1 Metuwaa Teqqanawu Maaddiyaabaa

BESSIYAAGAAPPE AATTIDI UYIYOOGAA

Hagaappe kasetiya huuphe yohuwan denttido Delfiina unꞌꞌettidoogee A bessiyaagaappe aatta uyanawu koyanaadan oottidoogaa akeekaasu. Geeshsha Maxaafay amaridaagaa uyiyoogaa diggana xayikkonne, ‘Daro woyne eessaa uyiyaageetuura zuppetoppa’ yaagees. (Leemiso 23:20) Bessiyaagaappe aattidi uyiyoogee iita harggiyaa kaalettees, dabbotaa mooreesinne layttan layttan miilooniyan qoodettiyaageeti hegaa daafan hayqqanaadan oottees. Asay Geeshsha Maxaafaa eratetta zoriyaa ekkiyaaba gidiyaakko he metuwaappe dariya baggay gakkennaadan teqqana danddayettees.

Delfiina hegaadan oottaasu. A haꞌꞌi hagaadan gawusu: “Ushshay taani unꞌꞌettiyoogaa agganaadan oottennaagaa akeekaas. Piliphphisiyuusa 4:6, 7n deꞌiya, ‘Inttena koshshiyaabaa ubbau woossiteppe attin, issibaukka hirggoppite’ giya loꞌꞌo zoriyaa oosuwan peeshshaas. Qammi ubbatoo hirggissiyaabaynne qofissiyaabay dariyo wode Yihoowa woossays. Tana hanqqetissidabaa, ta qohuwaa, ta yibbaanne tawu siyettiya ubbabaa Yihoowawu qonccissada, loꞌꞌobaa qoppanaadan I tana maaddana mala A woossays. Guuran, loꞌꞌobaa qoppiyoogaa aggennaadan baaxetays. Yaatiyoogee tawu baynnabaa aggada, tawu deꞌiyaabaa ubbatoo qoppanaadan maaddiis. Ushshaa mule uyennan agganawu kuuyaas. Ta demmido sarotettay keehi alꞌꞌoba gidiyo gishshawu, hegaa xayssiyaabaa mule oottana koyikke.”

SHORI BAYNNA KANDDUWAA

Keehi azzanttiyaabaa kaalettiyaabatuppe issoy shori baynna kandduwaa. Geeshsha Maxaafaa maaray lambbeechchiyoogaa woy pornograafiyaa beꞌiyoogaa malabay hegawu waanna gaaso gidiyoogaa yootiyoogan, nuuni he metuwaappe teqettanaadan maaddees. Samuꞌela giyo yelagay hagaadan giis: “Lambbeechchiyoogee tawu kaassa mala gidiis. Issi issi maccaasata ta dosikke, shin eti tana siiqiyoogaa akeekaas; hegee qassi taani lambbeechchiyoogaa dosanaadan oottiis.” Samuꞌeli qoppibeenna wodiyankka asay A lambbeechchaasa giyoogaa akeekidi, eriiddi lambbeechchanawu kuuyiis. SHin he meeziyaabay A qofissiis. I haꞌꞌi, “Hegee issi uri ba xallaa siiqanaadan oottiyo gishshawu, keehi qohiyaaba” yaagees.

Samuꞌeli jw.org web saytiyan yelagatuyyo giigida huuphe yohuwaa nabbabiis. I, “Na7i geeshshanne suure gidiyoogee i oottiyo oosuwan erettees” giya, Leemiso 20:11 loytti qoppiis. Hegee A waati maaddidee? Lambbeechchiyoogee geeshshabakka suurebakka gidennaagaa Samuꞌeli akeekiis. I haꞌꞌi hagaadan gees: “Lambbeechchiya yelagi sinttappe iita azina woy machcho gidanaagaakka akeekaas. Sinttappe ta machchiyaa taani hara maccaasa lambbeechchishin beꞌiyaakko iyyo aybi siyettanaakko qoppiyoogaa doommaas. Hegee he meezee qohiyoogaa taani akeekanaadan maaddiis. Lambbeechchiyoogee kaassa mala gidiyoogee hegee likke giyoogaa gidenna.” Samuꞌeli laamettiis. I lambbeechchiyoogaa aggidoogee shori baynnabaappe naagettanaadankka maaddiis.

Antoniyo giyo bitanee shori baynnabaa kaalettana danddayiya keehi iitabaa haniis. Pornograafiyaa beꞌiyoogee ayyo amale gidiis. I ba machchiyo keehi siiqiyaaba gidikkokka, he iita eeshshay A zaari zaari wayssiis. I 1 PHeexiroosa 5:8y bana keehi maaddidoogaa yootiis. Xiqisee hagaadan gees: “Xalahe halaqai, intte morkkee, mittiyo uraa koyidi, gudiya gaammuwaadan gudiiddi, intte lanqqiyan yuuyiyo gishshau naagettitenne beegottite.” Antoniyoy hagaadan giis: “Pornograafe misilee ubbasan kumiis; qassi hegaa issitoo beꞌikko mule dogettenna. He paacciyaabay awuppe pulttiyaakko taani akeekanaadan he xiqisee maaddiis. Pornograafe misiliyawu pulttoy Dabloosa gidiyoogaa sohuwaara hassayiyoogaa taani meeze oottana koshshiis. Ta qofaa, ta wozanaanne ta aqo deꞌuwaa qohiya he meeziyaa eqettana mala ‘naagettanaadaaninne beegottanaadan’ maaddana danddayiyay Yihoowa xalla gidiyoogaa taani haꞌꞌi erays.” Antoniyoy koshshiya maaduwaa demmiis; qassi wurssettan he iita meeziyaa aggiis. Hegee qassi keehi iita metuwaappe teqettanaadan A maaddiis.

Keehi iita metuwaa teqqanawu maaddiya zoree Geeshsha Maxaafan deꞌiyoogee tuma. Gidoppe attin, aggennan ixxidi xoonida metuwaabaa shin? Hegaadan wayssiya metuwaa pagalanawu Xoossaa Qaalay nuna waatidi maaddana danddayiyaakko ane beꞌoos.