Kiristtoosaagaa Keenaa Dicciiddi Deꞌeetii?

1, 2. Ubba Kiristtaaneti aybin diccanawu baaxetana koshshii? Leemisuwan yoota.

QARA maccaasiyaa giyaappe muuziyaa woy hegaa malabaa shammanawu dooriyo wode, ubbatoo gitatiyaagaa woy hiraysiyaagaa xallaa doorukku. A sawiya keehi loꞌꞌuwaa koyawusu. Ee, gakkidi kaꞌꞌidaagaa koyawusu.

² Issi uri diccidi Yihoowawu bana geppi xammaqetti simmidikka dicciyoogaa aggenna. I Xoossawu haggaaziya kayma asa gidanawu halchees. Hegee asatettan gidennan, ayyaanaaban kayma gidiyoogaa. Efisoonan deꞌiya Kiristtaaneti ayyaanaaban diccana koshshiyoogaa kiitettida PHauloosi xaafiis. Eti ‘Xoossaa Naꞌaa ammaniininne erin beettiya issippetettaakko gakkanaadaaninne Kiristtoosa polo dichaa keenaa diccidi, gastta asa gidanawu’ baaxetanaadan zoriis.—Efi. 4:13.

3. Ha wodiyan deꞌiya Yihoowa Markkatu giddonkka Efisoona gubaaꞌiyaagaa mala ayba hanotay deꞌana danddayii?

³ PHauloosi dabddaabbiyaa xaafiyo wode, Efisoona gubaaꞌee eqqoosappe guutta layttaa takkiis. Yan deꞌiya daro erissiyo ashkkarati ayyaanaaban keehi diccidosona. SHin amaridaageeti kayma gidanawu baaxetana koshshees. Yihoowa Markkatu hanotay ha wodiyan hegaara issi mala. Daro ishanttinne michontti Xoossawu daro wodiyaa haggaazidosona; qassi ayyaanaaban kaymidosona. Gidoppe attin, issoti issoti kaymibeennaagee qoncce. Leemisuwawu, layttan layttan shaꞌan qoodettiyaageeti xammaqettiyo gishshawu, kaymanawu issoti issoti haꞌꞌikka baaxetana koshshees. Neeni shin?—Qol. 2:6, 7.

KIRISTTAANETU DICHAA

4, 5. Kaymida Kiristtaaneti issoy issuwaappe ayba ogetun dummatana danddayiyoonaa, shin eti ubbay aybin issi malee? (Ha huuphe yohuwaa doomettan deꞌiya misiliyaa xeella.)

⁴ Neeni kaꞌꞌida muuziyaa woy hegaa malabaa giyan dooriyo wode, ubbay issi mala gidennaagaa akeekaasa. Gidikkokka, eti ubbay kaꞌꞌidoogaa erissiya issi issibay deꞌees. Hegaadankka, kayma Kiristtaaneti zariyan, diccido hanotan, payyatettan, layttaaninne bantta deꞌuwan beꞌidoban issi mala gidennan aggana danddayoosona. Eeshshan woy wogan issoy issuwaappe dummatoosona. Gidikkokka, ayyaanaaban dicciya ubbaayyo eti kayma gidiyoogaa bessiya eeshshay deꞌees. He eeshshatuppe amaridaageeti awugeetee?

⁵ Nuuni a “kaallana mala” Yesuusi nuussi leemiso gidiis; Yihoowawu haggaaziya kaymida asi i deꞌidoogaadan deꞌees. (1 PHe. 2:21) Yesuusi keehi koshshiyaaba giidobay aybee? Issi uri ba kumetta wozanaappe, ba kumetta shemppuwaappenne ba kumetta qofaappe Yihoowa siiqiyoogaanne ba shooruwaa ba huuphedan siiqiyoogaa. (Maa. 22:37-39) Kaymida Kiristtaanee he zoriyaadan deꞌanawu baaxetees. I Yihoowaara medhido dabbotaa kaseyiyoogaanne ba goꞌꞌaa aggibayidi harata siiqiyoogaa bessiya deꞌuwaa deꞌees.

6, 7. (a) Kaymida Kiristtaaniyaa erissiya eeshshatuppe amaridaageeti awugeetee? (b) Nuuni ay beꞌanee?

