‘Ha Saꞌaa Aadhdhida Eratettan’ Cimettoppa

1. Xoossaa Qaalay nuna ay tamaarissii?

YIHOOWAY nu Gita Asttamaariyaa gidiyo gishshawu nuna gakkiya ay metuwaaninne genccana danddayoos. (Isi. 30:20, 21) A Qaalay nuuni ‘kumettanne loꞌꞌo ooso ubbawu giigidaageeta’ gidana mala nuussi koshshiya ubbabaa tamaarissees. (2 Xim. 3:16,17) Nuuni Geeshsha Maxaafay tamaarissiyoogaadan deꞌiyo wode, ‘ha saꞌaa aadhdhida eratettan’ deꞌana bessees giya asatuppe aaruwan aadhdhida eranchcha gidana.—1 Qor. 3: 19; Maz. 119:97-100.

2. Ha huuphe yohuwan nuuni ay pilgganee?

² Nuuni beꞌanaagaadan, ha saꞌaa aadhdhida eratettay nuuni darotoo nu xallaa siiqanaadan oottees. Hegaa gishshawu, nuuni ha saꞌaa bagga gidida asatuugaadan qoppennaadaaninne oottennaadan eqettanawu metootana danddayoos. Geeshsha Maxaafay, “Asappe yiida eratettan, qassi mela cimuwan inttena ooninne omooddenna mala naagettite” yaagiyoogee bessiyaaba. (Qol. 2:8) Seexaanay tamaarissiyo naaꞌꞌu worddota asay ammaniyoogaa waani doommidaakko ha huuphe yohuwan nuuni beꞌana. He naaꞌꞌu hanotankka, ha saꞌaa aadhdhida eratettay eeyyatetta gidiyoy aybissakko, qassi Xoossaa Qaalan deꞌiya aadhdhida eratettay ha saꞌay immiyo aybippenne waani aadhdhiyaakko pilggana.

MATTUMAA GAYTETTAABAN ASAA QOFAY LAAMETTEES

3-4. Amarkkan 20tta xeetu layttawu koyro heeran, mattumaa gaytettaa xeelliyaagan laamettidabay aybee?

³ Amarkkan, 20tta xeetu layttawu koyro heeran mattumaa gaytettaa xeelliyaagan asaa qofay keehi laamettiis. Kase, mattumaa gaytettaabaa haasayana bessiyay aqo oyqqidaageeta xalla gidiyoogaanne hegee asaa sinttan haasayennaba gidiyoogaa daroti ammanoosona. SHin he maaray keehi moorettiis, qassi xaasayi xeelliyoogee aakkiis.

⁴ Laatamantta xeetu layttawu koyro heeran mattumaa gaytettaa xeelliyaagan asaa hanotaynne xeelay keehi laamettiis. Issi eranchchiyaa, “Pilimeti, tiyaatireti, muuziqati, maxaafatinne erissoti pokko gidida darobaa bessiyoogaa doommidosona” yaagaasu. He layttatun, issoti issoti duriyo ogee asay mattumaa gaytettaabaa qoppanaadan oottiis; qassi eti maayiyo maayoy giiga gidenna. Wurssettaa gallassabaa Geeshsha Maxaafay kasetidi yootidoogaadan, asati “ufaittiyoobaa dosiyaageeta” gidana.—2 Xim. 3:4.

5. Ha saꞌaa kandduwaa maaraa xeelliyaagan 1960 heerappe doommidi aybi hanidee?

⁵ Aqo oyqqennan issippe deꞌiyoogaa, attumay attumaara maccay maccaara zinꞌꞌiyoogaa, pattennaban paraman shaahettiyoogaa malabay 1960 heerappe doommidi meeze gididaba. Allaxxiyoobati mattumaa gaytettaa qoncciyan bessoosona. Ha ubbabay ay kaalettidee? Asay kandduwaa maaraa kaallennan aggidoogee daro azzanttiyaabay deꞌanaadan oottidoogaa issi eranchchiyaa yootaasu. Leemisuwawu, yelidaageeti so asaara issippe deꞌokkona woy yelidaageetuppe issoy so asaa aggidi bees; qassi asay qofan qohettees; woy pornograafiyaa beꞌiyoogee amale gidiis. Hara azzanttiyaabay, mattumaa gaytettan asappe asa oyqqiya eedise mala harggee keehi daridoogaa. He ubbabay ha saꞌay loꞌꞌo gi minttettiyo deꞌo ogee eeyyatetta gidiyoogaa bessees.—2 PHe. 2:19.

