Cimida Kiristtaanetoo—Intte Ammanettiyoogaa Yihooway Nashshees

KUMETTA saꞌan deꞌiya cimati Xoossaa asaa giddon banttawu imettida oosuwaa nashshoosona. Eti nu ubbaassi gita anjjo! Gidikkonne, mata wode laamettidabay deꞌees. Ceeggida cimati amarida gita aawatettaa yelaga cimatuyyo sheedhdhanaadan odettiis. Ayba ogiyan?

Ooratti giigida issibay woradaa xomoosiyaageetinne deriyan tamaarissiyaageeti etawu layttay 70 gidiyo wode he oosuwaa aggiyoogaa. Qassi layttay 80 gidido cimati, Macara Biiruwaa Konttiyaa shiishshiyoogaa woy gubaaꞌe cimata shiishshiyoogaa mala dumma dumma aawatettaa yelaga cimatuyyo sheedhdhoosona. Hegaadan laamettidoogan he siiqo cimati waanidonaa? Eti Yihoowawunne A dirijjitiyawu ammanettidosona!

Macara Biiruwaa Konttiyaa shiishshiyaagaa gididi 49 gidiya layttaa oottida Keni, “Taani ha kuuyettidabaa muleera maayaas” yaagiis. I gujjidi hagaadan giis: “Taani issi gallassi maallado hegaa eranaappe kase, issi yelaga ishay shiishshiyaagaa gididi oottana koshshiyoogaa qonccissada Yihoowa woossaas.” Keni yootidobay ammanettidi oottiya kumetta saꞌan deꞌiya cimidaageeti yootiyoobaara issi mala. Eti bantta ishanttuyyo haggaaziyoogaa dosiyo gishshawu, koyro guuttaa azzanidoogee qoncce.

Ba gubaaꞌiyan cimata shiishshiyaagaa gididi oottida Esperandu, “Hegee tana guuttaa azzanttiis” yaagiis. SHin I hagaadan giis: “Payyatettay guuxxi guuxxi biyo gishshawu tawu daro wodiyaa koshshees.” Esperandu haꞌꞌikka Yihoowawu ammanettidi ootteesinne ba gubaaꞌiyawu anjjo; hegaadaana giidi nuuni qoppana danddayoos.

Hara haggaazuwaa doommida, daro wodiyawu yuuyi xomoosidaageetubaa shin? Yuuyi xomoosiyaagaa gididi 38 layttawu haggaazida Alani, “Taani hegaa siyido wode dagammaas” yaagiis. Gidikkokka, I he oosuwawu yelagata loohissiyoogee goꞌꞌiyoogaa akeekiis; qassi I ammanettidi haggaaziyoogaa aggibeenna.

Yuuyi xomoosiyaagaanne deriyan tamaarissiyaagaa gididi muleera 40 layttawu oottida Raasili, inne A machchiyaa koyro azzanidoogaa yootiis. “Nu maatay nuuni keehi nashshiyooba; qassi nuuyyo wolqqay deꞌiyaabadan qoppida.” Raasilinne A machchiyaa demmido loohissuwaanne eraa bantta gubaaꞌiyan goꞌettoosona; hegee etaara haggaaziya aassiyaageeti ufayttanaadan oottees.

Qommoora odettidaageetuugaadan intteyyo siyettana xayikkonne, 2 Sameelan deꞌiya issi taarikee hegaadan qoppiyaageetu hanotaa intte akeekanaadan maaddana danddayees.

BA HANOTAA AKEEKIYA ASHKKE BITANIYAA

Kawuwaa Daawita naꞌay Abeseloomi makkalido wodiyaa qoppa. Daawiti Yerusalaameppe baqatidi Yorddaanoosa SHaafaappe arshsho baggan deꞌiya Maahinayma katamaa biis. Daawitassinne aara deꞌiyaageetussi deꞌuwawu koshshiya amaridabay koshshiis. Aybi hanidaakko hassayeetii?

Heezzu asati hiixxiyoobata, dumma dumma kattaanne koshshiya miishshata kehatettan ehiidosona. Etappe issoy Barzzillaaya. (2 Sam. 17:27-29) Abeselooma makkalaa teqqin, Daawiti Yerusalaame simmiyo wode Barzzillaayi A Yorddaanoosa gakkanawu moyssiis. Yerusalaame I baanaadan Daawiti A oychchiis. Barzzillaayi “daro dure asa,” qassi kawoy immana giidobay ayyo koshshiyaaba gidenna; yaatikkonne, kawoy koshshiyaabaa ayyo immanaagaa yootiis. (2 Sam. 19:31-33) SHin Daawiti Barzzillaaya eeshshaanne I zorana danddayiyo aybanne nashshennan aggenna. Kawo keettan deꞌiyoogeenne oottiyoogee gita maata gidiyoogee erettidaagaa!

Ba hanotaa akeekiya ashkke Barzzillaayi bawu layttay 80 gididoogaa yootiis. I gujjidi, “Taani ha77i iitaanne lo77uwaa shaakkada eranau danddayiyaanaa?” yaagiis. I giidobay woygiyoogee? Ba deꞌido adussa wodiyan Barzzillaayi aadhdhida eratettaa demmidoogee erettidaba. Qassi guyyeppe Kawuwaa Robiꞌaama ‘cimati’ zoridoogaadan, I he wodekka loꞌꞌo zoriyaa zorana danddayees. (1 Kaw. 12:6, 7; Maz. 92:12-14; Lee. 16:31) Yaatiyo gishshawu, Barzzillaayi iitaanne loꞌꞌuwaa shaakkiyoogaabaa yootidoy cimatettay A bolli gattidobaa gidennan aggenna. I malꞌꞌuwaa masuhuwaa shaakkiyoogaaranne siyiyoogaara gayttidaagan cimatettay bana qohidoogaa yootiis. (Era. 12:4, 5) Hegaa gishshawu, Daawiti Kimihaama Yerusalaame efaanaadan Barzzillaayi oychchiis; Kimihaami Barzzillaaya naꞌaa gidennan aggenna.—2 Sam. 19:35-40.

