‘Neeni Giyoogaa Siyiyaageeti’ Attana

1. Nu ubbaykka nu dabbotussi ay amottiyoo?

POOLINOb giyo michchiyaa hagaadan gaasu: “Taani tumaa siyoosappe ta so asay ubbay tanaara Gannatiyaa gelanaadan koyays. Ta azinay Weyninne nu yelaga naꞌay tanaara Yihoowawu haggaazanaadan keehi koyaas.” Yihoowa erennanne siiqenna dabboy neeyyo deꞌii? Neenikka Poolinidan, ne dabboti nenaara Yihoowawu haggaazanaadan koyennan aggakka.

2. Ha huuphe yohuwan nuuni beꞌana oyshati awugeetee?

² Nu dabboti tumaa eranaadan wolqqanttokko, shin eti Geeshsha Maxaafay yootiyoobaa yuushshi qoppanaadan minttettana danddayoos. (2 Xim. 3:14, 15) Nu dabbotussi markkattana koshshiyoy aybissee? Nuuni etawu qarettana koshshiyoy aybissee? Nu dabboti nuugaadan Yihoowa siiqanaadan maaddanawu ay oottana danddayiyoo? Nu gubaaꞌiyan deꞌiya ubbay nuna waati maaddana danddayii?

NU DABBOTUSSI MARKKATTANA KOSHSHIYOY AYBISSEE?

3. Naaꞌꞌantto PHeexiroosa 3:9y yootiyoogaadan nuuni nu dabbotussi markkattana koshshiyoy aybissee?

³ Yihooway matan ha alamiyaa xayssana. Merinaa deꞌuwaassi “suure wozanaa koshshay deꞌiyo” asatu xallay attana. (Oos. 13:48, NW) Nu heeran nuuni erenna asatussi tumaa yootanawu daro wodiyaanne wolqqaa wurssiyo gishshawu, nu dabboti nunaara Yihoowawu haggaazanaadan nuuni markkattiyoogee bessiyaaba. Nuna siiqiya Aaway Yihooway, “ooninne ba nagaraappe simmanaadan koyeesippe attin, ooninne xayana mala koyenna.”—2 PHeexiroosa 3:9 nabbaba.

4. Nu dabbotussi markkattiyo wode nuuni balana danddayiyoobay aybee?

⁴ Atotettaabaa suure ogiyaaninne suure gidenna ogiyan yootana danddayiyoogaa nuuni qoppana koshshees. Leemisuwawu, nuuni erenna asatussi ashkketettan markkattana danddayikkonne, nu dabbotussi hegaadan waayi oottana.

5. Nu dabbotussi tumaa yootanaappe kase ay hassayana koshshii?

⁵ Nuuppe daroti tumaa siyido wode, nu dabbotussi markkattido hanotaa hassayikko, hegaappe kehiya ogiyan yootidaba gidiyaakko ixxokko. PHawuloosi, “Intte ubbau waati zaaranau bessiyaakko erana mala, intte haasayai ubba wode, siyanau kehiyaagaanne ufaissiyaagaa gidanau bessees” yaagidi Kiristtaaneta zoriis. (Qol. 4:5, 6) Nu dabbotussi markkattiyo wode ha zoriyaa hassayiyoogee keehi koshshees. Yaatana xayikko, eti siyanaadan oottiyoogaappe, eta hanqqetissana danddayoos.

NU DABBOTA MAADDANAWU AY OOTTANA DANDDAYIYOO?

6-7. Yihoowa Markka gidenna aqo laggiyaassi aybissi qoppana koshshiyaakko bessiya leemisuwaa yoota.

⁶ Qoppiyoogaa bessa. Qommoora ibaa yootido Poolina, “Koyro heeran taani, ta keettaawaara ayyaanaabaa xallaa haasayanawu koyaas. Nuuni ‘harabaa’ mule haasayokko” yaagaasu. SHin, Poolini azinay Weyni Geeshsha Maxaafaa daro erenna gishshawu, Poolina yootiyoobaa akeekenna. A ba haymaanoote xallaa qoppiyooba ayyo malatiis. A qohiya citan gayttada cimettidaba ayyo malatin hirggiis.

