Ta deꞌoy he wode yaa iiti iiti biis

KASE DEꞌUWAA:

Taani Amarkkan, Kaliforniyan, Losanjjeles kataman dumma dumma heeran deꞌiya, iitabaa oottiyoogaaninne jallissiya xaliyaa goꞌettiyoogan erettida naatuura diccaas. Nu soo naati usuppuna; taani naaꞌꞌantto naꞌa.

Ta aayyiyaa nuna Protesttantte haymaanootiyaa kaallanaadan ootta dichaasu. SHin yelagatettan taani naaꞌꞌu qommo deꞌuwaa deꞌiyoogaa doommaas. Woggaa Woggaa woosa keettan kuwayriyan yexxays. Hara gallassatun asay shiiqidi yexxiyoonne duriyo sohuwaa bays, jallissiya xaliyaa goꞌettays, qassi kandduwan shori baynnabaa oottays.

Kase taani hanqquwaa eexxa kiyiya asa. Taani asa shocada xoonanawu aybakka goꞌettanawu guyye giikke. Taani woosa keettan tamaaridobay aybanne maaddibeenna. Taani darotoo, “Haluwaa kessiyay Godaa; taani qassi i haluwaa kessanawu goꞌettiyo miishsha!” yaagays. Taani 1960 heeran naaꞌꞌantto xekka timirtte keettan tamaaraydda, asaa maatawu olettiya Blak Panter giyo polotikaa yame gidana koyaas. Yaatada, asaa maatawu baaxetiya tamaaretu citaa yame gidaas. Issi issitoo, eqettiyoogaa bessanawu salppiyaa kiyoos; he wodetu ubban timirtte keettay gorddettees.

Hanqquwaa eexxa kiyiya asa gidiyo gishshawu, eqettiyoogaa xallay tana ufayssibeenna. Hegaa gishshawu, danobaa oottiyoogaa doommaas. Leemisuwawu, issi wode ta laggetuura Afirkkaa aylleti Amarkkan naaqettidoogaa bessiya pilmiyaa beꞌida. He naaquwan yiillotidi, paranjja gidida yelagata he pilime keettan shocida. Yaatidi, haratakka shocanawu paranjjati deꞌiyo moottaa biida.

Tawu layttay 20 kumana haniyo wode, ta ishatinne taani daro danobaa oottida. Polisetakka keehi wayssida. Ta kaalo ishatuppe issoy danobaa oottiyoogan erettida naatu citaa yame; taanikka eta yame gidaas. Ta deꞌoy he wode yaa iiti iiti biis.

TAANI LAAMETTANAADAN GEESHSHA MAXAAFAY MAADDIIS:

Ta laggetuppe issuwaa aawaynne aayyiyaa Yihoowa Markkata. Eti tana gubaaꞌiyaa shiiquwaa shoobbin baas. Yihoowa Markkati dumma gidiyoogaa sohuwaara akeekaas. Ubbaykka Geeshsha Maxaafaa oyqqidosona; qassi shiiquwan a goꞌettoosona. Yelagatuura ubbay he shiiquwan madirakiyan haasayaa haasayoosona. Xoossaa sunttay Yihoowa gidiyoogaanne eti hegaa goꞌettiyoogaa erada garamettaas. (Mazamure 83:18, NW) Gubaaꞌiyan dumma dumma zare gidida asay deꞌees; shin eti zariyaappe zariyaa dummayi xeellokkona.

Koyro heeran, taani Yihoowa Markkatuura Geeshsha Maxaafaa xannaꞌana koyabeykke; shin shiiquwaa biyoogaa dosays. Issi galla omarssi taani Yihoowa Markkatu shiiquwan deꞌishin, ta laggeti asay yexxiyo sohuwaa biidosona. Yan issi yelagay ba jaakkeetaa etawu immennan ixxin, shocidi woridosona. Wonttetta gallassi, eti naꞌaa woridoogaa ceeqettidi yootidosona. Eti pirdda keetti shiiqido wodekka, hegaa xaasayi xeellidosona. Etappe daroti deꞌo laytta ubbaa qashettanaadan pirddettidosona. He galla omarssi taani etaara deꞌenna gishshawu, keehi ufayttaas. Taani laamettanawunne Geeshsha Maxaafaa xannaꞌanawu qofaa qachaas.

