Xoolinttiyaa Qoodiyoogeenne Kaayiyoogee—Sinttanaabaa Eranawu Maaddii?
XOOLINTTIYAA QOODIYOOGAA
Xoolinttiyaa qoodiyoogee xoolintteti, aginaynne pilaaneeteti saꞌan deꞌiya asaa deꞌuwaara gayttidaba giidi ammaniyo kaayo qommo. Xoolinttiyaa qoodiyaageeti issi uri yelettiyo wode, saluwan deꞌiya he meretati deꞌiyo sohoy izaawu qaadaara gayttidaba gidiyoogaa yootoosona. Xoolinttiyaa qoodiyoogee beni Baabiloonen doommidaba gidikkokka, ha wodiyankka aahuwan oosettiyaaba. Amarkkan 2012n xannaꞌanawu oychchidobay qonccissiyoogaadan, he oychchido asatuppe heezzaappe issi kushe gidiyaageeti xoolinttiyaa qoodiyoogee “sayniseera gayttidaba” giidi qoppoosona; hegeetuppe xeetaappe 10 kushe gidiyaageeti qassi “saynisiyaara keehi maayiyaaba” goosona. Hegee tumee? Tuma gidenna. Hegee aybissakko ane beꞌoos.
Pilaaneetetussinne xoolinttetussi xoolinttiyaa qoodiyaageeti giyoogaa mala asa hanotaa laammiyo wolqqi baawa.
Darotoo hanana geetettiyaabay O bollikka gakkana danddayiyaaba.
Ha wodiyan xoolinttiyaa qoodiyaageeti pilaaneeteti saꞌaa yuushuwan yuuyoosona giyo beni qofaa kaallidi qoodoosona. SHin pilaaneeteti awaa ayfiyaa yuushuwan yuuyoosona.
Xoolinttiyaa qoodiya dumma dumma asati issi uraabaa yootiyoobay dumma dumma.
Xoolinttiyaa qoodiyaageeti saluwaa eti shaakkidi xoolinttetu citan sunttido 12 malaatatun, asaa eti yelettido gallassaadan shaakkoosona. Saluwaa bollan saꞌay yuuyiyo sohoy aadhdhida daro layttatun laamettido gishshawu, awaa ayfee he saluwaa shaahuwaa malaataara kanttiyo wode eti gattido gallassati haꞌꞌi eti sunttido wode deꞌiya xoolinttetu citaa malaataara gayttokkona.
Saluwaa shaakkiyo malaatay issi uraa eeshshaabaa qonccissiyaabadan qofettees. SHin issi galla yelettida asatu eeshshay issi mala gidenna; hegaa gishshawu, issi uri yelettido gallassay A eeshshaabaa aynne qonccissenna. Xoolinttiyaa qoodiyaageeti asaa akeeki xeellidi eta tumu oonatettaa eriyoogaappe eta eeshshaa coo maloosona. Hegee asaa coo mela zaggiyooba gidennee?
KAAYIYOOGAA
Asay beniisappe doommidi kaayiyaageeta oychchees. Kaayiya issoti issoti mehiyaa woy asaa maracciyaa woy kuttoy kattaa waati maxiyaakko xeellidi hegaa birshshettaa yootoosona. Harati qassi bonccuwaa woy tukkiyaa tociyaa xeellidi yootoosona. Ha wodiyan, tarot karddiyaa, shaate mala sayniyaa, day giyoobaanne harabaa goꞌettidi issi uraabaa yootoosona. Kaayoy sinttanaabaa tumuppe eranawu maaddii? CHiikka, maaddenna. Aybissi maaddennaakko ane beꞌoos.
Odettiyaabay issi mala gidennaagaa qoppa. Kaayiya dumma dumma asati yootiyoobay issuwaagee haraagaappe dummatees. Eti issi malaban kaayikkokka, yootiyoobay dumma dumma. Leemisuwawu, issi asi issi mala karddiyan kaayiya asata babaa yootanaadan issi mala oyshaa oychchikko eta zaaroy issi mala gidana bessees. SHin zaaroy darotoo issi mala gidenna.
Kaayiyaageetu hayyoy woy eta koshshay sirissiyaaba. Eta boriyaageeti, kaayiya asati goꞌettiyo karddee woy saynee milatissuwawu goꞌettiyooba gidiyoogaa yootoosona; qassi eti he miishshaa gidennan izaawu hanotaa kaallidi yootoosona. Leemisuwawu, meezee deꞌiyo kaayiya asi issi issibaa oychchidi, izaawu hanotaa eranawu I yootiyoobaa woy haniyoobaa akeekan kaallees. Kaayiya uri izaawu erennan qonccissidobaa goꞌettidi abaa eriya ura mala gidees. Kaayiya issi issi asati asay eti yootiyoobaa ammanettiyo gishshawu, daro miishshaa eta qanxxissoosona.
GEESHSHA MAXAAFAY YOOTIYOOBAA
Xoolinttiyaa qoodiyaanne kaayiya asatu oosoy nu sinttanaabay kuuyettidaban qonccissees. SHin kuuyettidee? Geeshsha Maxaafay nuuni ammaniyoobaa woy oottana koyiyoobaa doorana danddayiyoogaa, qassi hegee nuna sinttappe maaddanaagaa woy qohanaagaa yootees.—Yaasa 24:15.
Xoossaayyo goynniyaageeti xoolinttiyaa qoodiyoonne kaayo oosoppe haakkana bessiyo hara gaasoykka deꞌees; shareechcho ooso ubbaa Xoossay ixxees. Geeshsha Maxaafay hagaadan gees: “Bitiyaabi, maracce xeelliyaabi, murunniyaabinne qaadaa odiyaabi qassi intte giddon de7oppo. Daggamiyaagee, ayyaanata xeegiyaagee, shareechchiyaageenne haiqqida asaa ayyaanaa xeegiyaagee intte giddon de7oppo. Hegaa malabaa oottiya ai asinne GODAA matan ixettida asa.”—Zaarettido Wogaa 18:10-12.