“Nuuni Salettokko”!

1. Kiristtaaneti deꞌuwaa wottaa wurssanawu ay oottana bessii?

KIRISTTAANETI deꞌuwaa wottaa woxxiiddi deꞌoosona. Nuuni wottaa biron doommidaageeta gidin woy daro layttawu woxxidaageeta gidin, wurssana gakkanawu aggennan woxxana koshshees. Kiitettida PHawuloosi Piliphphisiyuusa Kiristtaanetuyyo immido zoree, woxxiyo wottaa wurssanaadan nuna minttettees. Piliphphisiyuusa gubaaꞌiyan deꞌiya amaridaageeti PHawuloosi kiittido dabddaabbee eta gakkiyo wode, daro layttawu Yihoowawu haggaazidosona. Eti ammanettidi Yihoowayyo haggaaziiddi deꞌoosona; shin aggennan genccidi woxxana koshshiyoogaa PHawuloosi eta hassayissiis. Eti A leemisuwaa ubbatoo kaalliyoogan ‘gakkanasawu horddofanaadan’ woy baaxetanaadan I koyiis.—Pili. 3:14.

2. PHawuloosi Piliphphisiyuusan deꞌiya Kiristtaaneta zoridoy koshshiya wodiyaana giyoy aybissee?

² PHawuloosi Piliphphisiyuusan deꞌiya Kiristtaaneta zoridoy koshshiya wodiyaana. Piliphphisiyuusan deꞌiya asay gubaaꞌee eqqosaappe doommidi ishantta yedettiis. PHawuloosinne Sillaasi 50 M.Ln, ‘Maqidooniyaa pinnanaadan’ Xoossay shoobbin azazettidosona. Hegaa gishshawu, mishiraachchuwaa sabbakanawu eti Piliphphisiyuusa biidosona. (Oos. 16:9) Mishiraachchuwaa “siyana mala Xoossai i wozanaa” dooyido, Lidiyo giyo issi maccaaseera eti yan gayttidosona. (Oos. 16:14) I keettan deꞌiyaageeti ubbay iira issippe sohuwaara xammaqettidosona. SHin, Dabloosi eta bolli metuwaa gattiyoogaa sohuwaara doommiis. Katamaa asay PHawuloosanne Sillaasa daannatu sintti goochchidi efiis; qassi wayssidoosona giidi wordduwan mootidosona. Hegaappe denddidaagan, PHawuloosanne Sillaasa shocidosona, qasho keettan yeggidosonanne guyyeppe katamappe kiyanaadan azazidosona. (Oos. 16:16-40) Eti hidootaa qanxxidonaa? CHiikka! Mati eqqida gubaaꞌiyan deꞌiya ishanttinne michchontti shin waanidonaa? Etikka genccido gishshawu, loꞌꞌo leemiso gididosona! PHawuloosinne Sillaasi etawu loꞌꞌo leemiso gididoogan eti keehi minettidoogee qoncce.

3. PHawuloosi ay akeekidee, qassi nuuni xannaꞌana oyshati awugeetee?

³ PHawuloosi genccanawu murttiis. (2 Qor. 4:16) SHin, I hayqqana gakkanawu ammanettidi Yihoowayyo aggennan haggaazanawu, ba halchchuwaa polanaagaa xallaa qoppana koshshiyoogaa akeekiis. Nuuni PHawuloosa leemisuwaappe ay tamaarana danddayiyoo? Ha wodiyan deꞌiya asatu hanotan nuuni metoy gakkishinkka genccana danddayiyoogaa bessiyaabay aybee? Qassi sinttanaa hidootay nuuni salettennan yaa murttanaadan waati maaddana danddayii?

PHAWULOOSA LEEMISUWAA KAALLIYOOGEE NUNA WAATI MAADDII?

4. PHawuloosa bolli gakkidabay ayba gidikkonne, I Yihoowa oosoy daridoogaa gididi waani deꞌidee?

⁴ PHawuloosi Piliphphisiyuusan deꞌiya Kiristtaanetussi xaafido wode, I oottiiddi deꞌiyo ubbabaa qoppa. I Roomen issi keettan qashetti uttiis. I sabbakanawu kiyana danddayeenna. Gidikkonne, A oychchanawu yiyaageetussi markkattiyoogaaninne haahuwan deꞌiya gubaaꞌetussi dabddaabbiyaa xaafiyoogan oosoy daridoogaa gididi deꞌiis. Ha wodiyankka hegaadan, sooppe kiyana danddayenna daro Kiristtaaneti bantta soo yiyaageetussi mishiraachchuwaa yootanawu banttawu danddayettida ubbabaa oottoosona. Qassi eti demmana danddayennaageetussi minttettiya dabddaabbiyaa xaafoosona.

