaadan, etikka daro asaa ufayssenna kiitaa awaajjidosona. He wode eta qooday guutta; qassi alamiyaa asay eta tamaaribeenna asadan xeellees. Guyyeppe, Seexaanaa Dabloosi ‘wolqqaamaa hanqquwan’ eta bolli denddiis. (Ajj. 12:12) Qassi eti he wodeppe doommidi ‘wayssiya ha wurssetta gallassankka’ Kawotettaa mishiraachuwaa sabbakiiddi deꞌoosona.—2 Xim. 3:1.

2. Ha wodiyan sabbakanaadan Yihooway nuna waati maaddii?

² Gidoppe attin, Yihooway ba asay Kawotettaa mishiraachuwaa ha wodiyan awudeegaappenne aaruwan yootanaadan koyees; qassi i he halchuwaa polennaadan aybinne teqqana danddayenna. Yihooway beni Israaꞌeela deriyaa Baabilooneppe naxa kessidoogaadan, ha wodiyankka ba asaa worddo haymaanoote ubbaa xaaxa waaxiya ‘Gita Baabiloonippe’ kessiis. (Ajj. 18:1-4) I maaddiyaabaa tamaarissees, sarotettaa immiyoogan anjjees, qassi nuuni appe tamaaridobaa haratuyyo yootanaadan maaddees. (Isiyaasa 48:16-18 nabbaba.) SHin hegee, Yihooway sinttappe hananabaa erana danddayiyo ba wolqqaa goꞌettidi, alamiyan haniya ubbabay Kawotettaa mishiraachoy odettanaadan maaddiyaaba gidanaadan oottees giyoogaa gidenna. Sabbakiyo oosuwaara gayttidaagan, alamiyan deꞌiya issi issibay nuna maaddidoogee qoncce; shin Seexaanay haariyo ha alamiyan gakkiya, sabbakiyo oosoy deexxanaadan oottiya yedetaanne hegaa mala harabaa genccana danddayiyoy Yihooway maaddiyo gishshataassa.—Isi. 41:13; 1 Yoh. 5:19.

3. Daaneela hiraagay ha wodiyan waani polettidee?

³ Wodiyaa wurssettan tumu ‘eray’ daranaagaa kasetidi yootanaadan Yihooway Daaneela ba ayyaanan denttettiis. (Daaneela 12:4 nabbaba.) Banttana Kiristtaane giyaageeti daro wodiyawu goozido Geeshsha Maxaafaa tumaa ba asay akeekanaadan Yihooway maaddiis. I ba asay kumetta saꞌan tumu eraa yootanaadan maaddiiddi deꞌees. Daaneeli kasetidi yootidobay haꞌꞌi polettiiddi deꞌees. Ha wodiyan, 8,000,000 gidiya asay Geeshsha Maxaafaa tumaa ekkidi, he tumaa kumetta alamiyan yootiiddi deꞌees. Kumetta saꞌan mishiraachuwaa yootanawu hanotay injjetanaadan maaddida issi issibay aybee?

GEESHSHA MAXAAFAY BIRSHSHETTIDOOGAA

4. Geeshsha Maxaafay 19tta xeetu layttan aappun doonan birshshettidee?

⁴ Mishiraachuwaa yootanawu hanotay injjetanaadan maaddidabaappe issoy Geeshsha Maxaafay daro asawu gakkidoogaa. Daro xeetu layttawu, Kiristtaane giyo haymaanootiyaa kaalettiyaageeti Geeshsha Maxaafaa asay nabbabennaadan diggidosona; ubba a birshshida issota issota woridosona. SHin 19tta xeetu layttan, issi issi dirijjiteti Geeshsha Maxaafaa 400 gidiya doonan birshshidosona. Geeshsha Maxaafay 1900n daro asaa gakkiis; shin eti Geeshsha Maxaafaa tumu eraa demmibookkona.

5. Geeshsha Maxaafaa birshshiyoogaara gayttidaagan Yihoowa Markkati ay oottidonaa?

⁵ Geeshsha Maxaafaa Tamaareti sabbakana koshshiyoogaa akeekidosona; qassi Geeshsha Maxaafay yootiyoobaa tamaarissanawu baaxetidosona. Hegaa bollikka, Yihoowa asati dumma dumma Geeshsha Maxaafaa birshshettata goꞌettidosonanne asawu immidosona. Eti 1950ppe doommidi, Ooratta Alamiyaa Geeshsha Maxaafaa Xuufetu Birshshettaa kumettaa woy appe amaridaagaa 120ppe dariya doonan birshshidosona. Qassi eti 2013n zaaretti giigissido, Inggilizetto Ooratta Alamiyaa Birshshettay hara doonan birshshanawu metennaagaa. Nabbabanawu metenna Geeshsha Maxaafaa goꞌettiyoogee mishiraachuwaa loytti yootanawu maaddees.

