Armmageedooni Laamotan Naagiyooba!

1-2. (a) Armmageedooni asaa ufayssiyoy aybissee? (b) Ha huuphe yohuwan nuuni beꞌana oyshati awugeetee?

AMARIDA asay alamiyaa niyukileere olay woy meretay gattiyo daafabay xayssana giidi ammanees. SHin, Geeshsha Maxaafay hegaadan tamaarissenna. Loꞌꞌobaa ehaana olay mata wode denddanaagaa Geeshsha Maxaafay tamaarissees. He olay Armmageedoona geetettees, qassi Geeshsha Maxaafay he olaabaa yootiyoobay nuna ufayssiyaaba. (Ajj. 1:3) Armmageedoona olay asaa ashshanaappe attin, xayssenna! Waatidi?

² Armmageedoona olay asaa haaruwaa xayssiyoogan, asaa ashshanaagaa Geeshsha Maxaafay yootees. He olay iitata xayssiyoogaaninne xilloti paxa deꞌanaadan oottiyoogan asaa ashshana. Qassi I saꞌay xayennaadan naagiyoogan asaa ashshana. (Ajj. 11:18) Ha allaalliyaa nuuni loytti akeekanawu maaddiya oyddu oyshata ane beꞌoos: Armmageedooni aybee? Armmageedoonappe kase hananabay aybee? Nuuni Armmageedoona olaappe attiyaageeta waani gidana danddayiyoo? Armmageedooni mati mati biyo wode nuuni ammanettiyaageeta gididi waani deꞌana danddayiyoo?

ARMMAGEEDOONI AYBEE?

3. (a) “Armmageedoona” giyo qaalaa birshshettay aybee? (b) Armmageedooni saꞌan deꞌiya soho gidennaagaa Ajjuutaa 16:14, 16y waati qonccissii?

³ Ajjuutaa 16:14, 16 nabbaba. Armmageedooni saꞌaa kawotinne eta olanchchati ubbay issippe Xoossaa asaa bolli denddiyo wode hananabaa bessiyaaba. Hegee kaalettiyoobay “Ubbaappe Wolqqaama Xoossaa gita [gallassa]” olaa gidana. “Armmageedoona” giyo qaalay Geeshsha Maxaafan issisan deꞌees; hegee Ibraawettuwan “Magiddo Deriyaa” giya qaalaappe yiis. (Ajj. 16:16) Magiddoy beni Israaꞌeelan deꞌiya katama. (Yaas. 17:11) SHin, Armmageedooni saꞌan deꞌiya ay sohonne suntta gidenna. Hegee ‘saꞌaa kawoti ubbay’ Yihoowaara eqettanawu issippe shiiqiyo hanotaa bessiyaaba. (Ajj. 16:14) Gidoppe attin, kawotettati ubbay issippe shiiqin sohuwaara denddiya olaa qonccissanawukka “Armmageedoona” giyo qaalaa ha huuphe yohuwan goꞌettana. Armmageedooni leemiso soho gidiyoogaa nuuni waati eriyoo? Koyruwan, Magiddo giyo deree baawa. Naaꞌꞌanttuwan, Magiddo heeran deꞌiya sohoy “sa7aa kawota ubbaa,” qassi eta olanchchatanne olaa miishshata wottanawu keehi guutta. Heezzanttuwan, ha huuphe yohuwan nuuni beꞌanaagaadan, alamiyaa ‘kawoti’ kumetta saꞌan darosan deꞌiya Xoossaa asaa bolli denddiyo wode Armmageedoona olay doommana.

4. Xoossay ba wurssetta wolqqaama olaa Magiddoora gattidoy aybissee?

⁴ Yihooway wurssetta wolqqaama olaa Magiddoora gattidoy aybissee? Beni wode, Magiddooninne A matan deꞌiya Iziraaꞌeela wombban asay daro olaa olettiis. Issi wode, he olatun Yihooway kelttiyaa geliis. Leemisuwawu, Sisaara giyo gadaaway kaalettiyo Kanaane olanchchata “Magiddo pulttotu matan” Israaꞌeela Daannay Baaraaqi xoonanaadan Xoossay maaddiis. Baaraaqinne hananabaa yootiya Deboora eti xoonido maalaalissiya xoonuwawu Yihoowa galatidosona. Eti mazamuriyaa hagaadan yexxidosona: “Saluwan de7iya xolinttetikka . . . Sisaaraara olettidosona. Qiishoona SHaafai . . . he kawota shokkidi efiis.”—Daan. 5:19-21.

