Ha Wodiyankka Ufayttana Danddayaasa
SAHOY, ceegatettaynne hayqoy kaalettiyo azzanoy issi galla attana. Neenikka hegaa mala deꞌuwaa demmana danddayaasa! SHin haꞌꞌi ubba asawu daro metoynne waayee deꞌees. Ha wodiyan neeni ne deꞌuwan ufayttanaadan aybi maaddana danddayii? Ha wodiyankka ufayssaanne woppaa demmanaadan Geeshsha Maxaafay nena maaddana. Deꞌuwan gakkiya amarida metota, qassi Geeshsha Maxaafay waati maaddana danddayiyaakko beꞌa.
DEꞌIYAAGEE GIDANA GIYOOGAA
Geeshsha Maxaafaa zoriyaa: “Miishsha siiqoppe inttena naagite; intteyyo de7iyaagee intteyyo gido.”—Ibraawe 13:5.
Asay nuuyyo deꞌana bessees giyo darobay ha wodiyan deꞌees. SHin, nuuni ‘deꞌiyaabay gidana’ gaana danddayiyoogaa Geeshsha Maxaafay yootees. Waanidi?
‘Miishsha siiquwaappe’ naagetta. Asay ba payyatettaa, ba soo asaa deꞌuwaa, ba laggetetta, ba kandduwaa, ubba qassi ba bonchchuwaa qohiyaaba gidikkokka, ‘miishsha siiqidi’ aybanne oottees. (1 Ximootiyoosa 6:10) Hegee maaddenna. Wurssettan, duretettaa siiqiya uri “miishshaa kalli erenna.”—Eranchchaa 5:10.
Asi aquwaappe keehi aadhdhees. Aqoy maaddana danddayiyoogee tuma. SHin miishshay nuna siiqana woy galatana danddayenna; yaatanawu danddayiyay asa xalla. Tumu “laggee” deꞌiyoogee nuuni ufayssaa demmanaadan nuna maaddana.—Leemiso 17:17.
NUUNI GEESHSHA MAXAAFAA ZORIYAA KAALLIYOOGAN, HA WODIYAN NU DEꞌUWAN UFAYTTANA DANDDAYOOS
SAHETTIYO WODE GENCCIYOOGAA
Geeshsha Maxaafaa zoriyaa: “Wozani ufaittiyoogee asassi lo77o xale.”—Leemiso 17:22.
‘Loꞌꞌo xaledan,’ nuuni sahuwaa genccanaadan ufayssay nuna maaddana danddayees. SHin sahettiyo wode nuuni waani ufayttana danddayiyoo?
Galata. Nuuni nu metuwaabaa xallaa qoppikko, ‘ubba gallassay’ iita milatana. (Leemiso 15:15) Geeshsha Maxaafay, “galatite” yaagees. (Qolasiyaasa 3:15) Guuttabankka galata. Away wullishin beettiya loꞌꞌiyaabay, woppissiya carkkoy, siiqiyo uri pashkki giyoogee nuuni ufayttanaadan oottana danddayees.
Haratuyyo loꞌꞌobaa ootta. Nuuni sahettikkokka, ‘ekkiyoogaappe immiyoogee anjjettanaadan’ woy ufayttanaadan oottees. (Oosuwaa 20:35) Nuuni oottidobawu harati nuna galatiyo wode, ufayttoos, qassi nu metuwaabaa darin qoppokko. Nuuni harati ufayttanaadan maaddiyoogan, nu deꞌuwan ufayttana danddayoos.
AQO DEꞌUWAA MINTTIYOOGAA
Geeshsha Maxaafaa zoriyaa: “Keehi koshshiyaabaa shaakki [erite.]”—Piliphphisiyuusa 1:10, NW.
Issippe wodiyaa darin aattenna aqo laggetu dabbotay moorettana danddayees. Azinatinne machchoti aqo deꞌuwaa bantta deꞌuwan keehi koshshiyaabatuppe issuwaadan xeellana koshshees.
Issi issibaa issippe oottite. Issi issibaa issippe oottanawu halchchite. Geeshsha Maxaafay, “Issuwaa gidiyoogaappe naa77a gidiyoogee lo77o” yaagees. (Eranchchaa 4:9) Issippe qumaa kattana, bullachchaa baana, woy tukkiyaa uyana danddayeeta.
Siiqiyoogaa bessite. Geeshsha Maxaafay azinaynne machchiyaa issoy issuwaa siiqanaadaaninne bonchchanaadan minttettees. (Efisoona 5:28, 33) Wozanappe pashkki giyoogee, siiquwan qoommiyoogee, woy guutta imota immiyoogee aqo deꞌuwaa minttanawu keehi maaddees. Aqo laggeti hara uraara mattumaa gayttana koshshennaagee qoncce.—Ibraawe 13:4.