Yihooway Bonchchettana Mala, “Intte Poo7oy Asa Sinttan Poo7o”

1. Nuuni ufayttanaadan oottiya dummabay aybee?

YIHOOWA asaa qooday gujjiyogaa siyiyoogee keehi ufayssees! Zillaytti nuuni Geeshsha Maxaafaa xannaꞌissidoogeetu qooday 10,000,000⁠ppe daro. Hegee tumukka Xoossaa asay ba pooꞌuwaa pooꞌissiyoogaa bessiyaaba! Qassi Godaa Kahuwaa Baalan nuuni mokkido, eranawu koyiya daro miiloone asaa qoppa. Eti yaatiyoogan, Xoossay wozuwaa giigissiyoogan nuna siiqido siiquwaabaa erana danddayoosona.—1 Yoh. 4:9.

2, 3. (a) ‘Saluwan pooꞌiya xoolinttedan’ pooꞌenna mala nuna diggennabay aybee? (b) Yesuusi Maatiyoosa 5:14-16n yootidobaara gayttidaagan, nuuni ay beꞌanee?

² Kumetta saꞌan deꞌiya Yihoowa asay daro qaalaa haasayees. Gidikkokka, nuuni nu Aawaa Yihoowa issippetettan sabbennaadan hegee diggenna. (Ajj. 7:9) Nu qaalay ayba gidin woy nuuni awan deꞌinkka, nuuni alamiyaa ‘asaa giddon saluwan pooꞌiya xoolintte’ mala.—Pili. 2:15.

³ Nuuni beꞌiyo dichchaynne issippetettay, qassi ubbatoo naagi uttanawu baaxetiyoogee nuuni Yihoowa bonchchissanaadan maaddees. Hegee waanidi haniyaakko, ha huuphe yohuwan pilggana.—Maatiyoosa 5:14-16 nabbaba.  

SHOOBIYAA YOOTA

4, 5. (a) Sabbakiyoogaappe hara aybin nu pooꞌuwaa pooꞌissana danddayiyoo? (b) Nu keha eeshshay waatidi goꞌꞌana danddayii? (Doomettan deꞌiya misiliyaa xeella.)

⁴ “Ooninne ha attida wodiyan ba pooꞌuwaa pooꞌissana xayikko . . . Godawu ammanettiya tumanchcha asa gidana danddayenna.” Hegee Tamme 1, 1925 Wochiyo Keelan, “Xuman Pooꞌiya Pooꞌuwaa” giya huuphe yohuwan kiyida qofa. He huuphe yohoy hegaa qonccissiiddi, “I saꞌan deꞌiya asawu mishiraachchuwaa yootiyoogaaninne ba deꞌoy pooꞌuwaa ogiyaara maayanaadan oottiyoogan yaatana bessees” yaagiis. Nuuni nu pooꞌuwaa pooꞌissiyo issi ogee mishiraachchuwaa yootiyoogaanne asaa erissiyo ashkkara oottiyoogaa gidiyoogee tuma. (Maa. 28:19, 20) Hegaa bollikka, nuuni Kiristtaanetuppe koyettiyaagaadan deꞌiyoogan Yihoowa bonchchissana danddayoos. Nuuni haasayissiyoogeetinne ogiyaara kanttiyaageetikka nu eeshshaa akeekoosona. Nuuni laggedan pashkki giyoogeenne wozanappe sarotiyoogee nuuni oonakko, qassi ay mala Xoossawu goynniyaakko darobaa qonccissees.

⁵ Yesuusi ba erissiyo ashkkarata, “Soo geliiddi sarotite” yaagiis. (Maa. 10:12) Yesuusinne I kiittidoogeeti darotoo sabbakiyo heeran asay erenna asa ba soo shoobbiyoogee oorattaba gidenna. Ha wodiyan, darosan hegaa mala meezee baawa. Gidikkokka, neeni issi uraa soo ayssi biidaakko pashkki gaada loꞌꞌo hanotan yootiyoogee, darotoo izaawa qofissidabaa woy I yiillotidobaa zarbbissees. Erettiiddi darotoo ufayssiya hanotan pashkki giyoogee keehi loꞌꞌo. Ishatinne michchoti xuufiyaa wottiyo gaariyaa goꞌettidi dabaaban markkattiyo wodekka hegee loꞌꞌo gidiyoogee beettees. Neeni dabaaban hegaadan sabbakiyo wode pashkki gaada sarotiyo wode asay ufayttiyoogaa akeekana danddayaasa. Hegee eti nuukko shiiqidi xuufiyaa ekkanaadan denttettana danddayees. Ne keha eeshshaykka asaara haasayaa doommanaadan maaddana danddayees.

