‘Zaway Baynna Daro Asaa Beꞌa!’

1. Koyro xeetu layttaa M.L. wurssettan, kiitettida Yohaannisa hanotay ay malee?

KOYRO XEETU layttaa M.L. wurssettan, kiitettida Yohaannisi keehi metiya hanotan deꞌees. I cima gidikkonne Paaximo giyo haruuruwan qashettiis; qassi kiitettidaageetuppe paxa deꞌiyaagee A xalla gidennan waayi aggana. (Ajj. 1:9) Eqettiyaageeti gubaaꞌeta balettiyoogaanne eti shaahettanaadan oottiyoogaa I erees. He wode tumu Kiristtaaneti ubbay xayanawu matidaba milatennan waayi aggana.—Yih. 4; Ajj. 2:15, 20; 3:1, 17.

2. Ajjuutaa 7:9-14y yootiyoogaadan, Yohaannisi ajjuutan beꞌido maalaalissiya hiraagay aybee? (Koyro sinttan deꞌiya misiliyaa xeella.)

² Yohaannisi deꞌiyo hanotay deexxiyaaba gidikkonne, I sinttanaabaa xeelliyaagan ufayssiya ajjuutaa beꞌanaadan Xoossay oottiis. He ajjuutan, Xoossaa ashkkaratu somꞌꞌuwan wurssetta maatafaa wottana gakkanaashin iita waayiyaa carkkoy carkkennaadan teqqana mala issi kiitanchchay hara oyddu kiitanchchatuyyo yootiis. (Ajj. 7:1-3) Yesuusaara saluwan haarana 144,000ti he citan deꞌoosona. (Luq. 12:32; Ajj. 7:4) Hegaappe simmin, Yohaannisi hara citaabaa qonccissiis; he keehi daro asaabaa hagaadan giis: “Hegaappe guyyiyan, zare ubbaappe, qommo ubbaappe, yara ubbaappenne dumma dumma biitta qaala ubbaappe ooninne qoodanau danddayenna zawai bainna daro asaa taani be7aas. He asai . . . , kawotaa araataa sinttaaninne Dorssaa sinttan eqqiis.” (Ajjuutaa 7:9-14 nabbaba.) Xoossaayyo suure ogiyan goynniya daro asay sinttappe deꞌanaagaa eriyoogan Yohaannisi keehi ufayttennan waayi aggana!

3. (a) Yohaannisa ajjuutay nu ammanuwaa minttana koshshiyoy aybissee? (b) Ha huuphe yohuwan nuuni ay tamaaranee?

³ He ajjuutay Yohaannisa ammanoy minnanaadan oottidoogaa nuuni ammanettana danddayoos. Nuuni he ajjuutay polettiyo wodiyan deꞌiyo gishshawu, hegee nu ammanuwaa hegaappe aaruwan minttana koshshees! Daro waayiyaappe paxa attanawunne saꞌan merinawu deꞌanawu hidootiya miilooniyan qoodettiyaageeti shiiqiyoogaa nuuni beꞌoos. Yihooway zaway baynna daro asay oonakko hosppun xeetaappe dariya layttaappe kase waati qonccissidaakko nuuni ha huuphe yohuwan tamaarana. Zaway baynna daro asaa xeelliyaagan naaꞌꞌubaa beꞌana: (1) eta qooday daro gidiyoogaanne (2) eta yameti kumetta saꞌaappe shiiqiyoogaa. Ha qofati he citaa yame gidanawu hidootiya ubbaa ammanuwaa kaseegaappe aaruwan minttana koshshees.

ZAWAY BAYNNA DARO ASAY AWAN DEꞌANEE?

4. Banttana Kiristtaane giyaageeti akeekibeenna Geeshsha Maxaafaa tumay aybee, qassi hegaa xeelliyaagan Geeshsha Maxaafaa Tamaareti aybin dummatidonaa?

