“Yayyoppa”
1. Ha wodiyan nunakka Ermmaasaagaadan ayba paaceti huuphe xekkan gakkana danddayiyoonaa?
1 Ermmaasi hananabaa yootanaadan kiitettido wode au giday baynnabadan siyettiis. SHin Yihooway, i ba Oosuwaa polanaadan, “yayyoppa” giidi kehatettan a minttettiis. (Erm. 1:6-10) Ha wodiyankka, yayyiyoogee woy dungguuxiyoogee, nu haggaazuwan koshshiyaagaa keenaa oottennaadan diggana danddayees. Issi issitoo asay nu odiyo kiitau ay mala zaaro immaneeshsha giyo yashshaykka nu haggaazuwau guyye gaanaadan oottana danddayees. Yaatin, hagaa mala yashshaa waatidi xoonanee, qassi huuphe xekkan ayba anjjo demmiyoo?
2. Haggaaziyo wode yayyenna mala kasetidi giigettiyoogee nuna waati maaddi?
2 Kasetidi Giigettite: Loytti giigettiyoogee yashshaa agganau nuna maaddees. Leemisuwau, haasayaa esissana danddayiya qofaa xeelliyaagan kasetidi giigettiyoogee, darotoo denddiya oyshau haniya zaaro immanaadan maaddees. (Lee. 15:28) Yaatin, timirtte keettaaninne haggaazuwan denddiya issi issi oyshata So Asaa Goynuwaa wode tdenttidi ayssi meezetekketii?—1 PHe. 3:15.
3. Yihoowan ammanettiyoogee yashshaa xoonanau nuna waati maaddi?
3 Yihoowan Ammanettite: Xoossan ammanettiyoogee nuuni yashshaa agganaadan maaddees. Yihooway nuna maaddanau qaala geliis. (Isi. 41:10-13) Hagee nuuni woppu giidi deꞌanaadan keehippe maaddiyaaba! Harabay qassi, Yesuusi Yihoowa geeshsha ayyaanay, qoppibeenna hanotati nu bolla gakkiyo wodekka loꞌꞌo hanotan nuuni sabbakana mala maaddanaagaa odiis. (Mar 13:11) Hegaa gishshau, Yihooway ba geeshsha ayyaanaa immanaadan ubbatoo woossite.—Luq 11:13.
4. Metoy deꞌishinkka haggaazuwan gencciyoogee ayba anjjo demissii?
4 Anjjota: Dumma dumma metoy deꞌishin haggaazuwan gencciyo wode, sinttanau gakkana metuwaa xoonanau wolqqaa demmoos. Xalatettaakka demmoos—hegee geeshsha ayyaanan kummida asaa eeshsha. (Oos 4:31) Hegaa bollankka, Yihoowa maaduwan yashshaa xooniyo wode, nu ammanuwaa minttoos, qassi Yihoowan ammanettiyoogan minnoos. (Isi. 33:2) Harabay qassi, saluwan deꞌiya nu Aawaa ufayssiyoogaa eriyoogan beettiya ufayssaanne woppaa demmoos. (1 PHe. 4:13, 14) Hegaa gishshau, Yihoowa maaduwan ammanettidi Kawotettaa mishiraachuwaa xalan sabbakiyoogan sinttau sugoos!