6. Issi cima aqo laggeti bantta haggaazuwaa waatidi aassidonaa?

⁶ Inggilizen issi cima aqo laggeti sooppe soo biidi haggaazennaadan sahoy eta diggiis. Eti bantta keettaa penggen bantta pooꞌuwaa pooꞌissanawu qofaa qachchidosona. Heeran deꞌiya issi timirtte keettaappe bantta naata efaanawu yelidaageeti aadhdhiyo saatiyan eti Geeshsha Maxaafaa qofay deꞌiyo amarida xuufeta xaraphpheezan wottoosona. Daroti eranawu koyidi Yelagati Oychchiyo Oyshaa—Oosuwan Peꞌiya Zaaruwaa, Paydo 1⁠nne 2, qassi brooshuretakka ekkidosona. Eta gubaaꞌiyan deꞌiya issi aqinyiyaa he aqo laggetuura sabbakiyoogaa doommaasu. A pashkki giyoogeenne he aqo laggeti wozanappe baaxetiyoogee issi aaway Geeshsha Maxaafaa xannaꞌanawu eeno gaanaadan denttettiis.

7. Intte biitti yiyaageeta waatada maaddana danddayay?

⁷ Mata layttappe haa simmin, daro biittata beteti zuloosona. He asati Yihoowanne A halchchuwaa eranaadan maaddanawu ay oottana danddayay? Intte biitti yiya asatuppe daroti haasayiyo qaalan sarotaa koyro tamaarana danddayaasa. Yaatanawu, JW Language appee nena maaddana danddayees. Hegaa bollikka, eta ufayssana danddayiya amarida qaalata tamaariyoogee loꞌꞌo. Yaatada, jw.org saytiyaa eta erissada yan eta qaalan deꞌiya dumma dumma biidotanne xuufeta bessana danddayaasa.—Zaa. 10:19.

8, 9. (a) Saaminttawu gidduwan shiiqiyo shiiquwan nuna maaddiyaabaa ay demmiyoo? (b) Naati shiiquwan zaaranaadan yelidaageeti waatidi maaddana danddayiyoonaa?

⁸ Nuuni haggaazuwan loytti ayfana mala, Yihooway Deꞌuwaanne Haggaazuwaa SHiiquwaa siiquwan giigissiis. He shiiquwan nuuni demmiyo maaddiya kaaletoy nuuppe daroti zaarettidi oychchanawunne Geeshsha Maxaafaa xannaꞌissanawu xalanaadan maaddees.

⁹ Nu naati shiiquwan zaariyoogaa shiiquwaa koyro yiya daroti akeekidosona. Yelidaageetoo, intte naati bantta wozanaappe zaaranaadan tamaarissiyoogan eti bantta pooꞌuwaa pooꞌissanaadan maaddite. Eti wozanappe yootiyo qoncce qofay eranawu koyidi yiida imattati tumaa akeekanaadan issi issitoo maaddiis.—1 Qor. 14:25.

ISSIPPETETTAA MINTTA

10. So asaa goynoy issippetettaa minttanawu waati maaddii?

¹⁰ Ne pooꞌuwaa pooꞌissiyo hara ogee sooninne gubaaꞌiyan issippetettay minnanaadan oottiyoogaa. Yelidaageeti So Asaa Goynuwaa ubbatoo goynnanaadan giigissiyoogee hegaa oottana danddayiyo issi oge. Daroti aginaa giddon issitoo JW Brodkastingiyaa beꞌoosona. Hegaa beꞌi simmidi odettida qofaa waati oosuwan peeshshanaakko tobbiyoogee loꞌꞌo. Yelidaageeti so asaa goynuwaa kaalettiyo wode guutta naꞌassinne yelaga naꞌassi koshshiya kaaletoy issi mala gidennaagaa hassayana bessees. Xannaꞌiyo xuufiyaa qofaa so asaa ubbaa goꞌꞌiya hanotan oosuwan peeshshiyo ogiyaa qonccissite.—Maz. 148:12, 13.

11-13. Ubbaykka waatidi gubaaꞌiyaa issippetettaa minttananne harati bantta pooꞌuwaa pooꞌissanaadan maaddana danddayiyoo?