5. Piliphphisiyuusa 3:12-14n PHawuloosi yootidoogaadan, I aggennan Yihoowawu haggaazanaadan maaddiday aybee?

⁵ PHawuloosi kase oottido loꞌꞌobay woy iitabay A qofay Yihoowa haggaazuwaappe sherꞌꞌi gaanaadan oottibeenna. I “sinttan de7iyaagaa” oyqqanawu woy wottaa wurssanawu “guyyeera de7iyaagaa” dogi aggana koshshiyoogaa yootiis. (Piliphphisiyuusa 3:12-14 nabbaba.) PHawuloosa qofay shaahettanaadan oottana danddayiya amaridabati aybee? Koyroogee, PHawuloosi Kiristtaane gidanaappe kase, keehi injjetido asa. Gidikkonne, I hegaa “wora olidobaadan” qoodiis. (Pili. 3:3-9) Naaꞌꞌanttoogee, I Kiristtaaneta yedettidoogan bana mooranchchadan qoppiyaakkonne, hegee I Yihoowawu haggaaziyoogaa digganaadan oottibeenna. Heezzanttoogee, taani Yihoowawu oottidobay gidana giidi I qoppibeenna. PHawuloosi qashettidaba, shocettidaba, shuchchan cadettidaba, abban markkabee meꞌidaba, namisettidabanne kallottidaba gidikkonne haggaazuwan darobaa oottiis. (2 Qor. 11:23-27) SHin, PHawuloosi ay oottidabanne tuggatidaba gidikkonne, I aggennan Yihoowawu haggaazana koshshiyoogaa eriis. Nuunikka hegaadan oottana bessees.

6. Nuuni dogana koshshiyo ‘guyyeera deꞌiya’ amaridabati aybee?

⁶ Nuuni ‘guyyeera deꞌiyaagaa dogi aggiyoogan’ PHawuloosa leemisuwaa waati kaallana danddayiyoo? Nuuppe issoti issoti kase oottido nagaraa gaasuwan nuna mooranchchadan xeelliyoogaa agganawu baaxetiyoogee koshshennan aggenna. Ne hanotay hegaa mala gidikko, Kiristtoosa wozuwaa yarshshuwaabaa xannaꞌa. He minttettiya qofaa xannaꞌikko, wotti dentti qoppikko, qassi woossikko, koshshennan nuna mooranchchadan xeelliyoogaa aggana danddayoos. Yihooway atto giichchido nagarawu nurkka nuna qaxxayiyoogaa aggana danddayoos. Nuuni PHawuloosappe tamaarana danddayiyo harabaa qoppa. Issoti issoti Yihoowayyo kaseegaappe aaruwan oottanawu, banttana dureyana danddayiya oosuwaa aggennan waayi aggana. Yaatikko, nuuni demmana danddayiiddi aggidobaa amottiyoogaa aggikko, guyyeera deꞌiyaabaa dogoos. (Qoo. 11:4-6; Era. 7:10) Nuuni Yihoowawu oottidobati woy kase genccido metotikka ‘guyyeera deꞌiyaabata.’ Yihooway nuna kase ay keena maaddidaakko qoppiyo wode, nuuni kaseegaappe aaruwan nu Aawaakko shiiqana danddayoos. SHin, nuuni Yihoowawu oottidobay gidana giidi mule qoppana koyokko.—1 Qor. 15:58.