⁷ Poolina ayyaanaaban baassi ishanne michcho gididaageetuura shiiqota shiiqiyoogan, sabbakiyoogaaninne eta soo biyoogan omarssinne saaminttaa wurssettan daro wodiyaa aattiyoogaa guuttaa takkada akeekaasu. Poolina, “Weyni issi issitoo soo simmiyo wode asi son baynna gishshawu moozottees” yaagaasu. Weyni ba machchiyaanne ba naꞌay he wode banaara deꞌiyaakko dosees. I eta laggeta erenna, qassi Poolini ooratta laggeti iyyo appe aadhdhiyaaba assi malatiis. Weyni Poolino paraman shaahettana giidi yashissiis. Poolina ba azinawu qoppiyoogaa bessana ginata qoppana danddayay?

8. Koyro PHeexiroosa 3:1, 2y yootiyoogaadan, nu dabboti loytti akeekana danddayiyoobay aybee?

⁸ Loꞌꞌo leemiso gida. Darotoo, nu dabboti nuuni haasayiyoobaappe aaruwan nuuni oottiyoobaa akeekoosona. (1 PHeexiroosa 3:1, 2 nabbaba.) Poolina guyyeppe hegaa akeekaasu. A hagaadan gaasu: “Weyni nuna dosiyoogaanne I paraman shaahettanawu tumuppe koyennaagaa taani erays. SHin, I tana yashissi simmin taani Yihooway koyiyoobaa oottana bessiyoogaa akeekaas. Assi ubbatoo sabbakiyoogaappe loꞌꞌobaa oottiyoogee keehi koshshees.” Poolina Geeshsha Maxaafaabaa haasayanaadan Weyna wolqqanttiyoogaa aggada, galla galla koshshiyaabawu aara haasayiyoogaa doommaasu. Weyni ba machchiyaa kaseegaappe kehidoogaa, qassi eta naꞌay kaseppe aaruwan woppidoogaanne azazettiyoogaa akeekiis. (Lee. 31:18, 27, 28) Geeshsha Maxaafaa zoree ba soo asaa maaddidoogaa Weyni beꞌido wode, Xoossaa Qaalay yootiyoobaa yuushshi qoppiyoogaanne azazettiyoogaa doommiis.—1 Qor. 7:12-14, 16.

9. Nu dabbota nuuni aggennan maaddana koshshiyoy aybissee?

⁹ Ne dabbota maaddanawu baaxetiyoogaa aggoppa. Yihooway hegan nuussi leemiso gidees. I asay mishiraachchuwaa siyidi deꞌuwaa demmanaadan ‘zaari zaaridi’ odissiis. (Erm. 44:4) Qassi, harata aggennan maaddanaadan kiitettida PHawuloosi Ximootiyoosassi yootiis. Aybissi? Yaatikko, inne I yootiyoobaa siyiyaageeti attiyo gishshataassa. (1 Xim. 4:16) Nuuni nu dabbota dosiyo gishshawu, Xoossaa Qaalan deꞌiya tumaa eti eranaadan koyoos. Poolina oottiyoobaynne haasayiyoobay guuttaa takkidi I soo asaa maaddiis. Haꞌꞌi I keettaaway iira Yihoowawu haggaaziyo gishshawu, A keehi ufayttawusu. Eti naaꞌꞌaykka aqinye, qassi Weyni gubaaꞌiyaa cima gididi oottees.

10. Nuuni danddayanchcha gidanawu bessiyoy aybissee?

¹⁰ Danddayanchcha gida. Nuuni Xoossawu azazettanawu kuuyido wode, nu deꞌoynne nu ammanoy laamettiis. Nu dabboti hegaa meezetanawu metootana danddayoosona. Nuuni etaara haymaanoote baalata bonchchennaagaa, qassi polotikan walahettennaagaa eti koyro beꞌoosona. Issi issi dabboti koyro nuna hanqqettana danddayoosona. (Maa. 10:35, 36) SHin, nuuni eti laamettennabadan mule qoppana koshshenna. Nuuni ammaniyoobaa eti akeekanaadan maaddiyoogaa aggikko, hegee eti merinaa deꞌuwaa demmanawu bessokkona giidi pirddiyoogaara issi mala. Yihooway nuussi pirddiyo oosuwaa immibeenna, I he oosuwaa Yesuusawu immiis. (Yoh. 5:22, 23) Nuuni danddayanchcha gidikko, nu dabboti guyyeppe nuuni yootiyoobaa siyana danddayoosona.—“Tamaarissanawu Nu Websaytiyaa Goꞌetta” giya saaxiniyaa xeella.