⁴ Azazettiya asay saꞌan merinawu deꞌanaagaa Geeshsha Maxaafay yootiyo tumaa banttana Kiristtaane giyaageeti tamaarissokkona. (2 Qor. 4:3, 4) Ha wodiyan, banttana Kiristtaane giyaageetu giddon deꞌiya daro haymaanooteti loꞌꞌo asa ubbay hayqqiyo wode saluwaa bees giidi tamaarisoosona. SHin, qoodan guutta Geeshsha Maxaafaa Tamaareti 1879⁠ppe doommidi attamissiyo Wochiyo Keelan qoncciya timirttiyaappe hegee dummatees. Eti Xoossay zaarettidi saꞌaa Gannate oottanaagaanne miilooniyan qoodettiya azazettiya asay saluwan gidennan, ha saꞌan deꞌanaagaa akeekidosona. Gidoppe attin, he azazettiya asay oonakko loytti shaakkanawu etawu daro wodiyaa koshshiis.—Maa. 6:10.

5. Geeshsha Maxaafaa Tamaareti 144,000 xeelliyaagan woygidi qoppidonaa?

⁵ Geeshsha Maxaafaa Tamaareti ‘saꞌaappe wozettana’ amarida asay Yesuusaara saluwan haaranaagaakka Geeshsha Maxaafaappe akeekidosona. (Ajj. 14:3) He citay saꞌan deꞌiyo wode Xoossaayyo ammanettidi oottida, minnidi oottiyaanne ayyo aqida 144,000 Kiristtaaneta. Zaway baynna daro asay shin?

6. Geeshsha Maxaafaa Tamaareti zaway baynna daro asaa xeelliyaagan woygidi qoppidonaa?

⁶ Yohaannisi ajjuutan he citay ‘kawotaa araataa sinttaaninne Dorssaa sinttan eqqidaagaa’ beꞌiis. (Ajj. 7:9) He qaalati Geeshsha Maxaafaa Tamaareti zaway baynna daro asati 144,000 asatudan, saluwan deꞌana giidi kuuyanaadan oottiis. Qassi, 144,000tinne zaway baynna daro asay saluwan deꞌana bessikko, issi citay haraappe waani dummatanee? Geeshsha Maxaafaa Tamaareti zaway baynna daro asati saꞌan deꞌiyo wode Xoossaayyo loytti azazettibeenna Kiristtaaneta gidana bessees giidi qoppidosona. Eti Geeshsha Maxaafan deꞌiya kandduwaa maaraa kaalliyaaba gidikkonne, etappe amaridaageeti banttana Kiristtaane giya haymaanootetu yame gididi deꞌiyaageeta gidana danddayoosona. Geeshsha Maxaafaa Tamaareti he asati Xoossaa amarida hanotan siiqikkonne, Yesuusaara haarana danddayokkona giidi qoppidosona. Zaway baynna daro asay Xoossaa siiqiyo siiqoy mino gidenna gishshawu, eti kawotaa araatan uttiyaageeta gidennan, araataa sinttan eqqiyaageeta gidana.

7. SHaꞌu Layttaa Haaruwaa wode saꞌan ooni deꞌana giidi Geeshsha Maxaafaa Tamaareti qoppidonaa, qassi Geeshsha Maxaafaa Tamaareti beni wode deꞌida ammanettida asata xeelliyaagan woygidi qoppidonaa?

⁷ SHin saꞌan ooni deꞌanee? Geeshsha Maxaafaa Tamaareti 144,000tinne zaway baynna daro asay saluwaa bi simmin, miilooniyan qoodettiya harati Kiristtoosa SHaꞌu Layttaa Haaruwan saꞌan deꞌuwaa demmana giidi qoppidosona. He miilooniyan qoodettiyaageeti Kiristtoosi haaruwaa doommanaappe kase Yihoowayyo oottana giidi Geeshsha Maxaafaa Tamaareti qoppibookkona. Eti he asati SHaꞌu Layttaa Haaruwaa wode Yihoowabaa tamaarana giidi qoppidosona. Hegaappe simmin, Yihooway kessido kandduwaa maaraa kaalliyaageeti saꞌan merinaa deꞌuwaa demmidi anjjettana; shin makkalanchchati xayana. Geeshsha Maxaafaa Tamaareti SHaꞌu Layttaa Haaruwaa wode saꞌan daanna gididi ‘sunttettana’ amaridaageeti SHaꞌu Layttaa Haaruwaa wurssettan saluwaa baana giidi qoppidosona. SHaꞌu Layttaa Haaruwaa wode hayquwaappe denddana, Kiristtoosappe kase deꞌida ammanettida asatuppe amaridaageeti he daannatu qoodan deꞌana giidikka eti qoppidosona.—Maz. 45:16.

