Beni Wodiyaa Xaatta Maxaafay Qoncciis
Eyin Gedin beettida, xuugettida duuxay 1970n beettoosappe doommidi A nabbabanawu danddayettibeenna. He xaatta maxaafan Xoossaa sunttaynne Wogaabaa maxaafaappe amaridabay deꞌiyoogaa 3-D iskkaaning giyo, ubba ginan bessiya hiillay qonccissiis
ISRAAꞌEELAN Eyin Gedi giyoosan, Maxine Abbawu arggo bagga gaxaa matan, 1970n, biittaa bookkidi xannaꞌiyaageeti xuugettida xaatta maxaafay duuxeretti attidaagaa demmidosona. Eti issi Ayhuda woosa keettay moogettidosaa bookkiiddi hegaa demmidosona; he woosa keettay geella usuppuntta xeetu layttaa M.Ln he moottay xayiyo wode xuugettennan aggenna. He xaatta maxaafaa hanotay hegee nabbabettennaadan oottiis; haray atto A moorennan xaattaa birshshanawukka danddayettibeenna. Ubba ginan bessiya 3-D iskkaaning giyo hiillaa wolqqan, he xaatta maxaafan deꞌiyaabaa beꞌana danddayettiis. Dijital Imejing softwer giyo ooratta eraa goꞌettidi, an xaafettidabaa nabbabana danddayoos.
Yaatin hegan aybi qonccidee? He xaatta maxaafay Geeshsha Maxaafa. He duuxeretti attidaban Wogaabaa maxaafaa doomettan deꞌiya amarida xiqiseti deꞌoosona. He xiqisetun Ibraawetto oyddu pitaletun xaafettida Xoossaa sunttay deꞌees. Hegee koyro xeetu layttaa M.L. baggaa heerappe oyddantto xeetu layttaa M.L. gakkanaassi deꞌiya wodiyan xaafettidaba milatees; kushiyan xaafettida, Kumranen beettida xuufetuppe simmin, Ibraawetto Geeshsha Maxaafaa xuufetu ubbaappe hegee keehi gamꞌꞌidaagaa. Gil Zohar giyo eranchchay Ze Jerusalem Post giyo gaazeexan hagaadan xaafiis: “Wogaabaa maxaafaappe duuxerettidi attida, Eyin Gedin beettidaagaa nuuni nabbabanaappe kase, Naaꞌꞌantto Beeta Maqidasiyaa wode xaafettida, 2,000-layttaa-gamꞌꞌida, Maxine Abbaa Xaatta Maxaafatuppenne giddo wodiyan, 10tta xeetu layttaa M.Ln xaafettida Alepo Kodekisiyaappe gidduwan shaꞌa gidiya layttay aadhdhiis.” Eranchchati yootiyoogaadan, ha xaatta maxaafan xaafettidabay Masooreti xaafido Torah (Higgee) “shaꞌu layttaa giddon aynne laamettibeennaagaanne wotti yeggi xaafidaageetu balay qofaa laammibeennaagaa” bessees.