Geeshsha Maxaafay Attido Gaasuwaa

Geeshsha Maxaafay darobata xoonidi attiis. Hegaa gishshawu, ha wodiyan A koppiyaa demmananne nabbabana danddayaasa. Qassi loytti birshshettida Geeshsha Maxaafaa neeni doorikko, ne nabbabaydda deꞌiyoogee koyro xaafettida xuufe gidiyoogaa ammanettana danddayaasa.a SHin Geeshsha Maxaafay meretan musiyogaa, hanttaara yedetaanne halchchidi A qofaa laammiyogaa, darotoo maalaalissiya hanotan xoonidi attidoy aybissee? He maxaafaa xeelliyaagan keehi dummatiyaabay aybee?

“Xoossaa maxaafa ubban Xoossaa Ayyaanai deꞌees” giidi xaafida kiitettida PHawuloosi xaafidobaa Geeshsha Maxaafaa tamaaretuppe daroti maayettoosona. (2 Ximootiyoosa 3:16) Geeshsha Maxaafay dumma gidida Xoossaa Qaala gidiyo gishshawunne Xoossay ha wodiya gakkanawu A naagido gishshawu Geeshsha Maxaafay attidoogaa eti ammanoosona. Ha kaalli kaalli kiyiya timirttiyawu doometta huuphe yohuwan odettida Feyzaali, wurssettan Geeshsha Maxaafaa xannaꞌidi he qofata bawu pilgganawu kuuyiis. I pilggidi demmidobay A maalaalissiis. Banttana Kiristtaane giyaageeti tamaarissiyo darobati Geeshsha Maxaafaa giddon baynnaagaa I sohuwara akeekiis. Hegaa bollikka, Xoossay Ba Qaalaa giddon ha saꞌaassi halchchidobay A wozanaa denttettiis.

I hagaadan giis: “Taayyo deꞌiya Geeshsha Maxaafay Xoossay immidoba gidiyoogaa haꞌꞌi taani ammanaas. Woni Xoossay saluwaanne saꞌaa medhdhanawu danddayikko, nuuyyo maxaafaa immanawunne hegaa nuuyyo naagidi wottanawu ayyo wolqqi deꞌennee? Hegaappe dummatiyabaa qoppiyoogee Xoossaa wolqqaa guuttiyogaa gidees. Ubbaa danddayiyaagaa wolqqaa guuttanawu taani oonee?”—Isiyaasa 40:8.