⁶ SHin, kaymida Kiristtaanee ayfiyo ayyaanaa ayfiyaa macaratuppe siiqoy issuwaa gidiyoogaa akeekoos. (Gal. 5:22, 23) Danddayaa, ashkketettaanne ba huuphiyaa naagiyoogaa mala hara eeshshatikka keehi koshshoosona. Hegeeti i metiya hanotan yiillotennaadaaninne azzanttiyaaban hidootaa qanxxennan genccanaadan maaddana danddayoosona. I iitaa kehaa shaakki eranaadan maaddana danddayiya Geeshsha Maxaafaa maaraa ubbatoo pilggees. Yaati simmidi, ayyaanaaban kaymidoogaa bessiyaabaa kuuyees. Leemisuwawu, Geeshsha Maxaafaa maaran loohida ba kahay yootiyoobaa kaallees. Kaymida Kiristtaanee Yihoowa ogeenne i kessido maaray ubbatoo baagaappe loꞌꞌo gidiyoogaa akeekiyoogan ba huuphiyaa kawushshiyoogaa bessees.a I mishiraachuwaa mishettidi yootees; qassi gubaaꞌiyaa issippetettawu maaddiyaabaa oottees.

⁷ Nuuni Yihoowawu ay keena wodiyaa haggaazikkokka, hagaadan oychana danddayoos: ‘Taani ayyaanaaban ubbatoo diccanawu, Yesuusa leemisuwaa mintta kaallana koshshiyo gini deꞌii?’

‘MINO QUMAY WOZANNAAMA ASAASSA’

8. Yesuusi Geeshsha Maxaafaa ay keena loytti eriinne akeekii?

⁸ Yesuus Kiristtoosi Xoossaa Qaalaa loytti erees. Assi layttay 12 gidido wodekka, asttamaaretuura beeta maqidasiyan Geeshsha Maxaafaabaa tobbiis. “A doonaappe kiyiyaabaa siyida ubbai i immiyo era zaaruwan garamettiis.” (Luq. 2:46, 47) Guyyeppe, Yesuusi Xoossaa Qaalaappe haniya qofaa yootidi bana eqettiyaageeta coꞌꞌu oottiis.—Maa. 22:41-46.

9. (a) Ayyaanaaban diccanawu koyiya uri Geeshsha Maxaafaa xannaꞌiyoogaara gayttidaagan meeze oottana koshshiyoy aybee? (b) Nuuni Geeshsha Maxaafaa xannaꞌiyoy aybissee?

⁹ Ayyaanaaban kayma gidanawu koyiya Kiristtaanee Yesuusa leemisuwaa kaallidi, bawu danddayettida keenan loyttidi Geeshsha Maxaafaabaa eranawu koyees. I ‘mino qumay wozannaama asaassa’ gidiyoogaa akeekidi, a giddon deꞌiya qofaa ubbatoo loytti pilggees. (Ibr. 5:14) Kayma Kiristtaanee ‘Xoossaa Naꞌaa loytti eranawu’ koyiyoogee qoncce. (Efi. 4:13) Galla galla Geeshsha Maxaafaa nabbabay? Buzo xinaatiyaa ubbatoo xannaꞌay? Saaminttan saaminttan so asaa goynuwaa goynnay? Xoossaa Qaalaa xannaꞌiyo wode, Yihoowa qofaa neeni loytta eranaadan maaddiya Geeshsha Maxaafaa maaraa akeeka. Yaatada, issibaa kuuyiyo wode Geeshsha Maxaafaa maaraa kaalliyoogan hegaa oosuwan peeshshanawu mala; hegee neeni Yihoowakko keehi shiiqanaadan maaddees.

10. Kayma Kiristtaaniyaa eray deꞌuwan ubba galla a waati maaddii?

¹⁰ Kayma Kiristtaanee era xallay gidennaagaa akeekees. Xoossay kessido maaraanne a zoriyaa i siiqana bessees. Hegaa mala siiquwaa bessiya issibay asa qofaara gidennan, Yihoowa sheniyaara maayettiyaabaa deꞌuwan kaseyiyoogaa. Hegaa bollikka, issi Kiristtaanee ba kase qofaanne eeshshaa ‘xayssanawu’ woy agganawu baaxetidoogee erettidaagaa. I hegaadan laamettiyo wode, “tumu xillotettaaninne geeshshatettan Xoossaa leemisuwan merettida” Kiristtoosaagaa mala ooratta asatettaa maayees. (Efisoona 4:22-24 nabbaba.) Geeshsha Maxaafay Xoossaa ayyaanay kaalettin xaafettiis. Issi Kiristtaanee Geeshsha Maxaafaa maaraa loytti eriyo wodenne siiqiyo wode, geeshsha ayyaanay ba wozanaanne ba qofaa laammanaadan oottees. Hegee ayyaanaaban diccanaadan maaddees.