SAROTETTAY MAADDIIS

6, 7. (a) Aadhida xeetu layttan olay ay keena aakkidee? (b) Issi issi biittan amarida sarotettay deꞌiyoogee mishiraachuwaa yootanawu waati maaddidee?

⁶ Aadhida xeetu layttan, alamiyan denddida naaꞌꞌu wolqqaama olata gujjin, keehi daro olay denddiis. Hegaappe denddidaagan miilooniyan qoodettiya asay hayqqiis. SHin Yihoowa Markkatu dirijjitiyaa sintta xeera gididi kaalettiya Naatan Noori, Naaꞌꞌantto Alamiyaa Olaa wode 1942n, issi gita shiiquwan, “Sarotettay Ubba Wode Deꞌanee?” giya huuphe yohuwan haasayaa haasayiis. He haasayay he olaappe simmin Armmageedooni gidennan, sarotettay guutta wodiyawu yaanaagaa bessiya, Ajjuutaa 17 qofaa qonccissiis.—Ajj. 17:3, 11.

⁷ Naaꞌꞌantto Alamiyaa Olay wuriyoogee kumetta saꞌan sarotettay deꞌanaadan oottibeenna. Issi xinaatee qonccissidoogaadan, 1946ppe 2013 gakkanaashin deꞌiya wodiyan 331 olay denddin, miilooniyan qoodettiya asay hayqqiis. SHin he wodetun, daro biittatun amarida sarotettay deꞌiyo gishshawu, Yihoowa ashkkarati Kawotettaa mishiraachuwaa loytti yootidosona. Hegee ay demissidee? Kumetta saꞌan, 1944n Yihoowa Markkatu qooday 110,000ppe guutta. SHin ha wodiyan, eta qooday 8,000,000 matiis! (Isiyaasa 60:22 nabbaba.) Nuuni mishiraachuwaa yootanawu hanotay injjetanaadan oottiya sarotettaa demmiyo wode ufayttokkoo?

ISSISAAPPE HARASAA BAANAWU INJJETIIS

8, 9. Issisaappe harasaa baanawu hanotay injjetanaadan oottidabay aybee, qassi hegee nu oosuwawu waati maaddii?

⁸ Issisaappe harasaa baanawu hanotay injjetidoogee, loytti sabbakanawu maaddiis. Koyro Wochiyo Keelay attamettoosappe 21 layttay aadhi simmin, 1900n, Amarkkan deꞌiya kaamee 8,000 xalla; qassi he biittan kaamiyawu injjetiya ogee he wode darenna. SHin ha wodiyan, kumetta saꞌan issi biiloonenne baggaappe dariya kaamee deꞌees; qassi kaamiyawu injjetiya daro miiloone kilo meetire ogee deꞌees. Kaameenne injjetiya ogee haahosan deꞌiya asawukka Kawotettaa mishiraachuwaa gattanawu maaddees. SHin nuuni issisaappe harasaa baanawu hanotay injjetennaba woy qassi darosaa tohuwan baana koshshiyaaba gidikkokka, asaa erissiyo ashkkara oottanawu wozanappe baaxetoos.—Maa. 28:19, 20.

⁹ Issisaappe harasaa baanawu injjetanaadan oottida harabaykka nu oosuwawu keehi maaddees. Caana kaamee, markkabeenne baaburee nu xuufeta keehi haahosaa amarida saaminttatun gattanawu maaddoosona. Horophillee qassi woradaa xomoosiyaageeti, Macara Biiruwaa Konttiyaa yarati, misoonaawetinne harati gita shiiquwawu woy ayyaanaaban harabaa oottanawu elle gakkanaadan maaddees. Qassi Bolla Gididi Heemmiyaagaa yaratinne waanna biiroy kiittiyo ishati bantta ishantta minttettanawunne tamaarissanawu horophilliyan daro biitti boosona. Yaatiyo gishshawu, issisaappe harasaa baanawu goꞌettiyoobay kaseegaappe injjetidoogee, Yihoowa asaa giddon deꞌiya issippetettaa minttanawu maaddiis.—Maz. 133:1-3.