Issi zaree haraa ixxiyoogaa taani darotoo beꞌido gishshawu, Yihoowa Markkatu hanotan garamettaas. Leemisuwawu, paranjja gidida Yihoowa Markkay hara biitti biyo wode, ba naata paranjja gidenna urawu hadaraa immidi biis. Qassi keetti baynna karetta yelagaa paranjja gididaageeti bantta son deꞌanaadan efiidosona. Yesuusi yootido, Yohaannisa 13:35n deꞌiya, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiya qaalaara Yihoowa Markkati maayettidi deꞌiyoogaa taani akeekaas. Taani tumuppe issippetettay deꞌiyo ishantta demmidoogaa eraas.

Geeshsha Maxaafaa xannaꞌiyoogan, taani ta qofaa laammana koshshiyoogaa akeekaas. Taani saro deꞌanaassa xalla gidennan, hegee aybippenne aadhiya deꞌo oge gidiyoogaa erido gishshawu, ta qofaa muumeera dummayanawu baaxetaas. (Roome 12:2) Leddan leddan taani laamettaas. Ichashe 1974n xammaqettada Yihoowa Markka gidaas.

Taani xammaqetta simmadakka, hanqqettiyoogaa agganawu baaxetaas. Leemisuwawu, issi wode sooppe soo baada haggaazishin ta kaamiyaappe eraadooniyaa wuuqqida bitaniyaa yedettaas. Taani a gakkana hanin, i eraadooniyaa olidi woxxiis. Taani eraadooniyaa waatada wotta ekkidaakko haratuyyo yootishin, eta giddoppe issi cimay, “Istevenaa, neeni a oyqqiyaakko waatuutee?” giidi oychiis. He oyshay taani asaara saruwan deꞌanawu qoppanaadaaninne baaxetanaadan denttettiis.

Xiqimita 1974n kumetta wodiyaa haggaaziyoogaa doommaas; hegee aginan aginan Geeshsha Maxaafaa tamaarissiyoogan asaa 100 saatiyaa haggaaziyoogaa. Guyyeppe, Niwu Yorken, Birukiliinen deꞌiya Yihoowa Markkatu waanna biiruwan oottiyo maataa demmaas. SHin 1978n ta aayyiyaa sahettido gishshawu o maaddanawu Losanjjelese simmaas. Naaꞌꞌu layttappe simmin, Aranddo geetettiya ta siiqiyo machiyo ekkaas. A taassi miyye gidada, ta aayyiyaa hayqqana gakkanaashinkka tana keehi maaddaasu. Guyyeppe Aranddanne taani Giiliyaade Geeshsha Maxaafaa Timirtte Keettan tamaaridi, Paanaama maddabettida; nuuni haꞌꞌikka yan misoonaawe gididi haggaazoos.

Taani xammaqettoosappe ha simmin, hanqquwaa eexxa kiyanaadan oottiya darobay gakkiis. Hanqqettanaadan oottiya asatuppe baqatana woy he hanotaa zarbbissana koshshiyoogaa tamaaraas. Taani he hanotaa oyqqiyo ogiyaa xeelliyaagan ta keettaayyiyo gujjin, daro asay tana nashshees. Taani ta huuphiyawukka garamettays! Hegawu taani tanan ceeqettikke. SHin, hegee Geeshsha Maxaafay asay laamettanaadan oottiyo wolqqaa bessiyaaba gidiyoogaa ammanays.—Ibraawe 4:12.

TAANI GOꞌETTIDO HANOTAA:

Geeshsha Maxaafay taani ufayssiya deꞌo deꞌanaadan maaddiis; qassi tumuppe saruwan deꞌanaadan tamaarissiis. Taani asaa shociyoogaa aggada, eti ayyaanaaban paxana mala maaddays. Ubba naaꞌꞌantto xekka timirtte keettan tamaariyo wodeppe doommidi tawu morkka gidida uraakka Geeshsha Maxaafaa xannaꞌissaas. I xammaqetti simmin, nuuni amarida wodiyawu issippe deꞌida. Nuuni hanno gakkanawu mata lagge. Taaninne ta keettaayyiyaa 80ppe dariya asay nunaara Geeshsha Maxaafaa xannaꞌidi, Yihoowa Markka gidanaadan maaddida.

Taani tumu ishanttu giddon ufayssiya deꞌuwaa deꞌanaadan maaddido gishshawu, Yihoowa wozanappe galatays.