5. Baaraaqi olettido olaappe Armmageedoona olay keehi dummatiyoy ayba ogiyaanee?

⁵ Baaraaqinne Deboora bantta mazamuriyaa hagaadan giidi wurssidosona: “Abeet GODAU, ne morkketi ubbai hegaadan haiqqona! SHin ne siiqoti maallado mokkiya awaadan phoolona.” (Daan. 5:31) Armmageedoona olaa wode, Xoossaa morkketi hegaadan xayana; shin Xoossaa siiqiyaageeti attana. Gidoppe attin, he naaꞌꞌu olatu giddon gita dummatettay deꞌees. Armmageedoona olaa wode Xoossaa asay olettenna. Etassi olaa miishshikka baawa! ‘Coꞌꞌu giyoogee,’ qassi Yihoowaaninne saluwan deꞌiya A olanchchatun ‘ammanettiyoogee etayyo wolqqa gidana.’—Isi. 30:15; Ajj. 19:11-15.

6. Armmageedoona olaa wode, Yihooway ba morkketa xayssanawu ay goꞌettana danddayii?

⁶ Xoossay ba morkketa Armmageedoonan waati xayssanee? I daro ogiyaa goꞌettana danddayees. Leemisuwawu, I biittaa qaattaa, shachchaanne dadaa goꞌettana danddayees. (Iyy. 38:22, 23; Hiz. 38:19-22) I ba morkketi issoy issuwaa xayssanaadan oottana danddayees. (2 Odi. 20:17, 22, 23) Qassi iitata woranawu kiitanchchata I goꞌettana danddayees. (Isi. 37:36) Xoossay goꞌettiyo ogee ayba gidikkonne, I xoonana. A morkketi ubbay xayana. Geeshshati ubbay attana.—Lee. 3:25, 26.

ARMMAGEEDOONAPPE KASE AYBI HANANEE?

7-8. (a) Koyro Tasalonqqe 5:1-6y yootiyoogaadan, alamiyaa haariyaageeti awaajjana oorattabay aybee? (b) Hegee qohiya worddo gidiyoy aybissee?

⁷ “Godaa gallassai” yaanaappe kase “ubbabai saro; aibikka hanenna” geetetti awaajjettana. (1 Tasalonqqe 5:1-6 nabbaba.) Koyro Tasalonqqe 5:2n odettida “Godaa gallassai” “daro waayiyaa” qonccissees. (Ajj. 7:14) He daro waayee doommana haniyo wodiyaa nuuni waati eranee? Geeshsha Maxaafay issi oorattabay awaajettanaagaa yootees. He awaajjoy daro waayee doommanaagawu malaata gidana.

⁸ Hegee “ubbabai saro; aibikka hanenna” geetettidi kasetidi odettida awaajjo. Haymaanootiyaa kaalettiyaageeti etaara hashetanee? Hashetana danddayoosona. Alamiyaa haariyaageeti “ubbabai saro; aybikka hanenna” giyo wode, hegee daydanttati odiyo worddo gidiyoogaa nuuni eroos. Qassi hegee asi deꞌido wodiyan awudeegaappenne aadhdhiya waayee doommana hanishin, asay hirggissiyaabi baynnabadan qoppanaadan oottiyo gishshawu, he worddoy keehi qohiyaaba gidana. Ee, “maccaasaa maaretai oiqqiyoogaadan, bashshai eti qoppennan eta bolli yaana.” Yihoowayyo ammanettidi oottiyaageeti shin? Yihoowa gallassay eti qoppennan doommiyoogan eti maalaalettana danddayikkonne, he gallassawu eti giigetti uttana.

9. Yihooway Seexaanaa alamiyaa issi kutti xayssanee? Qonccissa.

⁹ Yihooway I Nohe wode oottidoogaadan, Seexaanaa alamiyaa issi kutti muleera xayssenna. I Seexaanaa alamiyaa naaꞌꞌu kayan xayssana. Koyro, worddo haymaanoote ubbaa xaaxa waaxiya Gita Baabiloono xayssana. Hegaappe simmin, polotikaa, olanchchatanne zalꞌꞌiyaa siraataa gujjin, Seexaanaa alamiyaappe attidaagaa Armmageedoona olan I xayssana. Nuuni ha keehi koshshiya naaꞌꞌu hanotata ane loyttidi pilggoos.

10. Ajjuutaa 17:1, 6⁠ynne 18:24 y yootiyoogaadan, Yihooway Gita Baabiloono xayssanay aybissee?

¹⁰ ‘SHaaramuxee qixaatiyaa.’ (Ajjuutaa 17:1, 6; 18:24 nabbaba.) Gita Baabiloona Xoossaa sunttay keehi cayettanaadan oottaasu. Xoossaa xeelliyaagan A wordduwaa tamaarissaasu. Saꞌaa kawotuura issippetettaa medhdhiyoogan, A ayyaanaaban shaaramuxaasu. Worddo haymaanootee ba yameta huqqunneesinne eta miishshaa ekkees. Worddo haymaanootee Xoossaayyo oottiyaageeta gujjin, daro asaa suuttaa gussiis. (Ajj. 19:2) Yihooway Gita Baabiloono waati xayssanee?