8. Xoossaa halchchuwan sohoy deꞌiyooba milatido heezzu citati awugeetee?

⁸ Yaatiyo gishshawu, Geeshsha Maxaafaa Tamaareti heezzu citati deꞌiyoogaadan qoppidosona; hegeetikka (1) Yesuusaara saluwan haarana 144,000ta; (2)  saluwan Yesuusa araataa sinttan eqqana zaway baynna daro asata; qassi (3) Kiristtoosa SHaꞌu Layttaa Haaruwaa wode Yihoowa sheniyaa saꞌan tamaarana miilooniyan qoodettiya asaa.b SHin guyyeppe, he allaalliyaa loytti akeekanaadan Yihooway eta maaddiis.—Lee. 4:18.

TUMAA POOꞌOY GUJJI GUJJI POOꞌEES

9. (a) Zaway baynna daro asay “kawotaa araataa sinttaaninne Dorssaa sinttan” saꞌan ayba ogiyan eqqana danddayii? (b) Ajjuutaa 7:9n deꞌiya qofaa hegaadan akeekiyoogee bessiyaaba gidiyoy aybissee?

⁹ Yohaannisi ajjuutan beꞌido zaway baynna daro asay oonakko Yihoowa Markkati 1935n loytti akeekidosona. Yihoowa Markkati zaway baynna daro asay “kawotaa araataa sinttaaninne Dorssaa sinttan” saluwan eqqana bessennaagaa akeekidosona. Eti hegaadan oottiyoy leemiso hanotaana. Zaway baynna daro asay saꞌan deꞌikkonne, eti Yihoowa maataa akeekiyoogaaninne I ubbabaa haariyo maatawu haarettiyoogan ‘kawotaa araataa sinttan eqqana.’ (Isi. 66:1) Eti Yesuusa wozuwaa yarshshuwan ammaniyoogaa oosuwan bessiyoogan “Dorssaa sinttan” eqqana danddayoosona. Hegaadan, Maatiyoosa 25:31, 32y iitata gujjin, “sa7an de7iya asai ubbai” ba bonchcho kawotaa araatan uttida Yesuusa “sintti shiiqana” yaagees. He asa ubbay deꞌiyoy saꞌaanappe attin, saluwaana gidennaagee qoncce. Laamettida ha qofay bessiyaaba. Geeshsha Maxaafay zaway baynna daro asay saluwaa baana geennay aybissakko hegee qonccissees. Yesuusaara “sa7an haarana” 144,000tu xallay saluwan merinaa deꞌuwaa demmanaagee kasetidi odettiis.—Ajj. 5:10.

10. Zaway baynna daro asay SHaꞌu Layttaa Haaruwaappe kase Yihoowa ogetubaa tamaarana bessiyoy aybissee?

¹⁰ Yohaannisi ajjuutan beꞌido zaway baynna daro asati saꞌan merinawu deꞌanawu hidootiya ammanettida Kiristtaanetu cita gidiyoogaa Yihoowa Markkati 1935⁠ppe doommidi akeekidosona. Gita waayiyaappe paxa attanawu, zaway baynna daro asay SHaꞌu Layttaa Haaroy doommanaappe kase Yihoowa ogetubaa tamaarana koshshees. Eti Kiristtoosa SHaꞌu Layttaa Haaruwaappe kase ‘yaana he ubbaappe attanawu’ mino ammanoy deꞌiyoogeeta gidana koshshees.—Luqaasa 21:34-36.

11. Geeshsha Maxaafaa Tamaaretuppe amaridaageeti SHaꞌu Layttaa Haaruwaappe simmin amarida asay saluwaa baana giidi qoppidoy aybissee?

¹¹ Saꞌan deꞌiya amarida loꞌꞌo asati SHaꞌu Layttaa Haaruwaappe simmin saluwaa boosona giyo qofaabaa shin? Daro layttaappe kase Usuppune 15, 1913, Wochiyo Keelan he qofay odettiis. Issi uri hagaadan qoppana danddayees: ‘Beni wode deꞌida ammanettida asati saꞌaa laattikko, etaagaadan ammanettibeenna Kiristtaaneti saluwan woytuwaa demmiyoy aybissee?’ Eti hegaadan qoppidoy, (1) zaway baynna daro asay saluwan deꞌana, qassi (2) zaway baynna daro asay ammanuwan mino gidenna Kiristtaane giidi balan qoppido gishshataassa.