7. Koyro Qoronttoosa 9:24-27y yootiyoogaadan, deꞌuwaa wottan xoonanawu koshshiyaabay aybee? Leemisuwaa yoota.

⁷ ‘Olettanaadan’ woy baaxetanaadan Yesuusi yootidoogaa PHawuloosi loytti akeekiis. (Luq. 13:23, 24) Yesuusaagaadan, ba deꞌo wode ubban minni oottana bessiyoogaa PHawuloosi eriis. Hegaa gishshawu, I Kiristtaanetu deꞌuwaa wottaara geeddarssiis. (1 Qoronttoosa 9:24-27 nabbaba.) Issi wottanchchay ba wottaa wurssanaagaa xallaa qoppees; qassi haraban qofay shaahettanaadan oottenna. Leemisuwawu, woxxiya uri suuqetinne qofay shaahettanaadan oottiya harabati deꞌiyo ogiyaara woxxana danddayees. Issi wottanchchay suuqiyan deꞌiyaabaa beꞌanawu eqqees gaada qoppay? I xoonana koyikko hegaadan oottenna. Nuunikka deꞌuwaa wottan, nu qofay shaahettanaadan oottiyaabatuppe naagettana koshshees. Nuuni PHawuloosi oottidoogaadan ubbatoo nu gakkanaassa qoppikko, qassi minnidi Yihoowawu haggaazikko, woytuwaa demmana!

METIYAABATI DEꞌISHINKKA AGGENNAN YIHOOWAWU WAATI HAGGAAZANA DANDDAYIYOO?

8. Nuuni beꞌana heezzu metoti aybee?

⁸ Nuuni hidootaa qanxxanaadan oottana danddayiya heezzu metota ane beꞌoos. Koyro metoy issibay nu naagido wodiyan polettennan aggiyoogaa. Naaꞌꞌanttoogee, nu cimiyo wode wolqqi xayiyoogaa. Heezzanttoogee, aggenna metoy gakkiyoogaa. Harati he metota waati genccidaakko tamaariyoogan goꞌettana danddayoos.—Pili. 3:17.

9. Issibay nu naagido wodiyan polettennan aggiyoogee nuna waati qohana danddayii?

⁹ Issibay nu naagido wodiyan polettennan aggiyoogaa. Nuuni Yihooway qaalaa gelido loꞌꞌobata demmanawu hidootiyoogee wottin deꞌiyaaba. Yihooway kiittin hananabaa yootiya Imbbaaqoomi Yihudan deꞌiya iitabaa Yihooway xayssanaadan I keehi koyiyoogaa yootin, Yihooway A, “naaga” yaagiis. (Imb. 2:3) SHin, nuuni naagidobay sohuwaara polettana xayikko, minnidi haggaaziyoogaa aggana danddayoos. Ubba qassi hidootaa qanxxana danddayoos. (Lee. 13:12) Amarida ishantti 1914 heeran hegaadan hanidosona. He wode, tiyettida daro Kiristtaaneti 1914n saluwaa baana giidi naagidosona. Eti naagidobay polettennan attido wode, ammanettidaageeti waanidonaa?

10. Issi azinaynne machchiyaa eti naagidobay polettennan gamꞌꞌin waanidonaa?

¹⁰ Hegaa malabay gakkin azzaniyoogaa aggida ammanettida naaꞌꞌu Kiristtaanetu hanotaa qoppa. Ishaa Royal Ispasi 1908n, layttay awu 20 gidiyo wode xammaqettiis. I mata wode saluwaa baanaagaa ammanettiis. Hegaa gishshawu, 1911n I Peerlo giyo michchiyo ekkanawu oychchido wode, O hagaadan giis: “Neeni 1914n aybi hananaakko eraasa. Nuuni aqo oyqqanawu koyikko, hegaa sohuwaara poliyoogee loꞌꞌo!” Ha Kiristtaane aqo laggeti 1914n saluwaa bibeenna gishshawu, deꞌuwaa wottaa woxxiyoogaa aggidonaa? CHiikka, ayssi giikko, eti saluwaa biyoogan giddennan, ammanettidi Yihoowawu haggaaziyoogan xeelaa wottidosona. Eti wottaa genccidi woxxanawu murttidosona. Royalinne Peerla hayqqana gakkanaashin, daro layttawu minnidinne ammanettidi haggaazidosona. Yihoowa sunttaa mooriyaabay xayin, A haaroy suure gidiyoogee qonccin, qassi I gelido qaalay ubbay polettin neeni beꞌanawu laamotiyoogee qoncce. Yihooway ba keerido wodiyan hegeeta polanaagaa neeni ammanettana danddayaasa. Hegaa gakkanaashin, nu naagidobay polettennan aggin hidootaa qanxxiyoogaappe, ubbatoo Xoossawu haggaaziyoogan oosoy daridoogeeta gidoos.