11. ‘Zoꞌo doꞌay’ aybee, qassi I Gita Baabilooni bolli denddanaadan Xoossay an waatidi goꞌettanee?

¹¹ Yihooway ‘shaaramuxiyo’ “tammu kacee” deꞌiyo ‘zoꞌo doꞌay’ xayssanaadan oottana. He doꞌay Kawotettatu Issippetettaa bessiyaaba. Tammu kaceti ha wodiyan he dirijjitiyawu exatiya kawotettata qonccissoosona. Xoossay keerido wodiyan, he kawotettati Gita Baabilooni bolli denddana. I aquwaa boggiyoogaaninne I iitatettaa qoncciyaa kessiyoogan eti “iyyo deꞌiya ubbabaa ekkirggana. Qassi O kallo [ashshana.]” (Ajj. 17:3, 16) A issi gallassa giyoogaa mala hanotan, eesuwan xayiyoogan iyyo exatiyaageeti keehi dagammana. Ayssi giikko, A ceeqettada hagaadan gaasu: “Taani kaweedan uttais; taani azini bainna maccaasa gidikke; qassi mulekka kayyottikke.”—Ajj. 18:7, 8.

12. Yihooway kawotettati ay oottanaadan eeno geennee, qassi aybissi?

¹² Xoossay kawotettati ba asaa xayssanaadan eeno geenna. Xoossaa asay A sunttan xeesettiyoogan ceeqettees, qassi Gita Baabiloonippe baqatanaadan I azazido azazuwaa eti azazettidosona. (Oos. 15:16, 17; Ajj. 18:4) Eti hara asaykka ippe baqatanaadan minnidi oottidosona. Yaatiyo gishshawu, Yihoowa ashkkarati ‘I nagaraa iira koxxokkona.’ Gidikkonne, eta ammanoy paacettana.

13. (a) Googi aybee? (b)  Hizqqeela 38:2, 8, 9y yootiyoogaadan, Googi Xoossaa asaa bolli denddanaadan oottiyaabay aybee?

¹³ Googi qohanawu denddiyoogaa. (Hizqqeela 38:2, 8, 9 nabbaba.) Worddo haymaanoote dirijjite ubbay xayi simmin, Xoossaa asay wolqqaama gotiyaappe barkka attida mittaa mala gidana. Seexaanay hanqquwaa eexxi kiyanaagee qoncce. ‘Tuna ayyaanatuppe kiyiyaabaa,’ hegeekka issippe denddiya kawotettati Yihoowa ashkkaratu bolli denddanaadan daydanttati odiyo worddobaa goꞌettiyoogan I he hanqquwaa bessana. (Ajj. 16:13, 14) He issippe denddiya kawotettati ‘Maagooga biittan deꞌiya Googa’ geetettoosona. He kawotettati Yihoowa asaa bolli denddiyo wode, Armmageedoona olay doommana.—Ajj. 16:16.

14. Googi ay akeekanee?

¹⁴ Googi ba ‘asa wolqqan,’ hegeekka ba olanchchatun ammanettees. (2 Odi. 32:8) Nuuni nu Xoossan Yihoowan ammanettana; hegee kawotettatussi eeyyatetta milatiyaaba. Ayssi giikko, Gita Baabiloona wolqqaama gidikkonne, ‘doꞌaappenne’ A ‘tammu kacetuppe’ I xoossati O ashshibookkona! (Ajj. 17:16) Hegaa gishshawu, he kawotettati metootennan nuna xayssana giidi qoppana. “Biittaa kammiya shaaraadan,” eti Yihoowa asaa bolli denddana. (Hiz. 38:16) SHin he kawotettati baqatana danddayennaagaa he wode akeekana. Paarooni Zoꞌo Abban eridoogaadan, Googi Yihoowaara olettiiddi deꞌiyoogaa erana.—Kes. 14:1-4; Hiz. 38:3, 4, 18, 21-23.

15. Armmageedoona olaa wode Yesuusi ay oottanee?

¹⁵ Kiristtoosinne saluwan deꞌiya A olanchchati, kawotettatanne eta olanchchata muleera xayssana. (Ajj. 19:11, 14, 15) SHin, kawotettatussi worddotidi eti Armmageedoona olan Xoossaa asaa bolli denddanaadan oottida, Yihoowa gita morkkee Seexaanay waananee? Yesuusi anne A daydanttata eti shaꞌu layttawu aynne oottennaadan ciimma ollan duge yeggidi qulppana.—Ajj. 20:1-3.

NEENI ARMMAGEEDOONA OLAA WODE WAANA ATTANA DANDDAYAY?