12-13. Tiyettidaageetikka zaway baynna daro asatikka bantta woytuwaabaa ay akeekidonaa?

¹² SHin, nuuni qommoora beꞌidoogaadan, Yohaannisi ajjuutan beꞌido zaway baynna daro asay Armmageedoonappe paxa attanaagaa Yihoowa Markkati 1935⁠ppe doommidi loytti akeekidosona. Eti ha saꞌan “daro waayiyaa waayidi yiidaageeta,” qassi “eti bantta qaalaa xoqqu oottidi, ‘Nu atotettaikka kawotaa araatan uttida nu Xoossaappenne Dorssaappe yees’ yaagidosona.” (Ajj. 7:10, 14) Hegaa bollikka, saluwaa deꞌuwawu denddiyaageeti beni wode deꞌida ammanettida asatuugaappe ‘loꞌꞌobaa’ demmanaagaa Geeshsha Maxaafay yootees. (Ibr. 11:40) Kase akeekido qofaa 1935n laammidoogee denttettin nu ishantti asay saꞌan merinawu deꞌanawu hidootidi Yihoowayyo haggaazana mala minnidi shoobboosona.

¹³ Zaway baynna daro asati bantta hidootan keehi ufayttoosona. Yihooway baayyo ammanettidi goynniyaageeti saluwaana gidin saꞌaana gidin, ayyo awan haggaazanaakko kuuyiyaagee A gidiyoogaa eti akeekidosona. Tiyettidaageetikka zaway baynna daro asatikka Yihooway Yesuus Kiristtoosa wozuwaa yarshshuwaa giigissidoogaa gaasuwaana xallappe attin, eti bantta oosuwan bantta woytuwaa demmennaagaa akeekoosona.—Roo. 3:24.

QOODAY DARO

14. Zaway baynna daro asaabaa yootiya hiraagay waani polettanee giidi daroti 1935⁠ppe simmin qoppidoy aybissee?

¹⁴ Yihoowa asay kase akeekidobay 1935n laametti simmin, saꞌan deꞌanawu hidootiya asaa qooday waanidi cora gidanee giidi daroti qoppidosona. Leemisuwawu, zaway baynna daro asaa oonatettay qonccido wode Ronald Parkiinawu layttay 12. I hagaadan giis: “He wode kumetta saꞌan deꞌiya aassiyaageetu qooday 56,000, qassi etappe daroti tiyettidaageeta gidennan waayi aggana. Yaatiyo gishshawu, zaway baynna daro asay keehi cora giyoogaa gidenna.”

15. Zaway baynna daro asaa shiishshiyoogee waani gujji gujji biidee?

¹⁵ Gidoppe attin, hegaappe simmin daro layttaa giddon daro biittawu misoonaaweti kiitettidosona; qassi Yihoowa Markkatu qooday gujji gujji biis. Guyyeppe, 1968n, Merinaa Deꞌuwawu Kaalettiya Tumaa giyo maxaafaa goꞌettidi Geeshsha Maxaafaa xannaꞌissiyo prograamee doomettiis. Hegee Geeshsha Maxaafaa tumaa geliya ogiyan qonccissidoogaa gaasuwan kaseegaappe daro asay Yihoowakko shiiqanaadan maaddiis. Oyddu laytta giddon, bagga miilooniyaappe dariyaageeti xammaqettidi erissiyo ashkkara gididosona. Tohossa Amarkkaaninne hara biittatun Kaatolike Woosa Keettawu deꞌiya wolqqay leppiyoogaa doommido wode, Arshsho Awurooppaaninne Afirkkan amarida biittan nu oosuwaa teqqiyoogee attin, miilooniyan qoodettiyaageeti xammaqettidosona. (Isi. 60:22) Mata wodeppe doommidi, Geeshsha Maxaafay tamaarissiyoobaa asay eranaadan maaddanawu goꞌꞌiya daro miishshata Yihoowa dirijjitee giigissiis. Ha wodiyan qooday hosppun miilooniyaappe dariyo, zaway baynna daro asaa Yihooway shiishshiiddi deꞌiyoogee qoncce.