11-12. Nuuni kaseegaadan mino gidana xayikkonne, ubbatoo Yihoowayyo ammanettidi haggaazana danddayiyoy aybissee? Leemisuwaa yoota.

¹¹ Cimiyo wode wolqqi xayiyoogaa. Wottaa woxxanawu issi wottanchchaassi daro wolqqay koshshees. SHin, neeni kaseegaappe aaruwan Yihoowa ammananawunne minnada ayyo haggaazanawu asatettan keehi mino gidana koshshenna. Asatettan darin mino gidennaageeti haꞌꞌikka Yihoowawu immanawu banttawu danddayettida ubbabaa oottanawu koyoosona. (2 Qor. 4:16) Leemisuwawu, Ishaa Arter Iskorddawu layttay 88, I 55 layttawu Beeteelen oottiis. Awu haꞌꞌi wolqqi baawa, qassi A sakkees. Issi gallassi issi narssiyaa ayyo koshshiyaaban maaddanawu A alggaa mati shiiqaasu. Yaatada A xeellaydda hagaadan gaasu: “Ishaa Iskorddaa, neeni Yihoowayyo loytta oottadasa.” SHin I, kase oottidobaa bolli xeelaa wottibeenna. O xeelliiddi pashkki giidi hagaadan giis: “Ee hegee tuma. Shin keehi koshshiyaabay nuuni oottidobaa gidenna. Hegaappe aaruwan koshshiyaabay nuuni haꞌꞌi ammanettidi deꞌiyoogaa.”

¹² Neeni Yihoowawu daro layttawu haggaazennan aggakka, qassi neeni haꞌꞌi sakettiyoogee kaseegaadan oottennaadan diggana danddayees. Yaatikko, azzanoppa. Neeni kase ammanettada haggaazidoogaa Yihooway hassayiyoogaanne nashshiyoogaa ammanettana danddayaasa. (Ibr. 6:10) Hegaa bollikka, nuuni Yihoowa wozanappe siiqiyoogaa bessiyaabay ayyo daro oottiyoogaa gidennaagaa hassaya. Nuuni loꞌꞌobaa qoppiyo wodenne nuussi danddayettida ubbabaa oottiyo wode, Yihoowa wozanappe siiqiyoogaa bessoos. (Qol. 3:23) Nuussi danddayettennabaa Yihooway akeekees, qassi nuuyyo danddayettiyaagaappe aaruwaa oottanaadan koyenna.—Mar. 12:43, 44.

13. Anatolanne Lidee bolli gakkidabay aybee, qassi kase daro metoy gakkikkonne aggennan Yihoowawu haggaazanaadan hegee nuna waati minttettii?

¹³ Aggenna metoy gakkiyoogaa. Issi issi Yihoowa ashkkarati metoynne yedetay banttana gakkishin daro layttawu genccidosona. Leemisuwawu, Anatoli Melnikesawub layttay biron 12 gidiyo wode, A aaway oyqettidi qashettiis; qassi Moldova biittan deꞌiya eta sooppe 7,000 kilo meetiriyaappe daruwaa haakkidi deꞌiya Saybeeriyaa A yeddidosona. Qassi issi layttappe guyyiyan, Anatola, A aayyiyo, qassi A aayyee aayyiyo Saybeeriyaa yeddidosona. Guyyeppe eti harasan deꞌiya qeeri kataman shiiquwaa shiiqana danddayidosona; shin yaa baanawu keehi meeggishin 30 kilo meetiriyaa hemettoosona. Guyyeppe, Ishaa Anatoli ba machchee Liideeppenne issi laytta gidido bantta naꞌeeppe shaahettidi heezzu layttaa qashettiis. Daro layttawu metootikkonne, Anatolinne A soo asay ammanettidi Yihoowawu haggaaziyoogaa aggibookkona. Haꞌꞌi Anatolawu layttay 82, I Giddo Isiyan Macara Biiruwaa Konttiyaa yara gididi haggaazees. Anatolanne Liidee leemisuwaa kaallidi, kaseegaadankka ubbatoo gencciyoogan Yihoowawu haggaaziyoogan nuussi danddayettida ubbabaa oottoos.—Gal. 6:9.

