Issi Kiristtaaniyaa Ammanenna Aqo Laggiyaa Maaddana Danddayeetii?
1 Intte gubaaꞌiyan deꞌiya, issi issi aassiyaageetu azinay woy machiyaa ammanennaageetee? Hegaadaana gidikko, bantta aqo laggeti etaara tumu goynuwaa issippe goynnanaadan he aassiyaageeti koyiyoogee sirissenna. Gidikkokka, hegaadan koyiyaageeti eta xalla gidokkona. “Asai ubbai attanaadaaninne tumatettaa eranaadan” Xoossay koyiyoogaadan, gubaaꞌiyan deꞌiya ubbaykka hegaa koyees. (1 Xim. 2:4) Nu gubaaꞌiyan aassiya ishatunne michotu ammanenna aqo laggeta maaddanau ayba ogiyan baaxetana danddayiyoo?
2 Koyro, ammanenna uray xeelliyo ogiyan nuuni issi issibaa xeellanau malana koshshees. Ammanenna daro aqo laggeti bantta soo asaa siiqiyaageeta; loꞌꞌo aqo laggenne loꞌꞌo aawa woy aayo gidanau baaxetiyaageeta. Geella nuugaappe dummatiya, eti minttidi kaalliyo haymaanootee deꞌana danddayees. Eti Yihoowa Markkatubaa loytti erenna woy nuna ixxiya laggetuppe siyidobaappe attin, nubaa eriyoobay guutta gidana danddayees. Issoti issoti bantta aqo laggee kase so asaara issippe aattiyo wodiyaa goynuwau goꞌettiyo gishshau, yiillotoosona. Nuuni ammanenna uraa kehatettaaninne bonchuwan oyqqanau, qassi aara gayttiyo wode bessenna hirgga hirggiyoogaa agganau akeekancha gidiyoogee maaddees.—Lee. 16:20-23.
3 Maaddanau Wozanappe Koyiyoogaa: Ammanenna aqo laggee tumaa ekkanaadan maaddiyo ubbaappe loꞌꞌo ogee, koyro heeran Geeshshaa Maxaafaa qofaa denttiyoogaa gidennan, nuuni oottiyoobaa gidana danddayees. (1 PHe. 3:1, 2) Hegaadan oottanau keehippe koshshiyaabay etau wozanappe qoppiyoogaa bessiyoogaa. Gubaaꞌiyan deꞌiya michoti ammanenna macheessi, qassi ishantti ammanenna azinaassi wozanappe qoppiyoogaa bessana danddayoosona. Waatidi?
4 He aqo laggiyaara gaytti erennaba gidikko, Kiristtaane gidiya aqo laggiyaappe issi issi hanotaa eri simmidi hegaadan oottana danddayeeta. Ammanenna uray koyro galla ufayttibeenna gishshau hidootaa qanxxoppite. Nu kehatettaynne ayyo wozanappe qoppiyoogee i Yihoowa Markkata kaseegaappe loꞌꞌo ogiyan xeellanaadan denttettana danddayees. (Roo. 12:20) Kayma gidida issi issi Kiristtaaneti he uraara loytti erettanaunne i ixxiyoobay deꞌikko agganaadan, ammanenna uraanne a soo asaa bantta son qumaa shoobbidosona. Eti Geeshsha Maxaafaa qofaa denttidi haasayiyoogaappe, he ura ufayssiyaabaa denttidi haasayidosona. Takkidi, ammanenna uray nunaara loytti erettiyo wode, Geeshsha Maxaafaa qofaa denttidi haasayana danddayettees. Woy gubaaꞌiyan deꞌiya issotu issotuura erettido gishshau, a maccaasiyaa ay tamaariyaakko beꞌanaadan nu shiiqotuppe issuwan beettanaadan shoobbiyo wode eeno gaana danddayees. I tumaa eranau koyiichibeennaba gidikkokka, ammaniya ba aqo laggiyo kaafiyo gishshau, nuuni a galatana danddayoos.
5 Gubaaꞌiyaa cimati ammanenna aqo laggiyaa maaddanaunne markkattiyo injjiyaa demmanau akeekancha giddana bessees. Geeshsha Maxaafaa qofaa denttidi haasayiyo wode kase dosenna, ammanenna uray, hosppitaaliyaa geliyo wode woy harggiyo wode, Geeshsha Maxaafaappe minttettiyaabaa yootiyoogaa siyana danddayees. Dumma dumma haymaanootiyaa kaalliya so asaa issi metoy gakkiyo wode, leemisuwau so asaappe issoy hayqqiyo wode, gubaaꞌiyaa cimati he keettaa asaa minttettiyo wode ammanenna uraykka he sohuwan deꞌanaadan shoobbana danddayoosona.
6 Nu gubaaꞌiyan deꞌiya issi Kiristtaanee ba aqo laggee tumaa siyidi ekkiyo wode, ay keenaa ufayttanaakko qoppite! He ufayssiya hanotay Yihoowa, kiitanchatanne gubaaꞌiyan deꞌiya haratakka keehi ufayssees. (Luq. 15:7, 10) Ammanenna uray koyro heeran loꞌꞌo zaaruwaa immennaba gidikkokka, nuuni aggennan baaxetiyoogee “ooninne ba nagaraappe simmanaadan [koyiyoogaappe] attin, ooninne xayana mala koyenna” Yihoowa ufayssiyo gishshau ufayttana danddayoos.—2 PHe. 3:9.
[Oyshata]
1. Dumma dumma haymaanootiyaa kaalliya so asaara deꞌiya Kiristtaanetu aqo laggeti tumaa ekkanaadan koyiyay he Kiristtaanetu xalla gidokkona giyoy aybissee?
2. Ammanenna aqo laggiyaa maaddanau akeekancha gidiyoogee nuna waati maaddii?
3. Ammanenna uray tumaa ekkanaadan maaddiyo ubbaappe loꞌꞌo ogee ayba gidana danddayii?
4. Wozanappe qoppiyoogaa waatidi bessana danddayiyoo?
5. Gubaaꞌiyaa cimati ammanenna uraa waatidi maaddana danddayiyoonaa?
6. Ammanenna aqo laggeta maaddanaadan oottiya gaasoti awugeetee?
[Sinttaa 6n Deꞌiya qonccissuwaa
Ammanenna aqo laggee tumaa ekkanaadan nuuni maaddiyo ubbaappe loꞌꞌo ogee, koyro heeran Geeshshaa Maxaafaa qofaa denttiyoogaa gidennan, nuuni oottiyoobaa gidana danddayees