“Inttena Ooninne Omooddenna Mala Naagettite”!

1. Qolasiyaasa 2:4, 8y yootiyoogaadan, Seexaanay nu qofaa omooddanawu waati malii?

SEEXAANAY nuuni Yihoowa siiqiyoogaa agganaadan koyees. I ba halchchuwaa polanawu nu qofaa laammanawu malees, hegee nu qofaa omooddanawunne nuuni aagaadan qoppanaadan oottanawu malees giyoogaa mala. I nuuni dosiyoobaa goꞌettidi nuna ammanttanawu woy cimmanawu malees.—Qolasiyaasa 2:4, 8 nabbaba.

2-3. (a) Qolasiyaasa 2:8n deꞌiya qofaa nuuni akeekana koshshiyoy aybissee? (b) Ha huuphe yohuwan nuuni ay tamaaranee?

² Nuuni Seexaanan cimettiyo daafa hanotan deꞌiyoo? Ee, daafa hanotan deꞌoos! PHawuloosi Qolasiyaasa 2:8n deꞌiya akeekissuwaa xaafidoy ammanennaageetussi gidennaagaa hassaya. I hegaa geeshsha ayyaanan tiyettida Kiristtaanetussi xaafiis. (Qol. 1:2, 5) He wode Kiristtaaneti daafa hanotan deꞌikko, ha wodiyan nuuni hegaappe aadhdhiya daafa hanotan deꞌoos. (1 Qor. 10:12) Aybissi? Seexaanay saluwaappe saꞌaa duge olettido gishshawu, ammanettidi Xoossawu oottiyaageeta balettanawu keehi baaxetiiddi deꞌees. (Ajj. 12:9, 12, 17) Hegaa bollikka, iita asatinne balettiyaageeti ‘kaseppe iiti iiti biyo’ wodiyan deꞌoos.—2 Xim. 3:1, 13.

³ Ha huuphe yohuwan, Seexaanay nu qofaa laammanawu ‘mela cimuwaa’ waati goꞌettiyaakko beꞌana. Nuuni A ‘iita cimotuppe’ heezzaa xannaꞌana. (Efi. 6:11) Qassi, kaalliya huuphe yohuwan A hiillaa gaasuwan nuna gakkida iitabaa nuuni waati xayssanaakko tamaarana. SHin, koyruwan Israaꞌeelati Hidootaa Biittaa geli simmin, Seexaanay eta cimmido ogiyaappe nuuni ay tamaarana danddayiyaakko ane beꞌoos.

ISRAAꞌEELATI EEQAWU GOYNNANAADAN SEEXAANAY PAACCIIS

4-6. Zaarettido Wogaa 11:10-15n odettidaagaadan, Israaꞌeelati Hidootaa Biittan duussaa doommido wode, goshshaa xeelliyaagan tamaarido ooratta hiillay aybee?

⁴ Eeqawu goynnanaadan oottiyoogan Seexaanay Israaꞌeelata hiillan paacciis. I hegaadan waati oottidee? Etayyo qumay koshshiyoogaa I eriyo gishshawu, eti I koyiyoobaa oottanaadan hegaa goꞌettanawu baaxetiis. Israaꞌeelati Hidootaa Biittaa gelido wode, goshshaa oosuwaara gayttidaagan ooratta ogiyaa tamaarana koshshiis. Israaꞌeelati Gibxxen deꞌiyo wode, bantta goshsha gadiyaa ushshanawu Nayle shaafaa haattaa waaruwan goꞌettoosona. Gidoppe attin, Hidootaa Biittan gita shaafay baynna gishshawu, goshshaa oosuwawu etawu iraa haattaynne akkay koshshiis. (Zaarettido Wogaa 11:10-15 nabbaba; Isi. 18:4, 5) Hegaa gishshawu, Israaꞌeelati ooratta goshshaa hiillaa tamaarana koshshiis. Goshshaa oosuwaa eriya daroti bazzuwan hayqqido gishshawu, hegee etawu metiyaaba.

⁵ Eta hanotay laamettidoogaa Yihooway ba asawu qonccissiis. Qassi I goshshaa oosuwaara gayttiyaaba milatenna kaallidi deꞌiyaabaa gujjidi yootiis: “Intte wozanai balin wora simmidi, intte hara xoossatussi oottennaadaaninne etau goinnennaadan naagettite.” (Zaa. 11:16, 17) Ooratta goshshaa hiillaa tamaariyoogaa xeelliyaagan Yihooway etawu yootido wode, worddo xoossatussi goynniyoogaabaa yootidoy aybissee?