SINTTANAA HIDOOTAA UBBATOO QOPPA

14. PHawuloosi ba halchchuwaa polanawu ay oottana koshshiyoogaa akeekidee?

¹⁴ PHawuloosi wottaa wurssanaagaanne halchchidosaa gakkanaagaa ammanettiis. I tiyettida Kiristtaane gidiyo gishshawu, “Xoossai bolla de7uwau xeesiyo woituwaa ekkanau” hidootiis. SHin, he halchchuwaa polanawu ubbatoo ‘horddofana’ woy baaxetana koshshiyoogaa I akeekiis. (Pili. 3:14) Piliphphisiyuusa Kiristtaaneti ubbatoo bantta halchchuwaa qoppanaadan maaddanawu PHawuloosi loꞌꞌo leemisuwaa goꞌettiis.

15. PHawuloosi Piliphphisiyuusa Kiristtaaneti ‘gakkanasaa horddofiyoogaa’ woy baaxetiyoogaa aggennaadan minttettanawu issi biittaa asa gidiyoogaabaa leemisuwaa waati goꞌettidee?

¹⁵ PHawuloosi Piliphphisiyuusa Kiristtaaneti wurssettan saluwan deꞌanaagaa eta hassayissiis. (Pili. 3:20) Eti hegaa hassayana bessiyoy aybissee? He wode, Rooma biittaa asa gidiyoogee daro goꞌꞌaa demissiyo gishshawu, asay he biittaa asa gidanawu keehi koyees.c Piliphphisiyuusan deꞌiya Kiristtaaneti Rooma biittaa asa gidiyo gishshawu, Rooma biittaa sunttati koyiyoogaadan hanana koshshees. SHin, tiyettida Kiristtaaneti keehi aadhdhiya kawotettaa biittaa asa, hegee etawu daro goꞌꞌaa demissana. Saluwaa kawotettaa asa gidiyoogaara geeddarssiyo wode, Rooma biittaa asa gidiyoogee keehi laafaba! Hegaappe denddidaagan, PHawuloosi Piliphphisiyuusa Kiristtaaneti “Kiristtoosa wonggeliyaayyo bessiya de7uwaa” deꞌanaadan minttettiis. (Pili. 1:27) Saluwan merinaa deꞌuwaa demmanawu baaxetiyoogan tiyettida Kiristtaaneti ha wodiyan nuuyyo loꞌꞌo leemiso.

16. Nu hidootay saluwan deꞌiyoogaa gidin woy saꞌan deꞌiyoogaa gidin, Piliphphisiyuusa 4:6, 7y yootiyoogaadan, nuuni aggennan oottana bessiyaabay aybee?

¹⁶ Nuuni merinawu deꞌanawu hidootiyoy saluwaana gidin woy gannate gidida saꞌaana gidin, nuuni ubbatoo nu gakkanasawu baaxetana koshshees. Nuuni gencciiddi deꞌiyo metoy ayba gidikkonne, kasebaa qoppana koshshenna; qassi Yihoowawu haggaaziyoogaa nuna aybinne digganaadan oottana bessenna. (Pili. 3:16) Nuuni Yihooway qaalaa gelidobati polettin beꞌanawu daro wodiyawu naagiiddi deꞌennan woy cimanne wolqqi baynnaageeta gidennan aggokko. Nuuni daro layttawu metuwaanne yedetaa gencciiddi deꞌiyaageeta gidana danddayoos. Hanotay ayba gidikkonne, “issibaukka hirggoppite.” Inttessi koshshiyaabawu ubbawu Xoossaa mintti woossite, qassi intte qoppana danddayiyo aybippenne aadhdhiya sarotettaa I inttessi immana.—Piliphphisiyuusa 4:6, 7 nabbaba.

17. Kaalliya huuphe yohuwan nuuni ay xannaꞌanee?

¹⁷ Wottaa wurssanawu keehi matido wode wurssiyoogaa xallaa qoppiya wottanchchaadan, nuunikka nu wottaa wurssanawu keehi matido wode Yihooway qaalaa gelido maalaalissiyaabatu xallaa qoppoos. Yaatanawu, haꞌꞌi nuussi danddayettida ubbabaa aggennan oottanawu koyoos. Nuuni waani genccidi deꞌana danddayiyoo? Nuuni ay kaseyana koshshiyaakko qassi “keehi koshshiyaabaa shaakki [eranawu]” waatana danddayiyaakko kaalliya huuphe yohoy nuna maaddana.—Pili. 1:9, 10, NW.