Ammanttiya Ogiyan Tamaarissite
1. Haggaazuwan Xoossaa Qaalaa loyttidi goꞌettiyoogee darotoo ay gujjii?
1 Xoossau muruta ooso oottiya PHauloosa mala asati “tumatettaa qaalaa suuretettan” yootiyoogee Geeshsha Maxaafaappe yootiyoogaappe aadhiyaabaa gujjiyoogaa akeekoosona. (2 Xim. 2:15) Nuuni tamaarissiyoogan asay ‘ammananaadan’ oottiya ogiyan Xoossaa Qaalaa waatidi goꞌettana danddayiyoo?—Oos. 28:23.
2. Asay Xoossaa Qaalaa kaseppe aaruwan bonchanaadan waatana danddayiyoo?
2 Ezggiya Urau Xoossaa Qaalay Giyoobaa Bessite: Koyruwan, ezggiya uri an deꞌiya aadhida eratettaa bonchanaadan oottiya hanotan Geeshsha Maxaafaa qofaa bessite. Nuuni Xoossaa Qaalan ammanettiyoogee nu yootiyoobaa ezggiyaageeti xiqisee nabbabettiyo wode akeekan ezgganaadan oottana danddayees. (Ibr. 4:12) “Ha allaalliyaa xeelliyaagan Xoossaa qofaa akeekiyoogee goꞌꞌiyoogaa beꞌaas. A Qaalay giyoobaa beꞌite” gaana danddayoos. Danddayettida wode ubban, Xoossaa Qaalaappe nabbabiyoogan he Qaalay giyoobaa bessite.
3. Ezggiya uri akeekanaadan maaddanau xiqisiyaa nabbabi simmidi, waatana danddayiyoo?
3 Naaꞌꞌanttuwan, goꞌettido xiqisiyaa qonccissite. Daro asay issi xiqisiyaa koyro siyiyo wode akeekanau metootees. Hegee intte yootiyoobaa waatidi kaafiyaakko bessanau qonccissana koshshees. (Luq. 24:26, 27) Intte yootiyo waanna qofaa kaafiya, xiqisiyan deꞌiya qaalaa qonccissite. Ezggiya uri qofaa loyttidi akeekidaakkonne beꞌanau oyshaa oychiyoogee maaddana danddayees.—Lee. 20:5; Oos. 8:30.
4. Nuuni ammanttiya ogiyan tamaarissanau ekkana bessiya wurssetta tanggoy aybee?
4 Geeshsha Maxaafaa Qofaa Akeekissite: Heezzanttuwan, wozanaanne qofaa denttettanau baaxetite. Keettaaway xiqisee ba hanotaara waanidi gayttiyaakko akeekanaadan maaddite. Geeshsha Maxaafaa qofaa akeekissiyoogee, issi uri ba qofaa laammanaadan ammanttana danddayees. (Oos. 17:2-4; 19:8) Leemisuwau, Mazamure 83:18 [NW] nabbabi simmidi, issi urau lagge gidanau a sunttaa eriyoogee waannaba gidiyoy aybissakko qonccissana danddayoos. Hegaappe simmin, “Xoossaa sunttaa eriyoogee intte ufayssiya woosaa woossanaadan maaddees giidi qoppekketii?” giidi oychana danddayoos. Hegaa mala ogiyan xiqisiyaa izaawu deꞌuwaara gattiyoogee xiqisiyaa goꞌꞌaa qonccissees. Xoossaa Qaalaa hegaadan ammanttiya ogiyan tamaarissiyoogee, wozanay suure gidido asati tumu Xoossaanne deꞌo Xoossaa, Yihoowau goynnanaadan denttettana danddayees.—Erm. 10:10.