6. Mattumaa gaytettaabaa ha saꞌay qoppiyo ogee waanidi Seexaanay koyiyooba gidii?

⁶ Mattumaa gaytettaabaa ha saꞌay qoppiyo ogee Seexaanay koyiyooba. Mattumaa gaytettaa Xoossay qoppibeenna ogiyan asay goꞌettiyoogaanne yaatiyoogan, Xoossay asawu immido imota gidida aqo deꞌuwaa asay bonchchennaagaa beꞌiyo wode Seexaanay ufayttiyoogee qoncce. (Efi. 2:2) Asay pokkobaa oottiyo wode Yihooway asawu immiyo, naata yeliyo imotaa nashshennaagaa bessees. Eti merinawu deꞌennan agganakka danddayoosona.—1 Qor. 6:9, 10.

MATTUMAA GAYTETTAA XEELLIYAAGAN GEESHSHA MAXAAFAA QOFAA

7-8. Mattumaa gaytettaa xeelliyaagan Geeshsha Maxaafaa qofay ha saꞌaa qofaappe keehi aadhdhiyoy aybissee?

⁷ Ha saꞌaa aadhdhida eratettaa kaalliya asay Geeshsha Maxaafay yootiyo kandduwaa maaray bessennaba giidi yootiyoogan qilliiccees. Hegaa mala asay, ‘Xoossay mattumaa gaytettaa koshshay deꞌanaadan oottidi nuna medhdhidi, hegaa goꞌettennaadan yootiyoy aybissee?’ giidi oychchana danddayees. Asay issibaa oottanawu koyikko, hegaa oottana bessees giidi eti balan qoppiyo gishshawu, he oyshaa oychchoosona. SHin Geeshsha Maxaafay hegaappe dummatiyaabaa yootees. Geeshsha Maxaafay nuuni amottiyo ubbabawu azazettana koshshennaagaanne iitabaa oottennaadan nuuni eqettana danddayiyoogaa yootees. (Qol. 3:5) Hegaa bolli, aqo deꞌuwan mattumaa gaytettan nu ufayttanaadan oottidi Yihooway medhdhiis. (1 Qor. 7:8, 9) He hanotay, issi azinaynne machchiyaa shaaramuxiyoogee darotoo kaalettiyo zilꞌꞌettiyoogaappenne hirggaappe naagettidi mattumaa gaytettan ufayttanaadan maaddees.

⁸ Ha saꞌaa aadhdhida eratettaappe dumma ogiyan, mattumaa gaytettaabaa suure xeelaa Geeshsha Maxaafay nuna tamaarissees. Geeshsha Maxaafay mattumaa gaytettay ufayssawu pultto gidana danddayiyoogaa yootees. (Lee. 5: 18, 19) Gidoppe attin, Geeshsha Maxaafay hagaadan gees: “Intte ubbai huuphen huuphen geeshshatettaaninne bonchchuwan machcho waati ekkiyaakko eranau besseesippe attin, Xoossaa erenna ammanenna asatudan, keehi amottiyoogan ekkanau bessenna.”—1 Tas. 4:4, 5.

9. (a) Yihoowa asay 20tta xeetu layttawu doomettaa heeran Xoossaa Qaalan deꞌiya aadhdhida eratettaa kaallanaadan aybi maaddidee? (b) Koyro Yohaannisa 2:15, 16n deꞌiya loꞌꞌo zoree aybee? (c) Roome 1:24-27n qonccidaagaadan, nuuni kaallennaadan eqettana koshshiyo pokkobay aybee?