16. (a) Nuuni ‘Xoossaa eriyoogaa’ waatidi bessiyoo? (b) Yihoowa eriya asay Armmageedoona olaa wode waananee?

¹⁶ Nuuni tumaa siyoosappe daro wode gidin gidana xayin, Armmageedoona olaa wode attanawu, nuuni ‘Xoossaa eriyoogaanne’ ‘nu Godaa Yesuus Kiristtoosa wonggeliyaa mishiraachchuwaayyo azazettiyoogaa’ bessana koshshees. (2 Tas. 1:7-9) Nuuni Xoossay dosiyoobaa, I ixxiyoobaanne I kessido maarata eriyo wode ‘Xoossaa eroos.’ Nuuni A siiqiyoonne ayyo azazettiyo wode, qassi A xallawu goynniyo wodekka A eriyoogaa bessoos. (1 Yoh. 2:3-5; 5:3) Nuuni Xoossaa eriyoogaa bessiyo wode, an erettiyo maataa demmoos; hegee Armmageedoona olaa wode nuna ashshana! (1 Qor. 8:3) Waanidi? Nuuni ‘Xoossan erettiyoogee’ an nashettanaadan oottiyo gishshataassa.

17. ‘Nu Godaa Yesuus Kiristtoosa wonggeliyaa mishiraachchuwaayyo azazettiyoogaa’ giyoogee woygiyoogee?

¹⁷ ‘Nu Godaa Yesuus Kiristtoosa wonggeliyaa mishiraachchoy’ Xoossaa Qaalan deꞌiya, Yesuusi tamaarissido tuma ubbaa xaaxi waaxees. Nuuni nu deꞌuwan mishiraachchuwaa oosuwan peeshshiyo wode A azazettoos. Hagaadan azazettiyoogee Kawotettaabaa kaseyiyoogaa, Xoossay kessido xillotettaa maaraa kaalliyoogaanne Xoossaa Kawotettaabaa sabbakiyoogaa xaaxi waaxees. (Maa. 6:33; 24:14) Hegee ayyaanan tiyettida Kiristtoosa ishantti bantta wolqqaama aawatettaa poliyo wode maaddiyoogaarakka gayttidaba.—Maa. 25:31-40.

18. Ayyaanan tiyettida Kiristtoosa ashkkarati ‘hara dorssati’ banttana maaddido ubbabaa gishshawu ay woytanee?

¹⁸ Ayyaanan tiyettida Xoossaa ashkkarati ‘hara dorssati’ banttana maaddido ubbabaa gishshawu mata wode eta woytana. (Yoh. 10:16) Waatidi? Armmageedoona olay doommanaappe kasetidi, 144,000 hayqqenna ayyaana mereta gididi saluwan deꞌanawu denddana. Eti he wode Googa xayssana saluwaa olanchchatu yame gidana, qassi “zawai bainna daro asaa” hegeekka Xoossaa asaa ashshana. (Ajj. 2:26, 27; 7:9, 10) Ee, zaway baynna asati ayyaanan tiyettida Yihoowa ashkkarati saꞌan deꞌiyo wode maaddidoogan eti keehi ufayttana!

WURSSETTAY MATI MATI BIYO WODE NUUNI AMMANETTIYAAGEETA GIDIDI WAANI DEꞌANA DANDDAYIYOO?

19-20. Metoy deꞌishinkka, Armmageedooni mati mati biyo wode nuuni ammanettiyaageeta gididi waani deꞌana danddayiyoo?

¹⁹ Ha metiya wurssetta gallassatun, Yihoowa asatuppe daruwaa metoy gakkees. SHin, nuuni ufayssan genccana danddayoos. (Yaaq. 1:2-4) Nuna keehi maaddiya issibay ubbatoo wozanappe woossiyoogaa. (Luq. 21:36) Nuuni mata wode haniyaabaa yootiya hiraagata gujjin, Xoossaa Qaalaa galla galla xannaꞌiyoogaaninne hegaa wotti dentti qoppiyoogan nu woosaadan deꞌana bessees. (Maz. 77:12) Hegaadan oottiyoogeenne minnidi haggaaziyoogee nu ammanoy minnanaadaaninne nu hidootan xeelaa wottanaadan oottees!

²⁰ Gita Baabiloona xayiyo wodenne Armmageedoona olay wuriyo wode neeni ay keena ufayttanaakko qoppa! Qassi, ubba asay Xoossaa sunttaanne I haariyo maataa bonchchiyo wode ne ay keena ufayttanaakko qoppa! (Hiz. 38:23) Ee, Xoossaa eriyaageetussi, A Naꞌaayyo azazettiyaageetussinne wurssettay gakkanawu gencciyaageetussi Armmageedooni laamotan naagiyooba.—Maa. 24:13.