DUMMA DUMMA DOONAA GOꞌꞌAA

10. Inggilizettoy kumetta alamiyan asay haasayiyo doona geetettiyoy aybissee?

¹⁰ Koyro xeetu layttan Rooma Haaruwan deꞌiya daro asay Giriikettuwaa haasayees. Ha wodiyan qassi daro asay Inggilizettuwaa haasayees. Inglish as a Gilobal Languwej giyo maxaafay, “Alamiyan deꞌiya asaappe missa gidiyaagee Inggilizettuwaa haasayees woy akeekees” yaagees. Inggilizettoy kumetta alamiyan zalꞌꞌiyaara, polotikaara, saynisiyaaranne tekinolojiyaara gayttidaagan keehi erettiya doona gidiyo gishshawu, daro asay he doonaa tamaarees.

11. Yihoowa asay oottiyo oosuwaara gayttidaagan Inggilizettoy waati maaddidee?

¹¹ Inggilizettoy kumetta saꞌan asay haasayiyo doona gididoogee tumaa asa ubbawu gattanawu maaddiis. Daro layttawu, Wochiyo Keelaynne hara xuufeti koyro Inggilizettuwan giigoosona. Inggilizettoy Yihoowa Markkatu waanna biiruwankka goꞌettiyo doona. Qassi nu ishatinne michoti dumma dumma biittaappe Niyoorkken, Patrssenen deꞌiya timirtte keettaa biidi Inggilizettuwan tamaaroosona.

12. Nu xuufeta ay keena doonan birshshidoo, qassi hegaara gayttidaagan tekinolojee waati maaddidee?

¹² Nuuni Kawotettaa mishiraachuwaa kumetta saꞌan deꞌiya asawu yootiyo gishshawu, hanno gakkanawu nu xuufeta 700 gidiya doonan birshshida. Komppiyutereenne MEPS giyoogaa mala komppiyutere prograameti nuuni daro doonan xuufeta birshshanawu maaddoosona. Hegee Kawotettaa mishiraachuwaa ubbasan yootanawunne kumetta alamiyan Yihoowa asaa minttettanawu maaddees. SHin nu giddon issippetettay deꞌanaadan oottidaagee nuuni Geeshsha Maxaafaa tumaa gidida ‘geeshsha haasayaa’ haasayiyoogaa.—Sofonaasa 3:9 nabbaba.

KAWOTETTATU HIGGEE MAADDIIS

13, 14. Higgetinne pirdda keettati kuuyidobay nuna waati maaddidee?

¹³ Rooma biittaa higgee koyro xeetu layttan deꞌida Kiristtaaneti mishiraachuwaa yootanaadan keehi maaddiis. Ha wodiyankka daro biittan deꞌiya higgee nuuni mishiraachuwaa yootanaadan maaddees. Leemisuwawu, Amarkkaa higgee asay ba koyido haymaanootiyaa kaalliyo, ba ammaniyoobaa hara asawu yootiyoonne goynuwawu issippe shiiqiyo maataa immiis. Hegee Amarkkan deꞌiya ishati laꞌatettan goynuwawu shiiqanaadaaninne sabbakanaadan maaddiis. Hegee kumetta alamiyan sabbakiyo oosuwaa sintta xeera gididi kaalettiya ishati Amarkkan deꞌiya waanna biiruwan uttidi kaalettanawukka maaddiis. SHin mishiraachuwaa yootiyoogaara gayttidaagan mootuwawu pirdda keetti biyo wodeti deꞌiyoogee qoncce. (Pili. 1:7) Amarkkan issi issi pirdda keettan Yihoowa asaa bolli hanennabaa pirddiyo wode, ishantti xoqqa pirdda keettawu yigibaa oychidi darotoo shatimmidoogee Kawotettaa mishiraachuwaa yootanawu maaddiis.

