Taani Bessiyaagaa Keenaa Oottaydda Deꞌiyaanaa?
1. Ammanettida Kiristtaaniyaa aybi qofissana danddayii?
1 Ha oyshaa inttena oychi ereetii? Cimatettaappe, sahuwaappe woykko son aawatettay daridoogaappe denddidaagan, geella haggaazuwan guutta wodiyaa aattiyo gishshau azzanana danddayeeta. Heezzu naati deꞌiyo issi michiyaa ba soo asau koshshiyaabaa kunttanau goꞌettiyo wodeenne wolqqay haggaazuwan guutta wodiyaa aattanaadan oottiyo gishshau, issi issitoo bana mooranchadan xeelliyoogaa xaafaasu. Hanotata bessiyaagaadan xeellanau nuna aybi maaddii?
2. Yihooway nuuppe naagiyoy aybee?
2 Yihooway Nuuppe Naagiyoobaa: Nuuni ubbay haggaazuwan daruwaa oottanau koyiyoogee erettidaba. SHin, nuuni oottanau koyiyoobaanne oottanau danddayiyoobaa giddon darotoo gita dummatettay deꞌees. Nuuni darobaa oottana koyiyoogee cogochi uttibeennaagaa bessees. Yihooway nu abbiyaa pacaa loyttidi eriyoogaanne nuuyyo danddayettennabaa oottanaadan koyennaagaa hassayana koshshees. (Maz. 103:13, 14) I nuuppe ay naagii? Nuuni danddayiyooba ubbaa oottidi, kumetta shemppuwaappe ayyo haggaazanaadan koyees.—Qol. 3:23.
3. Haggaazuwan nuuni oottiyoobaa waatidi qorana danddayiyoo?
3 Nuuni oottana danddayiyoobaa shaakkidi eranaadan nuna aybi maaddanee? Nu hanotaabaa tumabaa eranaadan maaddana mala Yihoowa woosan oychana danddayoos. (Maz. 26:2) Nuna loyttidi eriyaanne giigissana koshshiyaabaa nuussi yootanau yayyenna ammanettiya, kayma Kiristtaane laggeekka maaddana danddayees. (Lee. 27:9) Hanotati laamettiyo gishshau, nu hanotaa ubbatoo qoriyoogee goꞌiyaaba gidiyoogaakka akeekite.—Efi. 5:10.
4. Haggaazuwaara gayttida, Geeshsha Maxaafan baasettida akeekissuwaa nuuni waati xeellana koshshii?
4 Nu Haggaazuwaara Gayttida Akeekissuwaa Xeellana Koshshiyo Ogiyaa: Woxxiyaageeta xeelliya asay darotoo eta minttettees. Eti hegaadan oottiyoy, woxxiyaageeti bantta hoolliyaa gakkanaadaanappe attin, eti hidootaa qanxxanaadaana gidenna. Hegaadankka, ‘minnidi yootanaadan’ nu xuufiyan kiyiyaanne shiiquwan odettiya Geeshsha Maxaafan baasettida minttettoynne akeekissoy nu goꞌaassa; qassi nuuni bessiyaagaa keena oottennaagaa bessanaassa gidenna. (2 Xim. 4:2) Nuuni ubbatoo nuuyyo danddayettiyaabaa ubbaa oottiyaaba gidikko, Yihooway ‘nu siiquwaanne nu oosuwaa’ nashshidi hassayanaagaa ammanettana danddayoos.—Ibr. 6:10.