⁹ Yihoowa asay 20tta xeetu layttawu koyro heeran, ‘yeella giyoobi baynna’ asatu qofan cimettibeenna. (Efi. 4:19) Eti Yihooway kessido maaraa mintti kaallidosona. Uddufune 15, 1926n kiyida Wochiyo Keelay hagaadan gees: “Issi attumaagee woy issi maccaara qoppiyoobaynne oottiyoobay, ubba qassi mattuman baappe dummatiya uraara gayttidaban geeshsha gidana bessees.” Ha saꞌan he wode haniyaabay ayba gidikkonne, Yihoowa asay Xoossaa Qaalan deꞌiya aadhdhida eratettaa kaalliis. (1 Yohaannisa 2:15, 16 nabbaba.) Xoossaa Qaalay nuussi deꞌiyo gishshawu nuuni keehi ufayttoos! Nuuni geeshsha kandduwaara gayttidaagan ha saꞌaa aadhdhida eratettan cimettennaadan maaddanawu Yihooway koshshiya wodiyan ayyaanaabaa qumaa immiyo gishshawukka galatoos.b—Roome 1:24-27 nabbaba.

BA XALAALAA SIIQIYOOGAWU LAAMETTIYA XEELAA

10-11. Wurssetta gallassatun aybi hananaagaa Geeshsha Maxaafay yootidee?

¹⁰ Geeshsha Maxaafay wurssetta gallassatun deꞌiya asay “banttana siiqiyaageeta” gidanaagaa yootiis. (2 Xim. 3:1, 2) Ha saꞌay hegaadan ba xallaa siiqanaadan minttettiyoogaa nuuni beꞌiyo wode maalaalettokko. Issi Insaykilopidee giiga deꞌuwawu maaddiya maxaafati 1970 heeran keehi daridoogaa yootees. Issi issi maxaafati “asay ba oonatettaa eranaadaaninne ba deꞌuwaa nashshanaadan mintti yootoosona.” Leemisuwawu, hegaa mala maxaafan deꞌiya issi qofaa beꞌa: “Neeni ha saꞌan deꞌida ooppenne loꞌꞌiyaanne ufayttiya asa gidiyo gishshawu ne huuphiyaa siiqa.” Issi asi waananaakko bawu kuuyana, qassi bawu likkenne giiga milatida aybanne oottana koshshiyoogaa he maxaafay yootees.

¹¹ Neeni hegaa kase siya eray? Seexaanay Hewaana hegaadan oottanaadan minttettiis. A “lo77uwaanne iitaa Xoossaadan” erana danddayiyoogaa I yootiis. (Doo. 3:5) Ha wodiyan, daroti banttana keehi xoqqu ootti xeelliyo gishshawu, ooninne, ubba qassi Xoossaykka banttassi hagee likke qassi hagee likke gidenna giidi yootana danddayenna giidi qoppoosona. Leemisuwawu, he qofay asay aqo deꞌuwaa xeelliyo ogiyan keehi qoncci beettiis.

12. Aqo deꞌuwaa xeelliyaagan ha saꞌay minttettiyo qofay aybee?

¹² Azinaynne machchiyaa issoy issuwaa bonchchanaadaaninne eti aqo oyqqiyo wode issoy issuwawu gelido qaalaa naaganaadan Geeshsha Maxaafay tamaarissees. Geeshsha Maxaafay azinaynne machchiyaa issippe deꞌanawu murttanaadan hagaadan giidi minttettees: “Asi ba aawaanne ba aayyiyo aggi bayidi, ba machcheera issippe de7ees; eti naa77ai issi asho gidoosona.” (Doo. 2:24) SHin, ha saꞌaa aadhdhida eratettaa kaalliyaageeti aqo laggeti bantta huuphessi koshshiyaabaa keehi qoppana bessees yaagiyoogan, hegaappe dummatiya qofaa yootoosona. Paraman shaahettiyoogaaban xaafettida issi maxaafay hagaadan gees: “Issi issi bullachchan, ‘naaꞌꞌaykka deꞌuwan deꞌido peeshshan’ aqo lagge gidanawu geliyo qaalay ‘naaꞌꞌaykka siiqettido peeshshan’ aqo lagge gidanawu geliyo qaalan laamettiis.” Asay aqo deꞌoy gamꞌꞌana koshshenna giidi qoppiyo gishshawu, so asay shaahettees; qassi daroti qohettoosona. Aqo deꞌuwaa ha saꞌay xeelliyo ogee eeyyatetta gidiyoogee qoncce.