11-13. Alisa bana yelidaageeta oyqqido hanotaappe ay tamaaray?

¹¹ Keha gida, shin ne kuuyidobaa ne dabboti laamissanaadan eeno gooppa. (Lee. 15:2) Alisi hanotaa beꞌa. A Xoossaa ammanennanne polotikaa asa gidida, bana yelidaageetuppe haaho sohuwan deꞌiya biittan Yihoowabaa tamaaraasu. A tamaarido mishiraachchuwaa danddayetta keenan eesuwan etawu yootana koshshiyoogaa akeekaasu. Alisa hagaadan gaasu: “Issi uri ammanidonne oottiyo oorattabaa bana yelidaageetussi yootanawu takkikko, guyyeppe eti yiillotana danddayoosona.” A bana yelidaageeta ufayssana gaada qoppido siiquwaa mala qofaa doorada, Geeshsha Maxaafay hegeetubaa woygiyaakko yootaasu; qassi eta qofay aybakko dabddaabbiyan oychchaasu. (1 Qor. 13:1-13) Ba aawaynne aayyiyaa bana dichchidonne naagido gishshawu eta galataasu, qassi etawu imotaa kiittaasu. Bantta soo asaa oychchanawu biido wode, ba aayyiyo so oosuwan maaddanawu A danddayido ubbaa oottaasu. Alisa ba ooratta ammanuwaabaa yootiyo wode, O yelidaageeti koyro heeran ufayttibookkona.

¹² Alisa bana yelidaageetu son takkido wode, ubba galla Geeshsha Maxaafaa nabbabawusu. Alisa, “Taassi Geeshsha Maxaafay ay keena koshshiyaabakko ta aayyiyaa akeekanaadan hegee maaddiis” yaagaasu. Alisi aaway ba naꞌiyo laammidabay aybakko akeekanawu kuuyiis; qassi Geeshsha Maxaafan balaa demmanawu koyiis. Alisa, “Taani A denttettana danddayiya amarida qofata an xaafada Geeshsha Maxaafaa assi immaas” yaagaasu. Yaatin waanidee? Alisi aaway balaa demmibeenna. Ubbakka I Xoossaa Qaalan nabbabidoban keehi ufayttiis.

¹³ Paacee gakkiyo wodekka, nuuni kuuyidobaa nu dabboti laamissanaadan eeno geennan etawu kehana koshshees. (1 Qor. 4:12b) Leemisuwawu, Alisa bana ba aayyiyaa ixxishin genccaasu. Alisa, “Taani xammaqettido wode, ta aayyiyaa tana ‘azazettenna naꞌiyo’ yaagaasu” gaasu. Yaatin, Alisa ay oottadee? A hagaadan gaasu: “Taani ta ooratta ammanuwaabaa yootiyoogaa aggabeykke, shin taani Yihoowa Markka gidanawunne taani kuuyidobaa laammennan agganawu qofaa qachchaas. Taani ta aayyiyo wozanappe siiqiyoogaa iyyo yootaas. Nuuni naaꞌꞌaykka yeekkida, qassi taani iyyo malꞌꞌiya qumaa kattaas. Hegaappe simmin, ta aayyiyaa tana Geeshsha Maxaafay loꞌꞌo asa oottidoogaa akeekiyoogaa doommaasu.”