⁶ Israaꞌeelati bantta yuushuwan deꞌiya, eeqawu goynniya asaappe issi issi goshshaa hiillaa tamaaranawu eti paacettanaagaa Yihooway erees. He eeqawu goynniya asay hegaa heera goshshaabaa Israaꞌeelatuppe aaruwan erees, qassi Xoossaa asati maaddiya amarida hiillata etappe tamaarana danddayoosona, shin eti cimettana danddayoosona. Kanaane biittaa goshshanchchati Baꞌaala giyo eeqawu goynnoosona, qassi eti hegaa mala haymaanootiyaa ammanuwaa kaalloosona. Eti Baꞌaali saluwaa godaanne iraa immiyaagaa giidi ammanoosona. Yihooway ba asay hegaa mala worddo timirttiyan cimettanaadan koyibeenna. SHin, Israaꞌeelati Baꞌaalayyo goynnanawu darotoo dooridosona. (Qoo. 25:3, 5; Daan. 2:13; 1 Kaw. 18:18) Seexaanay Israaꞌeelata waati omooddidaakko haꞌꞌi akeeka.

SEEXAANAY ISRAAꞌEELATA OMOODDANAWU GOꞌETTIDO HEEZZUBATA

7. Israaꞌeelati Hidootaa Biittaa gelido wode, eta ammanoy waani paacettidee?

⁷ Iray bukkidi biittaa ushshiyoogaa beꞌanawu asay koyiyo wottin deꞌiyaabaa Seexaanay koyro goꞌettiis. Hidootaa Biittan layttan layttan Hosppuniyaappe Masqqalaa aginaa gakkanaashin keehi guutta iray bukkees. Israaꞌeelati deꞌanawunne daro kattay mokkanawu darotoo Xiqimitaa heeran bukkiya iray koshshees. Seexaanay Israaꞌeelati duretanawu eeqawu goynniya bantta yuushuwan deꞌiya asaa meeziyaa kaallanawu qoppanaadan oottiyoogan eta cimmiis. Eta yuushuwan deꞌiya asati eti bantta haymaanootiyaa meezetuppe amaridaagaa kaallana xayikko, bantta xoossati iray bukkanaadan oottokkona giidi ammanoosona. Yihoowan ammanennaageeti iray bukkennan daro wodiyaa takkiyoogaa teqqiyo issi ogee hegaa giidi ammanidosona; yaatiyo gishshawu worddo xoossaa Baꞌaala bonchchanawu eti eeqaa goynuwaa meezeta kaallidosona.

8. Seexaanay goꞌettido naaꞌꞌantto hiillay aybee? Qonccissa.

⁸ Seexaanay naaꞌꞌantto hiillaa Israaꞌeelatu bolli goꞌettiis. I Israaꞌeelati Pokkobaa amottanaadan oottiis. Eeqawu goynniya asati pokkobaa oottiyoogan bantta xoossatussi goynnoosona. Ha pokko goynuwaa giddon maccaageetinne attumaageeti beeta maqidasiyan shaaramuxiyoogee deꞌees. Allaga xoossaassi goynniyaageeti attumay attumaara maccay maccaara mattumaa gayttiyoogaanne hara pokkobaa paqqadiyoogaa xalla gidennan, eti hegaa ufayssiyaabadan xeelloosona. (Zaa. 23:17, 18; 1 Kaw. 14:24) Bantta xoossati biittaa araddissanaadan he meezeti oottoosona giidi eeqawu goynniyaageeti ammanoosona. Allagati oottiyo pokkobaara gayttida meezetun daro Israaꞌeelati omooddettidosona; hegaa gaasuwan, eti worddo xoossatussi goynnidosona. Eti Seexaanan omooddettidosona.

9. Hoose7a 2:16, 17 y yootiyoogaadan, Seexaanay Israaꞌeelati Yihooway tumu oonakko doganaadan waati oottidee?

⁹ Seexaanay heezzantto hiillaa goꞌettiis. I Israaꞌeelati Yihooway oonakko doganaadan oottiis. Hananabaa yootiya Ermmaasa wode, Yihooway wordduwan hananabaa yootiyaageeti “Ba7aala giyo eeqaa gaasuwan” ba asay A sunttaa doganaadan oottidoogaa yootiis. (Erm. 23:27) Xoossaa asay Yihoowa sunttaa goꞌettiyoogaa aggidi hegaa “Godaa” giyo birshshettay deꞌiyo Baꞌaala giyaagan laammidaba malatees. Hegee Yihoowanne Baꞌaala giddon deꞌiya dummatettaa Israaꞌeelati shaakkanawu metootidi, Baꞌaalayyo goynniyo meezeta Yihoowa goynuwaara walakkanaadankka oottiis.—Hoose7a 2:16, 17 nabbaba.b