13. Yihooway otorettiya asaa shenetiyo issi gaasoy aybee?

¹³ Geeshsha Maxaafay, “GODAI otorettiya ubbaa shenetees” yaagees. (Lee. 16:5) Yihooway otorettiya asa shenetiyoy aybissee? Bantta xallaa siiqiyaanne hegaa minttettiya asati Seexaanaagaadan otorettiyoogee hegawu issi gaaso. Xoossay ubbabaa Yesuusa baggaara medhdhiis. Seexaanay baayyo Yesuusi gulbbatidi goynnana giidi ammanidoogaa qoppa! (Maa. 4:8, 9; Qol. 1:15, 16) Hegaadan bantta xallaa siiqiyoogan banttana xoqqu oottiyaageeti ha saꞌaa aadhdhida eratettay Xoossaa sinttan eeyyatetta gidiyoogaa bessoosona.

BANA XOQQU OOTTIYOOGAA XEELLIYAAGAN GEESHSHA MAXAAFAA QOFAA

14. Nuuni nu oonatettaabaa bessiyaagaadan qoppanaadan Roome 12:3y waati maaddii?

¹⁴ Nu oonatettaa bessiyaagaadan xeellanaadan Geeshsha Maxaafay nuna maaddees. Qassi amarida hanotan nuna siiqiyoogee bessiyaaba gidiyoogaa yootees. Yesuusi, ‘Ne shooruwaa ne huuphedan siiqa’ yaagiis; hegee nuuni amarida hanotan nuussi koshshiyaabawu qoppana bessiyoogaa qonccissees. (Maa. 19:19) Gidoppe attin, Geeshsha Maxaafay nuuni haratuppe gitatays giidi mule qoppana bessennaagaa tamaarissees. Geeshsha Maxaafay hagaadan gees: “Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite.”—Pili. 2:3; Roome 12:3 nabbaba.

15. Nubaa qoppiyoogaa xeelliyaagan Geeshsha Maxaafay zoriyoobay loꞌꞌo gidiyoogaa nena ammanttiyaabaa ay akeekadii?

¹⁵ Ha wodiyan daro asay, ubba qassi tamaaridaageeti Geeshsha Maxaafay yootiyo zoree maaddenna goosona. Eti, harati neeppe aadhdhiyaabadan neeni qoppikko, he asati banttawu goꞌettanawu nena naaqqana yaagoosona. SHin, Seexaanaa alamee minttettido qofay ay kaalettidee? Neeni ay akeekadii? Ba xallaa siiqiya asay ufayttii? Eta so asay ufayttii? Etassi tumu laggeti deꞌiyoonaa? Eti Xoossaayyo mata dabbo gididonaa? Neeni akeekido, aybippenne loꞌꞌo ayfiyaa demissiyay awugee—ha saꞌaa aadhdhida eratettaa kaalliyoogeeyye, Xoossaa Qaalan deꞌiya aadhdhida eratettaa kaalliyoogee?

16-17. Nuuni aybawu galatana danddayiyoo, qassi aybissi?

¹⁶ Ha saꞌay aadhdhida eranchchadan xeelliyo asatu zoriyaa kaalliya asay, ogiyaa balidi banaara biya ura likke ogiyaa oychchiya asa mala. Yesuusi he wode deꞌiya “eranchcha” asata xeelliyaagan, “Eti qooqe kaalettiya qooqeta; qooqee qooqe kaalettikko, naa77aikka ollan kunddana” yaagiis. (Maa. 15:14) Tumukka ha saꞌaa aadhdhida eratettaa kaalliyoogee Xoossaa sinttan eeyyatetta.

¹⁷ Geeshsha Maxaafan deꞌiya loꞌꞌo zoree “tamaarissanau, balaa seeranau, mooruwaa suurissanaunne xillotetta de7uwau zoriyaa immanau” ubbatoo maaddees. (2 Xim. 3:16, 17) Ba dirijjitiyaa baggaara ha saꞌaa aadhdhida eratettaappe nuna naagido gishshawu, Yihoowa keehi galatoos! (Efi. 4:14) I giigissidi immiyo ayyaanaa qumay A Qaalay yootiyo maaraa mintti kaallanaadan nuussi koshshiya wolqqaa immees. Geeshsha Maxaafan deꞌiya ammanttiya aadhdhida eratettaanne kaaletuwaa Yihooway nuussi immiyoogee keehi ufayssiyaaba!