Intte Ayfee Payyee?

1. ‘Payya ayfiyaara’ deꞌiyoogaa giyoogee woygiyoogee?

¹ Nu ayfee tishshi ootti xeelliyoobay issibaa oottanaadan nuna denttettees. Yesuusi: “Ne aifee payya gidikko, ne bolla ubbai poo7⁠o gidana” yaagidoogee keehippe bessiyaaba! (Maa. 6:22) Nu ayfee ayyaanaaban “payya” gidikko, issi halchuwan, giishin Xoossaa sheniyaa oottiyoogan xeelaa wottees. Nuuni Kawotettaa kaseyoos; nu haggaazuwaa xubbiyaaba gidida, darin koshshenna miishshati woy oosoti nuna sherꞌꞌi oottanaadan koyokko.

2. Nu xeelaa aybi moorana danddayii, shin nuna aybi maaddii?

² Nu Huuphiyaa Qorana Koshshees: Nuussi koshshiyaabadan qoppana mala eraadooniyaanne gaazeexaa malabatun odettiya erissoy woy haratussi deꞌiyaabati nu xeelaa moorana danddayoosona. Nu wodiyaappe, miishshaappe woy wolqqaappe daruwaa ekkiyaabaa oottanaappe woy shammanaappe kase, ‘Haggee taani loyttada haggaazanaadan maaddiiyye woy xubbii?’ giidi nuna oychiyoogan he hanotaa qoriyoogee loꞌꞌo. (Luq. 14:28; Pili. 1:9-11) Loyttidi haggaazanau nu deꞌuwaa kaseegaappe waatidi sima oottana danddayiyaakko wodiyaappe wodiyan qoppiyoogeekka eratetta.—2 Qor. 13:5; Efi. 5:10.

3. Giigisso oottada ba deꞌuwaa sima oottida micheeppe ay timirtte demmiyoo?

³ Issi michiyaa aqinye gidido wode, hara oosuwaa amarida saatiyau oottiyoogan bau koshshiyaabaa demmanau danddayaydda, kumetta gallassaa oottiyo, ba kase oosuwaa oottanau koyaasu. A wurssettan hagaadan gaasu: “Naaꞌꞌu godau haarettana danddayiya uri baawa. Taassi koshshiyaabaa demmanau taani koyiyoobaa yarshshana koshshiis. Aqoy takkidi galꞌꞌiyoogaanne demmi simmin salettiyaaba gidiyoogaa taani akeekaas; qassi taani hegaa demmanau daafuriyaaba gidikko, coo wolqqaa wurssays.” I hanotay, a ba deꞌuwaa sima oottadanne ba oosuwaa laammiyoogan aqinye gidada deꞌanau giigissuwaa oottanaadan danddayissiis.

4. Ha wodiyan nuuni payya ayfiyaara deꞌiyoogee eesoyiyaaba gididoy aybissee?

⁴ Nu wodee eesoyiyaagaa gidiyoogee, payya ayfiyaara deꞌiyoogee nuussi keehippe koshshiyaagaa gidanaadan oottees. Issi gallassay aadhido payduwan ha siraataa wurssettaunne Xoossaa ooratta alamiyaa doomettau mati mati baanaadan oottees. (1 Qor. 7:29, 31) Mishiraachuwaa yootiyoogan nu xeelaa wottiyoogan, nunanne nuuni yootiyoogaa siyiyaageeta ashshana danddayoos.—1 Xim. 4:16.