ISSIPPETETTAN DEꞌIYOOGAA

11. Yesuusi saꞌan deꞌido wode ay beꞌidee?

¹¹ Yesuusi wottiyoobi baynna asa gididi saꞌan deꞌiyo wode, nagarancha asay a yuushuwan kumiis. A dichida aawaynne aayyiyaa, qassi daro layttaa i etaara issippe deꞌido dabboti nagarancha. Yesuusa kaalliyaageetikka otorettidosonanne yaaretidosona. Leemisuwawu, Yesuusi hayqqanaappe kase qammi eti “bantta ubbaappe ooni gitakko bantta giddon palamettidosona.” (Luq. 22:24) SHin, Yesuusi nagarancha gidida ba erissiyo ashkkarati ayyaanaaban diccananne issippetettay deꞌiyoogeeta gidana danddayiyoogaa ammanettiis. He wode, Yesuusi kiittidoogeeti siiquwan issuwaa gidana mala, i saluwan deꞌiya ba aawaa hagaadan woossiis: “Eti ubbai issuwaa gidana mala, taani woossais. Aawau, neeni ta giddon de7iyoogaadan, qassi taanikka ne giddon de7iyoogaadan, eti nu giddon de7ona. . . . Neeninne taani issuwaa gidiyoogaadan, eti issuwaa [gidona].”—Yoh. 17:21, 22.

12, 13. (a) Efisoona 4:15, 16y gubaaꞌiyaa issippetettawu nuuni baaxetana koshshiyoogaa waati qonccissii? (b) Issi ishay issippetettaa minttiyoogaa waati tamaaridee?

¹² Yihoowawu haggaaziya kayma Kiristtaanee gubaaꞌiyan issippetettay deꞌanaadan maaddees. (Efisoona 4:1-6, 15, 16 nabbaba.) Xoossaa asay ‘issippe ohettanaadaaninne’ ubbay issoy issuwaara hashetidi oottanaadan halchoos. He issippetettay deꞌanaadan nuuni nu huuphiyaa kawushshana koshshiyoogaa Yihoowa Qaalay yootees. Harati nagarancha gidiyoogaa gaasuwan eta qohiyo wodekka, kayma ishay woy michiyaa issippetettan deꞌanawu bantta huuphiyaa kawushshoosona. Issi ishay woy issi michiyaa mooriyo wode neeni waanay? Woy qassi issi uri nena qohiyo wode waanay? Aara haasayiyoogaa aggabayayiyye, sigettanawu baaxetay? Kayma Kiristtaanee sigettanawu koyeesippe attin, harata metiya ura gidanawu koyenna.

¹³ Uva hanotaa qoppa. A mala Kiristtaaneti nagarancha gidiyoogaappe denddidaagan oottiyoobay a kase yiilloyees. Guyyeppe, i Geeshsha Maxaafaanne Geeshsha Maxaafaa Loytti Akeekiyoogaa giyo maxaafaa goꞌettidi Daawita deꞌuwaabaa xannaꞌanawu qofaa qachiis. I Daawitabaa xannaꞌanawu koyidoy aybissee? Uvi hagaadan giis: “Daawiti banaara issippe goynniyaageetuppe amaridaageeti Geeshsha Maxaafay yootiyoobaara maayettennabaa oottiyoogaa beꞌiis. Leemisuwawu, Kawuwaa Saaꞌooli a woranawu maliis, asaappe amaridaageeti a shuchan caddanawu koyidosona, qassi a machiyaa a bolli qilliiccaasu. (1 Sam. 19:9-11; 30:1-6; 2 Sam. 6:14-22) SHin, Daawiti Yihoowa siiqiyo siiqoy haratu eeshshaa gaasuwan irxxibeenna. Qassi, Daawiti wozanappe atto giyaagaa; taanikka atto giyaagaa gidana koshshiis. Taani xannaꞌada eridobay, ta mala Kiristtaanetu mooruwaa taani xeelliyo ogiyaa laammanaadan maaddiis. Taani haratu mooruwaa hassayiyoogaa aggaas. Qassi gubaaꞌiyaa issippetettawu maaddiyaabaa oottanawu baaxetays.” Neeni shin, hegaadan gubaaꞌiyaa issippetettawu maaddiyaabaa oottanawu qoppay?