ZAWAY BAYNNA DARO ASAY DUMMA DUMMA

16. Zaway baynna daro asay awuppe shiiqiiddi deꞌii?

¹⁶ Yohaannisi beꞌido ajjuutaa xaafiyo wode, zaway baynna daro asay “zare ubbaappe, qommo ubbaappe, yara ubbaappenne dumma dumma biitta qaala ubbaappe” yaanaagaa yootiis. Hananabaa yootiya Zakkaariyaasi hegaara issi malabaa kasetidi yootiis. I hagaadan giis: “He gallassatun dumma dumma qaalan haasayiya kawotettatu ubbaappe tammu asati yiidi, issi Aihuda bitaniyaa maayuwaa macaraa oiqqidi, ‘Xoossai inttenaara de7iyoogaa nuuni siyido gishshau, ane nuunikka nenaara boos’ yaagana.”—Zak. 8:23.

17. Ubba biittaanne ubbaa qaalaa asaa maaddanawu aybi oosettiiddi deꞌii?

¹⁷ Qaala ubbaappe asay shiiqana mala, Kawotettaa mishiraachchoy daro qaalan odettana bessiyoogaa Yihoowa Markkati akeekidosona. Geeshsha Maxaafaa xannaꞌissanawu maaddiyaabata 130⁠ppe dariya layttawu birshshiiddi takkida; shin ha wodiyan xeetan qoodettiya qaalatun awudeegaappenne aaruwan nuuni birshshiiddi deꞌoos. Zaway baynna daro asaa ubba biittaappe shiishshiyoogan Yihooway ha wodiyan maalaalissiyaaba oottiyoogee qoncce. Geeshsha Maxaafaynne Geeshsha Maxaafaa qofay deꞌiyo xuufeti keehi daro qaalan deꞌiyo gishshawu, he citaa yameti kumetta saꞌaappe yiidaageeta gidikkonne, Yihoowayyo issippetettan goynnoosona. Yihoowa asay minnidi sabbakiyoogaaninne bantta ishantta siiqiyoogan loytti erettees. Hegee ammanuwaa keehi minttiyaaba!—Maa. 24:14; Yoh. 13:35.

HE AJJUUTAY NUNA WAATI GOꞌꞌII?

18. (a) Isiyaasa 46:10, 11 maaran, Yihooway zaway baynna daro asaa xeelliyaagan odettida hiraagaa polidoogan nuuni garamettennay aybissee? (b) Saꞌan deꞌanawu hidootiyaageeti banttana diggidobi deꞌiyaabadan qoppennay aybissee?

¹⁸ Zaway baynna daro asaabaa yootiya hiraagan nuuni keehi ufayttida! Yihooway he hiraagaa hegaadan maalaalissiya ogiyan polidoogan nuuni garamettokko. (Isiyaasa 46:10, 11 nabbaba.) Zaway baynna daro asati Yihooway he hidootaa etassi immido gishshawu keehi galatoosona. Eti Yesuusaara saluwan oottanawu Xoossaa ayyaanan tiyettibeenna gishshawu banttana diggidobi deꞌiyaabadan qoppokkonna. Geeshsha ayyaanay kaalettido ammanettida attumaageetanne maccaageeta Geeshsha Maxaafay yootees; shin eti 144,000tu yame gidokkona. Xammaqiya Yohaannisi hegawu issi leemiso. (Maa. 11:11) Haray qassi Daawita. (Oos. 2:34) Etinne hara keehi daroti gannate saꞌan deꞌanawu hayquwaappe denddana. Eti ubbay zaway baynna daro asaara Yihoowayyoonne A haaruwaayyo ammanettiyoogaa bessiyo injjiyaa demmana.

19. Nuuni Yohaannisi ajjuutan beꞌido daro asaabaa akeekikko, ay oottanee?

¹⁹ Xoossay bawu issippetettan goynnanaadan miilooniyan qoodettiya asaa biitta ubbaappe shiishshido hagaa mala wodee baawa. Nuuni deꞌanawu hidootiyoy saluwaana gidin saꞌaana gidin, ‘hara dorssatu’ bagga gidida zaway baynna daro asaa yara gidanaadan, nuussi danddayettida keenan cora asaa maaddana koshshees. (Yoh. 10:16) Asaa bolli wolqqaama metuwaa gattiya kawotettatunne haymaanootetu bolli Yihooway kasetidi odettida iita waayiyaa mata wode ehaana. Zaway baynna daro asaa yame gidida ubbaa maalaalissiyaabay naagees. Eti saꞌan merinawu Yihoowayyo oottana!—Ajj. 7:14.