¹¹ Yelagati gubaaꞌiyaa issippetettay minnanaadan, qassi yaatiyoogan harati bantta pooꞌuwaa pooꞌissanaadan minttettanawu waatana danddayiyoonaa? Neeni yelaga Kiristtaane gidikko, cimatussi qoppanawu halchchiyoogee loꞌꞌoba. Eti daro laytti haggaaziyoogan demmidobaa yootana mala bonchchuwan oychchana danddayaasa. Hegee nena minttettana, qassi intte pooꞌuwaa kaseegaappe aatti pooꞌissanaadan nenakka etakka denttettana. Hegaa bollikka, nuuni ubbay SHiiquwaa Addaraashan shiiqiyaageeta mokkanawu halchchoos. Neeni yaatiyoogee issippetettaa minttees, qassi shiiquwaa yiida imattatikka bantta pooꞌuwaa pooꞌissanawu koyanaadan denttettana danddayees. Neeni geella uttiyoosaa bessaydda etawu pashkki gaana danddayaasa. Eti boorassenna mala haratuura eretissanawu mala.

¹² Haggaazuwaa shiiquwaa kaalettiyo maatay neessi imettikko, cimidaageeti haggaazanaadan loytta maaddana danddayaasa. Eta hanotaara giigiya mootti etawu deꞌii? Issi issi hanotan, eti asatettan banttana maaddana danddayiya yelagaara haggaazanaadan oottana danddayaasa. Qassi sahoy darobaa ootissenna ishatu woy michchotu hanotaa akeekiyoogaa bessana danddayaasa. Ee, neeni akeekan qoppiyoogee meezee deꞌin xayin, yelagikka cimikka mishiraachchuwaa mishettidi yootanaadan maaddana danddayees.—Wog. 19:32.

¹³ Mazamuraawee, “Ishantti issippetettan de7iyoogee aiba lo77obeenne ufaissiyaabee!” yaagiis. (Mazamure 133:1, 2 nabbaba.) Issippe deꞌiyoogee Yihoowawu goynniya harati eta loꞌꞌobaꞌwu denttettanaadan Israaꞌeelata keehi maaddiis. Hegee sawiyaanne ufayssiya, tiyiyo zaytiyaa mala. Neeni issippetettaa minttiya loꞌꞌobawu ne ishatanne michchota denttettanawu murttiyoogee loꞌꞌoba. Neeni yaataydda deꞌikko hegee ufayssiyaaba. Hegaa ‘dooya bessada,’ woykko kaseegaappe gujjada, qassi ubbatoo oottana danddayay?—2 Qor. 6:11-13.

14. Ne shooron ne pooꞌoy pooꞌanaadan ay oottana danddayay?

¹⁴ Geeshsha Maxaafaa tumaa pooꞌoy ne shooron pooꞌanaadan kaseegaappe aaruwan baaxetiyoogee shin? Neeni kehabaa haasayiyoogeenne oottiyoogee issi shooroy tumaa dosanaadan oottana danddayees. Nena hagaadan oychcha: ‘Ta shooroti tana waati xeelliyoonaa? Ta keettaanne gibbiyaa geeshshatettan ta shooron loꞌꞌo leemiso gidiyaanaa? Ta huuphen qoppada harata maaddiyaanaa?’ Hara ishatuuranne michotuura haasayaydda eta dabbota, shoorota, etaara oottiyaageeta woy tamaariyaageeta eta kehatettaynne loꞌꞌo eeshshay waati maaddidaakko oychchiyoogee loꞌꞌo. Neeni loꞌꞌobaa siyana danddayaasa.—Efi. 5:9.

NAAGA UTTA

15. Naagi uttiyoogee keehi koshshiyoy aybissee?

¹⁵ Nu pooꞌuwaa gujji pooꞌissanawu baaxetiyo wode, nuuni qoppiyoobaykka maaddees. Yesuusi ba erissiyo ashkkarata, “Naagi uttite” giidi zaari zaari zoriis. (Maa. 24:42; 25:13; 26:41) Nuuni “iita waayee” gamꞌꞌidi yaana, I yiyoogee attenna shin nu wodiyan yeenna giidi qoppikko, eesuwan sabbakanawu qoppokko. (Maa. 24:21) Nu pooꞌoy nu shooron pholqqu giyoogaa aggidi, xilqqi gaananne ubba qassi xayana danddayees.

