Xoossay Waaye Ubbaa Mata Wode Xayssana

“Abeet GODAU, neeni tana maaddanaadan taani xeesiyo wode, aude gakkanaashin siyennan ixxuutee? Qassi taani naaqettada neeyyo waassiyo wode, aude gakkanaashin ashshennan ixxuutee?” (Imbbaaqooma 1:2, 3) Xoossan nashettida loꞌꞌo bitanee Imbbaaqoomi hegaadan giis. A woosay A ammanoy shuggidoogaa bessii? CHii, bessenna! Xoossay ba keerido wodiyan waayiyaa xayssanaagaa Imbbaaqoomawu yootiis.—Imbbaaqooma 2:2, 3.

Neeni woy ne dabboy waayettiyo wode, Xoossay kelttiyaa gelana koshshishin eesuwan maaddibeenna gaada qoppiyoogee metenna. SHin, Geeshsha Maxaafay hagaadan minttettees: “Issooti issooti qoppiyoogaadan, Godai ba oottana giidoogaa oottanau takkenna; shin ooninne ba nagaraappe simmanaadan koyeesippe attin, ooninne xayana mala koyenna gishshau, inttebaa genccees.”—2 PHeexiroosa 3:9.

XOOSSAY AWUDE XAYSSANEE?

He wodee keehi matiis! Issi yeletay ha alamiyaa wurssetta gallassaa malaata gidida dumma dummabaa beꞌanaagaa Yesuusi qonccissiis. (Maatiyoosa 24:3-42) Yesuusi yootido hiraagay ha wodiyan polettiyoogee Xoossay asaa allaalliyan kelttiyaa geliyo wodee keehi matattidoogaa bessiyaaba.a

SHin Xoossay waaye ubbaa waati xayssanee? Yesuusi saꞌan deꞌiyo wode, asaa waayiyaappe shemppissanawu Xoossawu wolqqay deꞌiyoogaa bessiis. Hegawu amarida leemisota beꞌa.

Meretay Gattiyo Daafabaa: Yesuusinne I kiittidoogeeti Galiila Abban wolwoluwan biishin, wolqqaama gotee denddidi eta wolwoluwaa muukkana haniis. SHin Yesuusi inne A Aaway carkkuwaa seerana danddayiyoogaa bessiis. (Qolasiyaasa 1:15, 16) Yesuusi, ‘Coꞌꞌu ga; woppu ga’ giis. Yaagin aybi hanidee? “Goteekka co77u gin, ubbabaikka woppu giis.”—Marqqoosa 4:35-39.

Sahuwaa: Qooqetanne bollay silidoogeeta, qassi kaarettay, inchchirichchay, woy hara ayba sahoynne oyqqidoogeeta pattiyoogan Yesuusi keehi erettiis. I “harggida asa ubbaakka pattiis.”—Maatiyoosa 4:23, 24; 8:16; 11:2-5.

Kattay Qaxuhatiyoogaa: Yesuusi ba Aaway immido wolqqan guutta qumaa keehi daro oottiis. I saꞌan haggaaziyo wode, shaꞌan qoodettiya asaa naaꞌꞌutoo mizidoogaa Geeshsha Maxaafay yootees.—Maatiyoosa 14:14-21; 15:32-38.

Hayquwaa: Yesuusi heezzu asata hayquwaappe denttidoogaa Geeshsha Maxaafay yootiyoobay hayquwaa xayssanawu Yihoowawu wolqqay deꞌiyoogaa qonccissees. I hayquwaappe denttidoogeetuppe issoy hayqqoosappe oyddu gallassa gididoogaa.—Marqqoosa 5:35-42; Luqaasa 7:11-16; Yohaannisa 11:3-44.