SEEXAANAY HA WODIYAN ASAA CIMMANAWU GOꞌETTIYOOBATA

10. Seexaanay ha wodiyan goꞌettiyo hiillati aybee?

¹⁰ Seexaanay ha wodiyan hegaa mala hiillata goꞌettees. Pokkobaa oottiyoogaa likkeba milatissiyoogaaninne asay Yihooway qoppiyoobaa doganaadan oottiyoogan I asaa omooddees. Seexaanay asay Yihooway qoppiyoobaa doganaadan waati oottiyaakko koyro beꞌana.

11. Yihooway oonakko asay doganaadan Seexaanay waati oottii?

¹¹ Seexaanay Yihooway oonakko asay doganaadan oottees. Yesuusi kiittidoogeeti hayqqi simmin, kaddida amaridaageeti wordduwaa tamaarissiyoogaa doommidosona. (Oos. 20:29, 30; 2 Tas. 2:3) Ha kaddidaageeti asay tumu Xoossaa oonatettaa doganaadan oottiyoogaa doommidosona. Leemisuwawu, eti bantta Geeshsha Maxaafan Xoossaa sunttaa goꞌettiyoogaa aggidi “Godaa” giyaagaa mala qaalata goꞌettoosona. Eti Xoossaa buzo sunttaa kessidi A sohuwan “Godaa” giyaagaa gelissidoogee, Geeshsha Maxaafan ‘godata’ geetettida haratuppe Yihooway aybin dummatiyaakko Geeshsha Maxaafaa nabbabiya uri akeekanawu metootanaadan oottiis. (1 Qor. 8:5) Eti Yihoowakka Yesuusakka “Godaa” giidi xeegoosona. Hegee asay Yihoowaynne Yesuusi issi mala gidennaagaa akeekanawu metootanaadan oottiis. (Yoh. 17:3) Ha kirqqi giidabay Xoossaa Qaalan baynna Sillaasiyaa timirttee aakkanaadan maaddiis. Hegaappe denddidaagan, daro asay Xoossaa erana danddayennabadan qoppees. Hegee hanttaara worddo!—Oos. 17:27.

12. Roome 1:28-31n qonccidaagaadan, worddo haymaanootee ay minttettii, qassi hegee ay kaalettidee?

¹² Seexaanay pokkobaa amottanaadan oottees. Beni Israaꞌeelan, pokkobay aakkanaadan Seexaanay worddo haymaanootiyaa goꞌettiis. Ha wodiyankka I hegaadan oottees. Worddo haymaanootee pokkobaa coꞌꞌu gi xeelleesinne likkeba milatissanawu malees. Hegaappe denddidaagan, Xoossawu oottays giya daroti I kessido kandduwaa maaraa azazettiyoogaa aggidosona. Kiitettida PHawuloosi Roome Kiristtaanetuyyo xaafido dabddaabbiyan hegee kaalettidobaa qonccissiis. (Roome 1:28-31 nabbaba.) “Bessennabaa” geetettidabay attumay attumaara maccay maccaara mattumaa gayttiyoogaa gujjin, ubba qommo pokkobaa xaaxi waaxees. (Roo. 1:24-27, 32; Ajj. 2:20) Geeshsha Maxaafan deꞌiya qoncce timirttiyaa nuuni azazettiyoogee keehi koshshiyaaba!

13. Seexaanay goꞌettiyo hara hiillay aybee?

¹³ Seexaanay nu meretan koyiyoobaa amottanaadan oottees. Nuuyyoonne nu soo asawu deꞌuwaassi koshshiyaabaa kunttanawu nuuni ubbay koyiyoogee wottin deꞌiyaaba. Qassi hegaadan oottanawu amarida hiillata tamaaranawu koyoos. (1 Xim. 5:8) Darotoo, nuuni timirtte keetti gelidi loytti xannaꞌiyo wode he hiillata tamaarana danddayoos. SHin nuuni akeekanchcha gidana bessees. Daro biittatun, timirtte keettan tamaareti maaddiya hiillata tamaaroosona; shin eti alamiyaa aadhdhida eratettaakka tamaaroosona. Leemisuwawu, timirtte keettati tamaareti Xoossay deꞌiyoogaa siranaadaaninne Geeshsha Maxaafaa karanaadan minttettoosona. Loytti akeekiya asa ubbay deꞌoy lodda laamiyan doommidoogaa ammananaadan tamaaretussi odettees. (Roo. 1:21-23) He timirtteti ‘Xoossaa aadhdhida eratettaa’ phalqqoosona.—1 Qor. 1:19-21; 3:18-20.