14. Nuuni Yihoowawu haggaazanawu kuuyidoogaa nu dabboti laamissanaadan eeno gaana koshshennay aybissee?

¹⁴ Nuuni Yihoowawu haggaaziyoogee keehi koshshiyoogaa nu dabboti gamꞌꞌidi akeekana danddayoosona. Leemisuwawu, Alisa bana yelidaageeti A oottanaadan koyido oosuwaa aggada aqinye gidanawu kuuyido wodekka I aayyiyaa yeekkaasu. SHin, Alisa ba qofaa laammabeykku. A hagaadan gaasu: “Intte kuuyido issibaa inttena yelidaageeti laamissikko, intte kuuyido harabaakka laamissanawu eti baaxetana danddayoosona. SHin, intte kehanne kuuyidobaa laammennaageeta gidikko, etappe amaridaageeti tumaa siyana danddayoosona.” Alisissikka hegaadan haniis. I aawaynne I aayyiyaa haꞌꞌi aqinye, qassi I aaway gubaaꞌiyaa cima.

GUBAAꞌIYAN DEꞌIYA UBBAY WAATI MAADDANA DANDDAYII?

15. Maatiyoosa 5:14-16⁠ynne 1 PHeexiroosa 2:12y yootiyoogaadan, haratu ‘loꞌꞌo oosoy’ nu dabbota waati maaddana danddayii?

¹⁵ Yihooway ba asay oottiyo “lo77o oosuwaa” goꞌettidi asaa baakko shiishshees. (Maatiyoosa 5:14-16; 1 PHeexiroosa 2:12 nabbaba.) Ne aqo laggee Yihoowa Markka gidana xayikko, I ne gubaaꞌiyaa asaara gayttii? Qommoora ibaa yootido Poolina, I azinay Weyni etaara erettana mala ishanttanne michchontta ba soo shoobbawusu. Weyni issi ishay Yihoowa Markkati ay mala asakko I eranaadan waati maaddidaakko hassayidi hagaadan giis: “I kuwaasiyaa kaassaa tanaara beꞌanawu oosuwaappe issi galla shemppo ekkiis. Taani, ‘Ikka hara asa mala!’ gaada qoppaas.”

16. Nu dabboti shiiqota shiiqanaadan nuuni shoobbana koshshiyoy aybissee?

¹⁶ Nu dabbota maaddiyo issi loꞌꞌo ogee, nu gubaaꞌe shiiqota nunaara shiiqanaadan shoobbiyoogaa. (1 Qor. 14:24, 25) Godaa Kahuwaa shiiqoy oosoppe simmiinanne qantta gidiyo gishshawu, Weyni koyro shiiqidoy hegaa. I hagaadan giis: “Taani haasayaa wurssa akeekana xayikkonne, asati tana ufayssidosona. Eti taakko yiidi tana minttidi sarotidosona. Eti loꞌꞌo asa gidiyoogaa taani akeekaas.” Issi azinaynne machchiyaa Poolinonne I naꞌaa shiiquwaanne haggaazuwaa wode maaddiyoogan daro kehidosona. Guyyeppe Weyni Poolini ooratta ammanuwaabaa eranawu kuuyido wode, bana he azinay Geeshsha Maxaafaa xannaꞌissanaadan oychchiis.

17. Nuuni mooridabadan qoppana koshshennabay aybee, shin nu dabboti laamettana danddayokkona giidi nuuni kuuyana koshshennay aybissee?

¹⁷ Nu dabboti ubbay nunaara Yihoowawu oottanaadan koyoos. SHin, nu dabboti Xoossawu haggaazanaadan nuuni ay keena baaxetikkonne, eti tumaa siyennan ixxana danddayoosona. Eti hegaadan kuuyikko, nuuni hegee nu mooruwaana giidi qoppana koshshenna. Nu ammaniyoogaadan ammananaadan oonanne giddana danddayokko. SHin, neeni Yihoowawu haggaaziyo gishshawu ay keena ufayttiyaakko ne dabboti beꞌiyoogee eta keehi maaddana danddayees. Etawu woossa. Eta hiillan haasayissa. Eta maaddanawu baaxetiyoogaa aggoppa. (Oos. 20:20, 21) Yihooway ne baaxiyaa anjjanaagaa ammanetta. Qassi ne dabboti neeni yootiyoobaa siyanawu kuuyikko, eti attana!