¹⁴ Hara biittatun deꞌiya pirdda keettatikka nuuni laꞌatettan goynnanaadaaninne asawu mishiraachuwaa yootanaadan maaddidosona. Issi issi biittaa pirdda keettati nu bolli bessenna pirddaa pirddiyo wode, alamiyan hegaa mala pirddaa yiggiya pirdda keettawu yigibaa oychoos. Leemisuwawu, Tamme 2014 gakkanaashin Awurooppan Asaa Maataa Pirdda Keettay 57 allaalliyaa xeelliyaagan nuussi pirddiis; hegee Awurooppan deꞌiya daro biittati kaalliyo higge. ‘Dere ubbay nuna ixxiyaaba’ gidikkokka, daro biittan deꞌiya pirdda keettati nuuni tumu goynuwaara gayttidabaa laꞌatettan oottanaadan maaddidosona.—Maa. 24:9.

NU OOSUWAWU MAADDIDA HARABAA

15. Xuufiyaa attamiyo miishshay waani zammaanidee, qassi hegee nuna waati maaddidee?

¹⁵ Xuufeta attamiyo zammaana miishshati nuuni kaseegaappe aaruwan daro asawu mishiraachuwaa yootanawu maaddidosona. Daro xeetu layttawu, asay Yohaanis Gutenbergi 1450n medhido attamiyo miishshaa goꞌettiis. SHin aadhida 200 layttan xuufiyaa attamiyo miishshati kaseegaappe keehi giiga gididosona. Xuufiyaa attamiyo keehi zammaana miishshay meretti simmin, keehi muruta gidida daro xuufeta guutta wode giddon eesuwan attamana danddayettees. Qassi woraqataa medhiyoogeenne issippe gatti oyttidi maxaafa kessiyoogee haꞌꞌi beniigaadan metenna. Hegee nuuni xuufeta attamiyoogaara gayttidaagan waati maaddidee? Leemisuwawu, 1879n koyro Wochiyo Keelay Inggilizetto xallan attamettiis, an misilee giyoobi baawa, qassi attamettidaagaa qooday 6,000. SHin ha wodiyan Wochiyo Keelay 200ppe dariya doonan attamettees, an keehi loꞌꞌiya misileti deꞌoosona, qassi 50,000,000ppe dariyaagee attamettees.

16. Nuuni kumetta saꞌan sabbakkanawu maaddidabay aybee? (Ha huuphe yohuwaa doomettan deꞌiya misiliyaa xeella.)

¹⁶ Aadhida 200 layttan alamiyan oosettida zaammanabaa Xoossaa asay mishiraachuwaa yootanawu goꞌettiis. Kasetidi baaburiyaabaa, kaamiyaabaanne horophilliyaabaa beꞌida; qassi bishkkiliitiyaa, woraqataaninne bireyliyan xaafanawu maaddiya miishshata, telegrafiyaa, silkkiyaa, kaameeraa, cenggurssaa duuqqiyo miishshata, biiduwawu maaddiyaabata, eraadooniyaa, televizhiiniyaa, silimaa, komppiyuteriyaanne Intternneetiyaa goꞌettiyoogaakka beꞌida. Ha ubbabay nuuni asaa erissiyo ashkkara oottiyo oosuwaa polanawu dumma dumma ogiyan maaddiis. Ha zammanabaa medhiday Yihoowa asaa gidana xayikkokka, eti hegaa Geeshsha Maxaafaanne hara xuufeta daro doonan birshshanawunne mishiraachuwaa kumetta saꞌan sabbakanawu goꞌettoosona. Hegee Geeshsha Maxaafay kasetidi, “Neeni kawotettatu maattaa uyana” yaagidobay Yihoowa asawu polettiiddi deꞌiyoogaa bessiyaaba.—Isiyaasa 60:16 nabbaba.

17. (a) Naqaashati ay qonccissiyoonaa? (b) Yihooway nuuni aara “issippe oottiya a oosanchchata” gidanaadan koyiyoy aybissee?

¹⁷ Xoossay nuna anjjiiddi deꞌiyoogee qoncce. SHin Yihooway ba halchuwaa polanawu nunan zemppennaagee erettidaagaa. Gidikkokka, saluwan deꞌiya nu Aaway nuuni aara “issippe oottiya a oosanchchata” gidanaadan shoobbin, nuuni he oosuwaa oottiyoogee anne nu shoorota siiqiyoogaa bessanaadan maaddees. (1 Qor. 3:9; Mar. 12:28-31) Ay oosoppenne aadhiya, Kawotettaa mishiraachuwaa yootiyo oosuwaa oottanawu wozanappe baaxetiyaageeta gidoos. Yihooway nuuni kumetta saꞌan oottiyo oosuwaa kaalettiyoonne anjjiyo gishshawu a keehi galatiyaageeta gidoos!