14. Asa aadhdhida eratettay ay minttettii?

¹⁴ Asa aadhdhida eratettay Yihooway kessido maarata xaasayi xeellees, woy he maarata phalqqees. Hegee Hegee Xoossaa ayyaanaa ayfiyaa gidennan, ‘asatettaa oosuwaa’ minttettees. (Gal. 5:19-23) Hegee asay otorettanaadan minttettees, qassi hegaappe denddidaagan asay ‘bana siiqiyaagaa’ gidees. (2 Xim. 3:2-4) Ha eeshshati Xoossay ba ashkkaratuyyo deꞌanaadan koyiyo bana ziqqi oottiyo eeshshaa phalqqiyaabata. (2 Sam. 22:28) Yuniversttiyan tamaarida amaridaageeti Xoossaagaadan qoppiyoogaappe alamiyaagaadan qoppiyoogaa doommidosona. Nuuni ha qohiyaabaa coꞌꞌu giidi xeellikko aybi hanana danddayiyaakko ane issi leemisuwaa beꞌoos.

15-16. Issi michchee hanotaappe neeni tamaariyoobay aybee?

¹⁵ Ubba wode 15 layttawu haggaazida issi michchiyaa hagaadan gaasu: “Taani xammaqettida Yihoowa Markka gidiyoogaadan yuniversttiyaa timirttiyaa tamaariyoogee qohiyoogaa xeelliyaagan nabbabidabanne siyidaba gidikkonne, akeekissanawu yootido hegaa taani wozanan wottabeykke. Taani he zoree taayyo hanennaba gaada qoppaas.” Hegaappe denddidaagan O ayba metoy gakkidee? A hagaadan gaasu: “Taani tamaariyoobaa xannaꞌiyoogan daro wodiyaa aattiyo gishshawu, kaseegaadan Yihoowa woossanawu tawu wodee baawa, haratuura Geeshsha Maxaafaabaa tobbanawu tana keehi daafurssees, qassi shiiqotuyyo loytta giigettanawu keehi xalalays. Xoqqa timirttiyaa tamaariyoogee taani Yihoowaara dabbotido dabbotaa mooriyoogaa akeekido gishshawu, taani timirttiyaa aggana koshshiyoogaa eraas. Qassi taani aggaas.”

¹⁶ A qoppiyooban xoqqa timirttee he michchiyo waati qohidee? A hagaadan gaasu: “Taani tamaarido timirttee ta harata boranaadan, ta ishanttuppenne michchonttuppe eti oottana danddayiyoogaappe daruwaa naaganaadan oottidoogaanne taani haratuppe shaahettanaadan oottidoogaa yootanawu yeellatays. He qofaa agganawu taayyo daro wodiyaa koshshiis. Saluwan deꞌiya nu Aaway ba dirijjitiyaa baggaara nuuni akeekanaadan yootiyoobaa xaasayidi xeelliyoogee keehi qohiyaaba gidiyoogaa he hanotay tawu qonccissiis. Taani tana eriyoogaappe aaruwan Yihooway tana erees. Taani I yootiyoobaa siyana koshshees shin.”

17. (a) Nuuni ay oottana koshshii? (b)  Kaalliya huuphe yohuwan nuuni ay xannaꞌanee?

¹⁷ Seexaanaa alamiyaappe “yiida eratettan, qassi mela cimuwan” mule omooddettennaadan murtta. Seexaanay nena cimmanaadan mule eeno gooppa. (1 Qor. 3:18; 2 Qor. 2:11) Neeni Yihooway oonakko doganaadaaninne awu ne waata goynnanaadan I koyiyaakko doganaadan Seexaanay oottana mala eeno gooppa. Yihooway kessido kandduwaa maarata kaalla. Yihoowa zoriyaa neeni xaasayanaadan Seexaanay nena cimmanaadan oottoppa. SHin ha alamiyaa qofay nena qohidoogaa akeekikko, neeni ay oottanawu koshshii? Kaalliya huuphe yohoy wolqqaama ‘qato’ mala gidida qofatanne eeshshata nuuni xoonanaadan Xoossaa Qaalay waati maaddana danddayiyaakko qonccissana.—2 Qor. 10:4, 5.