SINTTANAWU HALCHCHIYOOGAA

Layttaara gayttidaagan laamettidabaa doomettan denttidobay Barzzillaaya qofaara issi mala. Ha wodiyan qoppana koshshiyaabay Barzzillaayaagaadan issi ura hanotaaranne abbiyaara gayttidaba gidennaagee qoncce. Ammanettidi kumetta saꞌan haggaaziya cimatussi keehi loꞌꞌo gididabaa akeekan qoppana koshshiis.

Ha cimida ashkke Kiristtaaneti eti daro wodiyawu aawatettan oottidobaa yelaga ishantti ekkikko Yihoowa dirijjitee sinttappe minnanaagaa sohuwaara akeekana danddayoosona. Barzzillaayi geella ba naꞌaa loohissidoogaadaaninne kiitettida PHawuloosi Ximootiyoosa loohissidoogaadan, daro hanotatun yelagata loohissidaageeti cimida ishantta. (1 Qor. 4:17; Pili. 2:20-22) Ha yelaga ishantti eti “Kiristtoosa bollaa keexxanaadan” maaddana danddayiya “imo” gidiyoogaa bessidosona.—Efi. 4:8-12; Qoodaabaa 11:16, 17, 29.

OOTTANA DANDDAYIYO DUMMABAA

Kumetta saꞌan Xoossaa asaa gubaaꞌiyaa giddon banttawu deꞌiya amarida aawatettaa haratussi immida daroti Yihoowa oosuwan dumma maataa woy daro maataa ekkana danddayoosona.

Yuuyi xomoosiyaagaa gididi 19 layttawu haggaazida Markoy hagaadan giis: “Ta hanotay laamettidoogee nu gubaaꞌiyan deꞌiya michchotu ammanenna azinata maaddanaadan oottiis.”

Yuuyi xomoosiyaagaa gididi 28 layttawu haggaazida ZHeraldoy, “Ayyaanaaban shuggidaageeta maaddiyoogeenne darota Geeshsha Maxaafaa xannaꞌissiyoogee nuuni ooratti halchchidobaappe amaridaagaa” yaagiis. Inne A machchiyaa he wode 15 asata Geeshsha Maxaafaa xannaꞌissiyoogaanne ayyaanaaban shuggida unddennaageeti gubaaꞌe shiiquwaa shiiqiyoogaa I yootiis.

Qommoora denttido Alani hagaadan giis: “Nuuni haꞌꞌi sabbakiyo oosuwaa kaseegaappe aaruwan oottana danddayoos. Nuuni dabaaban, zalꞌꞌe heeraaninne nu shoorotuyyo markkattoos; nu shoorotuppe naaꞌꞌati shiiquwaa yiidosona.”

Neeyyo Xoossaa asaa giddon ooratta oosoy imettidabanne neeni hegaa loytta oottana danddayiyaanne ammanettida isha gidikko, neeni maaddana danddayiyo dumma ogee deꞌees. Neeni meeze oottidobaa ne gubaaꞌiyan deꞌiya yelagatussi yootiyoogan Yihoowa oosuwaa kaafana danddayaasa. Qommoora denttido Raasili hagaadan giis: “Ufayssiya gooba yelagata Yihooway loohisseesinne goꞌettees. Eti minnidi tamaarissiyoogaaninne heemmiyoogan ishantti goꞌettoosona!”—“Yelagati Oottanawu Danddayanaadan Maaddite” giya saaxiniyaa xeella.

INTTE AMMANETTIYOOGAA YIHOOWAY NASHSHEES

Intte mati dumma haggaazuwaa doommidaba gidikko, loꞌꞌobaa qoppite. Intte wozanappe oottido oosuwan keehi daro asaa denttettideta; qassi haꞌꞌikka hegaadan oottana danddayeeta. Inttena asay kasekka siiqees; qassi haꞌꞌikka siiqanaagee erettidaagaa.

Ubbaappe aaruwan, Yihooway inttena mule dogennabaa oottideta. I “Intte oottido oosuwaanne qassi ammaniyaageeta maaddidoogaaninne ha77ikka maaddiyoogan Xoossaa siiqido siiquwaa” dogenna. (Ibr. 6:10) Ayyaanay kaalettin xaafettida ha xiqisee I qaalaa gelidobay nu kase oottidobaappe keehi dariyoogaa nuuni ubbay ammanettanaadan oottees. Yihoowawu intte keehi alꞌꞌo gidiyo gishshawu, A ufayssanawu kase oottidobaakka haꞌꞌi oottiyoobaakka I dogenna!

Neeni qommoora beꞌido ooratta oosoy imettido asa gidana xayikko shin? Gidikkokka he qofay nena maaddana danddayees. Ayba ogiyan?

Neeni ba oosuwaa laammida ammanettida cimaara ubbatoo gayttikko, I wozannaamanne meezee deꞌiyo asa gidiyoogee nena maaddana danddayees. Zoriyaanne qofaa A oychcha. Qassi I haꞌꞌi oottiyooban ammanettidi ba meezetidobaa waati goꞌettiyaakko akeeka.

Neeni kaseegaappe dumma ogiyan haggaazaydda deꞌiya cima gidin, woy hegee goꞌꞌiyo isha woy michcho gidin, adussa wodiyawu haggaazidanne haꞌꞌikka hegaadan oottiya ishantti ammanettiyoogaa Yihooway nashshiyoogaa hassaya.