Eray?

Erissiyo ashkkaraa Isxxifaanoosi yedetay gakkiyo wode waani woppu gaana danddayidee?

ISXXIFAANOOSI keehi hanqqettida amarida asatuura gayttiis. He 71 daannati Sanhedirina giyo Israaꞌeelan keehi xoqqa pirdda keettaa yame gidiyoogaadan, he biittan keehi wolqqaama asa. Amarida aginappe kase Yesuusa woranawu pirddido wode pirdda keettaa kaalettida Qeese Ubbatu Halaqaa Qayaafa son eti shiiqidosona. (Maa. 26:57, 59; Oos. 6:8-12) Wordduwan markkattiyaageeta kayan kayan shilootaa ehiido wode, eti garamissiya issibaa beꞌidosona; Isxxifaanoosa somꞌꞌoy “kiitanchchaa som77uwaa milatees.”—Oos. 6:13-15.

He keehi yashshiya hanotan Isxxifaanoosi waani woppu gaana danddayidee? A Sanhedirina shilootaa ehaanaappe kase, Xoossaa ayyaanay kaalettin Isxxifaanoosi ba oosuwaa kumetta wozanaappe oottiis. (Oos. 6:3-7) I shilootaa sinttan eqqidaashin he ayyaanay A minttettiyaagaanne hassayissiyaagaa gididi A bolli oottiis. (Yoh. 14:16, 17) Isxxifaanoosi xalan zaarido, Oosuwaa shemppo 7n deꞌiya qofay Ibraawettuwan Xaafettida Geeshsha Maxaafaappe 20 gidiya woy hegaappe daro xiqiseta I hassayanaadan geeshsha ayyaanay oottidoogaa bessees. (Yoh. 14:26) SHin Isxxifaanoosi Yesuusi Xoossaappe ushachcha baggan eqqidaagaa ajjuutan beꞌido wode, A ammanoy yaa minniis.—Oos. 7:54-56, 59, 60.

Nunakka issi galla asi yashissananne yedettana danddayees. (Yoh. 15:20) Xoossaa Qaalaa ubba wode xannaꞌiyoogaaninne minnidi haggaaziyoogan Yihoowa ayyaanay nunan oottanaadan eeno goos. Hegaa bollikka, nuuni ubbatoo sarotettan deꞌoosinne yedetaa eqettanawu wolqqaa demmoos.—1 PHe. 4:12-14.