XOOSSAY KOYIYOOBAA OOTTIYAAGEETUURA LAGGETIYOOGAA

14. Yesuusi ba lagge oottidi dooridoogeeti ay mala asee?

¹⁴ Yesuus Kiristtoosi ubba asawu keha. Attuma asay, macca asay, yelagati, cimati, haray atto naatikka ufayttidi akko shiiqoosona. SHin Yesuusi asaa giddoppe dooridoogeeta bawu mata lagge oottiis. I ba kiittido ammanettidaageeta, “Taani inttena azazidobaa ubbaa oottikko, intte ta laggeta” yaagiis. (Yoh. 15:14) Yesuusi ammanettidi bana kaalliyaanne kumetta wozanaappe Yihoowayyo haggaaziyaageetu giddoppe hegaa mala laggeta dooriis. Neenikka wozanappe Yihoowawu haggaaziyaageetu giddoppe mata laggeta dooray? Hagee keehi koshshiyaaba gidiyoy aybissee?

15. Yelagati kayma Kiristtaanetuura wodiyaa aattiyoogan waani goꞌettana danddayiyoonaa?

¹⁵ Awaa hoꞌꞌuwan muuzeenne hegaa malabay loꞌꞌo kaꞌꞌees. Hegaadankka ishanttunne michonttu siiqoy neeni kayma gidanaadan maaddana danddayees. Neeni ne deꞌuwan ay oottanaakko kuuyanawu maliya yelaga gidennan waaya aggana. Daro layttawu Yihoowawu haggaazidanne gubaaꞌiyaa issippetettawu maaddiyaabaa oottida Kiristtaanetuura neeni laggetiyoogee keehi loꞌꞌo! Eti bantta deꞌuwan metootidaageetanne Yihoowawu haggaaziyo wode paaciyan genccidaageeta gidana danddayoosona. Hegeetu mala Kiristtaaneti neeni loꞌꞌobaa dooranaadan maaddana danddayoosona. He ishanttuuranne michonttuura ufayssiya wodiyaa issippe aattiyoogee neeni loꞌꞌobaa kuuyada kayma gidanaadan maaddana danddayees.—Ibraawe 5:14 nabbaba.

16. Gubaaꞌiyan deꞌiya gasttati issi yelaga michiyo waatidi maaddidonaa?

¹⁶ Leemisuwawu, Helga timirttiyaa wurssiyo laytti i kifiliyan deꞌiya tamaareti bantta halchuwaa issoy issuwaagaara geeddarssidoogaa hassayawusu. Etappe daroti keehi loꞌꞌo ooso demmanawu yuniversttiyan tamaaranawu baaxetoosona. Helga ba gubaaꞌiyan deꞌiyaageetuura he hanotaabaa tobbaasu. A hagaadan gaasu: “Etappe daroti taappe bayratiyo gishshawu, tana keehi maaddidosona. Taani kumetta wodiyaa haggaazanaadan eti minttettidosona. Hegaappe simmin, aqinye gidada ichashu layttaa haggaazaas. Ta yelagatettaa layttaappe dariya baggan Yihoowawu haggaaziyoogaa kaseyido gishshawu, daro layttappe guyyiyan haꞌꞌi keehi ufayttays. Hegaadan oottidoogan taani aynne zilꞌꞌettikke.”

17, 18. Nuuni waatidi Yihoowayyo loytti haggaazana danddayiyoo?

¹⁷ Nu deꞌuwan Yesuusa leemisuwaa ubbatoo kaalliyoogee nuuni ayyaanaaban diccanaadan maaddees. Yaatiyo wode, Yihoowakko shiiqoos; qassi nuussi danddayettida ubban ayyo haggaazanawu kaseegaappe aaruwan koyoos. Yihoowawu haggaaziya uri kayma Kiristtaane gidiyo wode, ayyo murutabaa immana danddayees. Yesuusi ba erissiyo ashkkarata, “Asi intte oottiyo lo77o oosuwaa be7idi, saluwan de7iya intte Aawaa galatana mala, intte poo7oi asa sinttan poo7o” yaagidi minttettiis.—Maa. 5:16.

¹⁸ Hanno gakkanawu beꞌidoogaadan, kayma Kiristtaanee gubaaꞌiyaa keehi maaddana danddayees. Issi Kiristtaanee Xoossay immido kahaa goꞌettiyo ogiyan ayyaanaaban kaymidoogaa qonccissees. Loꞌꞌobaa kuuyanawu nu kahay nuna waatidi maaddana danddayii? Nu mala Kiristtaaneti akeekan kuuyiyoobaa waati bonchana danddayiyoo? Hegaa kaalliya huuphe yohuwan beꞌana.