Intte Kawotettaa Addaraashaa Bonchuwan Oyqqeetii?
1 “Ishantti issippetettan de7iyoogee aiba lo77obeenne ufaissiyaabee!” (Maz. 133:1) Kawotettaa Addaraashan shiiqiyo shiiqoti nuuni issoy issuwaa siiquwaunne loꞌꞌo oosuwau denttettanau, issoy issuwaa minttettanau issippetettaa medhanaadan maaddoosona.—Ibr. 10:24, 25.
2 Kawotettaa Addaraashay nu deꞌuwan keehi koshshiyaabaa poliyo soho gidiyo gishshau, nuuni wozanappe bonchiyoo? Kawotettaa Addaraashay heeran tumu goynuwaayyo waanna soho. Hegaa gishshau, nuuni a xoqqu oottidi xeellana koshshees. Nuuni ubbay a geeshshatettan loyttidi oyqqanau bessiyaabaa oottana koshshees. Addaraashaa geeshshatettaa naaganau nu citaa kayay gakkiyo wodee dees. Nuuni he oosuwaa oottana danddayikko, oottana koshshees; yaatiyoogan, geeshshanne boolima gidida shiiqo sohuwaa xoqqu oottidi xeelliyoogaa bessoos.
3 Kawotettaa Addaraashaa geeshshanau nuna kayay gakkin aggin, nuuni ubbay geeshshatettan oyqqana koyiyoogaa bessana danddayoos. Ayba ogiyan? Wuygiyaa moorenna mala Addaraashaa gelanaappe kase nu caammaa pittiyoogan hegaadan oottana danddayoos. Ubba qassi balggo hegaadan oottiyoogee keehippe koshshiyaaba. Issi issitoo sheeshsha keettan goꞌettiyaaba gidikko, nuuppe simmidi goꞌettiya urau geeshshidi kiyana koshshees. Maxeetiyaanne xuufiyaa kifiliyan oottiyaageeti mela deꞌiya karttooniyaa eesuwaara he sohuwaappe diggiyoogan, Kawotettaa Addaraashaa geeshshatettan oyqqana koyiyoogaa bessana danddayoosona. Nuuni wuygiyan olettida woraqataa woy harabaa beꞌiyaaba gidikko, hara uri denttanaadan aggi bayiyoogaappe nuuni denttana koshshees. Nu Kawotetta Haggaazuwaa, Ichashe 1989n erissuwaa kaqqiyo saleedaa maarayidi oyqqanaadan odettiis. He zoriyaa oosuwan peeshshana mala haratikka hashetana koshshees.—km 1/89 sinttaa 7.
4 Nuuni gita shiiqota shiiqiyo wodekka hegaadan oottana koshshees. Nuugaa gidin hara soho gidin, gita shiiquwaa shiiqiyo sohoy tumu goynuwau waanna soho gidiyo gishshau, bonchuwan oyqqana bessees. SHiiquwaappe laalettiyo wode, nuuni uttido sohuwan saꞌan wodhidabi deꞌikko, ubbatoo denttana koshshees. Nuuni haratuyyo qoppana bessees; nuuni bi simmin, geeshshatettaa xeelliyo aawatettay deꞌiyoogeeti denttoosona giidi qoppana koshshenna.
Addaraashshaa Kayan Kayan Goꞌettiyoogaa
5 Keettay keehi alꞌꞌo gidiyo gishshau, daro Kawotettaa Addaraashatun issi gubaaꞌiyaappe daroy goꞌettees. Kawotettaa Addaraashay Yihoowabaa gidiyoogaanne ayyo goynnanau goꞌettiyo soho gidiyoogaa akeekidi, gubaaꞌeti ubbay geeshshatettan oyqqana koshshees. Hegaa gishshau, Kawotettaa Addaraashaa bonchuwan oyqqiyoogee nuuni Yihoowa siiqiyoogaa xallaara gidennan, he Addaraashan goꞌettiya hara gubaaꞌiyan deꞌiya ishatakka siiqiyoogaara gayttidaba.
6 Darotoo saaminttan issi galla Kawotettaa Addaraashaa geeshshatettaa naagoos. Issi Kawotettaa Addaraashan issi gubaaꞌiyaappe daroy goꞌettiyo wode, shiiqo ubbaa wurssi simmidi, nuuppe simmin shiiqiya gubaaꞌiyau geeshsha gidana mala Addaraashaa amarida keenaa geeshshana bessees. Woggaa gallassi issi gubaaꞌiyaappe simmin hara gubaaꞌee sohuwaara shiiqiyo wodekka, hegaadan oottana koshshees. Nuuppe simmin hara gubaaꞌee shiiqanaashin deꞌiya wodiyaa hanotaadan amarida keenaa geeshshiyoogee loꞌꞌo. Addaraashan amarida gubaaꞌeti issi gallassi goꞌettiyo wode, ooninne geeshshennan aggikko, wurssettan moorettees.
7 Nuuni ayyaanaaban “issi wozanaaninne issi qofan issippe” gidiyoogaadan, Kawotettaa Addaraashaa bonchuwan oyqqiyoogankka issuwaa gidoos.—1 Qor. 1:10.