16, 17. Neeni ubbatoo naaga uttanawu ay oottana danddayay?

¹⁶ Ha wayssiya wodee iiti iiti biyo wode, nuuni ubbay naagi uttana koshshees. Yihooway likke ba keerido wodiyan denddana. Hegee aynne sirissenna. (Maa. 24:42-44) Hegee gakkanaashin, ubbatoo danddayan naaga utta. Xoossaa Qaalaa ubba galla nabbaba, qassi woosan minna. (1 PHe. 4:7) Ubbatoo naagi uttiyoogaaninne bantta pooꞌuwaa pooꞌissiyoogan bantta deꞌuwan ufayttiya ishatunne michchotu loꞌꞌo leemisuwaa qoppa. Issi loꞌꞌo leemisoy, Hosppune 15, 2012 Wochiyo Keelan (Amaarattuwaa), sinttaa 18-21n, “Laappun Tammu Layttawu Ayhuda Asa Maayuwaa Oyqqiyoogaa” giya huuphe yohuwan deꞌiyaagaa.

¹⁷ Minttettiya oosoynne laggetettay ne deꞌuwan kumo. Hegan neeni keehi ufayttana, qassi neeyyo wodee eesuwan aadhdhidaba milatana. (Efi. 5:16) Xeetu layttappe kase, nu ishantti oosuwan buusidi darobaa oottidosona. SHin Yihooway kaalettin, nuuni ha wodiyan hegaappe daruwaa oottida. Kase qoppanawukka danddayettennaagaa keenaa nu pooꞌuwaa pooꞌissoos.

18, 19. Nuuni naagi uttanaadaaninne minnanaadan cimati waati maaddiyoonaa? Leemisuwaa yoota.

¹⁸ Nuuni nagaranchcha gidiyoogee Yihoowa ufayssiya ogiyan ayyo haggaazanawu diggennaagaa eriyoogee nu ammanuwaa minttiyaaba. Yaanido gishshawu, Yihooway “imota” gidida attuma asata, gubaaꞌe cimata immidoogaa nashsha. (Efisoona 4:8, 11, 12 nabbaba.) Issi cimay nena oychchanawu yiyo wode, I yootiyo aadhdhida eraaninne zoriyan goꞌetta.

¹⁹ Maayettanawu metootida azinaynne machiyaa oychchin, Inggilize biittan naaꞌꞌu cimati eta maaddidosona. Machchiyaa ayyaanaaban bawu lagge gidida uraara waaxettabeennabadan qoppaasu. Azinay I loꞌꞌo asttamaare gidennaagaanne so asaa goynuwaa ubbatoo goynnanaadan hanotaa giigissibeennaagaa ammaniis. Cimati he aqo laggeti Yesuusi leemiso gidiyoobaa qoppanaadan oottidosona. Yesuusi ba erissiyo ashkkaratussinne etawu koshshiyaabawu qoppiis. Azinay Yesuusa leemisuwaa kaallanaadan he cimati zoridosona. Machchiyaa qassi danddayanchcha gidanaadan minttettidosona. He aqo laggeti bantta naaꞌꞌu naatuura so asaa goynuwaa goynnanawu waatanaakko maaddiyaabaakka cimati zoridosona. (Efi. 5:21-29) Guyyeppe he azinay oottidobawu cimati A galatidosona. I minnanaadaaninne ba machcheessi ayyaanaaban loꞌꞌo huuphe gidanawu geeshsha ayyaanan ammanettanaadankka cimati A minttettidosona. Cimati he so asawu siiquwan qoppidoogeenne eta kaafidoogee eti bantta pooꞌuwaa pooꞌissanaadan maaddiis.

20. Ne pooꞌuwaa pooꞌissiyo wode ay demmanaagaa ammanettana danddayay?

²⁰ Mazamuraawee, Yihoowassi “yayyiyaageetinne a ogiyan hemettiyaageeti ubbai” ufayttiyoogaa yootiis. (Maz. 128:1) Neeni harati Xoossawu haggaazanaadan shoobbiyoogan, issippetettaa minttiyaabaa oottiyoogaaninne ubbatoo naaga uttiyoogan ne pooꞌuwaa pooꞌissiyo wode, keehi ufayttana. Harati ne loꞌꞌo oosuwaa beꞌana, qassi daroti nu Aawaa bonchchanaadan hegee denttettana.—Maa. 5:16.